“Aabo Leza mbaaswaanganya, kutabi muntu uubaandaanya.” —MK. 10:9.

NYIMBO: 131, 132

1, 2. Ino lugwalo lwa Bahebrayo 13:4 lweelede kutukulwaizya kucita nzi?

SENA mulakkomana kumulemeka Jehova? Tacidoonekwi buya kuti mulakkomana! Uleelela kulemekwa alimwi usyomezya kuti uyoomulemeka andinywe. (1Sam. 2:30; Tus. 3:9; Ciy. 4:11) Alimwi uyanda kuti kamubalemeka abantu, mbuli beendelezi bamfwulumende. (Rom. 12:10; 13:7) Pele kuli cintu cimwi ncomweelede kulemeka kapati. Cintu eeco, ndukwatano.

2 Mwaapostolo Paulo wakalemba kuti: “Cikwati acilemekwe abantu boonse, alimwi bulo bwacikwati butasofwaazyigwi pe.” (Heb. 13:4) Paulo tanaakaamba majwi aaya cakwiinzya buyo mulawo. Muciindi caboobo, majwi aaya akaligaminide, inzya, wakali kwaambila Banakristo kubagama kuti kabalemeka lukwatano, kabalubona kuti ncintu ciyandika kapati. Sena andinywe mbomulubona lukwatano oobo, kwaambisya kuti mulikwete naa kukwatwa?

3. Ino ndulayo nzi luyandika kapati ndwaakapa Jesu kujatikizya lukwatano? (Amubone cifwanikiso icili kumatalikilo aacibalo.)

3 Ikuti naa lukwatano mulubona kuba cintu ciyandika kapati, nkokuti mutobela cikozyanyo cibotu kapati. Jesu wakali kululemeka lukwatano. Ciindi ba Farisi nobakamubuzya Jesu kujatikizya makani aakulekana, wakazubulula majwi ngaakaamba Leza naakatalisya lukwatano  lwakusaanguna: “Akaambo kaceeci mwaalumi uyoosiya bausyi abanyina, eelyo aaba bobilo bayooba mubili omwe.” Jesu wakayungizya ulaamba: “Aabo Leza mbaaswaanganya kutabi muntu uubaandaanya.”—Amubale Marko 10:2-12; Matl. 2:24.

4. Ino mbubambe nzi bwalukwatano mbwaakatalisya Jehova?

4 Aboobo Jesu wakazumina kuti Leza ngowakatalisya lukwatano alimwi wakakankaizya kuti kulekana takweelede. Leza tanaakaambila ba Adamu a Eva kuti lukwatano lulakonzya kumana kwiinda mukulekana. Bubambe bwalukwatano ibwakatalisyigwa mu Edeni bwakali bwakukwata buyo mukaintu omwe, nkokuti kuswaanganya bantu “bobilo” mane kukabe kutamani.

ZINTU ZYAKACINCA LUKWATANO

5. Ino lufwu lulujatikizya buti lukwatano?

5 Nokuba boobo, mbubwenya mbomuzyi, cibi ca Adamu cakapa kuti kube kucinca. Kucinca kumwi ndufwu, lwalo ilwakali kuyoolujatikizya lukwatano. Tulakonzya kucibona eeci kuzwa kumajwi ngaakalemba mwaapostolo Paulo ciindi naakali kupandulula kuti Banakristo tabali ansi aa Mulawo wa Musa. Wakaamba kuti lufwu lulamana lukwatano alimwi akuti ooyo wasyaala ulakonzya kukwata naa kukwatwa.—Rom. 7:1-3.

