“Mubulemu bwako koya butantide akuzunda.”—INT. 45:4.

1, 2. Nkaambo nzi bbuku lya Intembauzyo 45 ncoliyandika kapati kulindiswe?

MWAMI uulemekwa watanta bbiza kutegwa alwanine kasimpe abululami alimwi waunka kutegwa azunde basinkondonyina. Naamanizya kubazunda, wakwata nabwiinga weebeka. Mwami ulayeeyegwa akutembaulwa mumazyalani oonse aakumbele. Ooyo ngomutwe wamakani mubbuku lya Intembauzyo 45.

2 Nokuba kuti bbuku lya Intembauzyo 45 lijisi makani aakkomanisya alimwi amajwi aakondelezya, kumamanino lilijisi alimwi makani aayandika kapati. Zyintu izyakacitika izyaambidwe mubbuku eeli zilijisi bupanduluzi kulindiswe. Zijatikizya buumi bwesu lino alimwi abuumi bwesu bwakumbele. Aboobo, atubikkile maano kulingaula intembauzyo eeyi.

‘MOYO WANGU WAATA AMAKANI MABOTU’

3, 4. (a) Ino “makani mabotu” aatujatikizya ninzi, alimwi ino inga aujatikizya buti moyo wesu? (b) Muunzila nzi ‘lwiimbo lwesu mbolujatikizya mwami,’ alimwi ino mulaka wesu uba buti mbuli cilembyo?

3 Amubale Intembauzyo 45:1. “Makani mabotu” aamunjila mumoyo sintembauzyo aapa kuti ‘waate’ moyo, ajatikizya mwami. Ibbala lya Chihebrayo ilyakasandululwa kuti “waata” lyakali kwaamba “kubila.” Kaambo aaka kakapa kuti moyo wasintembauzyo waate aluyandisisyo alimwi kakapa kuti mulaka wakwe  ube mbuli “cilembyo camulembi uufwambaana.”

4 Mbuti kujatikizya ndiswe? Makani mabotu aaya aamba Bwami bwabu Mesiya makani aatunjila mumoyo. Mulumbe wa Bwami wakaba makani “mabotu” kwaambisya mu 1914. Kuzwa ciindi eeco, mulumbe taujatikizyi buyo Bwami bwakumbele pele ulajatikizya amfwulumende ini-ini yalo iibeleka kujulu. Aaya ‘ngamakani mabotu aa Bwami’ ngotukambauka “kuti bukabe bumboni kumisyobo yoonse.” (Mt. 24:14) Sena moyo wesu ‘ulaata’ akaambo kamulumbe wa Bwami? Sena tulakambauka makani mabotu aa Bwami cabusungu? Mbubwenya mbuli sintembauzyo, andiswe ‘lwiimbo lwesu lujatikizya mwami’—Mwami wesu Jesu Kristo. Tulaambilizya kujatikizya nguwe kuti ngo Mwami uulela kujulu mu Bwami bwabu Mesiya. Kuyungizya waawo, tulabatamba bantu boonse—beendelezi alimwi abalelwa—kuti balibombye kubulelo bwakwe. (Int. 2:1, 2, 4-12) Alimwi mulaka wesu uba mbuli “cilembyo camulembi uufwambaana” mukuti Majwi aalembedwe tulaabelesya kapati mumulimo wesu wakukambauka.

Tulakkomana kwaambilizya makani mabotu aajatikizya Mwami wesu, Jesu Kristo

‘KUMILOMO YAMWAMI KUZWA MAJWI AAKONDELEZYA’

5. (a) Muunzila nzi Jesu mwaakali ‘kweebeka’? (b) Ino muunzila nzi ‘kumilomo ya Mwami mbokwakazwa majwi aakondelezya,’ alimwi ino inga twasolekesya buti kutobela cikozyanyo cakwe?

