“Lemeka bapati.”—LEV. 19:32.

1. Ino bantu bali mubukkale nzi bukatazya?

JEHOVA kunyina naakali kuyanda kuti bantu kabapenga abucembele pe. Makanze aakwe akali aakuti baalumi abamakaintu kabakkomene abuumi bubotu mu Paradaiso. Pele lino “zilenge zyoonse zilatongela lyoonse akuba amacise.” (Lom. 8:22) Ino muyeeya kuti Leza ulimvwa buti nabona bantu kabapenga akaambo kacibi? Kuyungizya waawo, ciindi bacembeede nobayandika kulanganizyigwa kabotu, banji balasulaikwa.—Int. 39:5; 2 Ti. 3:3.

2. Nkaambo nzi Banakristo ncobababikkila maano bacembeede?

2 Bantu ba Jehova balikkomene kuba abacembeede mumbungano. Tulagwasyigwa abusongo bwabo alimwi tulakulwaizyigwa azikozyanyo zyabo zyalusyomo. Bunji bwandiswe, kuli mbotuswaangene abayandwa besu aaba bacembeede. Nokuba boobo, kufwumbwa naa kuli mbotuswaangene naa pe, tulababikkila maano bakwesu abacizyi bacembeede akuzyiba mbozibeendela zintu. (Gal. 6:10; 1 Pe. 1:22) Aboobo, toonse tulagwasyigwa kulanga-langa mbwababona Leza bacembeede. Alimwi, tulalanga-langa mukuli ngobajisi banamukwasyi ambungano caboola kukulanganya bayandwa besu bacembeede.

 “UTANDISOWI”

3, 4. (a) Nkulomba nzi ikuyandika kapati nkwaakaamba mulembi wa Intembauzyo 71 kuli Jehova? (b) Ncinzi ncobakonzya kumulomba Leza ibacembeede?

3 Mulembi wa Intembauzyo 71:9, wakasololelwa amuuya uusalala kulemba kuti: “Utandisowi kuciindi cakucembaala; utandilekelezyi na inguzu zyangu zyamana.” Intembauzyo eeyi ilibonya kuti njiyeeyo iizumanana kuzwa mu Intembauzyo 70, yalo iijisi katwe kamakani kakuti: “Intembauzyo ya-Davida.” Aboobo, kulibonya kuti mu Intembauzyo 71:9, ngu Davida iwakali kulomba. Davida wakabelekela Leza kuzwa ciindi naakali mukubusi kusikila mane naakacembaala, alimwi Jehova wakamubelesya kucita milimo minji iisiyene-siyene. (1 Sam. 17:33-37, 50; 1 Bam. 2:1-3, 10) Nokuba boobo, Davida wakalimvwa kuti wakali kuyandika kunakulanganizyigwa a Jehova.—Amubale Intembauzyo 71:17, 18.

4 Bantu banji mazuba aano bali mbuli Davida. Nokuba kuti bacembaala alimwi “mazuba aamapenzi” abasikila, bazumanana kutembaula Leza kweelana anguzu nzyobajisi. (Muk. 12:1-7) Bunji bwabo tabacikonzyi kucita zintu zyoonse nzyobakali kucita kaindi, kubikkilizya amulimo wakukambauka. Nokuba boobo, abalo balakonzya kumulomba Jehova kutegwa azumanane kubakkomanina akubalanganya. Ibacembeede aaba ibasyomeka balakonzya kuba masimpe kuti Leza uyakuyiingula mipailo yabo. Cili boobo akaambo kakuti mipailo iili boobo itondezya kulibilika kwini-kwini mbuli nkwaakajisi Davida iwakasololelwa amuuya kwaamba majwi aali boobo.

