“Kutabi muntu naba omwe uumunyanga bulumbu bwanu.”—KOL. 2:18.

NYIMBO: 122, 139

1, 2. (a) Ino babelesi ba Leza balangila bulumbu nzi? (b) Ino ncinzi citugwasya kulangisisya kubulumbu? (Amubone cifwanikiso icili kumatalikilo aacibalo.)

MBUBWENYA mbuli mwaapostolo Paulo, Banakristo bananikidwe amuuya mazuba aano balijisi coolwe citaliboteli cakutambula ‘bulumbu bwakujulu mbwabaitila Leza.’ (Flp. 3:14) Balangila kuyoobelekela antoomwe a Jesu Kristo mu Bwami bwakwe kujulu alimwi akugwasya bantu kuti bakalondoke. (Ciy. 20:6) Eelo kaka eeyo nimbaakani mbotu njobaitilwa a Leza kuti baijane! Ibambelele zimbi bajisi bulangizi bwiindene. Balangila kuyoojana bulumbu bwabuumi butamani anyika—eelo kaka oobo mbulangizi bukkomanisya!—2Pet. 3:13.

2 Kutegwa agwasye Banakristonyina bananike kuti bazumanane kusyomeka akujana bulumbu, Paulo wakabakulwaizya kuti: “Amuzumanane kubikkila maano zintu zyakujulu.” (Kol. 3:2) Lyoonse bakeelede kuyeeya bulangizi butaliboteli bwakutambula cikono cabo cakujulu. (Kol. 1:4, 5) Masimpe, kuyeeya zilongezyo Jehova nzyapa bantu bakwe kugwasya babelesi bakwe boonse kulangisisya kubulumbu, taakwe makani naa bulumbu bwabo mbwakujulu naa mbwaanyika.—1Kor. 9:24.

3. Ino Paulo wakagwasya Banakristonyina kuti bapakamane kuntenda nzi?

 3 Paulo alimwi wakagwasya Banakristonyina kupakamana kujatikizya ntenda izyakali kukonzya kubalesya kujana bulumbu. Mucikozyanyo, wakalembela mbungano yaku Kolose kujatikizya Banakristo bakubeja ibakali kuyanda kukkomaninwa a Leza kwiinda mumilimo ya Mulawo muciindi cakucita boobo kwiinda mulusyomo muli Kristo. (Kol. 2:16-18) Paulo alimwi wakabandika ntenda iziliko amazuba aano alimwi izikonzya kutulesya kujana bulumbu. Mucikozyanyo, wakapandulula mbotukonzya kukaka zisusi zyakutalilemeka, kulanganya mapenzi abasyomima, alimwi akulwana buyumuyumu mumukwasyi. Lulayo lwakwe mumakani aaya lulabeleka akulindiswe mazuba aano. Aboobo, atulange-lange kucenjezya kwaluyando kumwi kwa Paulo ikujanika mulugwalo ndwaakalembela bana Kolose.

AMUJAYE ZISUSI ZYAKUTALILEMEKA

4. Ino nkaambo nzi zisusi zyakutalilemeka ncozikonzya kutulesya kujana bulumbu?

4 Naakamana kuyeezya Banakristonyina kujatikizya bulangizi bwabo bubotu, Paulo wakalemba kuti: “Amujaye zizo zyamubili wanu eezyo zili anyika kujatikizya zisusi mbuli bwaamu, busofwaazi, luunyaunya, kunyomenena zintu zibi, alimwi abusyaacivwulemwangu.” (Kol. 3:5) Zisusi zyakutalilemeka zilakonzya kuba anguzu kapati alimwi zilakonzya kutulesya kubikkila maano kumbono zyakumuuya. Mukwesu umwi iwakazundwa azisusi zyakutalilemeka naakajokela mumbungano wakaamba kuti, “Ndakoongelezyegwa canguzu kapati cakuti ndakaalilwa kulilesya mane limwi ndakacita cibi.”

