“Iluyando lulayaka.”—1KOR. 8:1.

NYIMBO: 109, 121

1. Makani nzi aayandika kapati Jesu ngaakabandika abasikwiiya bakwe mubusiku bwakwe bwamamanino?

MUBUSIKU bwamamanino kali abasikwiiya bakwe, Jesu wakalwaamba luyando ziindi zitandila ku 30. Wakatondezya cacigaminina kuti basikwiiya bakwe beelede ‘kuyandana.’ (Joh. 15:12, 17) Luyando akati kabo lwakali kuyoolibonya kapati cakuti lwakali kuyootondezya kuti mbaasikumutobela bakasimpe. (Joh. 13:34, 35) Luyando oolu taluli lwakuupaupa buyo ameso pe. Jesu wakali kwaamba bube buyandika kapati, nkokuti luyando lwakulyaaba. Wakaamba kuti: “Kunyina uujisi luyando lwiinda loolu, lwakuti muntu umwi atuulile beenzinyina buumi bwakwe. Munooli beenzuma ikuti kamucita nzyondimulailila.”—Joh. 15:13, 14.

2. (a) Ncinzi ncotujana akati kababelesi ba Leza? (b) Mibuzyo nzi njotutiilange-lange mucibalo eeci?

2 Luyando lwakulyaaba alimwi alukamantano lwababelesi ba Jehova mazuba aano ncitondezyo cakuti mbantu ba Leza. (1Joh. 3:10, 11) Eelo kaka tulikkomene kuti luyando lwa Kristo nkoluli akati kababelesi ba Jehova, kunyina makani acisi nkobazwa, musyobo, mwaambo, naa bukkale bwabo! Nokuba boobo, tulakonzya kulibuzya kuti: ‘Nkaambo nzi luyando ncoluyandika kapati kwaambisya lino? Mbuti  Jehova alimwi a Jesu mbobatuyaka caluyando? Mbuti swebo lwesu kutugama mbotukonzya kutondezya luyando lwa Kristo ‘Iluyaka’?’—1Kor. 8:1.

KAAMBO LUYANDO NCOLUYANDIKA KAPATI, KWAAMBISYA LINO

3. Mbuti ‘ziindi eezyi zikatazya’ mbozibajatikizya bantu?

3 Akaambo kakuti buumi ‘buzwide buyo mapenzi amause,’ bantu banji ‘muziindi eezyi zikatazya ncobeni’ balaciswa malwazi aamumizeezo aayindene-indene. (Int. 90:10; 2Tim. 3:1-5) Bantu banji balimvwa kuti buumi bunyina mpindu. Kuyeeyelwa kuti bantu bainda ku 800,000 balafwa mwaka amwaka kwiinda mukulijaya, icaamba kuti mutuvwalu-vwalu tuli 40 kulafwa muntu omwe. Cuusisya ncakuti, nobaba Banakristo bamwi, baalilwa kuliyumya aboobo basala kulijaya.

4. Mbantu nzi bamu Bbaibbele ibakatondezya kuti bakali kuyanda kufwa?

4 Kaindi, babelesi ba Leza basyomeka bamwi bakalityompedwe kapati akaambo kabukkale bwabo cakuti tiibakacili kuyanda kuzumanana kupona. Mucikozyanyo, akaambo kakumvwa kucisa Jobu wakaamba kuti: “Buumi bwandicima; tandiyandi kuzumanana kupona.” (Job. 7:16; 14:13) Jona wakatyompwa kapati kweelana azintu mbozyakacitika kujatikizya mulimo wakwe cakuti wakaamba kuti: “Aboobo lino, O Jehova, kondinyanga buyo buumi, nkaambo cilainda kubota kuti ndafwa buyo kwiinda kuti kandipona.” (Jon. 4:3) Kuyungizya waawo, aciindi cimwi musinsimi uusyomeka Elija wakatyompya kapati akaambo kabukkale bwakwe cakuti wakalomba kuti afwe buyo. Wakaamba kuti: “Mbubo lino cabonwa! O Jehova, kondijaya buyo.” (1Bam. 19:4) Nokuba boobo, Jehova wakabakkomanina babelesi bakwe bakalyaabide aaba alimwi wakali kuyanda kuti bazumanane kupona. Muciindi cakubapa mulandu kujatikizya mbobakali kulimvwa, Jehova wakabagwasya kuzunda mizeezo njobakajisi yakuyanda kuti bafwe alimwi caluyando wakabayumya kutegwa bazumanane kumubelekela cakusyomeka.