5 Amubale Intembauzyo 45:2. Magwalo taambi zinji kujatikizya Jesu mbwaakali kulibonya ciwa. Pele mbwaanga wakalilondokede, tacidoonekwi kuti wakali ‘kweebeka.’ Nokuba boobo, kweebeka kwakwe ikwiinda kwakaboola akaambo kakusyomeka kuli Jehova alimwi akutazungaana mulusyomo. Kuyungizya waawo, Jesu wakali kubelesya ‘amajwi aakondelezya’ naakali kukambauka mulumbe wa Bwami. (Lk. 4:22; Joh. 7:46) Sena tulasolekesya kutobela cikozyanyo cakwe mumulimo wesu wakukambauka alimwi akubelesya majwi aakonzya kubanjila mumoyo bantu?—Kol. 4:6.

6. Muunzila nzi Leza mwaakalongezya Jesu ‘kukabe kutamani’?

6 Akaambo kakuti Jesu wakalyaaba camoyo woonse, Jehova wakamulongezya mumulimo wakwe wakukambauka anyika alimwi naakafwa kali cipaizyo wakamupa bulumbu. Mwaapostolo Paulo wakalemba kuti: ‘Jesu naakaba muciimo camuntu, wakalicesya akumvwida mane kusikila kulufwu, inzya, lufwu acisamu cakupenzyezya. Alimwi akaambo kakaambo aaka nkakonya, Leza wakamusumpula akumupa cuuno caatala azyina liinda mazyina oonse, kutegwa muzyina lya Jesu boonse bafwugame—aabo bali kujulu, munyika alimwi abaabo bali mubulongo—alimwi boonse beelede kuzumina caantangalala kuti Jesu Kilisito Mwami kutegwa Leza Taata alemekwe.’ (Flp. 2:8-11) Jehova wakalongezya Jesu “kukabe kutamani” kwiinda mukumubusya akumupa buumi butafwi.—Lom. 6:9.

MWAMI WASALWA KUBA MUPATI KWIINDA ‘BEENZINYINA’

7. Muunzila nzi Leza mwaakananika Jesu kwiinda ‘beenzinyina’?

7 Amubale Intembauzyo 45:6, 7Akaambo kaluyando Jesu ndwajisi kujatikizya bululami alimwi akutayanda cintu cili coonse cikonzya kupa kuti Bausyi batalemekwi, Jehova wakamunanika kuba Mwami wa Bwami bwa Mesiya. Jesu wakananikwa ‘amafuta aakukondwa’ kwiinda ‘beenzinyina,’ nkokuti bami ba Juda mumulongo wa Davida. Munzila nzi? Kaambo kamwi  nkakuti Jesu wakananikwa a Jehova lwakwe mwini. Kuyungizya waawo, Jehova wakamunanika kuba Mwami alimwi a Mupaizi Mupati. (Int. 2:2; Heb. 5:5, 6) Kunze lyaboobo, Jesu wakananikwa kutali amafwuta pe, pele amuuya uusalala alimwi bulelo bwakwe tabuli bwaanyika pe, pele mbwakujulu.

8. Nkaambo nzi ncotukonzya kwaamba kuti ‘Leza ncuuno cabwami ca Jesu,’ alimwi nkaambo nzi ncotukonzya kuba masimpe kuti bwami bwakwe mbwabululami?

8 Jehova wakabikka Mwanaakwe kuba Mwami wakwe Mesiya kujulu mu 1914. ‘Musako wabwami bwakwe musako wabululami,’ aboobo, bululami bwakwe alimwi abwabulelo bwakwe bulisinizyide. Bweendelezi bwakwe mbwamumulawo, nkaambo ‘Leza ncecuuno cakwe.’ Nkokuti Jehova nentalisyo yabwami bwakwe. Kuyungizya waawo, cuuno cabwami ca Jesu cinakuliko ‘kukabe kutamani.’ Sena tamukkomene kubelekela Jehova kwiinda mumwami singuzu uuli boobo, Mwami uusalidwe a Leza?

MWAMI ‘WAANGA PANGA LYAKWE’

9, 10. (a) Ndilili Kristo naakaanga panga lyakwe, alimwi muunzila nzi mwaakalibelesya? (b) Muunzila nzi Kristo mwayoolibelesya panga lyakwe?

