“[Jehova] ulizyi kabotu mbotupangidwe, ulaibaluka kuti tuli bulongo buyo.”—INT. 103:14.

NYIMBO: 30, 10

1, 2. (a) Mukwiimpana abantu balaanguzu, mbuti Jehova mbwabeendelezya bantu? (b) Ncinzi ncotutiilange-lange mucibalo eeci?

KANJI-KANJI bantu ibajisi nguzu alimwi ibalaampuwo “balabadyaaminina” bamwi, nokuba kubeendelezya buya. (Mt. 20:25; Muk. 8:9) Eelo kaka baliindene kapati a Jehova! Nokuba kuti Ngusinguzuzyoonse, ulababikkila maano kapati bantu batalondokede. Ulaaluse alimwi ulabikkila maano kujatikizya mbotulimvwa alimwi anzyotuyandika. Mbwaanga “ulaibaluka kuti tuli bulongo buyo,” kunyina nalangila zinji kulindiswe.—Int. 103:13, 14.

2 Mu Bbaibbele muli zikozyanyo zinji zitondezya mbwababikkila maano Jehova babelesi bakwe. Atubikkile maano kuzikozyanyo zyotatwe. Cakusaanguna, tulabona Leza mbwaakamugwasya mulombe Samuele kutola mulumbe walubeta ku Mupaizi Mupati Eli; cabili, tulabona Jehova mbwaakamukkazikila moyo Musa ciindi naakalimvwa kuti inga tacikonzyi kubasololela bana Israyeli; mpoonya catatu, tulabona Leza mbwaakababikkila maano bana Israyeli ciindi nobakali kuzwa mu Egepita. Notulanga-langa  zikozyanyo eezyi, atubikkile maano kubona ncozituyiisya kujatikizya Jehova alimwi akubona ziiyo nzyotukonzya kubelesya.

MULOMBE MBWAAKABIKKILWA MAANO

3. Ncintu nzi catakali kuyeeyelwa icakamucitikila Samuele busiku bumwi, alimwi ino eeci cipa kubuzya mubuzyo nzi? (Amubone cifwanikiso icili kumatalikilo aacibalo.)

3 Samuele wakatalika “kumubelekela Jehova” kutempele kacili muniini. (1Sam. 3:1) Busiku bumwi naakaunka kukoona Samuele, kwakacitika cintu catakali kuyeeyelwa. * (Amubale 1 Samuele 3:2-10.) Wakamvwa jwi ilyakali kumwiita. Kayeeya kuti Mupaizi Mupati Eli iwakali kumwiita, cakulibombya Samuele wakazuzila kuli Eli akwaamba kuti: “Ndime aano mwami, tee mulandiita.” Eli wakaamba kuti tanaakali nguwe iwakali kumwiita. Ciindi eeci nocakacitika alimwi kwaziindi zyobilo, Eli wakazyiba kuti ngu Leza iwakali kwiita Samuele. Aboobo Eli wakamwaambila mulombe Samuele mbwaakeelede kwiingula, aboobo wakaswiilila. Nkaambo nzi Jehova, kwiinda mumungelo wakwe ncaatakaliyubununa kuli Samuele ciindi cakusaanguna? Bbaibbele kunyina ncolitwaambila, pele kweelana ambwaakazicita zintu Jehova, citondezya kuti wakabikkila maano kujatikizya mbwaakali kulimvwa Samuele. Munzila nzi?

4, 5. (a) Ino Samuele wakacita buti kumulimo ngwaakamupa Leza, alimwi ino zintu zyakeenda buti buzuba bwakatobela? (b) Ino cibalo eeci cituyiisya nzi kujatikizya Jehova?

4 Amubale 1 Samuele 3:11-18. Mu Mulawo wa Jehova, bana bakali kulaililwa kuti kabalemeka bacembeede, ikapati silutwe. (Kul. 22:28; Lev. 19:32) Aboobo cilakatazya kweezyeezya kuti mulombe uucili muniini mbuli Samuele inga wabuka mafwumofwumo, kuunka kuli Eli akumwaambila cabusicamba mulumbe walubeta lwa Jehova uuyoosya. Ibbaibbele litwaambila kuti Samuele “wakaliyoowede kwaambila Eli kujatikizya cilengaano eeci.” Nokuba boobo, Leza wakacisalazya kuli Eli kuti wakali kwiita Samuele. Aboobo Eli wakaambila Samuele kuti aambe. Eli wakati: ‘Utandisisi noliba jwi lyomwe akati kamajwi oonse ngaakwaambila.’ Cakulibombya Samuele “wakaamba zyoonse nzyaakaambilwa.”

