“Meso aa Jehova ali kubalulami.”—1 PE. 3:12.

1. Nimbunga nzi yiitwa azina lya Jehova iyakanjila mubusena bwabana Israyeli basiluleyo? (Amubone cifwanikiso icili kumatalikilo aacibalo.)

JEHOVA ulapegwa bulemu akaambo kakutalisya mbungano ya Bunakristo mumwaanda wamyaka wakusaanguna alimwi akubukulusya bukombi bwakasimpe mazuba aano. Mbubwenya mbotwakaiya mucibalo cainda, mbunga iipangwa abasikutobela Kristo bakusaanguna njiyakanjila mubusena bwacisi cabasiluleyo cabana Israyeli kuba bantu baitwa azina lya Jehova. Mbunga mpya eeyi, njaakafwida luzyalo Leza, yakafwutuka ciindi Jerusalemu naakanyonyoonwa mu 70 C.E. (Lk. 21:20, 21) Zintu zyakacitika mumwaanda wamyaka wakusaanguna akali ngamatalikilo aazintu zicitikila babelesi ba Jehova mazuba aano. Mbunga ya Leza taikanyonyooki ciindi bweende bwazintu bwa Saatani bwaakunyonyoonwa. (2 Ti. 3:1) Mbuti mbotukonzya kuba masimpe kuti eeci ciyakucitika ncobeni?

2. Ncinzi Jesu ncaakaamba kujatikizya “mapenzi mapati,” alimwi ino ayakutalika buti?

2 Kujatikizya kubako kwakwe kutalibonyi alimwi amamanino aabweende bwazintu, Jesu wakaamba kuti: “Kuciindi eeco kuyooba mapenzi mapati aatanacitikide kuzwa kumatalikilo aanyika kusikila sunu, alimwi kunyina naayooba limbi pe.” (Mt. 24: 3, 21) Mapenzi aaya aatanabwenwe ayakutalika ciindi Jehova aakunyonyoona “Babuloni Mupati,” bukombi bwakubeja bwanyika yoonse kwiinda mukubelesya nkamu zyabasitwaambo twacisi. (Ciy. 17:3-5, 16) Ncinzi ciyakutobela kucitika?

NTAAMU YA SAATANI IYAKUSOLOLELA KU AMAGEDONI

3. Bwaakumana kunyonyoonwa bukombi bwakubeja, nkusoleka kuli buti kuyakucitwa mukulwana bantu ba Jehova?

3 Bwaakumana kunyonyoonwa bukombi bwakubeja, Saatani alimwi azibeela ziindene-indene zyanyika bayakulwana babelesi ba Jehova. Mucikozyanyo, kujatikizya “Gogo wakunyika ya-Magogo,” Magwalo aambila limwi kuti: “Uyoosika mbuli iguwo, uyooza mbuli ijoba livumba nyika, yebo amakamu aako oonse abantu banji mboli abo.” Akaambo kakuti Bakamboni ba Jehova tabajisi basikalumamba bankondo alimwi akaambo kakuba bantu basiluumuno, mbabantu bayakuboneka kuti inga tabakatazyi kulwana. Pele kucita boobo kuyakuba kulubizya kapati.—Ezk. 38:1, 2, 9-12.

4, 5. Mbuti mbwayakucita Jehova kujatikizya kusoleka kwa Saatani kwakunyonyoona bantu bakwe?

4 Ino Leza uyakucita buti kujatikizya kusoleka kwa Saatani kwakunyonyoona bantu bakwe? Jehova uyakubagwasya bantu bakwe kwiinda mukutondezya nguzu zyakwe mbwali Mwami Wabubumbo Boonse. Jehova ubona kuti kulwana bantu bakwe nkulwana nguwe. (Amubale Zekariya 2:8.) Aboobo, Taateesu wakujulu uyakubweza ntaamu mpoonya-mpoonya kutegwa atuvwune. Kufwutulwa ooku kuyakuboola kumamanino aakunyonyoonwa kwanyika ya Saatani lya Amagedoni, “nkondo yabuzuba bupati bwa Leza Singuzuzyoonse.”—Ciy. 16:14, 16.

