Mwaapostolo Paulo wakalemba kuti Jehova “takamulekeli kuti musunkwe kwiinda nguzu zyanu pe.” (1Kor. 10:13) Sena eeci caamba kuti Jehova usalila limwi masunko ngotukonzya kuzunda alimwi akutusalila masunko aayelede kutusikila?

Amulange-lange mbotukonzya kujatikizyigwa akaambo kakuyeeya kuli boobu. Mukwesu umwi iwakajisi mwana wakalijaya wakabuzya kuti: ‘Sena Jehova wakasalila limwi kuti mebo abakaintu bangu tulakonzya kuliyumya akaambo kulufwu lwamwaneesu? Sena cakacitika akaambo kakuti Leza wakazyibila limwi kuti inga twaliyumya?’ Sena kuli kaambo ikamvwika kakonzya kutupa kusyoma kuti Jehova weendelezya zintu mubuumi bwesu munzila eeyi?

Kulanga-langa majwi a Paulo aalembedwe kulugwalo lwa 1 Bakorinto 10:13 kutusololela kukaambo aaka: Kunyina kaambo kamu Magwalo katupa kusyoma kuti Jehova ulazyiba kakucili kooko zintu nzyotukonzya kuliyumya mpoonya kweelana ambwaazibona zintu, ulasala masunko aayelede kutusikila. Atulange-lange twaambo tone ncotukonzya kwaambila boobu.

Cakusaanguna, Jehova wakapa bantu cipego calwaanguluko lwakulisalila. Uyanda kuti katulisalila zintu mubuumi. (Dt. 30:19, 20; Jos. 24:15) Ikuti twasala nzila iili kabotu, inga twalanga kuli Jehova kutegwa atusololele munzila eeyo. (Tus. 16:9) Pele ikuti naa twasala nzila iitali kabotu, tuyakuyaanya mapenzi. (Gal. 6:7) Ikuti Jehova naali kutusalila masunko aayelede kutusikila, sena ooko inga takubi kunyonganya cipego calwaanguluko lwakulisalila?

Cabili, Jehova tatukwabilili ‘kuziindi zyamapenzi akucitikilwa zintu zitalangilwi.’ (Muk. 9:11) Ntenda zitaambiki ambweni izikonzya kupa kuti kube mapenzi mapati, zilakonzya kucitika akaambo kakuti tulakonzya kujanika kubusena buteelede aciiindi citeelede. Jesu wakaamba kujatikizya bantu ibali 18 ibakafwa muntenda ciindi ngazi noyakabawida, alimwi wakaamba kuti aaba bantu tiibakafwa akaambo kakuyanda kwa Leza. (Lk. 13:1-5) Sena takuli kutayeeya kabotu ikuyeeya kuti Leza ulakonzya kulangila limwi bantu beelede kupona alimwi abeelede kufwa akaambo kazintu zicitika cakutalangilwa?

Catatu, umwi aumwi wesu ulijatikizyidwe mumakani aakusyomeka. Amuyeeye kuti Saatani wakakudooneka kusyomeka kwabaabo babelekela Jehova, kaamba kuti inga tatukonzyi kuzumanana kusyomeka kuli Jehova ikuti twasikilwa mapenzi. (Job. 1:9-11; 2:4; Ciy. 12:10) Ikuti Jehova naali kutukwabilila kuzwa kumasunko aamwi akaambo kakuti wakaabona  kuti mapati kapati cakuti tatukonzyi kuliyumya, tee ooko nokwali kuzuminizya kaambo kaa Saatani kakuti bantu babelekela Leza akaambo kakuti ulabacitila zintu zibotu?

Cane, Jehova tayandiki kuzyiba zintu zyoonse izitucitikila. Muzeezo wakuti Leza usalila limwi masunko ayootusikila utondezya kuti weelede kuzyiba zyoonse ziyootucitikila kumbele. Pele muzeezo uli boobu tauli wamu Magwalo pe. Leza masimpe ulakonzya kuzyiba zyakumbele. (Is. 46:10) Pele Bbaibbele litondezya kuti ulasala caboola kukuzyiba zintu ziyoocitika kumbele. (Matl. 18:20, 21; 22:12) Aboobo uzibelesya kabotu nguzu zyakwe zyakuzyibila limwi zintu zyakumbele kwiinda mukulemeka lwaanguluko lwesu lwakulisalila. Sena eeci tacili ncico ncotunga twalangila kuli Leza walo uulemeka lwaanguluko lwesu alimwi uutondezya lyoonse bube bwakwe munzila iilondokede?—Dt. 32:4; 2Kor. 3:17.

