“Koyeeya Mulengi wako.”—MUK. 12:1.

1, 2. (a) Ino ndulayo nzi Solomoni ndwaakasololelwa amuuya kulembela bakubusi? (b) Nkaambo nzi lulayo lwa Solomoni ncolweelede kubakkomanisya abalo Banakristo ibajisi myaka yakuzyalwa iibalilwa kuma 50 naa kwiinda waawo?

KWIINDA mukusololelwa amuuya, mwami Solomoni wakalembela bakubusi kuti: “Koyeeya Mulengi wako mumazuba aabulombe bwako, mazuba aamapenzi naatana kusika.” Ino “mazuba aamapenzi” aaya ninzi? Solomoni wakabelesya majwi aakweema kupandulula mazuba aamapenzi aabucembele—kubimba maanza, koongomana maulu, kumana menyo, kutabona kabotu, kutamvwisya kwamatwi, imvwi, alimwi akoongomana musana. Taakwe weelede kucita bubambe bwakulindila kuti mane akasike aciimo eeci katanatalika kubelekela Jehova.—Amubale Mukambausi 12:1-5.

2 Banakristo banji ibajisi myaka yakuzyalwa iibalilwa kuma 50 naa kwiinda waawo bacijisi nguzu zinji. Balakonzya kabajisi mvwi, pele nokuba boobo mubili inga kautanabula nguzu kweelana ambwaakapandulula Solomoni. Sena Banakristo bapati aaba inga bagwasyigwa alulayo ilwakasololelwa amuuya ilwakalembelwa bakubusi ilwakuti: “Koyeeya Mulengi wako”? Ino lulayo oolu lwaamba nzi?

3. Ncinzi cibikkilizyidwe mukuyeeya Mulengi wesu Mupati?

 3 Nokuba kuti twali kumubelekela Jehova kwamyaka minji, cilayandika kuti ciindi aciindi katuyeeya mbwali mubotu Mulengi wesu. Sena buumi tabugambyi? Bumpiyompiyo ibujatikizya buumi mbobupangidwe bulakatazya kumvwisya. Zyintu nzyatucitila Jehova nzibotu alimwi ziliindene-indene zyalo izipa kuti buumi kabukkomanisya. Ciindi notuzinzibala kuyeeya zyintu nzyaakalenga Jehova, cipa kuti katulumba luyando lwakwe, busongo alimwi anguzu zyakwe. (Int. 143:5) Pele kuyeeya Mulengi wesu Mupati alimwi kulabikkilizya akuzinzibala kuyeeya zyintu nzyotweelede kumucitila. Ziindi zili boobu notuzinzibala kuyeeya, tulimvwa kuba amakanze aakuzumanana kutondezya kulumba Mulengi wesu kwiinda mukumubelekela cakumaninina kweelana ambotukonzya kufwumbwa kuti katucipona.—Muk. 12:13.

ZYOOLWE ZILIBEDELEDE CIINDI NOMWAKOMENA

4. Ino mubuzyo nzi ngobeelede kulibuzya Banakristo ibajisi luzyibo akaambo kakupona myaka minji, alimwi nkaambo nzi?

4 Kuti kamujisi luzyibo akaambo kakupona myaka minji, mweelede kulibuzya kuti, ‘Ncinzi nconditiicite abuumi bwangu lino kazitanamaninina nguzu nzyondicijisi?’ Mbomuli Munakristo uujisi luzyibo, mulijisi zyoolwe nzyobatajisi bamwi. Mulakonzya kwaabila bana nzyomwakaiya kuzwa kuli Jehova. Mulakonzya kubayumya-yumya bamwi kwiinda mukubalwiida zyintu zyakamukkomanisya ciindi nomwakali kubelekela Leza. Mwami Davida wakapaila kuti abe azyoolwe zyakucita boobo. Wakalemba kuti: “O Leza, nduwe wandiiyisya kuzwa kubwanike bwangu . . . Utandisii, O Leza, nekuba kuti ndacembaala akuba amvwi, Kuti ndwiide izyalani liciza makani aakuboko kwako, anguzu zyako kuliboonse baciboola.”—Int. 71:17, 18.