9 Amubale Intembauzyo 45:3. Jehova ulailila Mwami wakwe ‘kwaanga panga lyakwe akasolo kakwe,’ aboobo uzumizya Jesu kulwana bantu boonse ibakazya bweendelezi bwa Leza mububumbo boonse alimwi akuleta lubeta lwakwe alimbabo. (Int. 110:2) Akaambo kakuti Kristo Mwami Sikalumamba uutakonzyi kuzundwa, wiitwa kuti: “O sintaze.” Wakaanga panga lyakwe mu 1914 alimwi wakazunda Saatani amadaimona aakwe, walo ngwaakagusya kujulu akumusowela anyika.—Ciy. 12:7-9.

10 Aayo akali buyo matalikilo aakuzunda kwa Mwami katantide bbiza. Uciyandika ‘kumanizya kuzunda kwakwe.’ (Ciy. 6:2) Lubeta lwa Jehova luciyandika kuletwa kuzibeela zyoonse zyabweende bwa Saatani aanyika, alimwi Saatani alimwi amadaimona aakwe beelede kunyangwa nguzu. Iceelede kusaanguna kunyonyoonwa ngu Babuloni Mupati, bukombi bwakubeja bwanyika yoonse. Makanze aa Jehova ngakubelesya beendelezi bazisi kuti bakamunyonyoone “mukaintu muvwuule” ooyu mubyaabi. (Ciy. 17:16, 17) Kuzwa waawo, Mwami Sikalumamba uyoonyonyoona bweende bwa Saatani bwatwaambo twacisi, kubunyonyooda limwi. Kristo alimwi iwiitwa kuti “imungelo wamulindi uutagoli,” uyoomanizya kuzunda kwiinda mukumusowela mumulindi uutagoli Saatani alimwi amadaimona aakwe. (Ciy. 9:1, 11; 20:1-3) Atubone bbuku lya Intembauzyo 45 mbolyakasinsima zyintu eezyi zikkomanisya.

MWAMI WATANTA BBIZA ‘KUTI ALWANINE KASIMPE’

11. Muunzila nzi Kristo mwatanta bbiza kutegwa ‘alwanine kasimpe’?

11 Amubale Intembauzyo 45:4. Mwami Sikalumamba talwanini kuzunda kutegwa abweze masena alimwi akweendelezya bantu. Ulwana nkondo yabululami kajisi makanze mabotu. Ulatanta bbiza ‘kutegwa alwanine kasimpe, kulicesya abululami.’ Kasimpe kapati nkayelede kulwanina kajatikizya bweendelezi bwa Jehova bwakoonse-koonse. Saatani wakakazya kweelela kwabweendelezi bwa Jehova ciindi naakamuzangila. Kuzwa ciindi eeco, kasimpe aaka kapati kalakazyigwa amadaimona alimwi abantu. Lino ciindi casika cakuti Mwami wa Jehova uunanikidwe atante bbiza akuyaabuya kutegwa asumpule kasimpe ka Jehova kajatikizya bweendelezi.

12. Muunzila nzi Mwami mwatanta bbiza ‘kutegwa alwanine kulicesya’?

12 Mwami alimwi ulatanta bbiza ‘kutegwa alwanine kulicesya.’ Mbwali Mwana wa Leza simuzyalwaalikke wapa cikozyanyo cibotu cakulicesya alimwi akulibombya kubweendelezi bwa Bausyi. (Is. 50:4, 5; Joh. 5:19) Boonse balelwa ibalibombya  ku Mwami beelede kutobela cikozyanyo cakwe alimwi akulibombya kubweendelezi bwa Jehova muzyintu zyoonse. Balikke aabo ibacita boobo mbebayoozumizyigwa kupona munyika mpya Leza njasyomezya.—Zek. 14:16, 17.

