“Akati kambungano ndiyookutembaula.”​—INT. 22:22.

LWIIMBO 59 Atumutembaule Jehova

IZILI MUCIBALO *

1. Ino Davida wakalimvwa buti kujatikizya Jehova, alimwi ino eeci cakamupa kucita nzi?

MWAMI DAVIDA wakalemba kuti: “Jehova mupati alimwi weelede kutembaulwa kapati.” (Int. 145:3) Davida wakali kumuyanda Jehova alimwi luyando oolo lwakamupa kuti amutembaule Leza “akati kambungano.” (Int. 22:22; 40:5) Cakutadooneka, mulamuyanda Jehova alimwi mulaazumina majwi aa Davida aakuti: “Kotembaulwa O Jehova Leza wa Israyeli taateesu lyoonse alyoonse mane kukabe kutamani.”—1Mak. 29:10-13.

2. (a) Mbuti mbotukonzya kumutembaula Jehova? (b) Ino mbuyumuyumu nzi bamwi mbobajana, alimwi tulanga-langa twaambo nzi?

2 Mazuba aano, nzila imwi mbotumutembaula Jehova nkwiinda mukwiingula lyamiswaangano ya Bunakristo. Nokuba boobo, bunji bwabakwesu abacizyi cilabayumina kapati. Balayanda kutola lubazu ciindi camiswaangano, pele kuyoowa kubapa kwaalilwa kucita boobo. Mbuti mbobakonzya kulilwana penzi eelyo lyakuyoowa? Alimwi ninzila nzi zigwasya izikonzya kutugwasya toonse kupa bwiinguzi bukulwaizya? Katutanaingula mibuzyo eeyi, atusaangune kulanga-langa twaambo tuyandika kapati tone itutupa kwiingula kumiswaangano.

TWAAMBO ITUTUPA KWIINGULA KUMISWAANGANO

3-5. (a) Kweelana alugwalo lwa Bahebrayo 13:15, nkaambo nzi ncotweelede kwiingula kumiswaangano? (b) Sena toonse tweelede kupa bwiinguzi bukozyene? Amupandulule.

3 Toonse Jehova wakatupa coolwe cakumutembaula. (Int. 119:108) Bwiinguzi bwesu kumiswaangano ncibeela ‘cacipaizyo cantembauzyo’ cesu, alimwi kunyina uukonzya kutupeda cipaizyo  eeco. (Amubale Bahebrayo 13:15.) Sena Jehova uyanda kuti katupa cipaizyo cikozyene, naa bwiinguzi bukozyene? Peepe!

4 Jehova ulizyi kuti tuliindene mbotucita zintu alimwi abukkale, alimwi ulazikkomanina zipaizyo nzyotukonzya kumupa. Amuyeeye kujatikizya musyobo wazipaizyo nzyaakali kutambula kuzwa kubana Israyeli. Bana Israyeli bamwi bakali kucikonzya kupa mbelele naa mpongo. Pele muna Israyeli mucete wakali kukonzya kupa “nziba zyobilo naa bana bankwilimba bobilo.” Alimwi ikuti naa muna Israyeli tacikonzyi kupa zintu eezyi, Jehova wakali kutambula “cipaanzi cakkumi caefa cafulaulu mubotu.” (Lev. 5:7, 11) Fulaulu tiiwakali kudula, pele Jehova wakali kucilumba cipaizyo cili boobu, kufwumbwa buyo kuti kauli “fulaulu mubotu.”

5 Leza wesu siluzyalo mbwalimvwa amazuba aano. Ciindi notwiingula, talangili kuti toonse tube mbuli Apolo iwakali kupasaula kukanana naa mbuli Paulo iwakali kubandika munzila iisika amoyo. (Mil. 18:24; 19:8) Jehova uyanda buyo kuti katwiingula kweelana mbotukonzya. Amuyeeye kujatikizya mukamufwu iwakasanga tukkobili tobilo. Wakayandwa a Jehova nkaambo wakapa ncaakali kukonzya.—Lk. 21:1-4.

Kwiingula kulatugwasya swebo alimwi abaabo ibaswiilila (Amubone muncali 6-7) *

6. (a) Kweelana alugwalo lwa Bahebrayo 10:24, 25, mbuti mbotukonzya kujatikizyigwa abwiinguzi mbobapa bamwi? (b) Mbuti mbomukonzya kutondezya kulumba kubwiinguzi ibwamukulwaizya?

