Makani aazwa akati kazisi izili mucooko cakumbo (Western Hemisphere) alatondezya mbobuyandika busongo bwamu Bbaibbele.

Sena Kucesya Ziindi Zyakulanga ma E-mail Kulakonzya Kucesya Kulibilika?

Kweelana abuvwuntauzi ibwakacitwa ku Vancouver, Canada, bantu balakonzya kuleka kulibilika kapati kuti kabalanga ma e-mail ziindi zyotatwe buyo abuzuba muciindi cakwaalanga kufwumbwa ciindi ncobayanda. Ba Kostadin Kushlev, ibakasololela mukucita buvwuntauzi, bakaamba boobu kweelana ambobakabona: “Bantu cilabakatazya kuleka kulanga ma e-mail, kakuli kucita boobu inga cabagwasya kucesya kulibilika.”

NCOMWEELEDE KUYEEYA: Tupona ‘muziindi zikatazya ncobeni,’ aboobo sena inga tiitwayandika kujana nzila yakucesya kulibilika?—2 Timoteyo 3:1.

Inswi Izyakamanide Akaambo Kakujayigwa Kapati Zyatalika Kuvwula Alimwi

Lipooti yaba Wildlife Conservation Society (WCS) yakaamba kujatikizya cisi ca Belize alimwi amasena amwi aaku Caribbean kuti: “Kulibonya kuti zilenge zyamumaanzi izitegwa conch, inkala, alimwi answi zyatalika alimwi kuyaabuvwula mumasena oomo mfwulumende mozikasyide kuzela.” Yakayungizya kwaamba kuti: “Kutegwa zilenge izyakamanide zitalike kujanika alimwi mumasena aayo aakasyidwe amfwulumende, cilakonzya kutola buyo mwaka omwe kusika kumyaka iili cisambomwe kwiindana amumasena aazelwa kapati. Pele kutegwa zivwule ncobeni . . . inga catola myaka minji.” Ba Janet Gibson, imweendelezi wapulogilamu ya WCS, wakaamba boobu kujatikizya Belize: “Cilisalede kuti bubambe ibubikkwa amfwulumende bwakukasya kuzela mumasena aamwi bulakonzya kugwasya kutegwa nswi zivwule alimwi azilenge zyamisyobo-misyobo.”

NCOMWEELEDE KUYEEYA: Sena kuzumanana kubako kwazilenge kutondezya kuti kuli Mulengi musongo?—Intembauzyo 104:24, 25.

Bugwebenga mu Brazil

Muteende uutegwa Agência Brasil, wakaamba kuti, bugwebenga buyaabwiindila buya mu Brazil. Mu 2012, mweelwe wabantu ibakajaigwa wakainda ku 56,000—ooyu ngomweelwe wiinda kukomena akati kamyeelwe yaamwaka njobakajana kale ba Ministry of Health. Syaazibwene umwi mumakani aabukwabilizi bwabuleya uutegwa Luís Sapori usyoma kuti kuvwula kwabantu bajaigwa kutondezya kulilemeka mbokwayaansi. Wakaamba kuti, kufwumbwa buyo kuti bantu baleka kulemeka milawo iitobelwa abanamaleya, “balatalika kubelesya nguzu zyabo kutegwa nzyobayanda kazicitwa.”

SENA MULIZYI? Bbaibbele lyakaambila limwi kujatikizya ciindi luyando ‘noluyoomana’ alimwi abubi nobuyoovwula. —Matayo 24:3, 12.