‘Amuzumanane kwaambilizya lufwu lwa Mwami, kusikila akaboole.’—1KOR. 11:26.

LWIIMBO 18 Kulumba Akaambo ka Cinunuzyo

IZILI MUCIBALO *

1-2. (a) Ino ncinzi Jehova ncabona ciindi mamiliyoni aabantu nobaswaangana ku Mulalilo wa Mwami? (Amubone cifwanikiso icili acivwumbyo) (b) Ino ncinzi ncotutiilange-lange mucibalo eeci?

AMUYEEYELE Jehova ncabona ciindi mamiliyoni aabantu munyika yoonse nobabungana antoomwe ku Mulalilo wa Mwami. Talangi buyo mweelwe wabantu mbouli mupati; pepe ulalanga muntu umwi aumwi uujanika. Mucikozyanyo, ulababona aabo ibajanika cakusyomeka mwaka amwaka. Akati kabo inga kakuli bantu ibajanika nokuba kuti balapenzyegwa kapati. Bamwi tabasiki-siki kumiswaangano imwi, pesi babona kuti kujanika ku Ciibalusyo ncintu ciyandika kapati ncobeelede kucita. Jehova alimwi ulababona aabo ibajanika ku Ciibalusyo ciindi cakusaanguna, ambweni akaambo kakuti bayanda kuzyiba mbocicitwa.

2 Masimpe, Jehova ulakkomana kubona kuti bantu banji balajanika ku Ciibalusyo. (Lk. 22:19) Nokuba boobo, Jehova tabikkili kapati maano kumweelwe wabantu bajanika. Ubikkila kapati maano kukaambo kabapa kuti bajanike; kaambo kapa kuti bajanike kalayandika kapati kulinguwe. Mucibalo eeci, tulabandika mubuzyo uuyandika kapati: Ino nkaambo nzi ncotujanika ikutali buyo ku Ciibalusyo cicitwa amwaka ciindi comwe pele akumiswaangano yansondo ansondo yalo Jehova njabambilide baabo ibamuyanda?

(Amubone muncali 1-2) *

KULICESYA KUTUPA KUJANIKA

3-4. (a) Nkaambo nzi ncotujanika kumiswaangano? (b)  Ino kujanika kwesu kumiswaangano kwaamba nzi kujatikizya ndiswe? (c) Kweelana ancolwaamba lugwalo lwa 1 Bakorinto 11:23-26, nkaambo nzi ncotweelede kujanika ku Ciibalusyo?

3 Ikaambo kapati ikatupa kujanika kumiswaangano yambungano nkakuti ncibeela cabukombi bwesu. Alimwi tulajanika akaambo kakuti tulayiisyigwa a Jehova lyamiswaangano. Bantu balisumpula tabasyomi kuti beelede kuyiisyigwa cintu cili coonse.  (3Joh. 9) Mukwiimpana, tulayandisisya kapati kulaililwa a Jehova alimwi ambunga yakwe njabelesya.—Is. 30:20; Joh. 6:45.

4 Kujanika kwesu kumiswaangano kutondezya kuti tulalicesya alimwi tulilibambilide kuyiisyigwa. Mubusiku bwa Ciibalusyo calufwu lwa Jesu, tulajanika kumuswaangano ooyu uuyandika kapati ikutali buyo akaambo kakuti tulimvwa kuti mukuli pele alimwi akaambo kakuti cakulicesya tutobela malailile aa Jesu aakuti: “Kamucita oobu lyoonse kutegwa kamundiyeeya.” (Amubale 1 Bakorinto 11:23-26.) Muswaangano ooyu uyumya bulangizi bwesu bwakumbele alimwi ulatuyeezya mbwatuyanda kapati Jehova. Nokuba boobo, Jehova ulizyi kuti tuyandika kukulwaizyigwa alimwi akuyumizyigwa ikutali buyo ciindi comwe amwaka. Nkakaambo kaako ulatubambila miswaangano nsondo ansondo alimwi utukulwaizya kuti katujanika. Kulicesya kutupa kumvwida. Tulabelesya mawoola manji nsondo ansondo kulibambila alimwi akujanika kumiswaangano eeyo.

5. Nkaambo nzi bantu balicesya ncobazumina kutambwa a Jehova?

5 Mwaka amwaka, bantu banji ibalicesya balazumina kutambwa a Jehova kutegwa bayiisyigwe anguwe. (Is. 50:4) Balakkomana kujanika ku Ciibalusyo, alimwi balatalika kujanika kumiswaangano imwi. (Zek. 8:20-23) Antoomwe ambabo, tulakkomana kuyiisyigwa alimwi akusololelwa a Jehova, “mugwasyi [wesu] amuvwuni [wesu].” (Int. 40:17) Sena ncobeni kuli cintu cili coonse icikkomanisya naa ciyandika kapati kwiinda kuzumina kutambwa kuyiisyigwa a Jehova alimwi a Jesu, Mwana ngwayandisisya kapati?—Mt. 17:5; 18:20; 28:20.