5 Kujatikizya Amagedoni, businsimi bwamu Bbaibbele bwaamba kuti: “Jehova ulijisi makani aakukazyanya abamasi, ulabeteka bantu boonse balya maila, abasizibi ulabaaba kuti bajazigwe ipanga, Mbuboobu mbwaamba Jehova wamakamu. Amubone! Mapenzi alabuka mucisi cimwi acimwi, aguwo ipati lilabusigwa kumagolelo aanyika. Nkabela mubuzuba obo bajayidwe ba-Jehova bayoojanwa moonse munyika kuzwa kumagolelo amwi akusikila kumagolelo amwi. Tabakooyoolilwa nikuba kubambwa nikuba kuzikwa, pele bayooba bufumba buyo atala avu.” (Jer. 25:31-33) Nkondo ya Amagedoni iyakunyonyoona bweende bwazintu oobu bubyaabi. Nyika ya Saatani iyakugwisyigwa, pele cibeela caanyika cambunga ya Jehova ciyakufwutuka.

IKAAMBO MBUNGA YA JEHOVA NCOYAZWIDILILA MAZUBA AANO

6, 7. (a) Ino bapanga “nkamu mpati” bazwa kuli? (b) Ino kwaba kuyaambele kuli buti mumyaka misyoonto yainda?

6 Mbunga ya Leza yazwidilila mazuba aano akaambo kakuti ipangwa abantu ibali ncibeela ncakkomanina Leza. Bbaibbele litusyomezya kuti: “Meso aa Jehova ali kubalulami, amatwi aakwe aswiilila mipailo yabo yakukombelezya.” (1 Pe. 3:12) Baluleme babikkillizya “nkamu mpati” yabantu “bazwa mumapenzi mapati.” (Ciy. 7:9, 14) Aaba basikufwutuka taili buyo “nkamu” pe. ‘Ninkamu mpati’—mweelwe mupati kapati wabantu. Sena muyakuba akati kabantu bayakufwutuka lya “mapenzi mapati”?

7 Ino aabo bapanga nkamu mpati bazwa kuli? Balaletwa antoomwe kweelana abusinsimi bwa Jesu bujatikizya citondezyo cakubako kwakwe. Wakaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni kumisyobo yoonse, mpoonya mamanino ayoosika.” (Mt. 24:14) Mumazuba aano aakumamanino, kukambauka ngomulimo mupati kapati wambunga ya Leza. Akaambo kamulimo wakukambauka uucitwa nyika yoonse alimwi akuyiisya kucitwa a Bakamboni ba Jehova, mamiliyoni aabantu  batalika kukomba Leza “mumuuya amukasimpe.” (Joh. 4:23, 24) Mucikozyanyo, myaka iili kkumi yainda—mumwaka wamulimo wa 2003 kuzikusika mu 2012—bantu bainda ku 2,707,000 bakabbapatizyigwa kutondezya kulyaaba kwabo kuli Leza. Nyika yoonse, kuli Bakamboni bainda ku 7,900,000, alimwi amamiliyoni aabantu bamwi balabasangana, kwaambisya ciindi ca Ciibalusyo camwaka amwaka. Tatulilumbaizyi akaambo kamyeelwe eeyi nkaambo ‘Leza nguukomezya.’ (1 Ko. 3:5-7) Nokuba boobo, cilalibonya kuti nkamu mpati iyaabukomena alimwi akuba mpati ncobeni mwaka amwaka.