5. Nkaambo nzi ncotweelede kubayanda bakwesu alimwi abacizyi kwaambisya lino?

5 Nokuba kuti bakwesu abacizyi tabajisi mizeezo yakuyanda kuti bafwe, banji mazuba aano bali mubukkale bukatazya kapati alimwi bayandika kukulwaizyigwa caluyando. Bamwi balapenzyegwa alimwi akufwubaazyigwa. Bamwi balatongookwa naa kuvwiigwa kumulimo. Bamwi balakatala kapati akaambo kakubeleka mawoola manji naa milimo iiminya. Alimwi bamwi balwana mapenzi amuŋanda aamana nguzu, ambweni kutongookwa angobakwetene limwi uutasyomi. Akaambo kabukkale buli boobu alimwi azintu zimbi, bantu banji mumbungano balimvwa kutyompwa alimwi akupenga mumizeezo. Nguni uukonzya kugwasya batyompedwe kuzumanana kuliyumya?

AMUYAKWE ALUYANDO LWA JEHOVA

6. Mbuti Jehova mbwabayaka babelesi bakwe caluyando?

6 Jehova ulabayaka bakombi bakwe kwiinda mukubaumbulizya aluyando lwakwe lutamani. Kweelede kuti bakakulwaizyigwa kapati bana Israyeli basyomeka nobakamvwa majwi aa Jehova aakuti: “Wakali kuyandika kapati mumeso aangu, wakalemekwa, alimwi mebo ndakuyanda. . . . Utayoowi pe, nkaambo ndilaanduwe”! (Is. 43:4, 5) Mbuli umwi wababelesi ba Jehova, mulakonzya kuba masimpe kuti Jehova ulamuyanda kapati. * Jwi lya Leza lisyomezya baabo ibali mubukombi busalala kuti: “Mbubonya mbuli sikalumamba singuzu, uyookufwutula. Uyoosekelela akaambo kanduwe kakkomene kapati.”—Zef. 3:16, 17.

7. Muunzila nzi luyando lwa Jehova mboluli mbuli lwamutumbu uunyosya? (Amubone cifwanikiso icili kumatalikilo aacibalo.)

 7 Kufwumbwa mapenzi ngobakonzya kujana bantu bakwe, Jehova usyomezya kubagwasya alimwi akubaumbulizya. “Nywebo muyoonyonka akunyamudwa akasolo, alimwi muyoosumpaudwa amagondo. Mbubonya mutumbu mbwaumbulizya mwanaakwe, andime ndiyoozumanana kumuumbulizya nywebo.” (Is. 66:12, 13) Eelo kaka cikozyanyo eeci cilakkazyika moyo, mutumbu siluyando uunyamuna mwanaakwe akasolo, naa kumusumpaula amagondo! Munzila eeyi Jehova utondezya mboluli lupati luyando lwakwe kubakombi bakwe basyomeka. Tacidoonekwi buya kuti nywebo mulayandika kapati kuli Jehova.—Jer. 31:3.

8, 9. Mbuti luyando lwa Jesu mbolukonzya kutuyumya?

8 Nkaaka kaambo akambi ikatupa kulukkomanina luyando lwa Leza: “Wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.” (Joh. 3:16) Eelo kaka nduyando lupati awalo Jesu ndwaakatondezya kwiinda mukwaaba buumi bwakwe akaambo kandiswe! Alimwi luyando oolu lulatukulwaizya kapati! Ijwi lya Leza lisyomezya kuti naaba “mapenzi, naa kukatazyigwa” tazikonzyi pe “kutwaandaanya kuluyando lwa Kristo.”—Rom. 8:35, 38, 39.