5 Mulumbe ngwaakaamba Samuele tiiwakamugambya Eli. Ulikozyenye amulumbe “muntu wa Leza” uutaambidwe zina ngwaakaambide kale kumupaizi mupati ooyu. (1Sam. 2: 27-36) Cibalo eeci icijatikizya Samuele a Eli citutondezya mbwabikkila maano alimwi ambwali musongo Jehova.

6. Nziiyo nzi nzyotukonzya kwiiya kujatikizya Leza mbwaakagwasya mulombe Samuele?

6 Sena mucili mukubusi? Kuti naa mbocibede oobo, cibalo cijatikizya mulombe Samuele citondezya kuti Jehova ulibuzyi buyumuyumu mbomujana alimwi ambolimvwa. Ambweni mulaansoni alimwi cilamuyumina kwaambila bapati mulumbe wa Bwami naa cilamuyumina kwiindana abeenzinyoko. Amube alusyomo lwakuti Jehova ulilibambilide kumugwasya. Aboobo amumwaambile zyoonse zili mumoyo wanu mumupailo. (Int. 62:8) Kamuziyeeya zikozyanyo zyamu Bbaibbele mbuli camulombe Samuele. Alimwi kamubandika a Banakristonyoko, tacikwe makani mbana naa mbapati, aabo ibakazunda buyumuyumu mbuli mbomujana. Cakutadooneka, balakonzya kumwaambila ziindi Jehova naakabagwasya, ambweni munzila njobatakali kuyeeyela.

MUSA MBWAAKABIKKILWA MAANO

7, 8. Mbuti Jehova mbwaakamubikkila maano Musa?

7 Ciindi Musa naakajisi myaka yakuzyalwa iili 80, Jehova wakamupa mulimo uukatazya kapati. Musa wakeelede kwaangununa bana Israyeli  kuzwa mubuzike mu Egepita. (Kul. 3:10) Mbwaanga Musa wakabeleka kali mweembezi ku Midiyani myaka iili 40, kweelede kuti wakagambwa kupegwa mulimo ooyu. Wakaamba kuti: “Ino ndime ni kuti nduunke kuli Farao akuti ndikagwisye bana Israyeli mu Egepita.” Leza wakaambila Musa kuti: “Ndiyooba anduwe.” (Kul. 3:11, 12) Alimwi wakamusyomezya kuti: Baalu babana Israyeli “bayooswiilila jwi lyako.” Nokuba kuti Musa wakaambilwa cisyomezyo eeci, wakaingula kuti: ‘Ino kuti bakakake kuswiilila?’ (Kul. 3:18; 4:1) Munzila imwi, Musa wakali kukazya Leza. Pele Jehova wakazumanana kukkazika moyo. Mane buya wakamupa nguzu zyakucita maleele, alimwi ngowakaba muntu wakusaanguna kuba anguzu zili boobo.—Kul. 4:2-9, 21.

8 Musa wakazumanana kupa twaambo twakulitamizya, kaamba kuti takonzyi kwaambaula kabotu. Mukwiingula, Leza wakamwaambila kuti: “Ndinooli anduwe noambaula, alimwi ndiyookuyiisya nzyoyelede kwaamba.” Sena Musa wakazumina? Peepe, nkaambo cakulibombya wakalomba Leza kuti atume buyo muntu uumbi. Aboobo Jehova wakanyema. Pele tanaakaleka kumubikkila maano Musa, muciindi caboobo, wakasala Aroni kuba mwiiminizi wa Musa.—Kul. 4:10-16.

9. Mbuti luse akukkazika moyo kwa Jehova mbokwagwasya Musa kuba musololi mubotu?

9 Ino cibalo eeci cituyiisya nzi kujatikizya Jehova? Mbwali Leza Singuzuzyoonse, wakali kukonzya kumukonga Musa kutegwa azumine cakufwambaana. Muciindi caboobo, Jehova wakatondezya luse akukkazika moyo, wakacita oobo kwiinda mukusyomezya mubelesi wakwe uulicesya kuti wakali kuyoomugwasya. Sena nzila eeyi yakabeleka? Inzya! Musa wakaba musololi mubotu iwakasola kweendelezya bamwi calubomba mbubwenya Jehova mbwaakamweendelezya.—My. 12:3.

