“O Jehova, koyeeya mbondali kweenda kumbele lyako cakusyomeka acamoyo woonse.”—2BAM. 20:3.

NYIMBO: 52, 65

1-3. Ino ncinzi cijatikizyidwe mukubelekela Jehova “camoyo woonse”? Amupandulule.

AKAAMBO kakuti tatulondokede, tulabisya. Nokuba boobo, tulalumba akaambo kakuti Jehova tatucitili “kweelana azibi zyesu.” Muciindi caboobo, watupa cinunuzyo alimwi ulilibambilide kutulekelela ikuti tweempwa cakumaninina. (Int. 103:10) Aboobo, mbubwenya mbuli Davida mbwaakaambila Solomoni, kutegwa bukombi bwesu butambulike kuli Jehova, tweelede ‘kumubelekela camoyo woonse.’ (1Mak. 28:9) Pele ino mbuti swebo tobantu batalondokede mbotukonzya kucita oobo?

2 Kutegwa tugwasyigwe mumakani aaya, tulakonzya kweezyanisya buumi bwa Mwami Asa abwa Mwami Amaziya. Boonse bami aaba bobilo ba Juda bakacita zintu ziluleme mumeso aa Jehova, pele Asa wakacita oobo camoyo woonse. (2Mak. 15:16, 17; 25:1, 2; Tus. 17:3) Bami boonse bobilo aaba tiibakalondokede alimwi bakali kulubizya. Nokuba boobo, Asa kunyina naakaleya munzila zya Leza, akaambo kakuti moyo wakwe ‘wakalilyaabide cakumaninina kuli Leza.’ (1Mak. 28:9.) Kulubazu lumwi, Amaziya tanaakalilyaabide cakumaninina kuli Jehova. Naakamana kuzunda  basinkondonyina a Leza, wakaleta baleza bakubeja akutalika kubakomba.—2Mak. 25:11-16.

3 Kubelekela Leza “camoyo woonse” kubikkilizya kulyaaba kwini-kwini. Mu Bbaibbele, ibbala lyakuti “moyo” lyaamba muntu wamukati. Libikkilizya zintu nzyalombozya, nzyayeeya, nzyacita, mbwazibona zintu, alimwi ambaakani zyakwe. Aboobo muntu uubelekela Jehova amoyo wakwe woonse tali sikuupaupa ameso. Takombi Jehova cakwiinzya buyo mulawo. Ino mbuti kujatikizya ndiswe? Nokuba kuti tuli bantu batalondokede, ikuzumanana kubelekela Leza cakulyaaba, kuyootupa kumubelekela camoyo woonse.—2Mak. 19:9.

4. Ino ncinzi ncotutiilange-lange lino?

4 Kutegwa tumvwisye ncocaamba kubelekela Leza camoyo woonse, atulange-lange buumi bwa Asa alimwi abuumi bwabami ba Juda bamwi ibakabelekela Leza camoyo woonse—Jehosafati, Hezekiya alimwi a Josiya. Boonse aaba bone aciindi cimwi bakalubizya, nokuba boobo Jehova wakazumanana kubakkomanina. Ino nkaambo nzi Leza ncaakababona kuti bakamubelekela camoyo woonse, alimwi mbuti mbotukonzya kubaiya?

MOYO WA ASA “WAKALIMANINIDE KULI JEHOVA”

5. Ino nintaamu nzi zigaminide nzyaakabweza Asa?

5 Asa wakali mwami watatu wa Juda kuzwa ciindi bwami bwakunyika bwamisyobo iili kkumi bwa Israyeli nobwakaandaana. Wakakugwisya kukomba mituni alimwi abasankwa bakali kucita buvwuule kutempele mubulelo bwakwe. Nobaba bakaapanyina ba Maaka wakabanyanga cuuno cakuba “banyina mwami, nkaambo bakapangide mutuni uusesemya.” (1Bam. 15:11-13) Kuyungizya waawo, Asa wakakulwaizya bantu bakwe ‘kuyandaula Jehova . . . akutobela Mulawo akuubamba.’ Inzya, wakasumpula bukombi bwakasimpe.—2Mak. 14:4.