6. Mbuti kulicesya mbokwakamugwasya mwaalumi umwi kujanika ku Ciibalusyo?

6 Mwaka amwaka, tulasolekesya kutamba bantu banji kusikila mpotugolela kutegwa bajanike ku Ciibalusyo calufwu lwa Jesu. Bantu banji balicesya bagwasyigwa kwiinda mukuzumina ciindi notubatamba. Amulange cikozyanyo eeci. Myaka minji yainda, mwaalumi umwi wakatambula kapepa kakutamba bantu ku Ciibalusyo, pesi wakaambila mukwesu iwakamutamba kuti takacikonzyi kujanika. Nokuba boobo, mubusiku bwa Ciibalusyo, mukwesu wakagambwa kubona mwaalumi ooyo kanjila mu Ŋanda ya Bwami. Mwaalumi ooyu wakakkomana kapati akaambo kambobakamusamausya cakuti wakatalika kujanika kumiswaangano yansondo ansondo. Mubwini, wakaindwa buyo miswaangano yotatwe mwaka woonse wakatobela. Ncinzi cakamugwasya kutalika kujanika kumiswaangano yoonse? Wakali kulicesya kapati calo icakapa kuti acince mbwaakali kuyeeya. Mukwesu wakamutambide nokwakainda ciindi wakaamba kuti: “Mwaalumi uulicesya kapati.” Cakutadooneka Jehova wakamukwela mwaalumi ooyu kutegwa kamukomba, alimwi lino mukwesu uubbapatizyidwe.—2Sam. 22:28; Joh. 6:44.

7. Ino mbuti nzyotwiiya kumiswaangano alimwi anzyotubala mu Bbaibbele mbozikonzya kutugwasya kulicesya?

7 Nzyotuyiisyigwa kumiswaangano alimwi anzyotubala mu Bbaibbele zilakonzya kutugwasya kulicesya. Insondo zisyoonto kacitanacitika Ciibalusyo, miswaangano yesu kanji-kanji ibikkila kapati maano kucikozyanyo ca Jesu alimwi akulicesya nkwaakatondezya mukwaaba buumi bwakwe kacili cinunuzyo. Alimwi mumazuba masyoonto kacitanacitika ciibalusyo, tulakulwaizyigwa kubala zibalo zyamu Bbaibbele zijatikizya zintu zyakasololela kulufwu lwa Jesu alimwi abubuke. Nzyotwiiya kumiswaangano iili boobu alimwi anzyotubala muzibalo zyamu Bbaibbele eezyi zitupa kulumba kapati kukulyaaba kwa Jesu akaambo kandiswe. Tulakulwaizyigwa kwiiya bube bwakwe bwakulicesya alimwi akucita kuyanda kwa Jehova, nociba ciindi nocitukatazya kucita boobo.—Lk. 22:41, 42.

BUSICAMBA BULATUGWASYA KUJANIKA

8. Ino mbuti Jesu mbwaakatondezya busicamba?

8 Tulasoleka alimwi kwiiya Jesu mukutondezya busicamba. Amuyeeye buyo busicamba  mbwaakatondezya kalaafwaafwi kufwa. Wakalizyi kabotu-kabotu kuti kakutanainda ciindi cilamfwu basinkondonyina bakali kuyoomusampaula, kumukwibbaula alimwi akumujaya. (Mt. 20:17-19) Nomuba mubukkale buli boobu, wakalilyaabide kufwa. Nocakasika ciindi, wakaambila baapostolo bakwe basyomeka aabo mbaakali limwi ku Getesemane kuti: “Amunyamuke, atweende. Amubone! Sikundaaba wasika afwaafwi.” (Mt. 26:36, 46) Ciindi nkamu yabantu ibakanyamwide zilwanyo nobakasika kutegwa bamwaange, wakabacinga, akuliyubununa, mpoonya wakaambila basikalumamba kuti babaleke baapostolo bakwe. (Joh. 18:3-8) Eelo kaka Jesu wakatondezya busicamba bulibedelede! Mazuba aano, Banakristo bananike alimwi abambelele zimbi balasolekesya kwiiya Jesu mukutondezya busicamba. Mubuti?

Busicamba mbomutondezya kwiinda mukujanika kumiswaangano ya Bunakristo bulabayumya bamwi (Amubone muncali 9) *

9. (a) Nkaambo nzi ncotuyandika busicamba kutegwa katujanika kumiswaangano lyoonse? (b) Mbuti cikozyanyo cesu mbocikonzya kubagwasya bakwesu baangidwe akaambo kalusyomo lwabo?