Sena mulamwiiya Jehova ciindi nomweendelezya bamwi? (Amubone muncali 10)

10. Ino tugwasyigwa buti ciindi notubabikkila maano bamwi mbubwenya mbwacita Jehova?

10 Ziiyo nzyotukonzya kwiiya: Sena muli mulumi, muzyali, naa mwaalu mumbungano? Ikuti naa mbocibede oobo, nkokuti kuli nguzu  nzyomujisi zyakweendelezya bamwi. Aboobo cilayandika kapati kulindinywe kumwiiya Jehova kwiinda mukuba bantu babikkila maano, basilubomba, alimwi ibakkazika moyo ciindi nomweendelezya baabo mbomulanganya! (Kol. 3:19-21; 1Pet. 5:1-3) Ciindi nomusola kumwiiya Jehova alimwi a Musa Mupati, Jesu Kristo, muyoopa kuti bantu kabaanguluka kubandika andinywe, alimwi muyoobakulwaizya. (Mt. 11:28, 29) Alimwi muyooba cikozyanyo cibotu kulimbabo.—Heb. 13:7.

MUFWUTULI SINGUZU PELE ULABIKKILA MAANO

11, 12. Ciindi Jehova naakali kusololela bana Israyeli kuzwa mu Egepita, mbuti mbwaakabapa kulimvwa kukwabililwa?

11 Ciindi bana Israyeli nobakazwa mu Egepita mu 1513 B.C.E., beelede kuti bakali kwiinda ku 3 miliyoni. Akati kabo kwakali bana, bapati, alimwi ambweni bamwi bakali kuciswa naa bakali balema. Kusololela bantu banji boobo kuti bazwe mu Egepita kwakali kuyandika Musololi uumvwisya alimwi uubikkila maano. Jehova, kwiinda muli Musa, wakacita oobo. Aboobo bana Israyeli bakalimvwa kuti balikwabilidwe ciindi nobakasiya munzi ulikke ngobakazyi.—Int. 78:52, 53.

12 Mbuti Jehova mbwaakapa kuti bantu bakwe balimvwe kukwabililwa? Cakusaanguna, wakabagwasya kweenda “kabotu-kabotu kuzwa mucisi ca Egepita mbuli nkamu zyabasikalumamba.” (Kul. 13:18) Eeci cakapa bana Israyeli kusyoma kuti Leza ngowakali kubeendelezya. Cabili, kutegwa atondezye kuti wakali ambabo, wakabelesya “kkumbi isyikati” mpoonya “amumuni wamulilo” masiku. (Int. 78:14) Munzila imwi, Jehova wakali kwaamba kuti: “Mutayoowi pe. Ndiyoomusololela akumukwabilila.” Masimpe, cisyomezyo eeci cakali kuyandika kapati!

Muunzila nzi Jehova mwaakababikkila maano bana Israyeli ku Lwizi Lusalala? (Amubone muncali 13)

13, 14. (a) Mbuti Jehova mbwaakababikkila maano bana Israyeli ku Lwizi Lusalala? (b) Mbuti Jehova mbwaakatondezya kuti ulaanguzu kapati kwiinda bana Egepita?

13 Amubale Kulonga 14:19-22. Amweezyeezye kuti muli antoomwe abana Israyeli, mwasinkilwa ampi ya Farao alimwi a Lwizi Lusalala. Mpoonya Leza wabweza ntaamu. Musumpuululu wakkumbi wazwa akuyakwiima musyule lyankamu yabana Israyeli, akusinkilila bana Egepita akubabikka mumudima. Pele nkamu yanu mpati, yalo ili mumumuni wamaleele. Mpoonya mwabona Musa katandabika janza lyakwe atala alwizi, alimwi guwo ilizwa kujwe lyaandaanya maanzi akujalula nzila. Mpoonya nywebo, mukwasyi wanu, banyama banu bavwubwa alimwi abantu bamwi mwatalika kweenda kabotu-kabotu anyika njumu kuya kulubazu lumbi. Mpoonya mwagambwa kuti nyika taijisi mankanda alimwi taitezemuki. Ninjumu, aboobo ncuubauba kweenda alinjiyo. Akaambo kaceeci, nobaba baabo beenda asyoonto-syoonto bacikonzya kusika kabotu kulubazu lumbi.

