“Mubusongo Jehova wakabikka ntalisyo yanyika. Wakakkazikizya majulu cabupampu.”—TUS. 3:19.

NYIMBO: 105, 107

1, 2. (a) Ino bantu bamwi balimvwa buti ciindi nobamvwa kuti Leza ulijisi mbunga? (b) Ino tulabandika nzi mucibalo eeci?

SENA Leza ulijisi mbunga? Bantu bamwi inga baamba kuti, “Takuyandiki kuti mane buya mube mumbunga iimusololela pe. Iciyandika kapati, nkuba acilongwe cimugeme a Leza.” Sena muzeezo ooyu uliluzi? Ino twaambo twamasimpe tutondezya nzi?

2 Mucibalo eeci, tulabandika bumboni ibutondezya kuti Jehova, Leza waluumuno, ngu Leza uucibwene kubamba kabotu zintu. Alimwi tulalanga-langa ncotweelede kucita ikuti naa twatambula malailile aazwa kumbunga ya Jehova. (1Kor. 14:33, 40) Mumwaanda wamyaka wakusaanguna C.E. alimwi amazuba aano, Magwalo abagwasya aabo ibali mumbunga ya Jehova yaanyika ikucita mulimo uuyandika kapati wakukambauka makani mabotu. Akaambo kakuti tulazitobela nzyolyaamba Bbaibbele alimwi amalailile aazwa kumbunga, eeci cipa kuti mbungano zyoonse kazisalala, kazili muluumuno, alimwi kazikamantene.

JEHOVA, LEZA UUCIBWENE KUBAMBA KABOTU ZINTU

3. Ino ncinzi cimupa kusyoma kuti Jehova ngu Leza uucibwene kubamba kabotu zintu?

3 Zilenge zitondezya kuti Leza nguucibwene kubamba kabotu  zintu. Bbaibbele lyaamba kuti: “Jehova wakabikka ntalisyo yanyika. Wakakkazikizya majulu cabupampu.” (Tus. 3:19) Tuzyi buyo ‘mayaayila aanzila zya Leza,’ alimwi “nzyetwamvwa nkuvwiya-vwiya buyo kwamakani aajatikizya nguwe.” (Job. 26:14) Nokuba boobo, iluzyibo lusyoonto ndotujisi kujatikizya mapulaneti, nyenyeezi, alimwi amilalabungu zitupa kuzumina kuti zintu zyamujulu eezyi zibambidwe kabotu ncobeni. (Int. 8:3, 4) Milalabungu ijisi mamiliyoni aanyenyeezi, zyalo izyeenda kabotu mujulu kakunyina kupwayana. Mapulaneti aali mububumbo aleenda mutuzila kuzinguluka zuba mbuli kuti atobela milawo yamumugwagwa! Ikulanga zintu izili mububumbo izigambya kapati zilatugwasya kubona kuti Jehova, ooyo ‘iwakalenga majulu cabusongo’ alimwi anyika, tweelede kumutembaula, kumusyoma alimwi akumukomba.—Int. 136:1, 5-9.

4. Ino nkaambo nzi basayaansi ncobaalilwa kwiingula mibuzyo minji?

4 Basayaansi bayubununa zintu zinji kujatikizya bubumbo alimwi anyika, eeci catugwasya kapati mumbazu ziindene-indene zyabuumi bwesu. Pele kuli mibuzyo minji basayaansi njobaalilwa kwiingula. Mucikozyanyo, basikwiiya zyamujulu tabakonzyi kutwaambila kabotu-kabotu kujatikizya mbobwakaba bubumbo naa ikaambo ncotuli aapulaneti eeyi iitwa kuti Nyika antoomwe azilenge zimbi. Alimwi bantu tabakonzyi kupandulula ikaambo bantu ncobajisi luyandisisyo lwakupona kukabe kutamani. (Muk. 3:11.) Ino nkaambo nzi ncokuli mibuzyo iiyandika kapati minji pele iitajisi bwiinguzi? Akaambo kakuti basayaansi banji alimwi abantu bamwi buyo basumpula mizeezo iitali yabuna Leza alimwi anjiisyo yakusanduka. Pele mu Bbuku lyakwe, Jehova ulayiingula mibuzyo iikatazya bantu munyika yoonse.

