“Uulya uboneka mbuli kuti tali mukwesu Russell pele ngonguwe!”—Sikweebelela filimu ya “Photo Drama” mu 1914.

MWAKA uuno filimu yakusaanguna ya “Photo-Drama of Creation” yakkwanya myaka iili 100 kuzwa noyakabambwa, filimu iibambilidwe kugwasya bantu kuba alusyomo mu Bbaibbele mbolili Jwi lya Leza. Ciindi lusyomo lwabantu banji nolwakanyongene akaambo kakusyoma mukusanduka, kukazya kapati alimwi akudooneka, filimu ya “Photo-Drama” yakali kusumpula Jehova kuba Mulengi.

Charles T. Russell, walo iwakali kusololela akati ka Basikwiiya Bbaibbele, wakazumanana kuyandaula nzila iigwasya kapati alimwi iifwambaana yakumwaya kasimpe kamu Bbaibbele. Ciindi eeco Basikwiiya Bbaibbele bakali kubelesya mabbuku aasimbidwe kwamyaka iinda ku 30. Pele lino bakaba amuzeezo mupya: cipekupeku.

KUMWAYA MAKANI MABOTU KWIINDA MUKUBELESYA CIPEKUPEKU

Mumyaka yakuma 1890, kweebelela cipekupeku cinyina majwi kwakatalika. Kuzikusika kumatalikilo aamwaka wa 1903, filimu iitondezya makani aabukombi yakatondezyegwa mucikombelo camu New York City. Aboobo, mumwaka wa 1912 ciindi Russell cabusicamba naakatalika kulibambila filimu ya “Photo-Drama,” nceciindi kupanga cipekupeku nokwakali kutalika. Wakabona kuti nzila eeyi yakali kukonzya kumwaya kasimpe kamu Bbaibbele kwiinda mabbuku aasimbidwe alikke.

Filimu eeyi ya “Photo-Drama” iyakali kutola mawoola aali lusele kanji-kanji yakali kutondezyegwa muzibeela zyone, zibeela izili 96 zifwaafwi zyamu Bbaibbele zyakalekkoodwa akuluulwa amwaambi uuzyibidwe kapati alimwi iwakajisi ijwi libotu. Kwakali kulila nyimbo zibotu muzibeela zinji zyafilimu. Bakwesu ibakayiisidwe kabotu bakali kulizya majwi anyimbo kubelesya mincini iibelesya malekkoodi, kweendelanya majwi azifwanikiso alimwi azisobano zyamakani aamu Bbaibbele.

“Filimu eeyi yakalijisi zifwanikiso zyakali kutondezya kulengwa kwazintu mbuli nyenyezi mane kusika aku Bulelo bwa Kristo bwa Myaka Iili 1000.”—Majwi aaba F Stuart Barnes, kabajisi myaka yakuzyalwa iili 14 mu 1914

Bunji bwazibeela zyafilimu alimwi azifwanikiso zinji zyakabambwa abasikulekkooda basimakwebo. Basyaazibwene mukuzekaula baku Philadelphia, New York, Paris, alimwi abaku London bakabelesya maanza kupenta zifwanikiso zimwi zyamu filimu. Babelesi bamu Bethel’s Art Room abalo bakabeleka mulimo mupati wakupenta kanji-kanji kubamba zifwanikiso zimbi zyakanyonyooka. Kunze aamafilimu aakaulwa, bamukwasyi  wa Bbeteli bakatondezyegwa mufilimu munsi-munsi aku Yonkers, mu New York, ciindi nobakali kusobana zibeela zya Abrahamu, Izaka alimwi amungelo iwakakasya Abrahamu kutuula mwanaakwe.Matl. 22:9-12.