5. Ino Banakristo bapati inga babalwiida buti bamwi zyintu nzyobakaiya?

5 Ino inga mwaluula buti luzyibo ndomwajana kwamyaka minji? Mulakonzya kubatamba kuŋanda yanu bakubusi ibabelekela Leza kutegwa bakulwaizyigwe akuyanzana kuli boobo. Mulakonzya kubatamba kuti bamusangane mumulimo wa Bunakristo akubaambila lukkomano ndomwajana kwiinda mukubelekela Jehova. Elihu iwakali kupona kaindi wakati: “Majwi ndubazu lwabuumi bulamfu, abulaililo mbwamyaka minji.” (Job. 32:7) Mwaapostolo Paulo wakakulwaizya bamakaintu Banakristo balaaluzyibo kuti kabakulwaizya bamwi kwiinda mumajwi alimwi amucikozyanyo cabo. Wakalemba kuti: “Abalo bamacembele mbubonya ababe . . . bamayi bazyintu zibotu.”—Tit. 2:3.

AMUYEEYE NZYOMUKONZYA KUCITA KUTEGWA MUGWASYE BAMWI

6. Nkaambo nzi Banakristo ibajisi luzyibo akaambo kakupona myaka minji ncobateelede kulitenga?

6 Kuti kamuli Munakristo uulaaluzyibo, kuli zyintu zinji nzyomukonzya kucita. Amuyeeye zyintu nzyomumvwisya lino nzyomwatakazyi myaka iili 30 naa 40 yainda. Mulakonzya kubelesya njiisyo zyamu Bbaibbele cabusongo mubuumi. Cakutadooneka, mulakonzya kubasika amoyo bantu akasimpe kamu Bbaibbele. Ikuti kamuli mwaalu, mulizyi mbomukonzya kugwasya Banakristonyoko ibaleya. (Gal. 6:1) Ambweni mwakaiya mbokulanganizyigwa milimo yambungano, madipatimenti aamuswaangano wabbazu naa waalubazu, naa kuyaka Maanda aa Bwami. Inga kamuzyi mbomukonzya kukulwaizya madokota kutegwa babelesye nzila zyabusilisi zitabelesyi bulowa. Nokuba kuti kasimpe mwakakaiya ino-ino, mulijisi luzyibo lunji mubuumi. Mucikozyanyo, kuti naa mwakalela kale bana, inga kamujisi luzyibo lugwasya. Banakristo bapati balakonzya kukulwaizya kapati bantu ba Jehova kwiinda mukuyiisya, kusololela, alimwi akubayumyayumya bakwesu alimwi abacizyi.—Amubale Jobu 12:12.

7. Ino ndwiiyo luli buti ilugwasya Banakristo bapati ndobakonzya kuyiisya bakubusi?

7 Ino inga mwacita buti kutegwa zyintu nzyomukonzya kucita muzicite cakumaninina? Ambweni mulakonzya kubatondezya bakubusi mbobakonzya kutalisya ziiyo zya Bbaibbele akuzisololela. Ikuti kamuli mucizyi, mulakonzya  kubapa mizeezo bamatumbu ibacili bana-bana mbobakonzya kucita zyintu zyakumuuya kumwi kabalanganya nzyobayandika bana babo bacili baniini. Ikuti kamuli mukwesu, mulakonzya kuyiisya bakwesu bacili bana-bana mbobakonzya kupa makani cabusungu alimwi ambobakonzya kuzwidilila mumulimo wakukambauka makani mabotu. Mulakonzya kubatondezya mbomuswaya bakwesu abacizyi bacembeede kutegwa mubayumye-yumye kumuuya. Nokuba kuti tamujisi nguzu zyakumubili nzyomwakajisi kaindi, mulijisi zyoolwe zibotu zyakuyiisya bakubusi. Ijwi lya Leza lyaamba kuti: “Bulemu bwabakubusi ninguzu zyabo, pele kweebeka kwabapati nimvwi zyabo.”—Tus. 20:29.

