KANJI-KANJI bantu bayanda kupona buumi bwalukkomano. Pele mumazuba aano aamamanino, bantu boonse balasikilwa masunko ‘aakatazya.’ (2Tim. 3:1) Kutalulama, kuciswa-ciswa, kubula mulimo, buumba, naa zintu zimwi izipa kulibilika akuusa zilakonzya kupa kuti lukkomano lwabo lumane asyoonto-syoonto. Nobaba babelesi ba Leza balakonzya kutyompwa mpoonya lukkomano lwabo lulakonzya kumana. Ikuti naa eeci cakamucitikila, mbuti mbomukonzya kulujana alimwi lukkomano lwanu?

Kutegwa twiingule mubuzyo ooyo, cakusaanguna tweelede kumvwisya ncolwaamba lukkomano lwini-lwini alimwi ambuli bamwi mbobakazumanana kuba alukkomano nokuba kuti kwakali masunko. Mpoonya tulaiya ncotukonzya kucita kutegwa tuzumanane kuyungizya lukkomano lwesu.

INO LUKKOMANO NINZI?

Tweelede kwiimpanya akati kakukkomana alimwi akuseka-seka. Mucikozyanyo: Ciindi mukolwi naanywa bukoko bunji, ulakonzya kutalika kuseka-seka. Nokuba boobo, ciindi naakololokwa, ulaleka kuseka-seka, ulakonzya kutalika alimwi kuyeeya mause aakwe amapenzi aamubuumi. Kulimvwa kabotu kwakwe kwakaindi kasyoonto tiilwali lukkomano lwini-lwini.—Tus. 14:13.

Mukwiimpana, lukkomano mbube ibuli mumoyo. Lupandululwa kuti “nkulimvwa kabotu ikuboola akaambo kakuba naa kulangila zintu zibotu.” Lukkomano nkuzumanana kukondwa tacikwe makani naa bukkale butuzingulukide bulakkomanisya naa pe. (1Tes. 1:6) Mubwini, muntu ulakonzya kunyonganizyigwa acintu cimwi pele kacijisi lukkomano mumoyo wakwe. Mucikozyanyo, baapostolo bakaumwa akaambo kakwaambaula kujatikizya Kristo. Nokuba boobo, “bakazwa kumbele lya Nkuta Mpati Yaba Juda, kabakkomene nkaambo bakajanwa kuti baleelela kusampaulwa akaambo kazina lyakwe.” (Mil. 5:41) Mubwini, tiibakali kukkomana akaambo kakuti bakaumwa. Pele mbuli babelesi ba Leza, bakajana lukkomano lwini-lwini mukuzumanana kusyomeka kulinguwe.

Tatuzyalwi alukkomano luli boobo; alimwi talulibooleli buyo. Ino nkaambo nzi? Akaambo kakuti lukkomano lwini-lwini ncibeela camucelo wamuuya uusalala wa Leza. Kwiinda mukugwasyigwa amuuya wa Leza, tulakonzya kuba ‘abuntu bupya’ cakumaninina, bwalo ibubikkilizya alukkomano. (Ef. 4:24; Gal. 5:22) Alimwi kuti twaba alukkomano, tulakonzya kuliyumya mumapenzi aamubuumi.

ZIKOZYANYO NZYOTUYANDA KWIIYA

Jehova wakali kuyanda kuti kakuli buyo zintu zibotu anyika, ikutali zintu zibyaabi nzyotuvwula kubona mazuba aano. Nokuba boobo, micito mibyaabi yabamwi kunyina noimulesya kukkomana Jehova. Jwi lya Leza lyaamba kuti: “Inguzu akukondwa zili mubusena bwakwe mwakkala.” (1Mak. 16:27) Kuyungizya waawo, zintu zibotu izili mukucitwa ababelesi bakwe ‘zikkomanisya moyo wa Jehova.’—Tus. 27:11.

Tulakonzya kumwiiya Jehova kwiinda mukutalibilika kapati ciindi zintu nozyaba mbotwatali kuziyeeyela. Muciindi cakuti lukkomano lwesu lumane, tulakonzya kubikkila maano kuzintu zibotu nzyotujisi lino alimwi akulindila cakukkazika moyo kuzintu zibotu kapati zili kumbele. *

 Alimwi tulakonzya kujana zikozyanyo zinji zyamu Bbaibbele zyabantu ibakazumanana kusyomeka nobakali kuyaanya bukkale bukatazya. Abrahamu ngumwi wabo iwakaliyumya kubukkale ibwakali kubikka buumi muntenda alimwi akubuyumuyumu bwakali kuletwa abamwi. (Matl. 12:10-20; 14:8-16; 16:4, 5; 20:1-18; 21:8, 9) Nokuba kuti kwakali buyumuyumu buli boobu, Abrahamu wakazumanana kuba alukkomano mumoyo wakwe. Ino wakacita buti oobo? Wakalisinizyide mumizeezo yakwe kujatikizya bulangizi bwakwe bwakupona munyika mpya ansi abweendelezi bwa Mesiya. (Matl. 22:15-18; Heb. 11:10) Jesu wakaamba kuti: “Abrahamu uso wakakondwa kapati abulangizi bwakubona buzuba bwangu.” (Joh. 8:56) Tulakonzya kumwiiya Abrahamu kwiinda mukuyeeyesya lukkomano luboola kumbele.—Rom. 8:21.

