Ino kuswaanganizyigwa antoomwe kwatusamu tobilo itwaambidwe kulugwalo lwa Ezekieli caandaano 37 kwaamba nzi?

Jehova wakapa Ezekieli mulumbe uupa bulangizi wakukamantanya cisi ca Israyeli ciindi nocakapilusyigwa ku Nyika Yakasyomezyedwe. Mulumbe ooyo alimwi waambilizya kukamantanya kwabantu ba Leza ikwakatalika kucitika mumazuba aamamanino.

Jehova wakaambila musinsimi wakwe Ezekieli kuti alembe atusamu tobilo. Akasamu komwe wakeelede kulemba kuti, “Nkika Juda abantu ba Israyeli aabo balaanguwe,” mpoonya alikambi wakeelede kulemba kuti, “Nkika Josefa, nkasamu ka Efraimu, abamuŋanda ya Israyeli boonse ibalaanguwe.” Tusamu ootu tobilo twakali kuyooba “kasamu komwe buyo” mujanza lya Ezekieli.—Ezk. 37:15-17.

 Ino bbala lyakuti “Efraimu” liiminina nzi? Mwami wakusaanguna mubwami bwakunyika bwamisyobo iili kkumi, wakali Jeroboamu, kuzwa kumusyobo wa Efraimu, imusyobo iwakali ampuwo kapati. (Dt. 33:13, 17; 1Bam. 11:26) Ooyu musyobo wakazwa kuli Efraimu imwana wa Josefa. (My. 1:32, 33) Aboobo, cakali kweelela kuti ikasamu ikaiminina bwami bwamisyobo iili kkumi kaitwe kuti “kasamu ka Efraimu.” Ciindi Ezekieli naakalemba businsimi ibujatikizya tusamu tobilo, bwami bwakunyika bwa Israyeli bwakalitoledwe kale mubuzike abana Asuri mu 740 B.C.E. (2Bam. 17:6) Aboobo, bana Israyeli banji aciindi eeco bakalimwaikide mu Bulelo bwa Babuloni, bwalo ibwakazundide Bulelo bwa Asuri.

Mu 607 B.C.E., bwami bwamisyobo yobilo ibwakumusanza alimwi ambweni abaabo ibakasyeede kuzwa kubwami bwakunyika, bakatolwa mubuzike ku Babuloni. Bami bamumulongo wa Juda mbabakali kulela misyobo eeyi yobilo, alimwi ciinga cabapaizi cakali kuzulilwa kulimbabo, nkaambo bapaizi bakali kubelekela atempele mu Jerusalemu. (2Mak. 11:13, 14; 34:30) Aboobo cakali kweelela kuti bwami bwamisyobo yobilo mbobwakali kwiimininwa akasamu “ka Juda.”

Ino ndilili tusamu ootu tobilo twacikozyanyo notwakaswaanganizyigwa antoomwe? Twakaswaanganizyigwa ciindi bana Israyeli nobakapiluka ku Jerusalemu kuyooyakulula tempele mu 537 B.C.E. Baiminizi bamami oonse aaya obilo, nkokuti bwami bwamisyobo yobilo alimwi abwami bwamisyobo iili kkumi antoomwe bakapiluka kuzwa kubuzike. Aciindi eeci tiikwakacili kwaandaana akati kabana Israyeli. (Ezk. 37:21, 22) Bana Israyeli bakatalika alimwi kukomba Jehova calukamantano. Kukamantana ooku kwakalisinsimidwe alimwi amusinsimi Isaya alimwi a Jeremiya.—Is. 11:12, 13; Jer. 31:1, 6, 31.

Ino nkaambo nzi kamasimpe kujatikizya bukombi busalala nkotujana mubusinsimi oobu? Kaambo aaka nkakuti: Jehova uyoopa kuti bakombi bakwe babe bantu ‘bomwe buyo.’ (Ezk. 37:18, 19) Sena cisyomezyo eeci calukamantano cazuzikizyigwa mazuba aano? Inzya. Kumatalikilo, businsimi oobu bwakatalika kuzuzikizyigwa mu 1919, ciindi zintu akati kabantu ba Leza nozyakatalika kubambululwa asyoonto-syoonto alimwi ciindi bantu ba Leza nobakatalika kugwasyigwa kuti bakamantane. Makanze aa Saatani aakusoleka kuti abaandaanye cakumaninina tanaakazwiidilila pe.

Kuciindi eeco, ibanji akati kabaabo ibakakamantanizyigwa bakajisi bulangizi bwakuba bami abapaizi kujulu antoomwe a Jesu. (Ciy. 20:6) Munzila yacikozyanyo, bakali mbuli kasamu ka Juda. Nokuba boobo, mukuya kwaciindi, bantu banji ibakajisi bulangizi bwakupona anyika bakatalika kubasangana ba Juda aaba bakumuuya. (Zek. 8:23) Bakali mbuli kasamu ka Josefa, alimwi tiibakajisi bulangizi bwakulela antoomwe a Kristo.

Calukamantano, nkamu zyoonse eezyi zyobilo zibelekela antoomwe kabali bantu ba Jehova beendelezyegwa a Mwami omwe, Jesu Kristo, ooyo iwaambidwe mubusinsimi kuti “mubelesi wangu Davida.” (Ezk. 37:24, 25) Jesu wakapaila kuti basikumutobela boonse ‘babe bamwi, mbubwenya Bausyi mbobakamantene anguwe alimwi awalo mbwakamantene a Bausyi.’ * (Joh. 17:20, 21) Jesu alimwi wakasinsima kuti katanga kaniini kabasikumutobela bananike kayooba “tanga lyomwe” antoomwe ‘ambelele zyakwe zimbi.’ Boonse bakali kuyakweendelezyegwa “amweembezi omwe.” (Joh. 10:16) Eelo kaka taaliboteli majwi aa Jesu aatondezya bukkale bwalukamantano ibuliko akati kabantu ba Jehova mazuba aano kufwumbwa naa bajisi bulangizi buli buti bwakumbele!

^ par. 6 Cilakkomanisya kapati kubona Jesu mbwaakapandulula mbozyakali kuyootobelana zintu nzyaakaamba muzikozyanyo izyakaba cibeela cacitondezyo cakubako kwakwe. Cakusaanguna, wakaamba kujatikizya “muzike uusyomeka alimwi uucenjede,” nkokuti kakamu kasyoonto kabakwesu bananike ibakali kuyoosololela. (Mt. 24:45-47) Mpoonya, wakaamba zikozyanyo izyakagamikidwe kuli baabo ibajisi bulangizi bwakupona kujulu. (Mt. 25:1-30) Camamanino, wakaamba kujatikizya baabo ibajisi bulangizi bwakupona anyika ibakali kuyoogwasyilizya banabokwabo Kristo. (Mt. 25:31-46) Mbubwenya buyo, kuzuzikizyigwa kwamazuba aano kwabusinsimi bwa Ezekieli cakusaanguna butondezya icakali kuyoocitika kuli baabo ibajisi bulangizi bwakupona kujulu. Nokuba kuti bwami bwamisyobo iili kkumi kanji-kanji tabwiiminini baabo ibajisi bulangizi bwakupona anyika, kukamantanizyigwa ikwaambidwe mubusinsimi oobu kutuyeezya lukamantano iluliko akati kabaabo ibajisi bulangizi bwakupona anyika alimwi abaabo ibajisi bulangizi bwakupona kujulu.