9 Ciindi notwajana masunko aakumubili, mumizeezo, naa kutyompwa kumuuya, luyando lwa Kristo lulakonzya kutupa nguzu zyakuliyumya. (Amubale 2 Bakorinto 5:14, 15.) Luyando lwa Jesu lulijisi nguzu zyakutugwasya alimwi akutukulwaizya kuzumanana, nokuba kuti tuli mumasunko aali mbuli ntenda, kupenzyegwa, kutyompwa, naa kulibilika kapati.

TWEELEDE KUBAYANDA BAKWESU

Kwiiya cikozyanyo ca Jesu kulakonzya kumukulwaizya (Amubone muncali 10 a 11)

10, 11. Mbaani bajisi mukuli wakukulwaizya bakwesu batyompedwe? Amupandulule.

10 Nzila imwi Jehova mwatuyaka caluyando nkwiinda mumbungano ya Bunakristo. Umwi aumwi, ulakonzya kutondezya luyando lwa Jehova kwiinda mukubayanda alimwi akubayaka bakwesu abacizyi kumuuya akubakulwaizya ciindi nobatyompedwe. (1Joh. 4:19-21) Mwaapostolo Paulo wakakulwaizya Banakristo kuti: “Amuzumanane kukulwaizyanya akuyakana umwi amweenzinyina, mbubonya mbomucita lino.” (1Tes. 5:11) Inzya, boonse mumbungano, ikutali buyo baalu, balakonzya kumwiiya Jehova alimwi a Jesu kwiinda mukubaumbulizya alimwi  akubakulwaizya bakwesu abacizyi.—Amubale Baroma 15:1, 2.

11 Ibamwi mumbungano ibajisi malwazi aamumizeezo ambweni inga bayandika lugwasyo kuzwa kuli basyaazibwene mukusilika alimwi amisamu. (Lk. 5:31) Baalu alimwi abamwi mumbungano cakulicesya balizyi kuti tabali basyaazibwene mukupa lugwasyo kubantu bajisi malwazi aamumizeezo. Nokuba boobo, balo alimwi abamwi mumbungano balizyi kuti balijisi lubazu lupati ndobeelede kucita, nkokuti ‘kuumbulizya aabo ibatyompedwe mumoyo, kugwasya aabo ibatajisi nguzu, akubakkazikila moyo bantu boonse.’ (1Tes. 5:14) Banakristo boonse beelede kutondezya lweetelelo munzila yaluyando alimwi akukkazika moyo, kuumbulizya kutegwa babakulwaizye aabo batyompedwe. Sena muli bantu baumbulizya alimwi ibakulwaizya bamwi? Kucizyiba mbomweelede kulupa lugwasyo oolo kuyoopa kuti muyaambele kuumbulizya alimwi akukulwaizya bamwi.

12. Amupe cikozyanyo cijatikizya muntu uumwi iwakagwasyigwa aluyando lwabasimbungano.

12 Mbuti mbolukonzya kubayumya luyando ndotubatondezya aabo ibajisi penzi lyamumizeezo? Mucizyi Munakristo umwi waku Europe, wakaamba kuti “Zimwi ziindi inga ndiyeeya kulijaya, pele ndilijisi bantu bali kabotu ibandigwasya. Basimbungano nkondizulilwa babukwabilila buumi bwangu. Bakwesu abacizyi lyoonse balandikulwaizya alimwi akundiyanda. Nokuba kuti mbasyoonto bazyi kuti ndijisi penzi lyakutyompwa, mbungano ilandibikkila maano lyoonse. Banabukwetene bamwi bali mbuli kuti mbazyali bangu bakumuuya. Balandilanganya kabotu, alimwi inga tulilimwi buzuba boonse.” Mubwini, bantu tabakonzyi kweelana mbobapa lugwasyo. Pele lugwasyo lwesu luzwa ansi aamoyo lulakonzya kubakulwaizya kapati aabo ibajisi penzi lyamumizeezo. *