Mbubwenya mbuli Abrahamu, mwaapostolo Paulo amweenzinyina Sila abalo bakalibikkilide maano kuzisyomezyo zya Leza. Bakalijisi lusyomo luyumu, alimwi bakazumanana kuba alukkomano nokuba kuti bakacitikilwa zintu zibyaabi. Mucikozyanyo, nobakamana kuliyumya kukuumwa citaambiki alimwi akuwaalwa muntolongo, ‘akati kamasiku bakali kupaila akutembaula Leza munyimbo.’ (Mil. 16:23-25) Kunze lyakuyumizyigwa abulangizi bwabo, Paulo a Sila bakalikkomene akaambo kakuti bakali kupenga akaambo kazina lya Kristo. Tulakonzya kumwiiya Paulo a Sila kwiinda mukubikkila maano kububotu buboola akaambo kakubelekela Leza cakusyomeka.—Flp. 1:12-14.

Mazuba aano, bunyina bwesu bulabikkilizya azikozyanyo zibotu zinji zyabantu ibakazumanana kukkomana nobakali kuyaanya masunko. Mucikozyanyo, mu November 2013, kwakawa mvwula mpati yaguwo litegwa Super Typhoon Haiyan mucisi ca Philippines mpocili akati, yakanyonyoona maanda aamikwasyi ya Bakamboni ainda ku 1,000. Ba George, balo ibakanyonyookelwa ŋanda mudolopo lya Tacloban, bakaamba kuti: “Tacikwe makani acakacitika, bakwesu balikkomene. Nciyumu kuti ndilitondezye lukkomano ndotujisi.” Kufwumbwa ciindi twaakulijana mubukkale bukatazya kapati, tuyoozumanana kukkomana ikuti katuzinzibala kuyeeya cakulumba kuli nzyaatucitila Jehova. Ino ntwaambo nzi atumbi Jehova ntwaatupa itutupa kukkomana?

TWAAMBO TUTUPA KUKKOMANA

Ino nkaambo nzi kapati keelede kutupa kukkomana nkotukonzya kuba ankako ikainda cilongwe cesu a Leza? Amuciyeeyele buyo: Tulimuzyi Mweendelezi Wabubumbo Boonse. Ngu Taata, Leza wesu alimwi Mweenzuma!—Int. 71:17, 18.

Alimwi tucibona kuti cilayandika kapati cipego cabuumi alimwi akucikkomanina. (Muk. 3:12, 13) Mbotuli zilenge zijisi maano izyakakwelwa a Jehova, tulaamvwisya makanze ngajisi Leza kujatikizya ndiswe. (Kol. 1:9, 10) Aboobo, tulijisi buumi bulaampindu alimwi tulizyi ncotuponena. Kulubazu lumwi, bunji bwabantu bali munyika tabaazyi bwini makanze aabuumi. Kutegwa atondezye kwiindana ooku, Paulo wakalemba kuti: “‘Liso tiilyazibona akutwi tiikwazimvwa, alimwi kunyina muntu wakaziyeeya zintu eezyo Leza nzyabambilide baabo bamuyanda.’ Nkaambo Leza waziyubunwida ndiswe zintu eezyi kwiinda mumuuya wakwe.” (1Kor. 2:9, 10) Sena tatukkomani akaambo kakumvwisya kuyanda kwa Jehova amakanze aakwe?

Amulange-lange azimbi Jehova nzyaacitila bantu bakwe. Sena tatukkomene kuti zibi zyesu zilakonzya kulekelelwa? (1Joh. 2:12) Akaambo kaluse lwa Leza, tulijisi bulangizi bupona bwakuti ino-ino nyika mpya ilasika. (Rom. 12:12) Noliba lino, Jehova wapa mbunga mbotu yabakombima. (Int. 133:1) Jwi lya Leza alimwi lilatusyomezya kuti Jehova ulabakwabilila bantu bakwe kuli Saatani amadaimona aakwe. (Int. 91:11) Kuti twazinzibala kuyeeya kujatikizya zilongezyo zyoonse eezyi zizwa kuli Leza, tuyoolubona lukkomano lwesu kalukomena.—Flp. 4:4.