6. Ino ncinzi ncaakacita Asa ciindi bana Etiopiya nobakali kuyanda kuulwana munzi?

6 Jehova wakaulongezya munzi wa Juda aluumuno kwamyaka iili kkumi yakusaanguna yabulelo bwa Asa. Mpoonya Zera muna Etiopiya wakaboola kuzoolwana Juda abaalumi bali 1,000,000 alimwi ankalaki zili 300. (2Mak. 14:1, 6, 9, 10) Ino ncinzi ncaakacita Asa mumapenzi aaya? Wakatondezya lusyomo luyumu muli Jehova. (Amubale 2 Makani 14:11.) Mukwiingula mupailo wa Asa ngwaakapaila kuzwa ansi amoyo, Leza wakapa kuti azunde akwiinyonyoona mpi yabana Etiopiya. (2Mak. 14:12, 13) Noliba leelyo bami nobatakali kusyomeka kulinguwe, Jehova wakali kupa kuti kababazunda basinkondonyina akaambo kazina lyakwe. (1Bam. 20:13, 26-30) Asa wakasyoma Jehova Leza, aboobo wakayiingula mipailo yakwe. Nokuba boobo, aciindi cimwi Asa tanaakacita zintu cabusongo. Mucikozyanyo, wakalomba lugwasyo kumwami wa Siriya muciindi cakulomba kuli Jehova. (1Bam. 15:16-22) Nokuba boobo, Leza wakabona kuti moyo wa Asa “wakalimaninide kuli Jehova mubuumi bwakwe boonse.” Ino mbuti mbotukonzya kumwiiya Asa mukucita zibotu?—1Bam. 15:14.

7, 8. Mbuti mbomukonzya kwiiya Asa ciindi nomubelekela Jehova?

7 Umwi aumwi wesu weelede kuulingula moyo wakwe akubona naa ulilyaabide cakumaninina kuli Leza. Amulibuzye kuti, ‘Sena ndilikanzide kukkomanisya Jehova, kwiiminina bukombi bwakasimpe alimwi akukwabilila bantu bakwe kuzwa kukuyunga kubyaabi?’ Amuyeeye buyo busicamba mbwaakabelesya Asa kutegwa agwisye ba Maaka ibakali acuuno ‘cabanyina mwami’ mubulelo bwakwe! Ambweni kunyina ngomuzyi uucita zintu mbuli mbobakali kucita ba Maaka, pele kulakonzya kuba bukkale bumbi mbomukonzya  kwiiya busungu bwa Asa. Mucikozyanyo, ino mbuti kuti umwi wamukwasyi wanu naa mweenzinyoko wacita cibi, alimwi akugwisyigwa mumbungano? Sena mulakonzya kucileka kuyanzana amuntu ooyo? Ino moyo wanu inga wamukulwaizya kucita nzi?

8 Mbubwenya mbuli Asa, mulakonzya kutondezya kuti moyo wanu ulimaninide kuli Leza kwiinda mukumusyoma cakumaninina ciindi nomwasikilwa mapenzi naaba yaayo aalibonya kuti mapati kapati. Mulakonzya kufwubaazyigwa kucikolo akaambo kakuti muli Bakamboni ba Jehova. Mbomubeleka limwi kumulimo balakonzya kumusampaula akaambo kakubweza mazuba aakulyookezya kutegwa mucite zintu zyakumuuya naa akaambo kakutabeleka maovataimu kutegwa mujane mali manji. Mubukkale buli boobo, amupaile kuli Leza, mbubwenya Asa mbwaakacita. Cabusicamba amusyome Jehova alimwi akukakatila kuli ceeco ncomuzyi kuti cili kabotu alimwi akuti ncabusongo. Amuyeeye kuti Leza wakamuyumya-yumya alimwi akumugwasya Asa, andinywe uyoomuyumya-yumya.

9. Ciindi notukambauka, mbuti mbotukonzya kutondezya kuti myoyo yesu ilimaninide kuli Jehova?

9 Babelesi ba Leza tabalibikkili buyo maano lwabo beni. Asa wakasumpula bukombi bwakasimpe. Andiswe tweelede kugwasya bantu ‘kuyandaula Jehova.’ Cilamukkomanisya kapati Jehova nabona kuti twaambila bantu kujatikizya nguwe, katucita oobo akaambo kakuti tulamuyanda alimwi akaambo kakuti tulabubikkila maano bukkale bwabantu bamwi.