5. Ino Jehova ubabona buti bacembeede basyomeka?

5 Magwalo alacisalazya kuti Jehova ulababikkila kapati maano aabo ibacembeede ibasyomeka alimwi alatondezya kuti Leza uyanda kuti babelesi bakwe kababalemeka bantu bali boobo. (Int. 22:24-26; Tus. 16:31; 20:29) Lugwalo lwa Levitiko 19:32 lwaamba kuti: “Buka kunembo lyabasimvwi akulemeka bapati. Amuyoowe Leza wanu. Ndime Jehova.” Inzya, kulemeka bapati mumbungano wakali mukuli uuyandika kapati ciindi majwi aayo naakalembwa, alimwi buya asunu mbocibede oobo. Mbuti caboola kumakani aajatikizya kubalanganya? Nguni uupedwe mukuli ooyo?

MUKULI WAMUKWASYI

6. Ncikozyanyo nzi Jesu ncaakapa cakulanganya bazyali?

6 Ijwi lya Leza litwaambila kuti: “Lemeka bauso abanyoko.” (Kul. 20:12; Ef. 6:2) Jesu wakatondezya mbouyandika mulawo ooyu ciindi naakasinganya ba Farisi abalembi ibatakali kuyanda kulanganya bazyali babo. (Mk. 7:5, 10-13) Jesu mwini kumugama wakapa cikozyanyo cibotu. Mucikozyanyo, ciindi naakali acisamu cakupenzyezya kalaafwaafwi kufwa, Jesu wakapa Johane sikwiiya wakwe mukuli wakulanganya banyina, andiza aciindi eeco bakali bamukamufwu.—Joh. 19:26, 27.

7. (a) Ninjiisyo nzi mwaapostolo Paulo njakaamba iijatikizya kulanganya bazyali? (b) Ino majwi aa Paulo akaambwa mubukkale buli buti?

7 Mwaapostolo Paulo wakasololelwa amuuya uusalala kulembela basyominyina kuti beelede kulanganya mikwasyi yabo. (Amubale 1 Timoteyo 5:4, 8, 16.) Amubone bukkale mbwaakaamba Paulo naakalembela Timoteo. Paulo wakapandulula muntu uukonzya kweelela kupegwa lugwasyo lwamali ambungano ayooyo uutakonzyi. Wakasalazya kwaamba kuti bana basyomi, bazyukulu, abamukowa wayooyo ucembeede mbabeelede kuba kumbele mukumulanganya. Kwiinda mukucita boobo, mbungano tiiyakali kukonzya kuba amukuli wakujanina muntu ooyo ziyandika mubuumi. Mbubwenya buyo amazuba aano, nzila imwi Banakristo mbobatondezya muuya ‘wakubelekela Leza cakulyaaba’ nkwiinda mukujanina banamukwasyi zintu ziyandika.

8. Mbwaanga Bbaibbele talyaambi cacigaminina lugwasyo lweelede kupegwa kubazyali bacembeede, nkaambo nzi eeci ncocili cabusongo?

8 Mubufwaafwi, bana bapati Banakristo mbabajisi mukuli wakujanina bazyali babo zintu zyakumubili nzyobayandika. Paulo aawa wakali  kwaamba ‘banamukwasyi ibasyomi,’ nokuba boobo bazyali ibatali Bakamboni tabeelede kulekelezyegwa. Nzila nzyobabelesya bana kulanganya bazyali babo ziliindene-indene. Kunyina bukkale bukozyene. Nzyobayandika, bukkale, alimwi abuzumi ziliindene. Bamwi ibacembeede balijisi bana banji; mpoonya bamwi bajisi buyo mwana omwe. Bamwi inga basyoma lugwasyo kuzwa kumfwulumende, pele bamwi tabakonzyi kugwasyigwa amfwulumende. Nzintu nzyobayanda aabo ibayandika kulanganizyigwa ziliindene azyalo. Aboobo, tacili camaano alimwi taluli luyando kutongooka nzila yaumwi uusola kulanganya banamukwasyi ibacembeede. Kwiinda waawo, Jehova ulakonzya kukulongezya kusala kuli koonse ikuyeeme aa Magwalo akupa kuti zintu zyeende kabotu, oobu mbombubo mbwaali kucita kuzwa ciindi ca Musa.—My. 11:23.

9-11. (a) Mbukkale nzi bukatazya mbobakonzya kusikilwa bamwi? (Amubone cifwanikiso icili kumatalikilo aacibalo.) (b) Nkaambo nzi bana bapati ncobateelede kufwambaana kuleka mulimo wabo waciindi coonse? Amupe cikozyanyo.