6 Tulakulwaizyanya umwi amweenzinyina ciindi notwiingula. (Amubale Bahebrayo 10:24, 25.) Toonse tulakkomana kumvwa bwiinguzi bwiindene-indene kumiswaangano yesu. Tulakkomana kumvwa bwiinguzi bwabana butakatazyi. Tulakulwaizyigwa kapati ajwi lyamuntu umwi waamba kujatikizya kasimpe nkaakajana. Alimwi tulamvwa kabotu kubona baabo ‘ibaba abusicamba’ bwakwiingula nokuba kuti bajisi nsoni naa nobatalika kwiiya mwaambo wesu. (1Tes. 2:2) Mbuti mbotukonzya kutondezya kulumba akaambo kakusolekesya kwabo? Tulakonzya kubalumba akaambo kabwiinguzi bwabo bukulwaizya yamana miswaangano. Nzila imwi nkwiinda mukwiingula andiswe. Kuti twacita oobo, tatukakulwaizyigwi buyo kumiswaangano yesu pele alimwi tuyoobakulwaizya bamwi.—Rom. 1:11, 12.

7. Ino tugwasyigwa buti ciindi notwiingula?

7 Tulagwasyigwa lwesu ciindi notwiingula. (Is. 48:17) Mubuti? Cakusaanguna, ikuti naa tujisi makanze aakuyoopa bwiinguzi, tulakulwaizyigwa kapati kulibambila kabotu miswaangano.  Ciindi notulibambila kabotu, tulalimvwisya kapati Jwi lya Leza. Mpoonya ikuti naa twalimvwisya kapati, cilauba-uba kuzibelesya zintu nzyotwiiya. Cabili, tulaikkomanina kapati miswaangano akaambo kakuti tulatola lubazu mumubandi. Catatu, akaambo kakuti kuyandika kusolekesya kapati kutegwa tupe bwiinguzi, kanji-kanji tulatuyeeya twaambo ntotwakaingula nokuba kuti kwainda ciindi.

8-9. (a) Kweelana ancolwaamba lugwalo lwa Malaki 3:16, ino muyeeya kuti Jehova ulimvwa buti kujatikizya bwiinguzi bwesu? (b) Ino mbuyumuyumu nzi bamwi mbobakonzya kujana?

8 Tulamukkomanisya Jehova ciindi notwaamba kujatikizya lusyomo lwesu. Tulakonzya kuba masimpe kuti Jehova ulatuswiilila alimwi ulalumba kapati akaambo kakuti tulasolekesya kwiingula kumiswaangano. (Amubale Malaki 3:16.) Ulatondezya kulumba kwiinda mukutulongezya ciindi notusolekesya kapati kumukkomanisya.—Malk. 3:10.

9 Cakutadooneka, tulijisi twaambo tubotu ncotweelede kwiingula kumiswaangano. Nokuba boobo, bamwi balakonzya kuyoowa kutambika. Kuti naa mbomulimvwa oobo, mutatyompwi pe. Atulange-lange njiisyo zyamu Bbaibbele zimwi, nkokuti zikozyanyo zisyoonto alimwi atwaambo tugwasya tukonzya kutugwasya toonse kusolekesya kapati kwiingula kumiswaangano.

KULWANA PENZI LYAKUYOOWA

10. (a) Ino nkuyoowa kuli buti tobanji nkotujisi? (b) Nkaambo nzi kuyoowa kwiingula ncokukonzya kuba citondezyo cibotu?

10 Sena mulayoowa kapati kufwumbwa ciindi nomuyanda kutambika kutegwa mwiingule? Ikuti kacili boobo, tamuli mulikke pe. Bwini mbwakuti, bunji bwesu tulayoowa twayanda kwiingula. Ikutegwa mulilwane penzi eeli lyakuyoowa ilimupa kutaingula, mweelede kuzyiba icimupa kuyoowa. Sena muyoowa kuti mulaziluba nzyomuyanda kwaamba naa muyoowa kulubizya? Sena mulalibilika kuti bwiinguzi bwanu tabukoobota mbuli bwiinguzi bwabamwi? Kwaamba masimpe, kuyoowa kuli boobo kulakonzya kuba citondezyo cibotu. Kutondezya kuti mulalicesya akuti bamwi mubabona kuti balamwiinda. Jehova ulabuyanda bube oobu. (Int. 138:6; Flp.  2:3) Pele awalo Jehova uyanda kuti kamumutembaula alimwi akukulwaizya basyominyoko kumiswaangano. (1Tes. 5:11) Ulamuyanda alimwi uyoomupa busicamba mbomuyandika.