8. Ncinzi capa kuti kube kuyungizyika kugambya mumbunga ya Jehova yamazuba aano?

8 Kwaba kuyungizyika kugambya kumweelwe wababelesi ba Leza akaambo kakuti Jehova lwakwe kumugama ulabagwasya Bakamboni bakwe. (Amubale Isaya 43:10-12.) Kuyungizyika ooku kwakaambilwa limwi mumajwi aabusinsimi aakuti: “Kakamu kaniini kayooba cuulu, abantu bace bayooba mukowa mupati. Mebo nde-Jehova njoofwambya makani aya kuciindi cao ceelede.” (Is. 60:22) Aciindi cimwi, ciinga cabananike cakali buyo “kakamu kaniini,” pele mweelwe wabo wakakomena ciindi ba Israyeli bakumuuya abambi nobakaletwa mumbunga ya Leza. (Gal. 6:16) Akaambo kakulongezyegwa a Jehova mwaka amwaka, kuyungizyika kwazumanana kwiinda mukuyobololwa kwankamu mpati.

JEHOVA NCAYANDA KULINDISWE

9. Ncinzi ncotweelede kucita ikuti katuyanda kuyakukkomana abuumi bubotu busyomezyedwe mu Jwi lya Leza?

9 Kufwumbwa naa tuli Banakristo bananike naa bankamu mpati, tuyakukkomana abuumi bubotu busyomezyedwe mu Jwi lya Leza. Nokuba boobo, kutegwa tukacite oobo, tweelede kutobela nzyayanda Jehova. (Is. 48:17, 18) Amulange-lange cikozyanyo cabana Israyeli nobakali kweendelezyegwa a Mulawo wa Musa. Makanze amwi aa Mulawo akali aakukwabilila bana Israyeli kwiinda mukubapa milawo mibotu yeendelezya makani aakoonana, kucita makwebo abamwi, kulanganya bana, kubabona munzila iili kabotu bantu, azimwi buyo. (Kul. 20:14; Lev. 19:18, 35-37; Dt. 6:6-9) Kutobela nzyayanda Leza kulatugwasya andiswe munzila njiyonya eeyi—alimwi tacituminyi kucita kuyanda kwakwe. (Amubale 1 Johane 5:3.) Masimpe, mbubwenya Mulawo mbowakali kubakwabilila bana Israyeli, kumvwida Jehova Leza alimwi akutobela njiisyo zyakwe takutukwabilili buyo pele alimwi kulatugwasya ‘kuyuma mulusyomo.’—Tit. 1:13.

10. Nkaambo nzi ncotweelede kujana ciindi cakubala Bbaibbele alimwi a Kukomba Mumukwasyi nsondo ansondo?

10 Cibeela caanyika cambunga ya Jehova ciyaabuyaambele munzila ziindene-indene. Mucikozyanyo, twazumanana kuyaambele mukumvwisya kasimpe kamu Bbaibbele. Eeci taceelede kutugambya nkaambo “inzila yabaluleme ili mbuli mumuni uumweka, uuya bungwengwemuka mane bwaca buzuba.” (Tus. 4:18) Pele inga cabota kulibuzya kuti: ‘Sena ndeendela antoomwe akucinca mukumvwisya kasimpe kamu Magwalo? Sena ndilaacilengwa cakubala Bbaibbele buzuba abuzuba? Sena ndili munkutwe kubala mabbuku eesu? Sena mebo amukwasyi wangu tulijisi bubambe bwa Kukomba Mumukwasyi nsondo ansondo?’ Bunji bwesu tulazumina kuti tacikatazyi kapati kucita zintu eezyi. Ciyandika buyo nkujana ciindi cakucita boobo. Eelo kaka cilayandika kujana luzyibo lwamu Magwalo, kulutobela, alimwi akukomena kumuuya—kwaambisya mapenzi mapati mbwaayaabuswena afwaafwi!

11. Muunzila nzi mapobwe aansiku alimwi amiswaangano yamazuba aano yambungano, yaalubazu, yabbazu alimwi ayacooko mboigwasya?