9 Ikuti nkobakkala bazyali kakuli kulamfwu kuzwa nkobakkala bana, inga yaba penzi kubapa ziyandika bazyali ibacembeede. Kuciswa kapati cakutayeeyelwa, andiza akaambo kakuwa, kutyoka cifwuwa, naa penzi limwi buyo, inga kwapa kuti mubaswaye bazyali banu cakufwambaana. Kuzwa waawo, inga bayandika lugwasyo—andiza kwaciindi buyo cisyoonto naa kwaciindi cilamfwu. *

10 Aabo ibali mumulimo waciindi coonse, ibabeleka milimo yakumuuya iibapa kuyakubelekela mumasena aali kulamfwu akumaanda, balakonzya kupenga kapati. Aabo ibabeleka mulimo waa Bbeteli, mulimo wabumisyinali, alimwi abalangizi beendeenda balauyanda kapati mulimo wabo, alimwi baubona kuti ncipego kuzwa kuli Jehova. Nokuba boobo, ikuti bazyali baciswa, inga bayeeya kuti, ‘Tweelede kuuleka mulimo wesu ooyu kutegwa tukalanganye bazyali besu.’ Pele inga caba cabusongo kwaalanga-langa makani kwiinda mukwaapailila akubona naa ncencico ncobayanda abalo bazyali. Kunyina weelede kufwambaana kusiya mikuli yakwe yamulimo, alimwi buya talili lyoonse kucita boobo nokunga kwayandika. Andiza penzi eelyo lyakuciswa inga kalili buyo lyakaindi kasyoonto, lyalo aabo ibali mumbungano mobabede bazyali ndyobakonzya kugwasyilizya kulanganya.—Tus. 21:5.

11 Amubone cikozyanyo cabanabunyina ibakali kubelekela mumasena aali kulamfwu akumaanda. Muniini akati kabo wakali kubeleka mulimo wabumisyinali ku South America, umwi wakali kubelekela kumaofesi mapati, ku Brooklyn, New York. Bazyali babo ibacembeede bakali kuyandika lugwasyo. Bana basankwa aaba antoomwe abamakaintu babo bakabaswaya bazyali babo ibakali kukkala mucisi cimwi cili kujwe kutegwa babandike mbobakali kunga babagwasya. Mukuya kwaciindi, banabukwetene ibakali kubelekela ku South America bakasala kuti baleke mulimo wabo akupiluka kuŋanda. Kabatanacita oobo, bakatambula luwaile kuzwa kuli sicuuno wakabunga kabaalu iwakali mumbungano mobakabede bazyali babo. Baalu bakumbungano eeyo bakalibandikide mbobakali kunga bagwasya mubukkale oobo alimwi bakaambila bamisyinali aabo kuti bazumanane buyo amulimo wabo. Baalu bakali kulumba kumulimo ngobakali kucita banabukwetene aabo alimwi bakalikanzide kubagwasyilizya bazyali babo. Banamukwasyi boonse bakalumba akaambo kaluyando luli boobo.

12. Ncinzi banamukwasyi Banakristo ncobeelede kubikkila maano nobasala mbobayanda kubalanganya bazyali babo?

12 Kufwumbwa nzila njobakonzya kusala banamukwasyi Banakristo kutegwa balanganye bazyali babo bacembeede, boonse ibajatikizyidwe beelede kubikkila maano kubona kuti kusala kwabo takuleti masampu kuzina lya Leza. Tatweelede kuba mbuli basololi bazikombelo  bamumazuba aa Jesu. (Mt. 15:3-6) Tuyanda kuti kusala kwesu kube kooko ikumulemeka Leza alimwi ambungano.—2 Ko. 6:3.

MUKULI WAMBUNGANO

13, 14. Nkaambo nzi ncotukonzya kwaamba kuti mbungano zilabikkila maano kulanganya bacembeede kweelana ancaamba Magwalo?