9 Kutegwa katujanika kumiswaangano lyoonse, tuyandika kutondezya busicamba ciindi notulijana mubukkale bukatazya. Bakwesu abacizyi bamwi balajanika kumiswaangano nokuba kuti bali mubuumba, balatyompwa naa kuciswa-ciswa. Bamwi cabusicamba balajanika kumiswaangano nociba ciindi nobakazyigwa kapati abanamukwasyi naa beendelezi bamfwulumende. Amuzinzibale kuyeeya kwaciindi cisyoonto kujatikizya cikozyanyo cesu mbocibajatikizya bakwesu ibali muntolongo akaambo kakwiiminina lusyomo lwabo. (Heb. 13:3) Ciindi nobamvwa kuti tulazumanana kubelekela Jehova nokuba kuti tulasunkwa, balakulwaizyigwa kuzumanana kusyomeka alimwi akuba basicamba. Mwaapostolo Paulo wakali mubukkale bukozyene. Naakali muntolongo yaku Roma, wakali kukkomana kapati kumvwa kuti bakwesu bakali kubelekela Leza cakusyomeka. (Flp. 1:3-5, 12-14) Kakusyeede ciindi cisyoonto kuti aangununwe naa naakaangununwa, Paulo wakalembela bana Hebrayo lugwalo. Mulugwalo oolu wakakulwaizya Banakristo basyomeka aabo kuti ‘luyando lwabo lwabunyina luzumanane’ alimwi akutaleka kuswaangana antoomwe.—Heb. 10:24, 25; 13:1.

10-11. (a) Mbaani mbotweelede kutamba ku Ciibalusyo? (b) Nkaambo nzi ikajanika kulugwalo lwa Baefeso 1:7 ikatupa kucita boobo?

10 Tulatondezya busicamba ciindi notutamba banamukwasyi, babelesima alimwi abasimukoboma ku Ciibalusyo. Nkaambo nzi ncotubatamba bantu bali boobo? Tulikkomene kapati akaambo kancaakatucitila Jehova alimwi a Jesu cakuti tulaaluyandisisyo lwakutamba bamwi kutegwa bakajanike ku Ciibalusyo. Tuyanda kuti abalo baiye kujatikizya mbobakonzya kugwasyigwa “aluzyalo” lwa Jehova kwiinda mucinunuzyo.—Amubale Baefeso 1:7; Ciy. 22:17.

11 Ciindi notutondezya busicamba kwiinda mukuswaangana antoomwe, tulatondezya abube bumwi ibuyandika, oobo Leza alimwi a Mwanaakwe mbobatondezya munzila zilibedelede.

LUYANDO LUTUKULWAIZYA KUJANIKA

12. (a) Ino mbuti miswaangano yesu mboiyumya luyando ndotujisi kuli Jehova alimwi a Jesu? (b) Ino lugwalo lwa 2 Bakorinto 5:14, 15 lutugwasya kucita nzi mukwiiya Jesu?

12 Luyando ndotujisi kuli Jehova a Jesu lutukulwaizya  kujanika kumiswaangano. Mpoonya nzyotwiiya kumiswaangano ziyoopa kuti luyando oolo lukomene kapati. Kumiswaangano yesu tulayeezyegwa lyoonse nzyobakatucitila. (Rom. 5:8) Kwaambisya Ciibalusyo cituyeezya mboluli lupati kapati luyando ndobajisi, nokuba kuli baabo batanazyiba mbociyandika cinunuzyo. Akaambo kakulumba kapati, tulasola kumwiiya Jesu kweelana ambotupona buzuba abuzuba. (Amubale 2 Bakorinto 5:14, 15.) Kuyungizya waawo, moyo wesu ulatukulwaizya kumutembaula Jehova akaambo kakutupa cinunuzyo. Imwi nzila mbotukonzya kumutembaula Leza nkwiinda mukupa bwiinguzi buzwa ansi amoyo ciindi camiswaangano.

13. Mbuti mbotukonzya kutondezya mboluli lupati luyando ndotujisi kuli Jehova alimwi aku Mwanaakwe? Amupandulule.

13 Tulakonzya kutondezya mbolubede luyando ndotujisi kuli Jehova alimwi aku Mwanaakwe kwiinda mukulyaaba kubacitila cili coonse. Kanji-kanji, tweelede kwaaba zintu ziindene-indene kutegwa tujanike kumiswaangano yesu. Mbungano zinji zilacita muswaangano umwi kumazuba mukati kansondo ciindi kanji-kanji notukatede kapati akaambo kamilimo yacitwa mubuzuba oobo. Mpoonya muswaangano uumbi ulacitwa kumamanino aansondo ciindi bantu bamwi nobalyookezya. Sena Jehova ulabona kuti tulajanika kumiswaangano nokuba kuti tulikatede? Masimpe ulabona! Mubwini, ciindi notusolekesya kujanika kumiswaangano, Jehova ulalumba kapati akaambo kaluyando ndotutondezya kulinguwe.—Mk. 12:41-44.