6. Mbuti Mulawo wa Musa mboutondezya mbwalubona lukwatano Leza?

6 Mulawo Leza ngwaakapa cisi cabana Israyeli wakapa malailile aajatikizya lukwatano. Wakali kuzumizya maali, cilengwa eeco icakaliko nociba ciindi Leza katanapa bana Israyeli Mulawo. Nokuba boobo, kwakali milawo yakabikkidwe kujatikizya maali, iyakali kukasya kupenzya bamakaintu. Mucikozyanyo, ikuti naa muna Israyeli wakwata muzike mpoonya kumbele wamwaalikila, tanaakeelede kuleka kumupa zyakulya, zyakusama alimwi azyeelede zyamulukwatano mukaintu wakusaanguna. Leza wakalailila kuti wakeelede kuzumanana kumukwabilila alimwi akumulanganya mukaintu ooyo. (Kul. 21:9, 10) Nokuba kuti tatuli ansi aa Mulawo, tulakonzya kubona mbwalubikkila maano lukwatano Jehova. Sena eeci tacimupi kulubikkila maano lukwatano?

7, 8. (a) Kweelana alugwalo kwa Deuteronomo 24:1, Mulawo wakali kwaamba nzi kujatikizya kulekana? (b) Ino Jehova ukubona buti kulekana?

7 Ino Mulawo waamba nzi kujatikizya kulekana? Nokuba kuti Jehova tanaakali kuyanda kuti mulumi amukaintu kabalekana, Mulawo wakali kuzumizya mulumi muna Israyeli kumuleka mukaintu wakwe ikuti “wajana cintu cuusya nsoni mulinguwe.” (Amubale Deuteronomo 24:1.) Mulawo kunyina nowakaamba icakali kukonzya kwaambwa kuti ‘ncintu cuusya nsoni.’ Nokuba boobo, cakeelede kuba cintu cipati, ikutali buyo cibi cisyoonto. (Dt. 23:14) Cuusisya ncakuti, kuzikusika mumazuba aa Jesu, bama Juda banji bakali kulekana “akaambo kakaambo kali koonse.” (Mt. 19:3) Cakutadooneka, inga tiitwayanda kuba mbuli mbabo.

8 Musinsimi Malaki wakaamba kujatikizya mbwakubona Leza kulekana. Eeci cakali ciindi nocakadumide kumwaalumi kuleka ‘mukaintu wakwe wakubukubusi’ cabumpelenge, ambweni kutegwa akwate mukaintu uucili mwana-mwana walo uutakombi Leza. Kujatikizya mbwaakali kucibona eeci Leza, Malaki wakalemba kuti: “Ndilikusulide kulekana.” (Mal. 2:14-16) Eeci cakali kweendelana ancolyaamba Jwi lya Leza kujatikizya lukwatano lwakusaanguna kuti: ‘Mwaalumi uyookakatila kumukaintu wakwe, alimwi bayooba mubili omwe.’ (Matl. 2:24) Jesu wakabikkila maano kujatikizya mbobalubona lukwatano Bausyi, wakaamba kuti: “Aabo Leza mbaaswaanganya kutabi muntu uubaandaanya.”—Mt. 19:6.

KAAMBO KOMWE BUYO IKAZUMIZYA KULEKANA

9. Ino majwi aa Jesu aali kulugwalo lwa Marko 10:11, 12 apandulula nzi?

9 Muntu umwi ulakonzya kubuzya kuti, ‘Sena kuli kaambo kali koonse ikazumizya Munakristo kulekana alimwi akukwata naa kukwatwa kumbi? Amubone ncaakaamba Jesu kujatikizya mbwakubona kulekana: “Kufwumbwa uuleka mukaintu wakwe akukwata umbi wacita bumambe alimwi wabisizya mukaintu wakwe mutaanzi, alimwi ikuti  mukaintu wazwa kumulumaakwe akukwatwa kuluumbi, wacita bumambe.” (Mk. 10:11, 12; Lk. 16:18) Aboobo cilasalala kuti Jesu wakalulemeka lukwatano alimwi wakali kuyanda kuti abamwi kabacita oobo. Mwaalumi iwakali kuleka mukaintu wakwe uusyomeka (naa mukaintu, kuleka mwaalumi wakwe uusyomeka) akaambo katwaambo twabumpelenge akukwata naa kukwatwa kumbi wakali kucita bumambe. Kaambo aaka nkamasimpe nkaambo kwiile kuleka mweenzinyoko wamulukwatano tacaambi kuti lukwatano lwamana. Mumeso aa Leza, bantu aabo bobilo bacili “mubili omwe.” Kuyungizya waawo, Jesu wakaamba kuti mwaalumi uuleka mukaintu wakwe uusyomeka ulakonzya kumubikka muntenda yakucita bumambe. Mubuti? Muciindi camusyule, mukaintu iwakalekwa wakali kukonzya kulimvwa kuti uleelede kukwatwa kumbi kutegwa kajana mali aakuligwasyilizya. Lukwatano luli boobo ncimwi buyo akucita bumambe.

