AKATI ka Bakamboni basungu babelekela kumasena kubulide bakambausi ba Bwami, banji mbaamacizyi batakwetwe. Bamwi bali kubelekela kumasi aambi kwamyaka minji. Ino ncinzi cakabagwasya kumatalikilo kutegwa bakaakubelekele kucisi cimbi? Ino zintu nzi nzyobaiya akaambo kakubelekela kumasi aambi? Ino buumi bwabo bwacinca buti? Twakabuzya-buzya bunji bwabamacizyi aaba ibabeleka kwamyaka minji. Ikuti kamuli mucizyi uutakwetwe uujisi luyandisisyo lwakutola lubazu mumulimo ooyu uukkomanisya kapati, tulisinizyide kuti mulagwasyigwa atwaambo ntobakaamba. Masimpe, bantu ba Leza boonse balakonzya kugwasyigwa kwiinda mukulanga-langa zikozyanyo zyabo zibotu.

KUZUNDA PENZI LYAKUDOONEKA

Ba Anita

Sena inga mulalibuzya kuti naa inga mwazwidilila kuyoobelekela kucisi cimbi kamuli mupainiya uutakwetwe? Ba Anita ibajisi myaka iili kuma 70, bakali kudooneka ikuti naa inga bacikonzya. Bakakomenena ku England, kwalo nkobakatalikila bupainiya kabajisi myaka iili 18. Bakaamba kuti: “Ndakali kuyanda kuyiisya bantu kujatikizya Jehova, pele tiindakali kuyeeyela ikuti naa ndilakonzya kubelekela kucisi cimbi. Tiindakaiya mwaambo wakunze aacisi uuli woonse alimwi ndakalisinizyide kuti tandikonzyi kuzyiba mwaambo uuli woonse wakunze aacisi. Aboobo ciindi nondakatambwa ku Cikolo ca Gileadi, ndakagambwa kapati. Ndakagambwa kubona kuti muntu uunyina ambwabede uuli mbuli ndime inga watambwa kuti ajanike kucikolo eeci. Pele ndakayeeya mumoyo kuti, ‘Ikuti naa Jehova uyeeya kuti inga ndacikonzya, nkokuti ndiyoosola.’ Lino kwainda myaka iinda ku 50 nocakacitika eeco. Kuzwa ciindi eeco, ndilabeleka kandili misyinali ku Japan.” Lino ba Anita balikkomene kukulwaizya bamacizyi ibacili bana-bana kuti baiye cikozyanyo cabo akubelekela kucisi cimbi. Ba Anita balikkomene kuti banji bakacita oobo.

KUBA ABUSICAMBA

Bunji bwabamacizyi bakabelekela kale kumasi aambi, kumatalikilo bakali kuwaya-waya kuunka kuyoobelekela kumasi aambi. Ino bakaba buti abusicamba ibwakali kuyandika?

Ba Maureen

Ba Maureen ibajisi myaka iili kuma 65, bakaamba kuti: “Nondakali kukomena ndakali kuyanda kupona buumi bulaampindu, ibwakugwasya bantu.” Nobakakwanya myaka iili 20, bakalongela ku Quebec, Canada, kwalo ikwakali kuyandika bapainiya banji. “Mukuya kwaciindi, ndakatambwa ku Cikolo ca Gileadi, pele ndakayoowa kuunka kubusena nkondatakazyi kakunyina balongwe bangu.” Bakayungizya kuti: “Tiindakali kuyanda kusiya bamaama ibakali kulanganya bataata bacisidwe. Ziindi zinji masiku ndakali kumulilila Jehova mumupailo kujatikizya makani aaya. Ciindi nondakabandika  abazyali bangu kujatikizya zintu zyakali kundilibilisya, bakandikulwaizya kuti ndeelede kuunka kucikolo. Alimwi ndakabona lugwasyo basimbungano ndobakabapa bazyali bangu. Kubona Jehova mbwaakabagwasya bazyali bangu, kwakandipa kusyoma kuti andime uyakundilanganya. Aciindi eeco, ndakalilibambilide kuunka!” Kutalikila mu 1979, ba Maureen bakabeleka kwamyaka iinda ku 30 kabali bamisyinali ku West Africa. Mazuba aano, kumwi kabalanganya banyina ku Canada, ba Maureen bacibeleka kabali bapainiya baalubazu. Bayeeya myaka njobakabelekela kucisi cimbi, bakaamba kuti: “Jehova lyoonse wakali kundipa zintu nzyondakali kuyandika alimwi aciindi ncondakali kuziyanda.”