13 Tabali boonse ibakonzya kugwasyilizya baabo ibali mumulimo waciindi coonse mbuli mbokwaambwa kale musyule. Nokuba boobo, kwiinda mukulanga zintu zyakacitika mumwaanda wamyaka wakusaanguna, tubona kuti mbungano zilabikkila maano mukulanganya nzyobayandika bakwesu abacizyi bacembeede bapa cikozyanyo cibotu. Bbaibbele lilaamba zyambungano yamu Jerusalemu kuti “kunyina wakabulide cintu.” Eeci tacaambi kuti boonse bakalivwubide. Kulibonya kuti bamwi bakali bacete, nokuba boobo “bakali kwaabanya bantu, umwi aumwi kweelana akubula kwakwe.” (Mil. 4:34, 35) Nokwakainda ciindi, kwakabbuka penzi limwi. Kwakazyibwa kuti ‘bamukabafwu bamwi tiibakali kupegwa zyakulya zyakali kwaabilwa abuzuba.’ Aboobo, baapostolo bakalailila kuti kusalwe baalumi beelela, balo ibakali kuyakubikka bubambe kutegwa bamukabafwu balanganizyigwe kabotu. (Mil. 6:1-5) Masimpe kuti bubambe oobu bwakali bwakaindi buyo kasyoonto kutegwa balanganye ziyandika zyabaabo ibakaba Banakristo ciindi ca Pentekoste 33 C.E. alimwi ibakazumanana kukkala mu Jerusalemu kwaciindi cili mbocibede kutegwa bayume kumuuya. Nokuba boobo, nzyobakacita baapostolo zitondezya kuti mbungano ilakonzya kubagwasya aabo bapengede.

14 Mbuli mbotwabona, Paulo wakapa Timoteo malailile aatondezya bukkale mwalo Munakristo mukamufwu mwaakali kukonzya kweelela kutambula lugwasyo kuzwa kumbungano. (1 Ti. 5:3-16) Mulembi wa Bbaibbele Jakobo awalo wakatondezya kuti Banakristo balijisi mukuli wakulanganya bamucaala, bamukabafwu, abambi ikuti basikilwa mapenzi naa nobabulide. (Jak. 1:27; 2:15-17) Awalo mwaapostolo Johane wakaamba boobu: “Ikuti ooyo uujisi lubono lwamunyika eeyi wabona munyina uupengede nokuba boobo tayandi kumufwida luzyalo, ino luyando lwa Leza inga lwazumanana buti mulinguwe?” (1 Jo. 3:17) Ikuti Munakristo umwi aumwi ulipedwe mukuli uuli boobo kujatikizya bapengede, nkokuti ayalo mbungano ilijisi mukuli ooyo.

Mbuti mboikonzya kugwasya mbungano kuti kwacitika ntenda? (Amubone mincali 15 a 16)

15. Twaambo nzi tukonzya kubikkilizyigwa nomugwasya bakwesu abacizyi bacembeede?

15 Muzisi zimwi, mbunga zimwi zyamfwulumende zilapa mali, mapulogilamu aasumpula bukkale, alimwi zilabbadela bantu kutegwa kabagwasya bantu bacembeede mumaanda aabo. (Lom. 13:6) Muzisi zimwi kunyina bubambe buli  boobo. Aboobo, lugwasyo ndobakonzya kupa banamukwasyi alimwi ambungano kubakwesu abacizyi bacembeede luliindene kweelana abukkale. Ikuti bana kabakkala kulamfwu ankobakkala bazyali babo, lugwasyo ndobakonzya kupa luyeeme aabukkale bwabo. Bana aabo inga bacita kabotu kubandika cakwaanguluka abaalu bamumbungano mobazulilwa bazyali babo kutegwa boonse bazyibe bukkale bwamukwasyi. Mucikozyanyo, baalu balakonzya kubagwasya bazyali aabo kuti bakalilembye kumfwulumende kutegwa kabagwasyigwa. Baalu alimwi balakonzya kwaambila bana babo bapati kujatikizya zintu zili mbuli magwalo aakasika aatanajalulwa naa musamu iwatakabelesyegwa. Kubandika makani munzila iili boobo kulakonzya kugwasya mukujana nzila mbotu alimwi kutegwa zintu zitaindili kubija. Cilasalala kuti ciindi nokuli basikugwasyilizya alimwi abasikupa lulayo afwaafwi ibaiminina bana, balakonzya kucesya kulibilika kwamukwasyi.