5. Muunzila nzi milawo yeendelezya zilengwaleza moitugwasya?

5 Tusyoma milawo yeendelezya zilengwaleza iitacinci eeyo Jehova njaakabikka. Basikubamba magesi, basikubamba mipaipi, basyaabupampu mukupanga zintu, basikweenzya ndeke, bamadokota—aaba boonse basyoma milawo eeyi kutegwa babeleke milimo yabo. Mucikozyanyo, ciindi bamadokota nobaandula muntu, inga balizyi cizo camuntu mpocijanika. Aboobo dokota tayandiki kutalika kulangaula buya mpoujanika moyo wamuntu. Toonse tulailemeka milawo yeendelezya zilengwaleza. Kutatobela mulawo wanguzu zikwelela ansi kulakonzya kutunjizya muntenda mpati!

KUKAMANTANIZYIGWA A LEZA

6. Ino nkaambo nzi ncotweelede kulangila kuti bakombi ba Jehova kabakamantene?

6 Bubumbo bubambidwe kabotu ncobeni alimwi munzila iigambya. Aboobo tacidoonekwi kuti Jehova ulangila kuti abalo bakombi bakwe kabakamantene. Nkakaambo kaako Leza wakatupa Bbaibbele kutegwa kalitusololela. Kupona kakunyina lugwasyo kuzwa kumbunga ya Leza alimwi azyeelelo zyakwe inga kwatupa kutakkomana alimwi akupenga kapati.

7. Ncinzi citondezya kuti Bbaibbele ndibbuku lilembedwe kabotu?

7 Ibbaibbele talili bbuku-bbuku buyo lijisi mabbuku aanjilene-njilene aamba kujatikizya ba Juda alimwi a Banakristo. Muciindi caboobo, ndibbuku lilembedwe kabotu—ibbuku lyaalubazu ilyakasololelwa a Leza. Mabbuku aaindene-indene aamu Bbaibbele aliswaangene kapati. Kuzwa kubbuku lya Matalikilo kusikila ku Ciyubunuzyo, Bbaibbele lijisi mutwe wamakani mupati wakuti—kusumpulwa kwabweendelezi bwa Jehova alimwi akuzuzikizyigwa kwamakanze aakwe kujatikizya nyika kwiinda mu Bwami bweendelezyegwa a Kristo, “lunyungu” ilwakasyomezyegwa.—Amubale Matalikilo 3:15; Matayo 6:10; Ciyubunuzyo 11:15.

8. Nkaambo nzi ncotukonzya kwaambila kuti bana Israyeli bakalikamantene?

8 Bantu bamu Israyeli yansiku bakali cikozyanyo  cibotu cambunga iikamantene. Mucikozyanyo, kweelana a Mulawo wa Musa, kwakali “bamakaintu ibakali kubeleka cabulondo amulyango watente lyakuswaanganina.” (Kul. 38:8) Kulonga kwabana Israyeli kuzwa kubusena bumwi kuunka kuli bumbi alimwi akulonzya tente lyakuswaanganina zyakali kucitwa cabulondo. Kumbele, Mwami Davida wakabunganya ba Levi alimwi abapaizi munkamu izyakali kubeleka kabotu. (1Mak. 23:1-6; 24:1-3) Ciindi bana Israyeli nobakali kumvwida Jehova, zintu zyakali kubeendela kabotu, bakali kuba muluumuno alimwi bakali kukamantana.—Dt. 11:26, 27; 28:1-14.

9. Ino ncinzi citondezya kuti mbungano zya Banakristo bamumwaanda wamyaka wakusaanguna zyakalikamantene?

9 Mbungano zya Banakristo bamumwaanda wamyaka wakusaanguna zyakalikamantene, alimwi zyakali kugwasyigwa abusolozi bwakabunga keendelezya, aako kumatalikilo ikakali kupangwa abaapostolo. (Mil. 6:1-6) Mukuya kwaciindi, bakwesu bamwi bakayungizyigwa kukabunga keendelezya. (Mil. 15:6) Busolozi alimwi amalailile akali kupegwa kwiinda mumagwalo aakasololelwa amuuya aakalembwa abaalumi ibakali cibeela naa ibakali kubelekela antoomwe akabunga keendelezya kamumwaanda wamyaka wakusaanguna. (1Tim. 3:1-13; Tit. 1:5-9) Ino mbungano zyakagwasyigwa buti akaambo kakutobela busolozi bwakabunga keendelezya?