13. Muunzila nzi Kristo mwatanta bbiza ‘kutegwa alwanine bululami’?

13 Kristo alimwi ulatanta bbiza akuyaabuya ‘kutegwa alwanine bululami.’ Bululami mbwalwanina Mwami, ‘mbululami bwa Leza’—zyeelelo zya Jehova zyacintu ciluzi acitaluzi. (Lom. 3:21; Dt. 32:4) Kujatikizya Mwami Jesu Kristo, Isaya wakasinsima kuti: “Kuyooba mwami uuendelezya mubululami abasilutwe babeteka cakululama.” (Is. 32:1) Bulelo bwa Jesu buyooleta cisyomezyo ‘camajulu mapya’ alimwi “anyika mpya,” mwalo “muyooba bululami.” (2 Pe. 3:13) Boonse ibayakukkala munyika mpya eeyo bayooyandika kutobela zyeelelo zya Jehova.—Is. 11:1-5.

MWAMI WAMANIZYA KUBELEKA “MILIMO IIYOOSYA”

14. Muunzila nzi janza lyalulyo lya Kristo moliyakucita “milimo iiyoosya”? (Amubone cifwanikiso icili kumatalikilo aacibalo.)

14 Mbwayaabuzumanana katantide bbiza, Mwami waanga panga kukasolo kakwe. (Int. 45:3) Pele ciindi cilasika nabweza panga akulibelesya ajanza lyakwe lyalulyo. Sintembauzyo wakasinsima kuti: “Ijanza lyalulyo likwiiyisye milimo iiyoosya.” (Int. 45:4) Ciindi Jesu Kristo nayaabuya katantide bbiza kutegwa alete lubeta lwa Jehova lya Amagedoni, uyoocita “milimo iiyoosya” kuli basinkondonyina. Pele kujatikizya nzila njayoobelesya kunyonyoona bweende bwazyintu bwa Saatani, tatuzyi pe. Pele ntaamu eeyo iyoopa kuti bantu bapona anyika bayoowe kapati aabo ibatayandi kutobela kucenjezya kwa Leza kwakuti balibombye kubulelo bwa Mwami. (Amubale Intembauzyo 2:11, 12.) Mubusinsimi bwakwe bujatikizya ciindi cakumamanino, Jesu wakaamba kuti bantu “bayoonetuka akaambo kakuyoowa akulibilika zyintu zilangilwa kucitika anyika, nkaambo nguzu zyakujulu ziyoozungaanizyigwa.” Wakayungizya kuti: “Mpoonya bayoobona Mwana wamuntu kaboola mukkumbi kajisi nguzu abulemu bupati.”—Lk. 21:26, 27.

15, 16. Mbaani ibayakupanga “impi” yalo iiyakutobela Kristo kunkondo?

15 Nolyaambilizya kujatikizya kuboola kwa Mwami “kajisi nguzu abulemu bupati” kutegwa alete lubeta, ibbuku lya Ciyubunuzyo lyaamba kuti: “Ndakabona julu kalijalulwa, eelyo amubone kwakali bbiza lituba. Lino ooyo uutantide alindilyo wiitwa kuti Uusyomeka alimwi Wamasimpe, alimwi ulabeteka akulwana mubululami. Kunze lyaboobo, impi zyabasikalumamba bakujulu bakali kumutobela kabatantide mabbiza aatuba, alimwi bakasamide zisani zyuuba-uba, zituba, zitakwe tombe, zibotu. Alimwi mukanwa lyakwe muzwa panga damfwu libosya, lyakuti aumye masi, alimwi uyoobeembela ankoli yabutale. Kunze lyaboobo, ulalyataula mucikandilo camasaansa cabukali bwakunyema kwa Leza Singuzuzyoonse.”—Ciy. 19:11, 14, 15.