16. Mbuti Banakristo bamwi mbobabagwasya bacembeede mumbungano?

16 Akaambo kaluyando ndobajisi kulibaabo bacembeede, Banakristo bamwi balisungula kubelesya ciindi cabo anguzu kutegwa bagwasye munzila nzyobakonzya. Balasoleka kubabikkila maano kapati ibacembeede ibali mumbungano yabo. Basikulisungula bamwi balaabanya milimo imwi kuli basimbungano akulanganya bacembeede kwiinda mukupana malizyi. Mbwaanga balizyi kuti bukkale bwabo inga tiibwabazumizya kutalika mulimo waciindi coonse, balikkomene kugwasyilizya bazyali babana aabo kutegwa bazumanane mumulimo wabo. Eelo kaka ulalombozyeka muuya ngobatondezya bakwesu bali boobu! Cakutadooneka, bwaabi bwabo tabwaambi kuti bana tabacikwe mukuli wakulanganya bazyali babo.

AMUBALEMEKE BAPATI AMAJWI AAYUMYA-YUMYA

17, 18. Ino bube bubotu bugwasya buti mukulanganya bacembeede?

17 Boonse ibajatikizyidwe mububambe bwakulanganya umwi beelede kusoleka kusikila mpobagolela kutegwa kakuli lukkomano. Ikuti kamujisi lubazu, amubeleke canguzu kutegwa kakuli muuya mubotu. Zimwi ziindi, kucembaala kuletela kutakkomana, andiza buya kukopana mumizeezo. Aboobo, inga mwayandika kubikkila maano kutegwa kamubalemeka akubakulwaizya bakwesu abacizyi bacembeede kwiinda mukuba aamibandi iikulwaizya. Aabo ibabelekela Leza kwamyaka minji beelede kulumbaizyigwa. Jehova talubi milimo njobacita mukumubelekela, abalo Banakristonyina tababalubi.—Amubale Malaki 3:16; Bahebulayo 6:10.

18 Kuyungizya waawo, buyumuyumu bwabuzuba abuzuba bulakonzya kulwanwa kwiinda mukuba amasesya aziindi zyeelede. (Muk. 3:1, 4) Bamwi bacembeede inga tabayandi zyakulomba-lomba. Balizyi kuti kubikkilwa maano alimwi akuswaigwa kuyeeme aabube bwabo. Ziindi zinji tulabamvwa basikuswaya kabaamba kuti, “Ciindi nindakaunka kuyakukulwaizya mulongwe uucembeede, ndime ndakakulwaizyigwa.”—Tus. 15:13; 17:22.

19. Mbulangizi nzi mbobeelede kuba aambubo bana abapati caboola kuzintu ziboola kumbele?

19 Tuliyandide kapati kubona ciindi kupenga azibi ziboola akaambo kakutalondoka noziyakumana. Kwacecino ciindi, babelesi ba Leza beelede kuyumya bulangizi bwabo kuli ceeco citamani. Tulizyi kuti lusyomo muzisyomezyo zya Leza nengobyo muziindi zyabuumba naa mapenzi. Eelo kaka lusyomo oolu lulayandika kapati nkaambo “tatulengaani pe, pele nokuba kuti buntu bwesu bwaanze buyaabunyonyooka, buntu bwesu bwamukati buyaabubukulusyigwa buzuba abuzuba.” (2 Ko. 4:16-18; Heb. 6:18, 19) Kunze aakuba alusyomo luyumu muzisyomezyo zya Leza, ncinzi cikonzya kumugwasya kuzuzikizya mikuli yanu yakugwasya bamwi? Nzila zimwi zigwasya zilabandikwa mucibalo citobela.

^ par. 9 Cibalo citobela cilalanga-langa nzila zimwi nzyobakonzya kubelesya bacembeede abana babo.