10. Ncinzi cakacitika ciindi mbungano zyamumwaanda wamyaka wakusaanguna nozyakatobela milawo yakazuminanwa akabunga keendelezya? (Amubone cifwanikiso icili kumatalikilo aacibalo.)

10 Amubale Milimo 16:4, 5Bakwesu ibakali kweendeenda ikwiiminina kabunga keendelezya bakali kuyaabwaambila bamwi “milawo eeyo yakazuminanwa abaapostolo abaalu ibakali mu Jerusalemu kuti kabatobela njiyo.” Ciindi bantu mumbungano nobakali kutobela milawo eeyi, “bakazumanana kuyumizyigwa mulusyomo alimwi bakali kuyaabuvwula buzuba abuzuba.” Sena kuli ciiyo ciliko mucibalo camu Bbaibbele eeci ncotukonzya kwiiya mazuba aano mumbunga ya Leza?

SENA MULAATOBELA MALAILILE?

11. Ino mbuti baalumi ibasalidwe mbobeelede kucita ikuti batambula malailile kuzwa kumbunga ya Leza?

11 Ino ncinzi ncobeelede kucita aabo ibali muma Kkomiti Aamitabi naa ma Kkomiti Aacisi, balangizi bamabazu, alimwi abaalu mumbungano ciindi nobatambula malailile kuzwa kumbunga ya Leza mazuba aano? Ibbuku lya Jehova litulailila kuti toonse katumvwida alimwi akulibombya. (Dt. 30:16; Heb. 13:7, 17) Muuya wabuzangi tauyandiki mumbunga ya Leza, nkaambo muuya uuli boobo ulakonzya kunyonganya luumuno ndotujisi alimwi alukamantano mumbungano. Kunyina Munakristo uusyomeka uunga wayanda kutondezya muuya wakubula bulemu alimwi akutasyomeka mbuli ngwaakatondezya Diotrefe. (Amubale 3 Johane 9, 10.) Tulakonzya kulibuzya kuti: ‘Sena ndilabagwasya kusima kumuuya aabo mbondiyanzana limwi? Sena ndilafwambaana kubweza ntaamu yakutobela malailile aapegwa abakwesu ibasololela?’

12. Ino nkucinca nzi kwakacitwa kujatikizya mbobasalwa baalu alimwi abakutausi?

12 Amuyeeye kujatikizya kusala nkobakacita caino-ino bamu Kabunga Keendelezya. Cibalo cakuti “Mibuzyo Yabasikubala” mu Ngazi Yamulindizi yamu November 15, 2014, cakapandulula kucinca kwakacitwa kujatikizya mbobasalwa baalu alimwi abakutausi. Cibalo eeci cakatondezya kuti kabunga keendelezya kamumwaanda wamyaka wakusaanguna kakapa balangizi beendeenda nguzu zyakusala baalu abakutausi. Ikutobela nzila njimunya eeyo, kutalikila mu September 1, 2014, balangizi bamabazu bali kusala baalu alimwi abakutausi. Mulangizi wabbazu ulasoleka kuti abazyibe kabotu baalumi aabo ibalumbaizyigwa alimwi akubeleka ambabo mumulimo wamumuunda ikuti kacikonzyeka. Ulaulangilila mukwasyi wamukwesu ooyo uuli mukulangwa-langwa. (1Tim. 3:4, 5)  Kabunga kabaalu alimwi amulangizi wabbazu balalanga-langa cakubikkila maano zyeelelo zyamu Magwalo zyabakutausi alimwi abaalu.—1Tim. 3:1-10, 12, 13; 1Pet. 5:1-3.