MBOMUKONZYA KUYUNGIZYA LUKKOMANO LWANU

Sena Munakristo uukkomene kale ulakonzya kuyungizya lukkomano lwakwe? Jesu wakaamba kuti: “Ndamwaambila zintu eezyi kutegwa mukondwe mbondikondedwe akuti kukondwa kwanu kuzulile.” (Joh. 15:11) Sena eeci tacitondezyi kuti tulakonzya kuyungizya  lukkomano lwesu? Mulakonzya kweezyanisya kusolekesya kwanu kwakuti muyungizye lukkomano kukusosela mulilo. Mweelede kusosela kutegwa mulilo wiindilile kupya. Mbubwenya buyo, mweelede kulisanina kumuuya kutegwa muyungizye lukkomano lwanu. Amuyeeye kuti: Lukkomano lulaboola akaambo kamuuya wa Leza. Aboobo, mulakonzya kuba alukkomano lunji kwiinda mukulomba lugwasyo lwamuuya wa Jehova lyoonse akuzinzibala kuyeeya kujatikizya Jwi lyakwe ilyakasololelwa amuuya.—Int. 1:1, 2; Lk. 11:13.

Alimwi mulakonzya kuyungizya lukkomano lwanu kwiinda mukuba basungu mumilimo iimukkomanisya Jehova. (Int. 35:27; 112:1) Ino nkaambo nzi? Akaambo kakuti twakalengwa kutegwa ‘katuyoowa Leza mwini-mwini akutobela milawo yakwe, nkaambo ooyu ngomukuli woonse ngwapedwe muntu.’ (Muk. 12:13) Munzila imwi, twakalengwa kutegwa katucita kuyanda kwa Leza. Aboobo ciindi notubelekela Jehova, tulakkomana kapati mubuumi. *

BUBOTU BUJANIKA AKAAMBO KALUKKOMANO

Notuzumanana kujana lukkomano ndwapa Leza, tuyoojana zilongezyo zinji iziinda aakukkomana buyo mumoyo. Mucikozyanyo, tuyookkomaninwa kapati a Taateesu wakujulu mbotuzumanana kumubelekela calukkomano tacikwe makani amapenzi ngotukonzya kujana. (Dt. 16:15; 1Tes. 5:16-18) Kuyungizya waawo, akaambo kakuba alukkomano lwini-lwini, tuyoobukaka bukkale bwakuyandisya zintu zyakumubili, muciindi caboobo, tuyoosolekesya nzila motukonzya kutondezya kulyaaba kapati akaambo ka Bwami bwa Leza. (Mt. 13:44) Ciindi notubona zilongezyo ziboola akaambo kakucita boobo, tuyoozumanana kukkomana, akulimvwa kukkutila kapati mubuumi alimwi akupa kuti bamwi bakkomane.—Mil. 20:35; Flp. 1:3-5.

“Ikuti naa mulikkomene akukkutila abuumi bwanu lino, nkokuti mulalangilwa kupona buumi bubotu kumbele.” Oobu mbombubo mbwaakalemba syaazibwene umwi waku University of Nebraska ku United States naakamana kulanga-langa buvwuntauzi buli mbobubede kujatikizya buumi. Eeci cileendelana a Bbaibbele, lyalo ilyaamba kuti: “Moyo uukkomene musamu mubotu uuponya.” (Tus. 17:22) Masimpe, mbomuyaabuyungizya lukkomano lwanu, mulalangilwa kuba abuumi bubotu kumubili.

Aboobo nokuba kuti tupona muziindi zyamapenzi, tulakonzya kuba alukkomano lwini-lwini alimwi lutamani ciindi notulomba muuya uusalala kwiinda mumupailo, kwiiya alimwi akuzinzibala kuyeeya kujatikizya Jwi lya Jehova. Alimwi tulaluyungizya lukkomano lwesu ciindi notuyeeya zilongezyo nzyotujisi lino, notwiiya lusyomo lwabamwi, alimwi anotucita kuyanda kwa Leza. Munzila eezyi, tulakonzya kutola lubazu mukasimpe kali mulugwalo lwa Intembauzyo 64:10, ilwaamba kuti: “Mululami uyookondwa muli Jehova akuyuba mulinguwe.”

^ munc. 10 Ibube bwakukkazika moyo buyoolangwa-langwa kumbele muzibalo eezyi ziccililene izyaamba “mucelo wamuuya.”

^ munc. 20 Kutegwa mujane nzila zimwi zyakuyungizya lukkomano lwanu, amubone kabbokesi kakuti “ Nzila Zimwi Zyakuyungizya Lukkomano.”