JEHOSAFATI WAKAYANDAULA JEHOVA

10, 11. Ino mbuti mbomukonzya kumwiiya Jehosafati?

10 Mwana wa Asa Jehosafati “wakazumanana kweenda munzila zya Asa usyi.” (2Mak. 20:31, 32) Ino mbuti mbwaakacita oobo? Mbubwenya mbuli bausyi, Jehosafati wakakulwaizya bantu kuyandaula Jehova. Wakacita oobo kwiinda mukubikka bubambe bwakuyiisya “bbuku lya Mulawo wa Jehova.” (2Mak. 17:7-10) Wakaunka akucilawo cakunyika cabwami bwa Israyeli, kucibeela camalundu a Efraimu, “ikuti abapilusye kuli Jehova.” (2Mak. 19:4) Jehosafati wakali mwami “iwakayandaula Jehova camoyo woonse.”—2Mak. 22:9.

11 Toonse tulakonzya kutola lubazu mumulimo wakuyiisya mupati Jehova ngwaazumizya kuti ucitwe mazuba aano. Sena nimbaakani yanu amwezi kuyiisya bamwi Jwi lya Leza, akusola kubapa kuti myoyo yabo ibelekele Leza? Kwiinda mukusolekesya alimwi akugwasyigwa a Leza, mulakonzya kutalisya ciiyo ca Bbaibbele. Sena eeyo nembaakani njomupailila? Sena mulilibambilide kutola lubazu mumulimo ooyu, nokuba kwaaba ciindi canu cakulyookezya? Alimwi mbubwenya Jehosafati mbwaakaunka kucilawo ca Efraimu kutegwa agwasye bantu kupiluka kubukombi bwakasimpe, andiswe tulakonzya kubagwasya aabo batacisungweede. Kuyungizya waawo, baalu bamumbungano balabamba bubambe bwakuswaya baabo ibakagusyigwa mumbungano ibakaleka zibi nzyobakali kucita akubagwasya.

12, 13. (a) Ciindi Jehosafati naakaba mubukkale buyoosya, ino wakacita buti? (b) Ino nkaambo nzi ncotweelede kumwiiya Jehosafati mukuzumina kulezya kwesu?

12 Mbubwenya mbuli bausyi ba Asa, Jehosafati wakazumanana kulyaaba kuli Leza noliba leelyo naakakongwa ampi yabasikalumamba iiyoosya. (Amubale 2 Makani 20:2-4.) Jehosafati wakayoowa! Nokuba boobo, “wakakanza kuyandaula Jehova.” Mumupailo cakulicesya wakazumina kuti bantu bakwe ‘banyina nguzu zyakuzunda nkamu eeyi mpati’ alimwi akuti walo abantu bakwe tiibakazyi cakucita. Wakasyoma Jehova cakumaninina kwiinda mukwaamba kuti: “Meso eesu ali kulinduwe.”—2Mak. 20:12.

 13 Zimwi ziindi, andiswe mbubwenya mbuli Jehosafati, inga katutazyi cakucita, naa kuyoowa buya. (2Kor. 4:8, 9) Pele mutalubi kuti Jehosafati wakalyaambilila mumupailo waabuleya kujatikizya mbwaakali kulimvwa kubula nguzu alimwi ambobakali kulimvwa bantu bakwe. (2Mak. 20:5) Aabo ibasololela kumuuya mumukwasyi inga baiya Jehosafati kwiinda mukulomba Jehova kuti abasololele alimwi akubapa nguzu kutegwa bacikonzye kuliyumya kumapenzi aabasikila. Tamweelede kufwa nsoni kuti bamukwasyi wanu baimvwe mipailo yakukombelezya iili boobu. Bayoobona kuti mulamusyoma Jehova. Leza wakamugwasya Jehosafati, andinywe uyoomugwasya.

HEZEKIYA WAKAZUMANANA KUCITA ZILULEME

14, 15. Mbuti Hezekiya mbwaakatondezya kuti wakali kumusyoma Leza cakumaninina?