10. Ino nkaambo nzi kakonzya kupa kuti Munakristo alekane angobakwetene limwi alimwi akwaanguluka kukwata naa kukwatwa kumbi?

10 Jesu wakaamba kaambo ikakonzya kupa kuti lukwatano lumane naakati: “Ndimwaambila kuti kufwumbwa uuleka mukaintu wakwe ikutali akaambo kabwaamu [mu Chigiliki, por·neiʹa], akukwata umbi, wacita bumambe.” (Mt. 19:9) Wakali kaambide kaambo nkoonya aaka amu Mulumbe waa Cilundu. (Mt. 5:31, 32) Mubukkale oobo boonse bobilo, Jesu wakaamba kujatikizya “bwaamu.” Ibbala eeli libikkilizya zintu zinji zijatikizya koonana ikutali kwamulukwatano: bumambe, buvwuule, koonana kwabantu batakwetene, koonana kwabantu bajisi zizo zikozyenye alimwi akoonana abanyama. Mucikozyanyo, ikuti naa mwaalumi uukwete wacita bwaamu, mukaintu wakwe ulakonzya kusala kulekana anguwe naa pe. Ikuti mukaintu wasala kulekana anguwe, nkokuti lukwatano lulamana mumeso aa Leza.

11. Nkaambo nzi Munakristo ncakonzya kusala kutalekana angobakwetene limwi nokuba kuti kuli kaambo kamu Magwalo kazumizya kucita boobo?

11 Amubone kuti Jesu tanaakaamba kuti, ikuti umwi wabanabukwetene wacita bwaamu (por·neiʹa) nkokuti beelede kulekana. Mucikozyanyo, mukaintu ulakonzya kusala kuzumanana kukkala mulukwatano nokuba kuti mulumi wakwe wacita bwaamu. Inga kacimuyanda mulumi wakwe; ambweni ulilibambilide kumulekelela alimwi akubelekela  antoomwe kutegwa babambulule lukwatano lwabo. Mubwini, kuti wasala kulekana akutakwatwa alimwi, ulakonzya kujana buyumuyumu. Mbuti kujatikizya zintu nzyayandika kumubili alimwi akoonana? Ino mbuti kujatikizya kulendelelwa? Sena kuli bana beelede kulanganizyigwa? Sena kulekana inga kwapa kuti cikatazye kubakomezya mukasimpe? (1Kor. 7:14) Cakutadooneka, ooyo uusyomeka iwalekana angobakakwetene limwi ulakonzya kujana mapenzi.

12, 13. (a) Ncinzi cakacitika kulukwatano lwa Hosea? (b) Ncinzi cakapa kuti Hosea amujole Gomeri, alimwi ncinzi ncotukonzya kwiiya kuzwa kuliceeci kujatikizya lukwatano mazuba aano?

12 Cakacitikila musinsimi Hosea cituyiisya kubona mbwalubona lukwatano Leza. Leza wakaambila Hosea kukwata mukaintu wazyina lya Gomeri, walo iwakali kuyooba “mukaintu muvwuule” alimwi iwakali kuyooba “abana bamubuvwuule.” Gomeri alimwi a Hosea bakazyala mwana musankwa. (Hos. 1:2, 3) Mukuya kwaciindi, Gomeri wakazyala mwana musimbi alimwi amusankwa, boonse bobilo kulibonya kuti bakali bamusyokwe. Nokuba kuti Gomeri wakacita bumambe cakwiinduluka-induluka, Hosea tanaakamuleka pe. Kumamanino, Gomeri wakamusiya Hosea akuba muzike. Nokuba boobo, Hosea wakamupilusya. (Hos. 3:1, 2) Jehova wakabelesya Hosea kutondezya mbuli mbwaakalekelela Israyeli cakwiinduluka-induluka akaambo kakutasyomeka kulinguwe akukomba baleza bambi. Ncinzi ncotukonzya kwiiya kuzwa kulukwatano lwa Hosea?