13. Ino inga twatondezya buti kuti tulabuzumina busolozi mbotutambula kwiinda mubaalu?

13 Tweelede kubutobela busolozi mbobapa baalu ibuzwa mu Bbaibbele. Beembezi aaba basyomeka ibali mumbunga ya Leza basololelwa ‘amalailile mabotu,’ naa ‘malailile aagwasya,’ aazwa mu Bbuku lyakwe. (1Tim. 6:3; bupanduluzi buyungizyidwe) Amuyeeye lulayo Paulo ndwaakapa kujatikizya baabo ibapilingene ibali mumbungano. Bantu bamwi ‘tiibakali kuyanda kubeleka abuniini pele bakali kwiile kulinjizya mumakani aatabajatikizyi.’ Cakutadooneka bakalulamikwa abaalu, pele bakazumanana kuunduluzya lulayo. Ino basimbungano bakeelede kumulanganya buti muntu uuli boobo? Paulo wakalailila boobu: “Amumucenjelele kapati ooyo alimwi amuleke kuyanzana anguwe.” Lulayo oolo lwakali buyo kabotu nkaambo alimwi wakacenjezya kuti muntu uuli boobo tabeelede kumubona mbuli kuti ngusinkondonyina. (2Tes. 3:11-15) Mazuba aano, baalu balakonzya kupa makani aakucenjezya kujatikizya muntu uumwi uuzumanana kuba mubukkale ibusampaula mbungano, mbuli kweebana amuntu uutasyomi. (1Kor. 7:39) Ino mulimvwa buti ciindi baalu nobapa makani aali boobu? Kuti kamumuzyi muntu iwaambwa mumakani aayo, sena muyoosoleka kumutantamuka? Ikubikkila maano kwanu alimwi akutazungaana kulakonzya kupa kuti muntu ooyo aileke nzila yakwe iitali kabotu. [1]

AMUZUMANANE KUSALALA, KUBA MULUUMUNO AKUKAMANTANA

14. Mbuti mbotukonzya kutola lubazu mukupa kuti mbungano izumanane kusalala?

14 Tulakonzya kutola lubazu mukupa kuti mbungano kaisalala kumuuya kwiinda mukutobela busolozi bujanwa mu Jwi lya Leza. Amubone bukkale bwakacitika mu Korinto yansiku. Paulo wakalyaaba cakumaninina kukambauka mumunzi ooyo, alimwi wakali kubayanda ‘basalalinyina’ ooko. (1Kor. 1:1, 2) Pele kweelede kuti wakakatazyigwa kwaabandika makani aakutalilemeka alo aakali kulangwa buyo mumbungano eeyo! Paulo wakalailila baalu kwaaba mwaalumi ooyo kuli Saatani—nkokuti munzila imwi, kumugusya mumbungano. Kutegwa mbungano izumanane kusalala, baalu bakeelede kugwisya “bumena” ibwakaliko. (1Kor. 5:1, 5-7, 12) Ciindi notukamantana akusala kwabaalu kwakugusya sizibi uuteempwi mumbungano, tugwasya kuti mbungano izumanane kusalala alimwi ambweni akupa kuti muntu ooyo ayempwe akulomba kulekelelwa kuli Jehova.

15. Mbuti mbotukonzya kuzumanana kubamba luumuno mumbungano?

15 Kwakali penzi alimbi ku Korinto ilyakeelede kulanganyizyigwa. Bakwesu bamwi bakali kutola bakombinyina kunkuta. Paulo wakababuzya mubuzyo uupa kukkala ansi kuyeeya wakuti: “Nkaambo nzi ncomutalekeli buyo kuti mubisyilwe ndinywe?” (1Kor. 6:1-8) Bukkale buli boobu bulacitika amazuba aano. Zimwi ziindi, luumuno akati kabakwesu lwanyonganyizyigwa akaambo kakuti makwebo aatakeenda kabotu akapa kuti mali alobe alimwi ambweni buya akuyeeyela kuti kuli bumpelenge bumwi ibwakacitwa. Bamwi batola bakwesu kunkuta, pele Bbuku lya Leza lilatugwasya kubona kuti cilainda kubota kusweekelwa buyo kwiinda kusampaula zina lya Leza naa kunyonganya luumuno lwambungano. [2] Kutegwa tumane mapenzi mapati alimwi amazwanga, tweelede kutobela lulayo lwa Jesu. (Amubale Matayo 5:23, 24; 18:15-17.) Ikuti naa twacita oobo, tusumpula lukamantano mumukwasyi wa Bakombi ba Jehova.