KUBELEKELA KUBUSENA KUBULIDE BASIKUMWAYA

8. Ncinzi ncaakacita mwaapostolo Paulo naakakomena?

8 Mwaapostolo Paulo wakazicita cakumaninina zyintu nzyaakali kukonzya kucita kwiinda mukubelekela Leza naakakomena. Kuzikusika ciindi naakaangununwa muntolongo ku Roma mu 61 C.E., wakali waliyumya kwamyaka minji yakubeleka mulimo wabumisyinali cakulomya alimwi wakali kukonzya kukkalilila mu Roma kuti akambauke. (2 Ko. 11:23-27) Cakutadooneka, bakwesu mudolopo eeli lipati bakalumba kapati akaambo kalugwasyo ndwaakazumanana kubapa. Pele Paulo wakabona kuti kuzisi zimbi kwakalibulide kapati kwiinda ku Roma. Kali antoomwe a Timoteo alimwi a Tito, wakatalika alimwi mulimo wakwe wabumisyinali, wakaunka ku Efeso, mpoonya ku Krete, alimwi ambweni aku Makedoniya. (1 Ti. 1:3; Tit. 1:5) Tatuzyi naa wakasika aku Spanya, pele wakali kuyanda kusika akwalo ooku.—Lom. 15:24, 28.

9. Kulangilwa kuti ndilili Petro naakalongela kubusena bwakabulide bakambausi? (Amubone cifwanikiso icili kumatalikilo.)

9 Mwaapostolo Petro ambweni wakajisi myaka yakuzyalwa iinda ku 50 ciindi naakalongela kubusena kwakabulide bakambausi. Nkaambo nzi eeci ncocikonzya kuba camasimpe? Kuti naa wakaleelene a Jesu myaka yakuzyalwa naa kuti wakali mupati asyoonto kwiinda Jesu, weelede kuti wakajisi myaka iibalilwa ku 50 ciindi naakaswaangana abaapostolo bamwi ku Jerusalemu mu 49 C.E. (Mil. 15:7) Nowakainda muswaangano uulya, Petro wakaunka kuyakukkala ku Babuloni, cakutadooneka wakacita oobo kutegwa akambaukile ba Juda banji ibakali kukkala mubusena oobu. (Gal. 2:9) Wakali kukkala mu Jerusalemu ciindi naakalemba lugwalo lwakwe lwakusaanguna ilwakasololelwa amuuya mu 62 C.E. (1 Pe. 5:13) Kukkala mucisi ceenzu tacili cuuba-uba, nokuba boobo Petro wakabelekela Jehova cakumaninina nokuba kuti wakali mupati.

10, 11. Amwaambe cakuluula cijatikizya muntu iwakaunka kuyakubelekela kubusena kubulide kapati basikumwaya.

10 Mazuba aano, Banakristo banji ibajisi myaka yakuzyalwa iibalilwa kuma 50 naa kwiinda waawo bajana kuti bukkale bwabo bwacinca akuti balakonzya kubelekela Jehova munzila zimwi zipya. Bamwi balongela kubusena kubulide basikumwaya. Mucikozyanyo, ba Robert bakalemba kuti: “Mebo abakaintu bangu twakajisi myaka yamuma 50 ciindi notwakabona zyoolwe zimwi nzyotwakajisi. Mwaneesu musankwa omwe buyo ngotwakajisi wakatalika kulikkalila, tiitwakacili amukuli wakulanganya bazyali bacembeede, alimwi twakajisi zyintu zisyoonto nzyotwakakona. Ndakabona kuti mali ngotwakali kukonzya kujana kuti naa twasambala ŋanda yesu akali kuyakukkwana kubbadelela cikwelete caŋanda akutugwasyilizya kusikila ciindi nondiyakutambula mali aapensyeni. Twakamvwa kuti kucisi ca Bolivia kuli bantu banji ibazumina kwiiya Bbaibbele, alimwi zyintu taziduli pe. Aboobo, twakasala kuti tulonge. Kuzibila kukkala muŋanda yesu mpya tiicakali cuuba-uba pe. Zyintu zyoonse buyo zyakaliindene azyintu nzyotwakazibide ku North America. Nokuba boobo, twakalongezyegwa akaambo kakusoleka kwesu.”

11 Ba Robert bakayungizya kwaamba kuti: “Zyintu zyoonse nzyotucita lino mubuumi zijatikizya kubeleka milimo yambungano. Bantu bamwi mbotwakali kwiiya limwi Bbaibbele bakabbapatizyigwa. Mukwasyi umwi mucete ngotwakali  kwiiya limwi wakali kukkala mumunzi wakali kulamfwu. Nokuba boobo, nsondo ansondo bamumukwasyi ooyu baleenda musinzo uukatazya kuunka kumiswaangano kudolopo. Amuyeeyele buyo mbotwakakkomene kubona mukwasyi ooyu kauyaambele alimwi amwana musankwa mupati naakatalika mulimo wabupainiya!”