11 Mbunga ya Jehova ilatubikkila maano  kwiinda mukutukulwaizya kumvwida lulayo lwa mwaapostolo Paulo lwakuti: “Alimwi katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe, mbuli bamwi ibajisi ciyanza eeci, pele katuyumizyanya umwi amweenzinyina, alimwi atuzumanane kucita boobo ikapati mbomubwene kuti buzuba bwaswena afwaafwi.” (Heb. 10:24, 25) Mapobwe akali kucitwa mwaka amwaka alimwi amiswaangano imwi yakukomba yakabayumya kumuuya bana Israyeli. Kuyungizya waawo, mapobwe aalubazu mbuli Pobwe Lyazilawo mumazuba aa Nehemiya, zyakali ziindi zikkomanisya. (Kul. 23:15, 16; Neh. 8:9-18) Mbubwenya buyo, andiswe tulagwasyigwa amiswaangano yambungano, yaalubazu, yabbazu alimwi ayacooko. Atugwasyigwe amiswaangano eeyi kutegwa katuli bayumu kumuuya alimwi akujana lukkomano.—Tit. 2:2.

12. Ino tweelede kulimvwa buti kujatikizya mulimo wakukambauka Bwami?

12 Mbotuli bantu bazulilwa mumbunga ya Leza, tulikkomene kutola lubazu ‘mumulimo uusalala wamakani mabotu aa Leza.’ (Lom. 15:16)Kutola lubazu ‘mumulimo uusalala’ ooyu kupa kuti tube “basimilimonyina” a Jehova, “Ooyo Uusalala.” (1 Ko. 3:9; 1 Pe. 1:15) Kukambauka makani mabotu kupa kuti zina lya Jehova lisalala lisalazyigwe. Kupegwa mulimo wakukambauka “makani mabotu aabulemu aazwa kuli Leza uukkomene” ncoolwe citakonzyi kweelanisyigwa.—1 Ti. 1:11.

13. Ino buumi bwesu bwakumuuya alimwi abwakumubili buyeeme anzi?

13 Leza uyanda kuti tube bantu bayumu kumuuya kwiinda mukukakatila kulinguwe alimwi akugwasyilizya mbunga yakwe mumilimo iindene-indene. Musa wakaambila bana Israyeli kuti: “Ndatamba ijulu anyika buzuba obuno, kuti zyoonse zibe bakamboni bangu, kuzibwe kuti buumi alufu, lulongezyo alutuko, zyoonse ndazibika kuti mulisalile. Amusale buumi, kuti mupone, nywebo abana banu. Amuyandisye Jehova Leza wanu, amuswiilile ijwi lyakwe, amumukakatile, nkaambo kucita obo kulamuletela buumi akoongola, kuti mukale munyika eyo Jehova njaakakonkezya kupa bamauso wanu, Abrahamu a Izaka a Jakobo.” (Dt. 30:19, 20) Buumi bwesu buyeeme akucita kuyanda kwa Jehova, kumuyanda, kuswiilila ijwi lyakwe, alimwi akukakatila kulinguwe.

14. Mbuti mukwesu umwi mbwaakali kulimvwa kujatikizya cibeela caanyika cambunga ya Leza?

14 Mukwesu Pryce Hughes, walo wakakakatila cakutazungaana kuli Leza alimwi akuzumanana kweendela antoomwe ambunga yakwe, wakalemba kuti: “Ndilalumba kapati kuti ndapona kweelana aluzyibo kujatikizya makanze aa Jehova kuzwa ciindi eeco camusyule kautanasika mwaka wa 1914 . . . Cintu ciyandika kapati kulindime, nkweenda antoomwe ambunga ya Jehova iilibonya. Zyakandicitikila mubuumi zyakandiyiisya kuti tandeelede kusyoma busongo bwabantu. Kandijisi muzeezo ooyo mumizeezo yangu, ndakakanza kuzumanana kukkalilila mumbunga eeyi iisyomeka. Eeyi njenzila ilikke muntu mbwakonzya kulongezyegwa akukkomaninwa a Jehova!”