14. Mbuti Jesu mbwaakasiya cikozyanyo mukutondezya luyando lwakulyaaba?

14 Jesu wakasiya cikozyanyo kulindiswe kwiinda mukutondezya luyando lwakulyaaba. Wakalilisungwide kufwida basikwiiya bakwe alimwi buzuba abuzuba wakali kupona munzila iyakali kutondezya kuti wakali kubikka nzyobayandika bamwi mubusena bwakusaanguna. Mucikozyanyo, wakali kuba abasikumutobela bakwe nociba ciindi naakakatede kapati naa kunyongana mumizeezo. (Lk. 22:39-46) Alimwi wakabikkila maano kuzintu nzyaakali kukonzya kucitila bamwi, ikutali nzyobakali kukonzya kumucitila. (Mt. 20:28) Ciindi luyando lwesu kuli Jehova alimwi akubakwesu nolukomena, tuyoocita zyoonse nzyotukonzya kutegwa tukajanike ku Mulalilo wa Mwami alimwi akumiswaangano iimbi yoonse yambungano.

15. Ino mbaani mbotubikkila kapati maano kugwasya?

15 Tuzulilwa akati kabunyina bwa Bunakristo  bwakasimpe, alimwi tulakkomana kubelesya ciindi cinji kutamba bapya kutegwa batusangane. Nokuba boobo, tubikkila kapati maano kugwasya baabo “ibaciinga cesu calusyomo” pele ibatacisungweede. (Gal. 6:10) Tulatondezya luyando ndotujisi kulimbabo kwiinda mukubakulwaizya kujanika kumiswaangano yesu, kwaambisya ku Ciibalusyo. Mbubwenya mbuli Jehova alimwi a Jesu, tulakkomana kapati ciindi muntu uutacisungweede napiluka kuli Jehova, Taateesu siluyando alimwi Mweembezi.—Mt. 18:14.

16. (a) Mbuti mbotukonzya kukulwaizyanya umwi amweenzinyina, alimwi ino miswaangano yesu itugwasya buti? (b) Nkaambo nzi eeci ncocili ciindi cibotu camwaka ikuyeeya majwi aa Jesu aajanika kulugwalo lwa Johane 3:16?

16 Munsondo ziboola, amukatambe bantu banji kusikila mpomugolela, kujanika ku Ciibalusyo muli Bwasanu kumangolezya, mu April 19, 2019. (Amubone kabbokesi kakuti “ Sena Muyoobatamba?”) Atuzumanane kucita kufwumbwa nzyotukonzya kukulwaizyanya umwi amweenzinyina kwiinda mukujanika lyoonse kumiswaangano yoonse Jehova njatubambila. Mbwaayaabuswena mamanino aabweende bwazintu oobu, miswaangano yesu iyootugwasya kuzumanana kuba bantu balicesya, basicamba alimwi basiluyando. (1Tes. 5:8-11) Amoyo wesu woonse, atutondezye mbotulimvwa akaambo kaluyando lupati ndwaakatutondezya Jehova alimwi a Mwanaakwe!—Amubale Johane 3:16.

LWIIMBO 126 Amupakamane, Mwiime Nji Akuyuma

^ munc. 5 Ciibalusyo calufwu lwa Kristo iciyoocitwa muli Bwasanu kumangolezya, mu April 19, 2019, unooli muswaangano uuyandika kapati mumwaka woonse. Ncinzi citupa kujanika kumuswaangano ooyu? Cakutadooneka, nkaambo kakuti tuyanda kukkomanisya Jehova. Mucibalo eeci, tulalanga-langa ncokwaamba kujanika kwesu ku Ciibalusyo alimwi akumiswaangano yesu yansondo ansondo.

^ munc. 50 CIFWANIKISO ICILI AACIVWUMBYO: Mamiliyoni aabantu munyika yoonse balatambulwa ku Mulalilo wa Mwami

^ munc. 52 BUPANDULUZI BWAZIFWANIKISO: Mukwesu uuli muntolongo akaambo kalusyomo lwakwe wakulwaizyigwa alugwalo ilwazwa kuŋanda. Kuzyiba kuti talubidwe pe, wakkomana kapati akaambo kakutambula mulumbe wakuti bamukwasyi wakwe abalo balazumanana kusyomeka kuli Jehova alimwi tabalekeli mazwanga aabasimapolitikisi aali kubusena nkobakkala kubalesya.