ZILAWO MOBABELESYA MWAAMBO WAKUNZE AACISI ZIYANDIKA BASIKUMWAYA

12, 13. Amwaambe cakuluula icijatikizya Munakristo iwakatalika kubelekela Jehova munzila zipya naakakkwanya myaka yakuleka mulimo wakumubili.

12 Tubunga alimwi ambungano izibelesya mwaambo wakunze aacisi zilakonzya kugwasyigwa kapati acikozyanyo cabakwesu alimwi abacizyi bapati. Alimwi kubelekela mucilawo cili boobu kulakonzya kukkomanisya. Mucikozyanyo, ba Brian bakalemba kuti: “Mebo abakaintu bangu twakaliiba ciindi nondakakkwanya myaka iili 65 yakuzyalwa, bantu ku Britain nobaleka mulimo. Bana besu bakatalika kulikkalila, alimwi cakali kukatazya kujana bantu bajisi luyandisisyo lwakwiiya Bbaibbele. Mpoonya ndakaswaangana amukubusi mu Chainizi iwakali kwiiya ayunivesiti iili mubusena oobu. Wakazumina kutambwa kumuswaangano, alimwi ndakatalika kwiiya Bbaibbele anguwe. Nokwakainda nsondo zisyoonto, wakatalika kuboola amu Chainizi mweenzinyina. Nokwakainda nsondo zyobilo, wakaboola amweenzinyina watatu, mpoonya awane.

13 “Kuzikusika ciindi mu Chainizi wasanu iwakali kwiiya ayunivesiti naakalomba ciiyo ca Bbaibbele, ndakati, ‘Kuba amyaka iili 65 tacaambi kuti ndeelede kuleka kubeleka mulimo wa Jehova.’ Aboobo ndakabuzya bakaintu bangu, ibasyoonto kulindime amyaka yobilo, kuti naa inga bayanda kwiiya mwaambo wa Chichainizi. Twakali kwiiya kubelesya zyakuswiilila zyakalekkoodwa. Kwainda myaka iili kkumi eezyi nozyakacitika. Kukambaukila mucilawo mobabelesya mwaambo wakunze aacisi kwakatupa kulimvwa kuti tucili bana. Kusika aciindi cino twaiya Bbaibbele aba Chainizi ibali 112. Bunji bwabo bakajanika kale kumiswaangano. Umwi wambabo ulabeleka mulimo wabupainiya antoomwe andiswe.”

Ambweni tamunakomena kapati cakuti tamukonzyi kuyungizya mulimo wanu (Amubone mincali 12 a 13)

AMUKKOMANE KUCITA NZYOMUKONZYA

14. Ino ncinzi cikonzya kubapa kukkomana Banakristo bapati, alimwi ino cikozyanyo ca Paulo cibakulwaizya buti?

14 Nokuba kuti Banakristo banji ibajisi myaka  iibalilwa kuma 50 balijisi zyoolwe zibotu zyakucita zyintu zipya mumulimo wa Jehova, tabali boonse ibakonzya kucita boobo. Bamwi balaciswa-ciswa, alimwi bamwi balanganya bazyali bacembeede naa kulela bana. Mulakonzya kukkomana kuzyiba kuti Jehova ulalumba zili zyoonse nzyomucita mukumubelekela. Aboobo, muciindi cakutyompwa akaambo kakuti tamukonzyi kucita zyintu zimwi, amukkomane anzyomukonzya kucita. Amubone cikozyanyo camwaapostolo Paulo. Kwamyaka minji, wakalaangidwe, katakonzyi kuzumanana amulimo wakwe wabumisyinali. Pele kufwumbwa ciindi bantu nobakali kumuswaya, wakali kubandika ambabo kujatikizya Magwalo akubayumya-yumya mulusyomo.—Mil. 28:16, 30, 31.