AMUZUMANANE KWEENDELA ANTOOMWE AMBUNGA YA LEZA

15. Amupe cikozyanyo camu Magwalo icitondezya mbotweelede kukubona kucinca mukumvwisya twaambo tumwi twamu Bbaibbele.

15 Ikuti katuyanda kukkomaninwa a Jehova alimwi akulongezyegwa, umwi aumwi wesu kumugama weelede kwiigwasyilizya mbunga ya Leza alimwi akuzumina kucinca mukumvwisya Magwalo. Amubone cakacitika eeci: Nolwakainda lufwu lwa Jesu, kwakali zyuulu-zyuulu zya Banakristo ba Juda ibakali basungu kutobela Mulawo alimwi cakabayumina kuleka kuutobela. (Mil. 21:17-20) Nokuba boobo, kwiinda mukugwasyigwa amagwalo  Paulo ngaakalembela bana Hebrayo, bakakazumina kaambo kamasimpe kakuti ‘izipaizyo izyakali kutuulwa kweelana a Mulawo’ tiizyakabasalazya pe, pele ‘bakasalazyigwa kwiinda mucituuzyo camubili wa Jesu Kilisito ciindi comwe buyo kukabe kutamani.’ (Heb. 10:5-10) Cakutadooneka, bunji bwa Banakristo ba Juda bakacinca kuyeeya kwabo alimwi bakayaambele kumuuya. Andiswe mbubwenya tuyandika kwiiya cakulomya alimwi akuba amizeezo iikonzya kuzumina kucinca ciindi nokwaba kucinca mukumvwisya Jwi lya Leza naa mumulimo wakukambauka.

16. (a) Nzilongezyo nzi iziyakupa kuti buumi munyika mpya kabukkomanisya? (b) Ncinzi ncomulangila munyika mpya?

16 Aabo boonse ibazumanana kusyomeka kuli Jehova alimwi akumbunga yakwe bayakujana zilongezyo zinji. Bananike basyomeka bayakuba acoolwe cipati cakuba basikukonanyina a Kristo kujulu. (Lom. 8:16, 17) Ikuti kamujisi bulangizi bwakupona anyika, amweezyeezye buyo mbomuyakukkomana kupona mu Paradaiso. Mbotuli cibeela cambunga ya Jehova, cilakkomanisya kwaambila bamwi kujatikizya cisyomezyo ca Leza canyika mpya. (2 Pe. 3:13) Lugwalo lwa Intembauzyo 37:11 lwaamba kuti: “Babombemyoyo bayoovuba nyika, bayookondwa muluumuno lunji.” Bantu “bayooyaka maanda akukala mulingao” alimwi bayakukkomana ‘amilimo yamaanza aabo.’ (Is. 65:21, 22) Takukabi kudyaamininwa, bucete, alimwi anzala. (Int. 72:13-16) Taakwe muntu uyakweenwa a Babuloni Mupati nkaambo tanakuliko. (Ciy. 18:8, 21) Bantu bafwide bayakubusyigwa akupegwa coolwe cakupona kukabe kutamani. (Is. 25:8; Mil. 24:15) Eelo kaka bulakkomanisya bulangizi mbwaajisi mamiliyoni aabantu ibalyaaba kuli Jehova! Kutegwa tukazibone zisyomezyo eezyi zyamu Magwalo, umwi aumwi wesu weelede kuzumanana kukomena kumuuya, alimwi akuzumanana kweendela antoomwe ambunga ya Leza.

Sena muleezyeezya kuba mu Paradaiso? (Amubone muncali 16)

17. Ino tweelede kuba amuuya uuli buti mumakani aakukomba Jehova alimwi ambunga yakwe?

17 Mbwaanga lino mamanino aabweende oobu ali aafwaafwi, atuzumanane kuzyandamana mulusyomo alimwi akulumba Leza kuzwa ansi aamoyo kububambe bwakumukomba. Ooyu ngomuuya ngwaakatondezya sintembauzyo Davida naakaimba kuti: “Nkocili cintu comwe ncenkumbila kuli-Jehova, ncenjandaula; nkokuti nkale muŋanda ya-Jehova mazuba oonse aabuumi bwangu, kuti njeebele bubotu bwa-Jehova akuliiya makani mucikombelo cakwe.” (Int. 27:4) Aboobo, umwi aumwi wesu akakatile kuli Leza, akuzumanana kweendela antoomwe ambunga ya Jehova alimwi abantu bakwe.