14 Kutegwa azyibwe kuti wakali mwami ooyo “wakakakatila kuli Jehova,” Hezekiya, kwiindana a Jehosafati, walo wakeelede kuzunda penzi lyakutobela cikozyanyo cibyaabi cabausyi ibakali kukomba mituni. Hezekiya “wakagwisya masena aakukombela akupwayaula misemu yamabwe yakukomba, kugonka musemu wacisamu wakukomba. Alimwi wakapwayaula nzoka yamukuba njaakapangide Musa,” eeyo aciindi eeco yakali kubelesyegwa munzila iiteelede kwiinda mukwiikomba. Wakalilyaabide camoyo woonse kuli Jehova, nkaambo “wakazumanana kubamba milawo eeyo Jehova njaakapa Musa.”—2Bam. 18:1-6.

15 Nociba ciindi bana Asuri, aabo aciindi eeco ibakali kweendelezya nyika yoonse, nobakali kuyanda kulwana Juda alimwi akunyonyoona Jerusalemu, camoyo woonse Hezekiya wakasyoma Jehova. Mwami wa Asuri Sanakeribu wakasampaula Jehova akusola kukonga Hezekiya kutegwa alibombye kulinguwe. Nokuba boobo, mumupailo Hezekiya wakatondezya kuti wakali kusyoma cakumaninina munguzu zya Jehova zyakufwutula. (Amubale Isaya 37:15-20.) Leza wakawiingula mupailo wakwe kwiinda mukutuma mungelo kuti ajaye bana Asuri ibali 185,000.—Is. 37:36, 37.

16, 17. Ino mbuti mbomukonzya kumwiiya Hezekiya ciindi nomubelekela Leza?

16 Mukuya kwaciindi, Hezekiya wakaciswa cakuti wakali kuyanda kufwa. Wakakombelezya Jehova kuti ayeeye mbwaakali kweenda cakusyomeka kumbele lyakwe. (Amubale 2 Bami 20:1-3.) Jehova wakawiingula mupailo wakwe kwiinda mukumuponya. Tulizyi kabotu kuzwa mu Magwalo kuti tupona muciindi ncotutakonzyi kulanga kuli Leza kuti inga watuponya naa kuyungizya buumi bwesu camaleele. Nokuba boobo, mbubwenya mbwaakacita Hezekiya, umwi aumwi wesu ulakonzya kwaambila Jehova mumupailo kuti: ‘Ndakali kweenda kumbele lyako cakusyomeka acamoyo woonse.’ Sena mulasyoma kuti Jehova ulakonzya alimwi ulilyaabide kumulanganya abulo bwanu ciindi nomucisidwe?—Int. 41:3.

17 Ciindi notuzinzibala kuyeeya cikozyanyo ca Hezekiya, inga twayandika kuleka kucita cintu cimwi icinyonganya cilongwe cesu a Leza naa citupa kutabikkila maano kubukombi bwakasimpe. Cilisalede kuti, tatuyandi kwiiya bantu bamunyika eeyi, balo kwiinda mukubelesya intaneti ibabona bantu bamwi mbuli kuti ntuleza. Masimpe, Banakristo bamwi balakukkomanina kubandika abanamukwasyi naa balongwe mbobamvwana limwi kwiinda mukubelesya intaneti. Pele banji munyika balaciindizya kubelesya intaneti akukkomanina bamaalumi naa bamakaintu aabo mbobatazyi naaceya. Bamwi balasowa ciindi cinji kweebelela zifwoto naa kubala makani aajatikizya  bantu aabo. Kuli ntenda iiliko kwiinda mukubikkila maano kapati kuzintu zyabuyo. Munakristo ulakonzya kutalika kulisumpula akaambo kabantu banji bakkomanina nzyabikka a intaneti, nokuba kunyema buya ikuti naa bantu baleka kuzikkomanina eezyo nzyabikka. Amuciyeeyele buyo kuti mwaapostolo Paulo naa Akula a Purisila nobaliko, sena inga kabasowa ciindi cabo abuzuba kutuma zifwoto a intaneti naa kutobelezya umwi muntu uutali Munakristo? Tubala kuti Paulo ‘wakali kubelesya ciindi cakwe coonse kukambauka jwi.’ Alimwi Purisila a Akula bakali kubelesya ciindi cabo ‘kupandulula bwini mboibede nzila ya Leza’ kubantu. (Mil. 18:4, 5, 26) Tulakonzya kulibuzya kuti, ‘Sena ndilakweeleba kukomba bantu naa kubelesya ciindi cinji ciyandika kutwaambo tutayandiki?’—Amubale Baefeso 5:15, 16.