5. Ino mbuti mbotukonzya kulikwabilila mubukkale ibukonzya kutunjizya muntenda?

5 Cilayandika kapati kupakamana ciindi notuli mubukkale ibukonzya kutusunka kutyola zyeelelo zya Jehova zyakulilemeka. Mucikozyanyo, ncabusongo kubantu bayanda kukwatana kucisalazya kumatalikilo kwini mbobatalikila buyo kweebana, kujatikizya zyeelelo zigaminide nzyobeelede kutobela mumakani aakujatana, kumyontana, naa bukkale mobeelede kuba balikke. (Tus. 22:3) Kuyungizya waawo, bukkale ibukonzya kubikka muntu muntenda bulakonzya kuba ciindi Munakristo naunka kuyoobelekela kubusena bumbi naa ciindi Munakristo nabeleka amuntu ngobaindene zizo. (Tus. 2:10-12, 16) Ikuti naa mwajanika mubukkale buli boobo, amulizyibye kuti muli umwi wa Bakamboni ba Jehova, amubalemeke aabo mbomuyanzana limwi alimwi amuyeeye kuti kusobanya bantu mbomutakwetene limwi kulakonzya kumunjizya muntenda. Alimwi tulakonzya kuba muntenda kapati ciindi notutyompedwe. Muziindi zili boobo, tulakonzya kulombozya kuba amuntu uukonzya kutupa kulimvwa kuti tulayandwa kapati. Alimwi buya tulakonzya katuyandide kapati kuba amuntu uukonzya kutubikkila maano cakuti inga twazumina kufwumbwa muntu uukonzya kujanika. Ikuti naa camucitikila cili boobu, amulombe lugwasyo kuli Jehova alimwi akubantu bakwe kutegwa mutalekeli cintu cili coonse kumulesya kujana bulumbu.—Amubale Intembauzyo 34:18; Tusimpi 13:20.

6. Caboola kumakani aakusala zyakulikondelezya, ino ncinzi ncotweelede kuyeeya lyoonse?

6 Kutegwa tujaye zisusi zyakutalilemeka, tweelede kuzikaka zyakulikondelezya zitali kabotu. Ibunji bwabasikubamba zyakulikondelezya mazuba aano bajisi muuya iwakali mu Sodoma a Gomora. (Jud. 7) Beendelezi bambunga zibamba zyakulikondelezya basumpula mizeezo yabo kwiinda mukutondezya kuti kutalilemeka mumakani akoonana cili buyo kabotu alimwi kunyina ntenda zikonzya kutobela. Tatweelede kuliiba akuleka kulikwabilila, ikwiile kuzumina kufwumbwa zyakulikondelezya zyaboola. Tweelede kusala zyakulikondelezya iziyoopa kuti tuzumanane kugamika meso eesu kubulumbu bwabuumi.—Tus. 4:23.

 “AMULISAMIKE” LUYANDO ALUZYALO

7. Ino mapenzi nzi ngotukonzya kujana mumbungano ya Bunakristo?

7 Toonse tulazumina kuti kuba cibeela cambungano ya Bunakristo ncilongezyo cipati. Kwiiya Jwi lya Leza kumiswaangano yesu alimwi ambotugwasyanya umwi amweenzinyina munzila yaluyando alimwi yaluzyalo kulatugwasya kuzumanana kugamika meso eesu kubulumbu. Nokuba boobo, zimwi ziindi kutamvwana kulakonzya kuleta mapenzi akati kabakwesu abacizyi mumbungano. Ikuti naa twaalilwa kwaamana mapenzi aali boobo, alakonzya kupa kuti bantu batalike kubikkililana.—Amubale 1 Petro 3:8, 9.

8, 9. (a) Ino mbube nzi mbotweelede kuba ambubo ibuyootugwasya kujana bulumbu? (b) Ino ncinzi cikonzya kutugwasya kubamba luumuno ciindi Munakristoma naatunyemya?

8 Ino mbuti mbotukonzya kutalekela kubikkilila kutulesya kujana bulumbu? Paulo wakakulwaizya bana Kolose kuti: “Mbomuli bantu ba Leza basalidwe, basalala alimwi bayandwa, amulisamike luyando lwamoyo walubomba, luzyalo, kulicesya, kubomba moyo alimwi akukkazika moyo. Amuzumanane kweengelelana akulekelelana camoyo woonse nokuba kuti umwi kajisi kaambo kakutongooka mweenzinyina. Mbubonya Jehova mbwaakamulekelela camoyo woonse, andinywe mweelede kucita mbubonya oobo. Pele kunze lyazintu zyoonse eezyi, amulisamike luyando, nkaambo ncecaanzyo calukamantano cilondokede.”—Kol. 3:12-14.

9 Luyando aluzyalo zilakonzya kutugwasya kutegwa katulekelelana. Mucikozyanyo, ikuti twalimvwa bubi akaambo kamajwi naa ncaacita Munakristoma, tweelede kuyeeya kujatikizya ziindi zimwi notwakaamba naa notwakacita zintu zimwi calunya. Sena tatulumbi kuluyando aluzyalo ndobakatondezya bakwesu abacizyi nobakatulekelela ciindi notwakalubizya? (Amubale Mukambausi 7:21, 22.) Tulamulumba kapati Kristo akaambo kaluzyalo lwakwe ndwaakatondezya kwiinda mukuyobolola bakombi bakasimpe akubakamantanya. (Kol. 3:15) Toonse tuyanda Leza omwe, tukambauka mulumbe omwe, alimwi tuyaanya buyumuyumu bukozyene. Kwiinda mukulekelelana caluzyalo alimwi caluyando, tupa kuti kube lukamantano lwa Bunakristo alimwi akuzumanana kugamika meso eesu kubulumbu bwabuumi.