MBOTUKONZYA KUBAYAKA BAMWI CALUYANDO

13. Ncinzi ciyandika kapati ikuti katuyanda kubayumya-yumya bamwi?

13 Amube muswiilizi mubotu. (Jak. 1:19) Kuswiilila calweetelelo ncitondezyo caluyando. Mulakonzya kubuzya mibuzyo cabupampu alimwi cabubombe kamujisi makanze aakumvwisya mbwalimvwide muntu ooyo uupengede. Kwiinda mukucita boobo, muyoocikonzya kutondezya lweetelelo alimwi akumuyumya mubelesinyoko. Mbomulibonya kubusyu kweelede kutondezya kuti mulibikkilide maano. Ikuti Munakristo umwi kayanda kumupandulwida zintu kabotu-kabotu, amukkazike moyo alimwi mutamunjili mukanwa pe. Kwiinda mukuswiilila cakukkazika moyo, ciyoomugwasya kumvwisya mbwalimvwa. Eeci ciyoopa kuti mukwesu naa mucizyi uupengede amusyome alimwi awalo uyooba aluyandisyo lwakuziswiilila nzyomumwaambila nomusola kumugwasya. Ikuti bamwi babona kuti mulababikkila maano, muyoobayumya kapati.

14. Nkaambo nzi ncotuteelede kubelesya majwi mabi?

14 Mutani kubelesyi majwi mabi. Muntu uutyompedwe inga waindila buya kutyompwa kuti wabona mbuli kuti tumufwubaazya buya. Aboobo inga catukatazya kumugwasya. “Majwi aambwa cakutayeeya alayasa mbuli panga, pele mulaka wabasongo ulaponya.” (Tus. 12:18) Nokuba kuti tatukonzyi ‘kumuyasa’ acaali muntu uutyompedwe kwiinda mukubelesya majwi mabi, pele tulakonzya kumutyompya  kapati ciindi notwaamba cakutayeeya. Kutegwa tubakulwaizye bamwi caluyando tweelede kutondezya lweetelelo, tweelede kusolekesya kusikila mpotugolela kulibikka muciimo cabo.—Mt. 7:12.

15. Ncibelesyo nzi ciyandika kapati ncotukonzya kubelesya kuyumya-yumya bamwi caluyando?

15 Amubaumbulizye bamwi kwiinda mukubelesya Jwi lya Leza. (Amubale Baroma 15:4, 5.) Magwalo aasalala ncibelesyo cibotu kapati kuumbulizya bamwi. Bbaibbele lyakazwa kuli “Leza uutupa kuliyumya aluumbulizyo.” Kunze aamagwalo aawumbulizya, tulijisi amabbuku aambi aabelesyegwa kwiiya Bbaibbele. Tulakonzya kubelesya Watch Tower Publications Index alimwi a Bbuku Ligwasya Kuvwuntauzya lya Bakamboni ba Jehova. Mabbuku aaya alakonzya kutugwasya kujana Magwalo aayaka kutegwa tucikonzye kuliyumya mumapenzi aali woonse. Alimwi mabbuku aaya alakonzya kutugwasya kuba bantu bazwidilila mukugwasya bamwi.