15. Nkaambo nzi Banakristo bacembeede ncobalumbwa kapati?

15 Jehova alimwi ulalumba nzyobakonzya kucita mumulimo wakwe Banakristo bacembeede. Nokuba kuti Solomoni wakaamba kuti mazuba aamapenzi ciindi muntu naacembaala tacili ciindi cibotu mubuumi, Jehova ulalumba nzyobakonzya kucita Banakristo bacembeede nobamutembaula. (Lk. 21:2-4) Mbungano zilalumba cikozyanyo cakusyomeka ncobatondezya aabo ibali kubelekela Leza kwamyaka minji.

16. Nzyoolwe nzi nzyaatakajisi Ana, pele ncinzi ncaakali kukonzya kucita mukukomba Leza?

16 Ibbaibbele lyaamba kuti mukaintu uucembeede iwakali kwiitwa kuti Ana wakazumanana cakusyomeka kutembaula Jehova nociba ciindi naakacembaala. Wakali mukamufwu iwakajisi myaka yakuzyalwa iili 84 ciindi Jesu naakazyalwa. Cakutadooneka, taakwe naakapona kwaciindi cilamfwu kutegwa abe sikutobela Jesu, kuti ananikwe amuuya uusalala, naa kuti akkomane akaambo kakukambauka makani mabotu aa Bwami. Pesi Ana wakakkomana kucita nzyaakali kukonzya kucita. “Kunyina naakali kulovwa mutempele, wakali kubeleka mulimo uusetekene masiku asyikati, kuliimya kulya alimwi akupaila mipailo yakukombelezya.” (Lk. 2:36, 37) Ciindi mupaizi naakali kuumpa tununkilizyo mutempele buzuba abuzuba mafwumofwumo alimwi akumangolezya, Ana wakali kunga uli antoomwe ankamu yabantu bakali kubungana mulubuwa kapaila cakaumuumu ambweni kwamaminiti aali 30. Ciindi naakamubona mwana Jesu, wakatalika “kwaamba zyamwana ooyu kuli boonse aabo bakali kulindila lufwutuko lwa Jelusalemu.”—Lk. 2:38.

17. Ino inga twabagwasya buti Banakristo bacembeede alimwi abaciswa kutegwa kabatola lubazu mubukombi bwakasimpe?

17 Mazuba aano, tweelede kubikkila maano kugwasya Banakristo bacembeede naa ibaciswa. Bamwi ibanga bayandisisya kujanika kumiswaangano yambungano alimwi akumiswaangano yabbazu ayaalubazu inga kabatacikonzyi lyoonse kucita oobo. Mumasena amwi, caluyando mbungano zilacita bubambe bwakuti bacembeede bali boobu baswiilile kupulogilamu yamuswaangano kwiinda mukubelesya fooni. Mumasena amwi, eeci tacikonzyeki pe. Nokuba boobo, Banakristo batakonzyi kujanika kumiswaangano balakonzya kugwasyilizya kusumpula bukombi bwakasimpe. Mucikozyanyo, mipailo yabo ilagwasyilizya kuti mbungano ya Bunakristo izwidilile.—Amubale Intembauzyo 92:13, 14.

18, 19. (a) Nkaambo nzi Banakristo bapati ncobatakonzyi kuzyiba mbobabakulwaizya bamwi? (b) Mbaani ibakonzya kulubelesya lulayo lwakuti: “Koyeeya Mulengi wako”?

18 Banakristo bacembeede ambweni tabakonzyi kuzyiba mbobabakulwaizya bamwi. Mucikozyanyo, nokuba kuti Ana wakali kusyomeka myaka yoonse eeyo njaakali kutempele, ambweni tanaakazyi pe kuti nokwakainda myaka minji cikozyanyo cakwe cakali kuyakuzumanana kuyumya-yumya bamwi. Luyando ndwaakajisi Ana kuli Jehova lwakalembwa mu Magwalo. Cakutadooneka, luyando lwanu kuli Leza lulilembedwe mumyoyo yabasyominyoko. Nkakaambo kaako Ijwi lya Leza ncoliti: “Mutwe uuli amvwi munsini wabulemu, ulajanwa munzila yabululami!”—Tus. 16:31.

19 Kuli mpotugolela toonse caboola kukubelekela Jehova. Pele swebo notucijisi nguzu atwaabikkile maano majwi aakasololelwa amuuya aakuti: “Koyeeya Mulengi . . . mazuba aamapenzi naatana kusika.”—Muk. 12:1.