11. Ino ziyeekezyo nzi zyamu Magwalo zikonzya kutugwasya?

11 Atulange-lange ziyeekezyo zimwi zyamu Magwalo. Ibbaibbele lyaamba kuti toonse tulalubizya kujatikizya nzyotwaamba alimwi ambotuzyaamba. (Jak. 3:2) Jehova talangili kuti katwaambaula munzila iilondokede, alimwi abalo bakwesu abacizyi tabusi mbobalangila oobo. (Int. 103:12-14) Mbanamukwasyi bakumuuya alimwi balatuyanda. (Mk. 10:29, 30; Joh. 13:35) Balizyi kuti zimwi ziindi tatwiinguli mbuli mbotwali kuyanda.

12-13. Ino twiiya nzi kucikozyanyo ca Nehemiya alimwi a Jona?

12 Amuyeeye zikozyanyo zimwi zyamu Bbaibbele izikonzya kumugwasya kulwana penzi lyakuyoowa. Amuyeeye kujatikizya Nehemiya. Wakabeleka munkuta yamwami singuzu. Nehemiya wakaluuside akaambo kakuti wakamvwa kuti bwaanda alimwi amilyango ya Jerusalemu yakanyonyoonwa. (Neh. 1:1-4) Amweezyeezye buyo mbwaakayoowede ciindi mwami naakamubuzya kupandulula ncaakali kulibonya kuusa! Nehemiya wakapaila cakufwambaana mpoonya akwiingula. Aboobo mwami wakacita zintu zinji kutegwa agwasye bantu ba Leza. (Neh. 2:1-8) Alimwi amuyeeye kujatikizya Jona. Ciindi Jehova naakamulomba kuti akabandike abantu baku Nineve, Jona wakayoowa kapati cakuti wakatijila kubusena kumbi. (Jon. 1:1-3) Pele kwiinda mukugwasyigwa a Jehova, Jona wakaunka akuyoobakambaukila bana Nineve. Alimwi majwi ngaakaamba, akabagwasya kapati bantu aabo ibakali mu Nineve. (Jon. 3:5-10) Kuli Nehemiya twiiya kujatikizya mbociyandika kapati kupaila katutanapa bwiinguzi. Alimwi kuli Jona twiiya kuti Jehova ulakonzya kutugwasya kumubelekela nokuba kuti tuliyoowede kapati. Masimpe ngakuti, kunyina mbungano iiyakuyoosya mbuli bana Nineve.

13 Nzintu nzi zigwasya izikonzya kumugwasya kupa bwiinguzi ibukulwaizya lyamiswaangano? Atulange-lange zimwi zisyoonto.

14. Nkaambo nzi ncotweelede kulibambila kabotu miswaangano yesu, alimwi ndilili notweelede kucita boobo?

14 Kulibambila muswaangano umwi aumwi. Ciindi nomuyeeyela limwi alimwi akulibambila kabotu, muyookulwaizyigwa kapati kupa bwiinguzi. (Tus. 21:5) Bwini mbwakuti, toonse tuliindene ciindi notulibambila miswaangano. Ba Eloise, bamukamufwu ibajisi myaka yakuzyalwa iili kuma 80, balatalika kulibambila Ciiyo ca Ngazi Yamulindizi kumatalikilo kwini kwansondo. Bakaamba kuti, “Ndilaikkomanina kapati miswaangano kuti ndalibambilila limwi kakucili ciindi.” Ba Joy, ibabeleka mulimo wakumubili, mu Mujibelo balabikka ciindi ambali cakulibambila Ngazi Yamulindizi. Bakaamba kuti, “Ncuubauba kuyeeya twaambo kuti naa ndalibambila kakuceede buyo ciindi cisyoonto kuti miswaangano icitwe.” Ba Ike, imwaalu uujisi bubi alimwi uubeleka kali mupainiya, bakaamba kuti, “Ndicibona kabotu kulibambila ciindi cisyoonto  abuzuba mumvwiki yoonse kwiinda kutola ciindi cilamfwu.”