16. Mbube nzi mbotuyandika ciindi notukulwaizya Munakristo uutyompedwe?

16 Amube amoyo mubombe. Oobu mbube bubotu bwaluyando lwakulyaaba ndotutondezya ciindi notuumbulizya alimwi akuyumya-yumya bamwi. Jehova lwakwe kumugama ngu “Taata siluse a Leza siluumbulizyo loonse,” alimwi ujisi ‘moyo waluzyalo’ kubabelesi bakwe. (Amubale 2 Bakorinto 1:3-6; Lk. 1:78; Rom. 15:13) Paulo ncikozyanyo cibotu mumakani aaya, wakalemba kuti: “Twakaba batete myoyo akati kanu, mbubonya mbuli mutumbu uunyonsya mbwabalanganya kabotu bana bakwe. Aboobo, mbwaanga nywebo twakali kumuyanda kapati, twakali kuyandisya kumwaabila ikutali buyo makani mabotu aa Leza, pele abuumi bwesu, nkaambo mwakaba bayandwa besu.” (1Tes. 2:7, 8) Ciindi notutondezya moyo waluzyalo mbuli Leza, tulakonzya kuba bwiinguzi bwamipailo yamuntu uutyompedwe.

17. Nkubabona munzila iili buti bakwesu ikuyootugwasya kubayaka caluyando?

17 Mutani kuboni bamwi kuti balilondokede. Amubabone munzila yeelede bakwesu abacizyi. Kuti kamulangila kuti bakwesu lyoonse banoocita zintu mbuli kuti balilondokede, muyootyompwa. (Muk. 7:21, 22) Kamuyeeya kuti Jehova talangili zinji kubabelesi bakwe. Ikuti twaiya cikozyanyo cakwe, tunoolibambilide kukubona munzila yeelede kutalondoka kwabamwi. (Ef. 4:2, 32) Muciindi cakubatondezya kuti tabaciti kabotu, amubalumbaizye kuzintu nzyobacita. Kucita boobo kuyoobakulwaizya. Kulumbaizya kuzwa ansi aamoyo kulakonzya kubayaka bamwi caluyando alimwi akubagwasya kujana ‘kaambo kabapa kukondwa’ mumulimo wabo uusetekene. Kucita boobo inga kwagwasya muciindi cakulimvwa kucimwa akaambo kakulyeezyanya abamwi.—Gal. 6:4.

18. Ncinzi citukulwaizya kuyaka bamwi caluyando?

18 Mbelele ya Jehova iili yoonse ilayandika kapati kulinguwe alimwi akuli Jesu, iwakapa cituuzyo cacinunuzyo. (Gal. 2:20) Tulabayanda kapati bakwesu alimwi abacizyi bakumuuya. Alimwi tuyanda kubalanganya munzila yaluyando alimwi alweetelelo. Kutegwa tube bantu bakulwaizya, “atusungwaalile kucita zintu ziletela luumuno azintu iziyaka umwi aumwi.” (Rom. 14:19) Toonse tulangila kuciindi, nkokuti Paradaiso iiboola, mwalo munoonyina twaambo tunootutyompya! Kunoonyina kuciswa, nkondo, lufwu, kupenzyegwa, kulwana mumaanda, alimwi akutyompwa. Yaakwiinda Myaka Iili Cuulu, bantu banoolondokede. Aabo ibayoozwidilila musunko wamamanino bayooba bana ba Jehova Leza baanyika alimwi bayooba “alwaanguluko lwabulemu bwabana ba Leza.” (Rom. 8:21) Aboobo, atuzumanane kutondezya luyando iluyaka alimwi akugwasyanya umwi amweenzinyina kutegwa tukanjile munyika mpya ya Leza.

^ munc. 6 Amubone cibalo 24 cabbuku lyakuti Amubaa Acilongwe a Jehova.

^ munc. 12 Kutegwa mujane twaambo tugwasya kujatikizya mbomukonzya kulwana mizeezo yakuyanda kulijaya alimwi ambomulimvwa kujatikizya makani aaya, amubone zibalo izili mu Sinsimuka! izyakuti: “Nkaambo Nzi Ncotweelede Kuzumanana Kupona? Twaambo Totatwe Itutupa Kuzumanana Kupona” (April 2014); “Ciindi Nomulimvwa Kuti Buumi Bunyina Mpindu” (January 2012); alimwi acakuti, “Life Is Worth Living” (October 22, 2001).