13 Ikuti umwi wabanabukwetene Munakristo wacita bwaamu, ooyo uusyomeka weelede kusala cakucita. Jesu wakaamba kuti ooyo uusyomeka ulijisi kaambo kalimvwisya kakulekana angobakwetene limwi alimwi akwaanguluka kukwata naa kukwatwa kumbi. Kulubazu lumbi, ooyo uusyomeka ulakonzya kumulekelela ngobakwetene limwi. Kucita boobo takuli kulubizya. Hosea wakamujola Gomeri. Ciindi Gomeri naakajokela kuli Hosea, tanaakeelede koonana amwaalumi uumbi uuli woonse. Hosea kunyina ‘naakali koonana’ a Gomeri kwaciindi cili mbocibede. (Hos. 3:3, bupanduluzi buyungizidwe.) Pele mukuya kwaciindi, kweelede kuti Hosea wakatalika alimwi koonana anguwe, eeci citondezya mbwaakalibambilide Leza kubatambula alimwi bantu bakwe alimwi akuzumanana kuba acilongwe ambabo. (Hos. 1:11; 3:3-5) Ino eeci cituyiisya nzi kujatikizya lukwatano mazuba aano? Ikuti ooyo uusyomeka watalika alimwi koonana angobakwetene limwi uutasyomeki, eeco citondezya kuti ooyo uusyomeka wamulekelela ngobakwetene limwi. (1Kor. 7:3, 5) Mpoonya kucinoonyina kaambo kalimvwisya ikeelede kubapa kulekana. Kuzwa waawo, banabukwetene beelede kubeleka canguzu kulubona mbwalubona Leza lukwatano.

AMULULEMEKE LUKWATANO NOKUBA KUTI LULI MUMAPENZI

14. Kweelana alugwalo lwa 1 Bakorinto 7:10, 11, ncinzi cikonzya kucitika mulukwatano?

14 Banakristo boonse beelede kusolekesya kululemeka lukwatano, mbubwenya buyo Jesu alimwi a Jehova mbobacita. Nokuba boobo, bamwi balaalilwa kucita boobo, akaambo kakuti bantu tabalondokede. (Rom. 7:18-23) Aboobo, taceelede kutugambya kuti Banakristo bamwi mumwaanda wamyaka wakusaanguna lukwatano lwabo lwakali mumapenzi. Paulo wakalemba kuti “mukaintu teelede kwaandaana amulumaakwe”; pele zimwi ziindi eeci cakali kucitika.—Amubale 1 Bakorinto 7:10, 11.

Ncinzi cikonzya kucitwa kutegwa lukwatano luli mumapenzi luzumanane? (Amubone muncali 15)

15, 16. (a) Nokuba kuti lukwatano lujisi mapenzi, makanze nzi ngobeelede kuba angawo banabukwetene, alimwi nkaambo nzi? (b) Mbuti eeci mbocikonzya kubeleka ikuti umwi wabanabukwetene katali mubelesi wa Jehova?

15 Paulo kunyina naakapandulula icakali kupa kuti banabukwetene kabaandaana. Mucikozyanyo, penzi tiilyakali akaambo kakuti mulumi wakacita bwaamu, calo cakali kukonzya kupa mukaintu kaambo kalimvwisya kuti balekane alimwi akukwatwa kumbi. Paulo wakalemba kuti mukaintu iwakaandaana amulumi wakwe wakeelede ‘kutakwatwa, ikuti kakutali boobo apilukile akuyanzana amulumaakwe.’ Aboobo mumeso aa Leza, bantu aaba bacikwetene. Paulo wakakulwaizya kuti tacikwe makani amapenzi ngobakonzya kujana banabukwetene, ikuti naa kunyina wacita  bwaamu, makanze aabo ayelede kuba akuyanzana alimwi. Beelede kulomba lugwasyo kubaalu bambungano. Nokuba kuti baalu tabalemeneni kubbazu lyomwe, balakonzya kupa lulayo lwamu Magwalo ilugwasya.