15. Mbuti mbomukonzya kulibambila kabotu miswaangano?

15 Ino ncinzi cijatikizyidwe mukulibambila kabotu miswaangano? Amutalike cibeela cimwi acimwi cakwiiya kwiinda mukulomba Jehova kuti amupe muuya uusalala. (Lk. 11:13; 1Joh. 5:14) Mpoonya kwamaminiti masyoonto amucilange-lange cibalo coonse. Amuulange-lange mutwe wacibalo, tutwe tuli mucibalo, zifwanikiso azikozyanyo alimwi atubbokesi twakuyiisya. Lino nomubala muncali umwi aumwi, amwaabale magwalo aabikkidwe kweelana ambomukonzya. Amuzinzibale kuyeeya kujatikizya twaambo, akubikkila maano kapati kutwaambo ntomuyanda kuyakwiingula. Ikuti mwalibambila kabotu, muyoogwasyigwa kapati alimwi ciyakumuubila kwiingula.—2Kor. 9:6.

16. Ino zibelesyo nzi ziliko mumwaambo ngomuzyi, alimwi ino muzibelesya buti?

16 Kuti kacikonzyeka, amubelesye JW Library app iiliko mumwaambo ngomuzyi. Kwiinda mumbunga yakwe, Jehova watupa zibelesyo zyaa intaneti kutegwa kazitugwasya kulibambila miswaangano. Kwiinda mukubelesya JW Library® app tulakonzya kukkopa mabbuku aakwiiya mutuncini. Mpoonya tulakonzya kwiiya, kubala naa kuswiilila cibalo cimwi kufwumbwa ciindi alimwi kuli koonse. Bamwi balacibelesya cibelesyo eeci kwiiya aaciindi cakulyookezya kumulimo naa kucikolo naa nobali mulweendo. Watchtower Library alimwi a LAIBBULALI YAA INTANETI ya Watchtoweripa kuti cuubeube kuvwuntauzya twaambo muciiyo ncomuyanda kuzyiba kabotu.

Ndilili nomujana ciindi cakulibambila miswaangano? (Amubone muncali 14-16) *

17. (a) Nkaambo nzi ncocili kabotu kulibambilila limwi twaambo tunji? (b) Ncinzi ncomwakaiya mukavidiyo kakuti Amube Balongwe ba JehovaAmulibambile bwiinguzi?

17 Kuti kacikonzyeka, amulibambilile limwi twaambo tunji muciiyo cimwi acimwi. Nkaambo nzi? Akaambo kakuti inga mwayandika kutambika ziindi zinji kutegwa mupegwe coolwe cakwiingula. Ibamwi ambweni balakonzya kutambika aciindi comwe andinywe, eelyo sikweendelezya ulakonzya kutondeka umwi akati kabaabo bambi ibatambika. Ikutegwa asinizye kuti miswaangano yamana muciindi cibikkidwe, sikweendelezya ulakonzya kupa coolwe kubantu buyo basyoonto kutegwa bape bwiinguzi kujatikizya kaambo kamwi akamwi. Aboobo mutanyemi pe naa kutyompwa ikuti naa tanaamutondeka kumatalikilo kwaciiyo. Ikuti naa mwakalibambilila limwi twaambo tunji, muyooba azyoolwe zinji zyakutola lubazu mumubandi. Ibwiinguzi bumwi mbomukonzya kulibambila bulakonzya kubikkilizya kubala lugwalo. Pele ikuti kamucikonzya, amulibambile akupa bwiinguzi mumajwi aanu. *