Ba Wendy

Ba Wendy, lino ibajisi myaka iili kuma 65, bakatalika bupainiya kabacili bakubusi ku Australia. Bakaamba kuti: “Ndakali kuyoowa kapati alimwi cakali kundikatazya kwaambaula abantu mbonditazyi. Pele bupainiya bwakandiyiisya kubandika abantu bamisyobo yoonse, aboobo ndakacileka kuyoowa. Mukuya kwaciindi, ndakabona kuti kuyoowa tiicakali cintu cakali kundikatazya. Bupainiya bwakali kundiyiisya kusyoma Jehova, mpoonya ndakatalika kulimvwa kuti inga ndacikonzya kubelekela kucisi cimbi. Alimwi, mucizyi umwi uutakwetwe walo wakabeleka kali misyinali ku Japan kwamyaka iinda ku 30, wakanditamba kuti tukakambauke antoomwe kwamyezi yotatwe ku Japan. Kubeleka anguwe kwakapa kuti luyandisisyo ndondakajisi lwakubelekela kucisi cimbi, lukomene.” Kuma 1985, ba Wendy bakalongela ku Vanuatu, nsumbu iili kucisi ca Australia nkocili kujwe kwalo kulampa makilomita aali 1,770.

Ba Wendy bacili ku Vanuatu, lino babelekela kuofesi yabasanduluzi. Bakaamba kuti: “Ndilakkomana kapati kubona tubunga alimwi ambungano kazipangwa mumasena aali kulamfwu. Kutola lubazu mumulimo wa Jehova munsumbu eezyi ncoolwe cilibedelede.”

Ba Kumiko (akati)

Ba Kumiko, ibajisi myaka iili kuma 65, bakali kubeleka kabali bapainiya baciindi coonse ku Japan ciindi mucizyi ngobakali kubeleka limwi naakapa muzeezo wakuti baunke kuyoobelekela ku Nepal. Ba Kumiko bakaamba kuti: “Wakali kundaambila lyoonse kuti tuunke, pele mebo ndakali kukaka, ndakali kuyoowa kwiiya mwaambo mupya alimwi akukkala kubusena bupya. Kwakali apenzi limbi lyakujana mali aakali kuyandika kutegwa tulongele kucisi cimbi. Ciindi nondakali kuyeeya cakucita, ndakajanika muntenda ya honda aboobo ndakalijana mucibbadela. Kandili mucibbadela ndakayeeya kuti: ‘Ino nguni uuzyi cikonzya kundicitikila alimwi? Ndilakonzya kuciswa kapati aboobo inga ndacibula coolwe cakucita bupainiya kumasi aambi. Sena inga tiindacikonzya kubelekela kucisi cimbi kwamwaka omwe buyo?’ Lyoonse ndakali kupaila kuli Jehova kuti andigwasye kubweza ntaamu.” Nobakazwa mucibbadela, ba Kumiko bakaakuswaya ku Nepal, mpoonya mukuya kwaciindi balo amucizyi ngobakali kubeleka limwi bakalongela nkuko.