Aboobo, ino mbuti mbotukonzya kwaamvwisya majwi aa Paulo aakuti: “Leza . . . takamulekeli kuti musunkwe kwiinda nguzu zyanu”? Aawa Paulo wakapandulula Jehova ncacita, ciindi camasunko, ikutali kaatanacitika. Majwi amwaapostolo atusyomezya kuti kufwumbwa masunko aakonzya kutusikila mubuumi bwesu, Jehova uyootulanganya ikuti twasyoma mulinguwe. (Int. 55:22) Majwi aa Paulo aawumbulizya ayeeme anjiisyo zyakasimpe ziyandika kapati zyobilo.

Cakusaanguna, masunko aatucitikila masunko ‘aacitikila bamwi.’ Aboobo, masunko aatucitikila, masunko aacitikila bantu boonse. Masunko aali boobo masunko ngotukonzya kuliyumya kufwumbwa buyo kuti twasyoma muli Leza. (1Pet. 5:8, 9) Katanaamba majwi aali kulugwalo lwa 1 Bakorinto 10:13, mutupango tuli munsi, Paulo wakaamba kujatikizya masunko aakabacitikila bana Israeli munkanda. (1Kor. 10:6-11) Masunko oonse aakabacitikila akacitikila kale bantu boonse alimwi tanaakali mapati cakuti bana Israyeli basyomeka tiibakali kukonzya kuliyumya. Paulo ziindi zyone wakaamba kuti “bamwi babo” tiibakamvwida. Cilausisya kuti bana Israyeli bamwi bakatalika kucita zintu zibi akaambo kakuti bakaalilwa kusyoma Leza.

Cabili, “Leza ulasyomeka.” Makani aamba Leza mbwaakabeendelezya bantu bakwe atondezya kuti Leza ulatondezya luyando lwakwe lutamani kuli baabo “bamuyanda akubamba milawo yakwe.” (Dt. 7:9) Makani aayo alimwi atondezya kuti Leza lyoonse ulabamba zisyomezyo zyakwe. (Jos. 23:14) Akaambo kamakani aakaindi aayo aatondezya mbwasyomeka Leza, aabo ibamuyanda alimwi ibamumvwida balakonzya kusyoma kuti uyoosyomeka kutwaambo tobilo itujatikizya cisyomezyo cakwe kumasunko aakonzya kubacitikila twakuti: (1) Takazumizyi kuti sunko lisike aawo mpobatakonzyi kuliyumya, alimwi (2) ‘uyoobapa nzila yamatijilo.’

Jehova ‘ulatuumbulizya mumapenzi eesu oonse’

Ino mbuti Jehova mbwabapa nzila yamatijilo aabo bamusyoma ciindi nobasikilwa masunko? Masimpe, ikuti naa nkuyanda kwakwe, ulakonzya kuligusya sunko eelyo. Pele amuyeeye majwi aa Paulo aakuti: “[Jehova] uyoomupa anzila yamatijilo kutegwa mukonzye kuliyumya musunko eelyo.” Aboobo, ziindi zinji, ulapa “nzila yamatijilo” kwiinda mukutupa nzyotuyandika kutegwa tuliyumye kumasunko. Amulange-lange nzila zimwi Jehova mwakonzya kutupa nzila yamatijilo:

  • Leza ‘ulatuumbulizya mumapenzi eesu oonse.’ (2Kor. 1:3, 4) Jehova ulakonzya kutontozya mizeezo yesu, moyo wesu, alimwi ambotulimvwa kwiinda mukubelesya Jwi lyakwe, muuya uusalala, alimwi acakulya cakumuuya caabilwa amuzike uusyomeka.—Mt. 24:45; Joh.14:16, bupanduluzi buyungizyidwe, Rom. 15:4.

  • Ulakonzya kutusololela kwiinda mukubelesya muuya uusalala. (Joh. 14:26) Ciindi naatusikila masunko, muuya ulakonzya kutugwasya kuyeeya zibalo zyamu Bbaibbele alimwi anjiisyo mpoonya akubona nzila zigwasya nzyotukonzya kutobela.

  • Ulakonzya kubelesya bangelo kutugwasyilizya.—Heb. 1:14.

  • Ulakonzya kubelesya basyomima balo ibakonzya ‘kutuyumya-yumya’ kwiinda mumajwi alimwi amumicito.—Kol. 4:11, bupanduluzi buyungizyidwe.

Aboobo, ncinzi ncotukonzya kwaamba kujatikizya ncaamba majwi aa Paulo aalembedwe kulugwalo lwa 1 Bakorinto 10:13? Jehova tasali buya masunko aatusikila. Pele ikuti naa twajanika mumasunko mubuumi bwesu, tulakonzya kuba masimpe kuti: Ikuti twasyoma cakumaninina muli Jehova, takazumizyi kuti tusikilwe masunko ngotutakonzyi kuliyumya; lyoonse uyootupangila nzila yamatijilo kutegwa tucikonzye kuliyumya. Eelo kaka majwi aaya alaumbulizya kapati!