JOSIYA WAKAZUMANANA KWIIBAMBA MILAWO YA JEHOVA

18, 19. Munzila nzi momuyanda kuba mbuli Josiya?

18 Muzyukululwa wa Hezekiya, Mwami Josiya awalo wakaibamba milawo ya Jehova “amoyo wakwe woonse.” (2Mak. 34:31) Naakacili mukubusi, “wakatalika kuyandaula Leza wa Davida,” alimwi ciindi naakakkwanya myaka iili 20 wakatalika kusalazya Juda kwiinda mukugwisya mituni. (Amubale 2 Makani 34:1-3.) Josiya wakali musungu mukucita zintu izyakali kukkomanisya Leza kwiinda bami banji ba Juda. Nokuba boobo, ciindi malembe aa Mulawo aayeeyelwa kuti ngangayo eni-eni aakalembwa a Musa naakajanika akutalika kwaabala kuli Josiya, wakabona mbocakali kuyandika kucita kuyanda kwa Leza cakumaninina. Wakakulwaizya bamwi kubelekela Jehova. Akaambo kaceeci, mubuumi bwakwe boonse bantu “tiibakaleya akuleka kutobela Jehova.”—2Mak. 34:27, 33.

19 Mbubwenya mbuli Josiya, bana-bana beelede kutalika kuyandaula Jehova kabacili baniini. Kweelede kuti Mwami Manase iwakeempwa wakamuyiisya Josiya kujatikizya luse lwa Leza. Nobana, amube acilongwe abantu bapati basyomeka mumukwasyi wanu alimwi amumbungano akubona Jehova mbwaabacitila zintu zibotu. Alimwi kamuyeeya kuti, kubala Magwalo kwakamusika amoyo Josiya alimwi kwakapa kuti abweze ntaamu. Kubala Jwi lya Leza kuyakumupa kubweza ntaamu iziyakupa kuti muyungizye lukkomano lwanu alimwi akuyumya cilongwe canu a Leza alimwi akukulwaizya bamwi kuyandaula Leza. (Amubale 2 Makani 34:18, 19.) Kubala Bbaibbele akwalo kulakonzya kumugwasya kuzyiba mpomukonzya kubambulula mumulimo wanu ngomubelekela Leza. Ikuti naa mwaazyiba mpomweelede kubambulula, amucite mbubwenya mbwaakacita Josiya.

AMUBELEKELE JEHOVA CAMOYO WOONSE!

20, 21. (a) Ino bami bone mbotwalanga-langa boonse bakacita nzi? (b) Ino tuyoolanga-langa nzi mucibalo citobela?

20 Sena kuli bubotu mbomwabona kwiinda mukulanga-langa bami bone ba Juda mbobakabelekela Jehova camoyo woonse? Bakali basungu alimwi bakalilyaabide cakumaninina mukucita kuyanda kwa Leza. Bakazumanana kucita kuyanda kwa Leza. Bakacita oobo noliba leelyo nobakayaanya buyumu-yumu. Ciinda kubota ncakuti, bakali kubelekela Jehova akaambo kakuti bakali kumuyanda ncobeni.

21 Mbubwenya mbotuyoobona mucibalo citobela, bami aaba boonse bone mbotwalanga-langa bakalubizya aciindi cimwi. Nokuba boobo, Sikulingula myoyo naakabalanga-langa, wakajana kuti myoyo yabo yakalimaninide kulinguwe. Andiswe tatulondokede pe. Jehova natulingula, sena ujana kuti tulamubelekela camoyo woonse? Tuyakwaalanga-langa makani aaya mucibalo citobela.