10, 11. (a) Ino nkaambo nzi bbivwe ncolitayandiki? (b) Ncinzi ncotukonzya kucita kutegwa tutalekeli bbivwe kutulesya kuyoojana bulumbu bwesu?

10 Zikozyanyo zitucenjezya izili mu Bbaibbele zituyeezya kuti kuba abbivwe kulakonzya kutulesya kujana bulumbu. Mucikozyanyo, Kaini wakaba abbivwe kumwanookwabo Abelo aboobo wakamujaya. Kora, Datani a Abiramu bakaba abbivwe kuli Musa alimwi bakatalika kumukazya. Kuyungizya waawo, Mwami Saulo wakaba abbivwe akaambo kakuzwidilila kwa Davida aboobo wakasola kuti amujaye. Aanu nkakaambo kaako Jwi lya Leza ncolyaamba kuti: “Kufwumbwa ooko ikuli munyono akukazyanya, alimwi kunooli manyongwe acintu cibi cili coonse.”—Jak. 3:16.

11 Ikuti naa twaba aluyando aluzyalo mumoyo wesu, tatukafwambaani kuba abbivwe. Ijwi lya Leza lyaamba kuti: “Luyando lulakkazika moyo alimwi lulaaluzyalo.” (1Kor. 13:4) Kutegwa tutalekeli moyo wesu kuba abbivwe, tweelede kusolekesya kubona zintu mbubonya mbwazibona Leza, nkokuti kubona bakwesu abacizyi kuti ncibeela camubili omwe wa Bunakristo. Eeci ciyootugwasya kuba alweetelelo kweelana ambolutondezya lulayo oolu lwakasololelwa amuuya lwakuti: “Ikuti cizo cimwi calemekwa, zizonyina zyoonse zilakkomana ancico.” (1Kor. 12:16-18, 26) Aboobo muciindi cakuba abbivwe, tuyookkomana ciindi bamwi nobalongezyegwa. Amulange-lange cikozyanyo ca Jonatani, imwana wa Mwami Saulo. Kunyina naakaba abbivwe ciindi Davida naakasalwa kuyookkala acuuno cabwami. Muciindi caboobo, wakamuyumya-yumya Davida. (1Sam. 23:16-18) Sena andiswe tatweelede kutondezya luyando alimwi aluzyalo mbubonya mbwaakacita Jonatani?

 AMUJANE BULUMBU MBULI MUKWASYI

12. Ino nkutobela lulayo luli lwamu Magwalo kuyootugwasya kujana bulumbu mbuli mukwasyi?

12 Kutobela njiisyo zyamu Bbaibbele kulakonzya kuleta lukkomano akukondwa kumukwasyi alimwi kulaugwasya mukwasyi kujana bulumbu. Ino ndulayo nzi lwamu Magwalo Paulo ndwaakapa mikwasyi ya Bunakristo ku Kolose? Wakaamba kuti: “Nywebo nobakaintu, amulibombye kubalumi banu, mbwaanga eeci ncibotu mu Mwami. Nywebo nobalumi, amuzumanane kubayanda bakaintu banu alimwi mutanoobanyemeni cakuzwa munzila. Nywebo nobana, amubamvwide bazyali banu muzintu zyoonse, nkaambo eeci cilakkomanisya mu Mwami. Nywebo nomausyi, mutanoobanyemyi bana banu, kutegwa batatyompwi.” (Kol. 3:18-21) Cakutadooneka muyoozumina kuti kutobela lulayo lwakasololelwa amuuya lwa Paulo kuyoobagwasya bamalumi, bamakaintu, alimwi abana.

13. Mbuti mucizyi Munakristo mbwakonzya kumukwelelezya kukasimpe mulumi wakwe uutasyomi?

13 Ino mbuti kuti naa kamuli mukaintu eelyo mulimvwa kuti mulumi wanu uutasyomi tamulanganyi kabotu? Sena zintu zilakonzya kuba kabotu ikuti naa kamukazyanya kujatikizya mbwalilemeka? Nokuba kuti mwazwidilila mukupa kuti kacita nzyomuyanda, sena muyoomukwelelezya kukasimpe? Eeco tacilangilwi pe. Pele ikuti naa mwatondezya bulemu kubusilutwe bwamulumi wanu, mulakonzya kupa kuti kube luumuno mumukwasyi,  muyootembaula Jehova alimwi buya mulakonzya kumukwelelezya mulumi wanu kwiiya kasimpe; aboobo nyoonse mulakonzya kujana bulumbu.—Amubale 1 Petro 3:1, 2.