 Balanga myaka iitandila ku 10 njobabeleka ku Nepal, ba Kumiko bakaamba kuti: “Mapenzi ngondakali kulibilika oonse akamana. Ndilikkomene akaambo kakuti ndakasala kubelekela kubusena kubulide. Kanji-kanji, ciindi nondibandika mulumbe wamu Bbaibbele amukwasyi umwi, bantu bamwi ibakkala munsi-munsi inga balaboola kuzooswiilila. Nobaba bana baniini inga balandilomba kuti ndibape katulakiti kaamba kujatikizya zyamu Bbaibbele. Cilakkomanisya kapati kukambaukila mucilawo muli bantu bajisi luyandisisyo.”

KUZUNDA BUYUMUYUMU

Tacigambyi kuti bamacizyi aaba batakwetwe mbotwakabuzya-buzya bakayaanya buyumuyumu. Ino bakabuzunda buti?

Ba Diane

Ba Diane ibazwa ku Canada bakaamba kuti: “Kumatalikilo cakali kundiyuminina kapati kukkala kulamfwu abamukwasyi wangu.” Lino bajisi myaka iili kuma 60, bakabeleka kabali bamisyinali kucisi ca Ivory Coast (lino ciitwa kuti Côte d’Ivoire) kwamyaka iili 20. “Ndakalomba Jehova kutegwa andigwasye kuti kandibayanda bantu ibali mucilawo cangu. Mukwesu Jack Redford umwi wabamayi bangu kucikolo ca Gileadi, wakatupandulwida kuti kumatalikilo inga mwanyongana, naa kugambwa, akaambo kabukkale kubusena nkomutiitumwe, kwaambisya ikuti naa mwajana bantu bapengede kapati. Pele bakaamba kuti: ‘Mutalangi kupenga kwabo. Amubalange bantu kubusyu bwabo. Amubone mbobacita ciindi bamvwa kasimpe kamu Bbaibbele.’ Oobu mbombubo mbondakacita, alimwi ndakalongezyegwa kapati! Ciindi nondibandika abantu kujatikizya mulumbe wa Bwami uumbulizya, inga ndilababona kabakkomana!” Ino ncinzi acimbi cakabagwasya ba Diane kuyakubelekela kucisi cimbi? “Ndakatalika kumvwana kapati abantu mbondakali kwiiya limwi Bbaibbele alimwi ndakakkomana kapati kubabona kababa babelesi ba Jehova basyomeka. Kucisi nkondakali kubelekela kwakaba mbuli kuti nkokucisi nkondizwa. Mbubonya mbuli Jesu mbwaakasyomezya, ndakajana mukwasyi wakumuuya.”—Mk. 10:29, 30.

Ba Anne, ibajisi myaka iili kuma 45, ibabelekela ku Asia kubusena mulimo wesu nkoukasyidwe. Bakaamba kuti: “Mumyaka njondabeleka mumasena aaindene-indene kucisi cimbi, ndakali kukkala abacizyi bakaindene kapati ambondakakomezyegwa alimwi ibakajisi bube bwiindene abube bwangu. Zimwi ziindi, eeco cakali kupa kuti kube kutamvwana kabotu. Ikuti eeco cacitika, ndakali kusola kuba antoomwe abantu mbotwakali kukkala limwi kutegwa ndizizyibe kabotu zilengwa zyabo. Alimwi ndakabeleka canguzu kutegwa kandinyoneka alimwi akuti kandibayanda kapati. Ndilikkomene kuti kusolekesya kwangu kwakapa kuti ndibe azilongwe zini-zini zyalo zyakandigwasya kuliyumya mumulimo wangu.”