Kwakali kuyandika bakwesu banji kumulimo mupati iwakeelede kucitwa kutegwa filimu ya Photo Drama of Creation itondezyegwe

Mulongwe wa Mukwesu Russell wakaambila basimubweza twaambo kuti nzila eeyi yakumwaya makani “yakali kukonzya kugwasya bantu banji kukkomanina Magwalo, kwiinda nzila iili yoonse iyakabambwa kale kusumpula makani aabukombi.” Sena basololi bazikombelo bakali kuyakulumbaizya kusoleka kuli boobo kwakuti bantu banji bajisi nzala yakumuuya basikilwe mulumbe? Peepe. Muciindi caboobo, beendelezi ba Bunakristo Bwanyika antoomwe bakasampaula filimu ya “Photo-Drama,” mane bamwi bakabelesya lweeno kukasya bantu kuti batayeebeleli. Mubusena bumwi, kabunga kamweendelezi umwi kakazima magesi.

Bagwasyilizi bacizyi kuzwa mumbungano zyamu busena oobo bakapa mamiliyoni aamakkopi aatubbuku aajisi zifwanikiso zya Filimu ya “Photo-Drama” kakunyina kubbadelesya

Aabo ibakajanika bakatambula alimwi a “Cinyongole” cijisi cifwanikiso ca Jesu mulombe. Cinyongole cakali kuyeezya wakacisamide kuti “mwana waluumuno”

Nokuba boobo, bantu bakazula mumaanda aakweebeleda kutegwa beebelele filimu ya “Photo-Drama” kakunyina kubbadela. Mucisi ca United States, madolopo aasika ku 80 akali kutondezya filimu ya “Photo-Drama” abuzuba. Basikweebelela banji bakagambwa kubona ‘cipekupeku cijisi majwi’ ciindi cakusaanguna. Kwiinda mukubelesya muncini wakufwotozya, bakacikonzya kulangilila kana kakayuni nokakali kuzwa mucikwa alimwi aduba nolyakali kuvwungunuka. Makani aasayaansi kuciindi eeco akali kutondezya busongo bwa Jehova bugambya. Mbubwenya mbokwaambwa kumatalikilo, kubona Mukwesu Russell acipekupeku kaamba makani aantalisyo kujatikizya filimu ya “Photo-Drama,” sikweebelela umwi mane wakayeeya kuti mwaambi wakali kulibonya “mbuli kuti tali Mukwesu Russell pele ngonguwe!”

NZILA IIGWASYA KAPATI MUKUYIISYA BBAIBBELE

Filimu ya “Photo-Drama” yakatalika mu January 11, 1914, abusena oobu bubotu bwakweebeleda bwamu New York City ciindi eeco busena oobu alimwi ababelesi bakali kuzulilwa mumbunga ya International Bible Students Association

Mulembi wamakani aakaindi alimwi syaazibwene mumafilimu, Tim Dirks, wakapandulula filimu ya “Photo-Drama” kuti “yakali filimu yakusaanguna iyakeendelanya majwi aakalekkoodwa, zifwanikiso zyeenda alimwi amibala yazifwanikiso.” Mafilimu aakaliko kaitanapangwa filimu ya “Photo-Drama” akabelesya nzila eezyi zimwi pele kutali zyoonse mucibeela comwe, kwaambisya cijisi mutwe wamakani aamu Bbaibbele. Alimwi taakwe yakajisi basikweebelela banji—babalilwa ku 9 miliyoni ku North America, Europe, Australia, alimwi aku New Zealand mumwaka wakusaanguna ulikke.

Filimu ya “Photo-Drama” yakatalika mu January 11, 1914, ku New York City. Myezi iili ciloba noyakainda kwakaboola ntenda iyakazikwiitwa kuti Nkondo Yakusaanguna Yanyika Yoonse. Nokuba boobo, bantu banji nyika yoonse bakazumanana kubungana kutegwa beebelele filimu ya “Photo-Drama,” akuumbulizyigwa azifwanikiso zitondezya zilongezyo ziyoobola akaambo ka Bwami. Kufwumbwa cintu ncomukonzya kweezyanisya kujatikizya mwaka wa 1914, taakwe icikonzya kweelana afilimu ya “Photo-Drama.”

Mafilimu a “Photo Drama” aali 20 akabelesyegwa atubunga mucooko coonse ca North America