14. Ino ncinzi ncayelede kucita mulumi Munakristo ikuti mukaintu wakwe katamulemeki?

14 Ino mbuti kuti naa kamuli mulumi eelyo mulimvwa kuti mukaintu wanu uutasyomi tamupi bulemu? Sena muyoopa kuti atalike kumulemeka ikuti kamumubwentela kutegwa mumutondezye kuti ndendinywe mupati? Peepe! Leza uyanda kuti busilutwe bwanu kamubucita caluyando, ikwiiya Jesu. (Ef. 5:23) Jesu ulabutondezya busilutwe bwakwe kumbungano cakukkazika moyo. (Lk. 9:46-48) Kwiinda mukwiiya cikozyanyo ca Jesu, mulumi ulakonzya kumukwelelezya mukaintu wakwe kubukombi bwakasimpe.

15. Mbuti mwaalumi Munakristo mbwatondezya luyando kumukaintu wakwe?

15 Balumi baambilwa kuti: “Amuzumanane kubayanda bakaintu banu alimwi mutanoobanyemeni cakuzwa munzila.” (Kol. 3:19) Mulumi siluyando ulamulemeka mukaintu wakwe kwiinda mukuswiilila mizeezo yakwe alimwi akumusyomezya kuti ulazibikkila maano zintu nzyaamba. (1Pet. 3:7) Nokuba kuti talili lyoonse nakonzya kucita zyoonse nzyalomba mukaintu wakwe, kanji-kanji ulasala cabusongo kwiinda mukumubuzya kuti aambe mizeezo njajisi mumakani aamwi. (Tus. 15:22) Mulumi siluyando ulasoleka kupa kuti mukaintu wakwe kamulemeka kwiinda muzintu zibotu nzyacita ikutali kumusinikizya buya pe. Mulumi uumuyanda mukaintu wakwe alimwi abana bakwe ulalangilwa kuba amukwasyi uubelekela Jehova calukkomano alimwi akujana bulumbu bwabuumi.

Ino mbuti mbotukonzya kutalekela buyumuyumu bwamumukwasyi kutulesya kujana bulumbu? (Amubone muncali 13-15)

NOBAKUBUSI—MUTALEKELI CINTU CILI COONSE KUMULESYA KUJANA BULUMBU!

16, 17. Mbomuli bakubusi, mbuti mbomukonzya kutantamuka kutyompwa kapati akaambo kabazyali banu?

16 Mbuti kuti muli bakubusi alimwi mulimvwa kuti bazyali banu Banakristo tabamumvwisyi alimwi tabamupi lwaanguluko lwakucita zintu? Kutyompwa mane kulakonzya kumupa kudooneka akubona mbuli kuti kubelekela Jehova tacigwasyi. Pele ikuti mwalekela kutyompwa kuti kumupe kucileka kubelekela Jehova, kalitanalampa mulakonzya kujana kuti kunyina muntu uumubikkila maano kapati kwiinda bazyali banu ibayoowa Leza alimwi ambungano yanu.

17 Ikuti naa bazyali banu nobatakali kumululamika, sena nomwatali kulibuzya kuti naa balamubikkila maano ncobeni? (Heb. 12:8) Pele ambweni ninzila njobabelesya bazyali banu kumulaya iimupa kunyema. Muciindi cakubikkila maano mbuli mbobamulaya, amusole kubona ambweni kuli kaambo ncobacitila boobo. Aboobo amukkazike moyo alimwi mutanoonyemi kapati ikuti bamwaambila majwi aatali kabotu. Ijwi lya Leza lyaamba kuti: “Muntu uujisi luzyibo ulalijata kwaambaula, alimwi muntu uulaamaano ulazumanana kukkazika moyo.” (Tus. 17:27) Amulibikkile mbaakani yakuba muntu uusimide uukonzya kutambula lulayo cakukkazika moyo, akugwasyigwa alulayo oolo kakunyina kubikkila kapati maano kujatikizya mbolwakapegwa. (Tus. 1:8) Ncilongezyo ikuba abazyali basyoma ibamuyanda ncobeni Jehova. Cakutadooneka inga bayanda kumugwasya kutegwa mukajane bulumbu bwabuumi.

18. Ino nkaambo nzi ncomukanzide kuzumanana kugamika meso aanu kubulumbu?

18 Bulumbu mbotulangila—mbubotu kapati kubuyeeya—tacikwe makani naa mbwabuumi butafwi kujulu naa mbwabuumi butamani aanyika muparadaiso. Mbulangizi businizyide, ibuyeeme acisyomezyo ca Mulengi kumugama. Kujatikizya Paradaiso aanyika, Leza waamba kuti: “Nyika iyoozula luzyibo lwa Jehova.” (Is. 11:9) Kuciindi eeco boonse ibanoopona anyika bayooyiisyigwa a Leza. Masimpe oobu mbulumbu mbotweelede kulwanina kubujana. Aboobo amuzumanane kuyeeya zisyomezyo zya Jehova, alimwi mutalekeli cintu cili coonse kumulesya kujana bulumbu!