16 Ino mbaani ibayakuba basikalumambanyina Kristo ibapanga “impi” zyakujulu iziyakumutobela kunkondo? Ciindi naakasaanguna kubweza panga lyakwe kutegwa atande Saatani alimwi amadaimona aakwe kuzwa kujulu, Jesu wakagwasyilizyigwa “abangelo bakwe.” (Ciy. 12:7-9) Cileelela kwaamba kuti ciindi cankondo ya Amagedoni, impi ya Kristo iyakubikkilizya abangelo basalala. Sena impi yakwe eeyi iyakubikkilizya abambi? Jesu wakaamba cisyomezyo eeci kubanabokwabo bananike cakuti: “Ooyo uuzunda akucita milimo yangu mane kusikila kumamanino, ndiyoomupa nguzu zyakweendelezya masi, alimwi bantu uyoobeembela ankoli yabutale cakuti bayoopwayaulwa mbuli mbozipwayaulwa zibelesyo zyabulongo, mbubonya andime mbondatambula kuzwa kuli Taata.” (Ciy. 2:26, 27) Aboobo, impi yakujulu  ya Kristo iyoobikkilizya abanabokwabo bananike balo kuciindi eeco banakuli bakatambula kale bulumbu bwabo bwakujulu. Balelinyina bananike banakuli kulubazu lwakwe ciindi nayakucita “milimo iiyoosya” kumwi keembela masi ankoli yabutale.

MWAMI WAMANIZYA KUZUNDA

17. (a) Ino bbiza lituba ndyatantide Kristo liiminina nzi? (b) Ino panga alimwi abuta ziiminina nzi?

17 Amubale Intembauzyo 45:5. Mwami utantide aabbiza lituba, iliiminina nkondo iisalala alimwi iiluleme mumeso aa Jehova. (Ciy. 6:2; 19:11) Kuyungizya apanga, ulijisi abuta. Tubala kuti: “Ndakalanga akubona bbiza lituba; lino ooyo wakatantide alindilyo wakajisi buta; alimwi wakapegwa musini, eelyo wakaunka kayaabuzunda akuti amanizye kuzunda.” Zyoonse zyobilo, ipanga alimwi abuta ziiminina nzila njayakubelesya Kristo kunyonyoona basinkondonyina.

Bayuni bayakwiitwa kuti basalazye nyika (Amubone muncali 18)

18. Ino “mivwi” ya Kristo ‘iyakubosya’ buti?

18 Kwiinda mukweema, sintembauzyo usinsima kuti ‘mivwi ya Mwami ilabosya, ilayasa mumyoyo yabasinkondonyina’ alimwi ‘bantu balawida ansi kunembo lyakwe.’ Bantu banji bayakujaigwa nyika yoonse. Businsimi bwa Jeremiya bwaamba kuti: “Bajayidwe ba-Jehova bayoojanwa moonse munyika kuzwa kumagolelo amwi akusikila kumagolelo amwi.” (Jer. 25:33) Businsimi ibukozyenye aboobu bwaamba kuti: “Ndakabona mungelo kaimvwi muzuba, mpoonya wakoongolola ajwi pati ikwaambila bayuni boonse bauluka mumulengalenga kuti: ‘Amuboole kuno, mubungane antoomwe kucilalilo citalikomeneni ca Leza, kutegwa mulye nyama yabami, nyama yabeendelezi babasikalumamba, nyama yabantu bayumu, nyama yamabbiza ayabaabo batantide alingawo, nyama yabantu boonse, yabantu baangulukide abazike, baniini alimwi abapati.’”—Ciy. 19:17, 18.

19. Mbuti Kristo ‘mbwayakuzunda’ akumanizya kuzunda?

19 Aakumana kunyonyoona bweende bwazyintu bubyaabi bwa Saatani aanyika, Kristo ‘mubulemu bwakwe uyakuzunda.’ (Int. 45:4) Uyakumanizya kuzunda kwiinda mukuwaala Saatani amadaimona aakwe mumulindi uutagoli kwa Myaka ya Bulelo Iili 1,000. (Ciy. 20:2, 3) Mbwaanga lino Diabolosi abangelo bakwe banakuli mbuli kuti balifwide, kabatacikonzyi kucita cintu cilicoonse, bantu munyika tabakayungwi a Saatani alimwi bayakulibombya cakumaninina ku Mwami wabo uuyakuzunda alimwi uulemekwa. Nokuba boobo, kabatanabona nyika yoonse mbwiiyaabucinca kuba paradaiso buce-buce, banakujisi kaambo akamwi ikayakubapa kukkomana a Mwami wabo abasikulelanyina kujulu. Cintu eeco icikkomanisya ciyakulangwa-langwa mucibalo citobela.