Ba Ute

 Mu 1993, ba Ute bajisi myaka iili kuma 50 bazwa ku Germany, bakatumwa kuyakubelekela ku Madagascar kabali bamisyinali. Bakaamba kuti: “Kumatalikilo, cakandikatazya kwiiya mwaambo wakubusena ooku, kuzyibila kukkala kubusena bupya, alimwi akuliyumya kubulwazi bwa malaria, tuzunda tutegwa amoebas, alimwi ama parasitic worms. Pele bakandigwasya kapati. Bacizyi bakubusena oobo, bana babo, alimwi abantu mbotwakali kwiiya limwi Bbaibbele bakandigwasya kutegwa nduuzyibe mwaambo. Mucizyi ngotwakali kubeleka limwi mulimo wabumisyinali wakali kundilanganya caluyando ikuti naa ndaciswa. Pele kwiinda boonse Jehova wakandigwasya. Ndakali kupaila lyoonse kulinguwe akumwaambila zintu zyondakali kulibilika. Mpoonya ndakali kulindila cakukkazyika moyo—zimwi ziindi kwamazuba aali mbwaabede, zimwi ziindi kwamyezi iili mbwiibede—kutegwa mipailo yangu yiingulwe. Jehova wakaalanganya oonse mapenzi aangu.” Ba Ute lino babeleka ku Madagascar kwamyaka iili 23.

KULONGEZYEGWA KAPATI

Mbubwenya mbuli bamwi ibabelekela kumasena aabulide, bamacizyi batakwetwe ibakaunka kuyookkala kumasi aambi kanji-kanji inga baamba kuti kubelekela kucisi cimbi kwakapa kuti balongezyegwe kapati. Ino nzilongezyo nzi zimwi nzyobakatambula?

Ba Heidi

Ba Heidi, bazwa ku Germany, lino ibajisi myaka iili kuma 70, balikubeleka kabali bamisyinali mucisi ca Ivory Coast (lino ciitwa kuti Côte d’Ivoire) kuzwa mu 1968. Bakaamba kuti: “Lukkomano lupati ndondajana, nkubona bana bangu bakumuuya ‘kabazumanana kweenda mukasimpe.’ Bantu bamwi mbondakali kuyiisya Bbaibbele lino balabeleka kabali bapainiya alimwi bamwi mbaalu mumbungano. Banabunji bandiita kuti Bamaama naa Bakaapa. Umwi wabaalu aaba alimwi abakaintu bakwe abana bandibona kuti ndili umwi wamukwasyi wabo. Aboobo Jehova wandipa mwana musankwa, mukamwana, alimwi abazyukulu botatwe.”—3Joh. 4.

Ba Karen (akati)

Ba Karen bazwa ku Canada, lino ibajisi myaka iili kuma 70, bakabelekela ku West Africa kwamyaka iinda ku 20. Bakaamba kuti: “Buumi bwabumisyinali bwakandiyiisya kuba muntu uulyaaba kapati, siluyando, alimwi uukkazyika moyo. Alimwi, kubeleka ababelesima ibazwa mumasi aaindene-indene kwakandipa kuzyiba zintu zinji. Ndakayiiya kuti kuli nzila zinji zyakujika alimwi azyakusalazya. Eelo kaka ncilongezyo kuba abalongwe mbondiyanda kapati nyika yoonse! Nokuba kuti buumi alimwi amilimo zyakacinca, zilongwe zyesu zicizumanana.”

Ba Margaret baku England, ibajisi myaka iitandila kuma 80, bakabeleka mulimo wabumisyinali ku Laos. Bakaamba kuti: “Kubelekela kucisi cimbi kwakandigwasya kulibonena Jehova mbwakwela bantu bamisyobo yoonse ibazwa mubukkale bwiindene-indene kuboola kumbunga yakwe. Zintu eezyi zyakayumya lusyomo lwangu. Zindipa kusinizya cakumaninina kuti Jehova ulaisololela mbunga yakwe alimwi akuti makanze aakwe ayoozuzikizyigwa.”

Masimpe, bamacizyi batakwetwe ibabelekela kuzisi zimbi babamba zina lilibedelede kumulimo wa Bunakristo. Bayandika kulumbaizyigwa kapati. (Bab. 11:40) Ciinda kubota ncakuti, bayaabuvwula. (Int. 68:11) Sena mulakonzya kucinca bukkale bwanu akutobele mikondo yabacizyi aaba basungu bakabuzyigwa-buzyigwa mucibalo eeci? Ikuti naa inga mwacikonzya, cakutadooneka ‘muyoolabila akubona kuti Jehova mubotu.’—Int. 34:8.