16. Nkaambo nzi ncotweelede kulangila kuti bantu ba Leza banookamantene?

16 Bbuku lya Jehova lilatondezya ikaambo ncotweelede kulangila bantu bakwe kuti kabakamantene.  Sintembauzyo wakaimba kuti: “Amubone! Eelo kaka ncibotu alimwi cilakondelezya kuti babunyina kabakkede antoomwe calukamantano!” (Int. 133:1) Ciindi nobakali kumuvwida Jehova, bana Israyeli bakali kucita kabotu zintu alimwi bakalikamantene. Kaamba zintu ziyoocitika kumbele, Leza wakaamba kuti “Ndiyoobaleta antoomwe kabakamantene, mbubonya mbuli mbelele mucaanda canzizyo.” (Mik. 2:12) Kuyungizya waawo, Jehova wakasinsima kwiinda mumusinsimi Zefaniya kuti: “Ndiyoosandula mwaambo wabantu kuba mwaambo uusalala, kutegwa boonse kabaita zina lya Jehova, akuti kabamubelekela calukamantano [naa “kabamukomba calukamantano,” bupanduluzi buyungizyidwe].” (Zef. 3:9) Eelo kaka tulalumba kapati akaambo kacoolwe ncotujisi cakukomba Jehova calukamantano!

Baalu balasolekesya kupa lugwasyo lwakumuuya kumuntu iwaleya (Amubone muncali 17)

17. Kutegwa mbungano izumanane kukamantana alimwi akusalala, ino mbuti baalu mbobeelede kwaalanganya makani aajatikizya zibi zipati?

17 Kutegwa mbungano izumanane kukamantana alimwi akusala, baalu beelede kufwambaana kwaalanganya makani aalubeta alimwi akucita oobo munzila yaluyando. Paulo wakalizyi kuti luyando lwa Leza talweendelezyegwi buyo amajwi ngakonzya kwaamba muntu, alimwi Leza tabulangi buyo bubi ibucitika. (Tus. 15:3) Aboobo Paulo tanaakawayawaya kulemba lugwalo lwa 1 Bakorinto, lugwalo ilujisi lulayo lulaanguzu pele ilwakalembwa caluyando. Lugwalo lwa 2 Bakorinto, ilwakalembwa myezi yakatobela, lutondezya kuti kwakaba kuyaambele akaambo kakuti baalu bakaatobela malailile Paulo ngaakapa. Ikuti Munakristo waleya katazyi walo, baalumi beelela beelede kusola kumululamika camoyo uubombede.—Gal. 6:1.

18. (a) Muunzila nzi lulayo luli mu Jwi lya Leza mbolwakagwasya mbungano zyamumwaanda wamyaka wakusaanguna? (b) Ncinzi ciyoobandikwa mucibalo citobela?

18 Cilisalede kuti lulayo ilwakasololelwa amuuya iluli mu Bbuku lya Leza lwakabagwasya Banakristo bamumwaanda wamyaka wakusaanguna mu Korinto alimwi amumasena aamwi kutegwa bazumanane kusalala, kuba muluumuno alimwi akukamantana mumbungano zyabo. (1Kor. 1:10; Ef. 4:11-13; 1Pet. 3:8) Aboobo bakwesu alimwi abacizyi bakuciindi eeco bakacikonzya kugwasya bantu banji mumulimo wakukambauka. Nkakaambo kaako Paulo ncaakaambila kuti makani mabotu ‘akakambaukwa kuzilenge zyoonse zili ansi aajulu.’ (Kol. 1:23) Mazuba aano, luzyibo lwamakanze aa Leza luli mukumwaigwa munyika yoonse akaambo kakusolekesya kwabaabo ibali mucibeela cambunga yomwe iikamantene mukukambauka. Cibalo citobela ciyoopa bumboni abumbi ibutondezya kuti bantu aaba balalilemeka kapati Bbaibbele alimwi akuti bakanzide kuzumanana kulemeka Mwami Singuzuzyoonse Jehova.—Int. 71:15, 16.

^ [1] (muncali 13) Amubone bbuku lyakuti Bakamantene Mukucita Kuyanda kwa Jehova, peeji 134-136.

^ [2] (muncali 15) makani aamba kujatikizya bukkale Munakristo mwakonzya kusala kumutola kunkuta Munakristonyina, amubone bbuku lyakuti “Amuzumanane Kukkala Muluyando lwa Leza,” peeji 223, bupanduluzi buyungizyidwe.