14 Amubale Kulonga 14:23, 26-30. Kazicitika zyoonse eezyi, Farao uulisumpula alimwi mufwuba-fwuba, wanjila mulwizi kumutobela. Alimwi Musa watandabika janza lyakwe atala aalwizi, mpoonya maanzi ajokela. Maanzi anyikizya Farao alimwi ampi yakwe. Kunyina naba omwe kati kabo iwafwutuka!—Kul. 15:8-10.

15. Ino cibalo eeci cituyiisya nzi kujatikizya Jehova?

15 Twabona kuzwa kucibalo eeci kuti Jehova ngu Leza waluumuno, ibube ibutupa kulimvwa kukwabililwa. (1Kor. 14:33) Kunze lyaboobo, Jehova ulatondezya kuti mweembezi siluyando uubikkila maano kubantu bakwe munzila zigwasya. Ulabeendelezya caluzyalo akubakwabilila kuli basinkondonyina. Eelo kaka alatukulwaizya makani aaya aamasimpe mbwaanga tulangila mamanino aabweende bwazintu oobu!—Tus. 1:33.

16. Tugwasyigwa buti kwiinda mukulanga-langa nzila Jehova mwaakabafwutula bana Israyeli?

 16 Ncimwi buyo amazuba aano, Jehova ulabalanganya bantu bakwe kabali mbunga, kumuuya alimwi akumubili. Uyoozumanana kucita oobo lyamapenzi mapati aaboola. (Ciy. 7:9, 10) Aboobo kufwumbwa naa tulibana naa tulicembeede, tulibalema naa pe, bantu ba Leza tabakalibiliki naa kuyoowa lyamapenzi mapati. * Alimwi buya, bayoocita ciindene aceeco! Bayooyeeya majwi aa Jesu Kristo aaya aakuti: “Amukaimikile akulanga mujulu, nkaambo lufwutuko lwanu lunooswenede afwaafwi.” (Lk. 21:28) Bayoozumanana kuba alusyomo oolo nociba ciindi Gogo aakubalwana, nkokuti nkamu yazisi yalo iiyoolibonya kuti ilaanguzu kapati kwiinda Farao wansiku. (Ezk. 38:2, 14-16) Nkaambo nzi bantu ba Leza ncobayoozumanana kuba alusyomo? Nkaambo balizyi kuti Jehova tacinci. Uyootondezya alimwi kuti ulalanganya alimwi akuti Mufwutuli uubikkila maano.—Is. 26:3, 20.

17. (a) Mbuti mbotukonzya kugwasyigwa kuzibalo zyamu Bbaibbele zijatikizya nzila Jehova mbwabalanganya bantu bakwe? (b) Ncinzi ncotuyoolanga-langa mucibalo citobela?

17 Zikozyanyo izili mucibalo eeci nzimwi buyo zyazikozyanyo izitondezya luse alimwi anzila Jehova mbwabikkila maano kubantu bakwe, mbwabasololela, alimwi ambwabafwutula. Nomuzinzibala kuyeeya zibalo zili boobu, amubikkile maano kuzintu zitondezya bube bwa Jehova nomuba munzila zitalibonyi. Kucita boobo kuyoopa kuti mubukkomanine kapati bube oobo, calo ciyooyumya luyando alimwi alusyomo lwanu mulinguwe. Mucibalo citobela tuyoolanga-langa nzila zijatikizya mbotukonzya kumwiiya Jehova mukubabikkila maano bamwi. Tuyoobikkila maano kumukwasyi, kumbungano ya Bunakristo, alimwi akumulimo wamumuunda.

^ munc. 3 Sikwiiya zyakaindi mu Juda wazina lya Josephus wakaamba kuti aciindi eeco Samuele wakajisi myaka yakuzyalwa iili 12.

^ munc. 16 Ncamaano kuyeeya kuti bamwi ibayoofwutuka lya Amagedoni banooli balema. Ciindi naakali anyika, Jesu wakaponya bantu bakajisi “malwazi aamisyobo yoonse,” calo citupa kubona zintu nzyayoocita kumbele, kutali kuli baabo bayoobusyigwa, pele aabo ibayoofwutuka lya Amagedoni. (Mt. 9:35) Tacidoonekwi buya kuti aabo bayoobusyigwa banooli kabotu.