18. Nkaambo nzi ncociyandika kupa bwiinguzi bufwaafwi?

18 Amupe bwiinguzi bufwaafwi. Kanji-kanji,  bwiinguzi bukulwaizya kapati mbufwaafwi alimwi tabukatazyi. Aboobo amube amakanze aakupa bwiinguzi bufwaafwi. Amusolekesye kubona kuti bwiinguzi bwanu butola buyo tuvwaluvwalu tuli 30. (Tus. 10:19; 15:23) Ikuti naa mwali kupa bwiinguzi lyamiswaangano kwamyaka minji, mulijisi mulimo mupati, mweelede kutondezya cikozyanyo cibotu kwiinda mukupa bwiinguzi bufwaafwi. Kuti kamutola ciindi cilamfwu kwaamba zintu zinji, bamwi balakonzya kuyoowa, inga batalika kuyeeya kuti tabakonzyi kupa bwiinguzi mbuli mbomupa. Kuyungizya waawo, bwiinguzi bufwaafwi bupa kuti bantu banji batole lubazu lyamiswaangano. Kwaambisya kuti naa ndinywe mwasaanguna kupegwa coolwe, amupe bwiinguzi butakatazyi, ibugaminide. Mutaambi twaambo toonse ituli mumuncali. Twamana kubandikwa twaambo tuyandika kapati ituli mumuncali, mulakonzya kwiingula kujatikizya twaambo tumbi.—Amubone kabbokesi kakuti “ Ino Inga Ndapa Bwiinguzi Nzi?

19. Mbuti sikweendelezya mbwakonzya kumugwasya, pele alimwi ino ncinzi ncomweelede kucita?

19 Amumuzyibye sikweendelezya kuti muyanda kwiingula mumuncali umwi. Ikuti naa mwasala kucita boobu, mweelede kumwaambila sikweendelezya kakucili ciindi miswaangano kaitanatalika. Casika ciindi cakuubandika muncali ooyo, amutambike janza cakufwambaana alimwi kalili mujulu kutegwa sikweendelezya akonzye kulibona.

20. Mbuti miswaangano yambungano mboili mbuli cakulya cilidwa antoomwe abalongwe?

20 Miswaangano yambungano amwiibone mbuli cakulya cilidwa antoomwe abalongwe babotu. Amweezyeezye kuti mwatambwa kutegwa mukalye cakulya antoomwe abalongwe bamwi bamumbungano alimwi mwalombwa kuti mukaletelezye cakulya cisyoonto. Ino inga mwalimvwa buti? Mulakonzya kulibilika, pele cakutadooneka mulakonzya kusolekesya kapati kutolelezya cakulya ncobakonzya kukkomanina boonse. Jehova, Sikututamba, watubambila tebulu lyazintu zibotu zinji kumiswaangano yesu. (Int. 23:5; Mt. 24:45) Alimwi ulakkomana ciindi notutolelezya cipego cisyoonto, ncotukonzya. Aboobo amulibambile kabotu alimwi akutola lubazu cakwaanguluka kweelana ambomukonzya. Kuti mwacita oobo, tamukalidi buyo atebulu lya Jehova pele alimwi muyooletelezya acipego cakupa mbungano.

LWIIMBO 2 Jehova Ndezina Lyako

^ munc. 5 Mbubwenya mbuli sintembauzyo Davida, toonse tulamuyanda Jehova alimwi tulakkomana kumutembaula. Tulijisi coolwe caalubazu cakutondezya luyando kuli Leza ciindi notuswaangana ambungano yesu kutegwa tukombe. Nokuba boobo, tobamwi cilatuyumina kwiingula kumiswaangano yesu. Ikuti naa kamujisi buyumuyumu buli boobu, cibalo eeci cilakonzya kumugwasya kuzyiba kaambo kamupa kuyoowa alimwi ambomukonzya kukulwana kuyoowa ooko.

^ munc. 17 A jw.org, amweebelele kavidiyo kakuti Amube Balongwe ba JehovaAmulibambile bwiinguzi. Amubone aalembedwe kuti NJIISYO ZYAMU BBAIBBELE > BANA.

^ munc. 63 BUPANDULUZI BWAZIFWANIKISO: Basimbungano calukkomano batola lubazu mumubandi waciiyo ca Ngazi Yamulindizi.

^ munc. 65 BUPANDULUZI BWAZIFWANIKISO: Bamwi akati kabasimbungano ibakatondezyegwa kumatalikilo kabatola lubazu mu Ciiyo ca Ngazi Yamulindizi. Nokuba kuti aumwi ujisi bukkale bwiindene, boonse balabikka ciindi ambali cakulibambila ciiyo iciyoobandikwa kumiswaangano.