16 Kulakonzya kuba buyumu-yumu kapati ikuti umwi wabanabukwetene katali mubelesi wa Jehova. Kuti kwaba mapenzi mulukwatano lwabo, sena kwaandaana nenzila iikonzya kumana mapenzi? Kweelana ambotwabona, Magwalo aamba kuti bwaamu nkakaambo kalikke kazumizya banabukwetene kulekana, pele taambi twaambo tukonzya kupa banabukwetene kwaandaana. Paulo wakaamba kuti: “Ikuti mukaintu kajisi mulumi uutasyomi, pele kalisungwide kukkala anguwe, atamusiyi pe mulumaakwe.” (1Kor. 7:12, 13) Majwi aaya alabeleka amazuba aano.

17, 18. Nkaambo nzi Banakristo bamwi ncobazumanana kukkala antoomwe nokuba kuti mulukwatano lwabo kuli mapenzi?

17 Nokuba boobo, kulaba ziindi zimwi “mulumi uutasyomi” natondezya kuti ‘talisungwide kukkala anguwe.’ Ambweni ulamuuma, cakuti ulimvwa kuti buumi bwakwe bwaba muntenda. Ambweni ulakaka kumulanganya alimwi amukwasyi naa kumukasya kucita zintu zyakumuuya. Mubukkale buli boobu, Banakristo bamwi basala kuti, tacikwe makani ancakonzya kwaamba ngobakwetene limwi, walo ‘talisungwide kukkala anguwe’ alimwi akuti cileelela kwaandaana. Pele Banakristo bamwi nokuba kuti bali mubukkale bukatazya kapati tiibacita oobo; baliyumya alimwi basolekesya kubeleka canguzu kubambulula zintu. Nkaambo nzi ncobacitila boobo?

18 Mubukkale oobu nokuba kuti banabukwetene baandaana, bacikwetene. Alimwi boonse bobilo balajana buyumuyumu, kweelana ambotwabona kale. Mwaapostolo Paulo wakapa kaambo akambi ikeelede kupa banabukwetene kuzumanana kukkala antoomwe. Wakalemba kuti: “Mulumi uutasyomi ulasalazyigwa akaambo kamukaintu wakwe, awalo mukaintu uutasyomi ulasalazyigwa akaambo kamukwesu; nikwatali boobo bana banu nobasofweede, pele lino balasalala.” (1Kor. 7:14) Banakristo basyomeka banji bazumanana kukkala angobakwetene limwi uutasyomi nomuba mubukkale bukatazya. Balikkomene akaambo kakuti kwiinda mukucita boobo mukuya kwaciindi ngobakwetene limwi wakatalika kubelekela Jehova.—Amubale 1 Bakorinto 7:16; 1Pet. 3:1, 2.

19. Nkaambo nzi ncokuli banabukwetene banji ibazwidilila mumbungano ya Bunakristo?

19 Jesu kuli ncaakaamba kujatikizya kulekana, alimwi awalo mwaapostolo Paulo wakapa lulayo ilwakasololelwa amuuya kujatikizya kwaandaana. Boonse bobilo bakali kuyanda kuti babelesi ba Leza kabalulemeka lukwatano. Munyika yoonse mazuba aano, kuli banabukwetene banji mumbungano ya Bunakristo ibazwidilila mulukwatano lwabo. Ambweni mulakonzya kubajana banji mumbungano momuzulilwa. Lukwatano lwabo lubambidwe abakwesu basyomeka balo ibabayanda bamakaintu babo ibalyaabide alimwi ibatondezya luyando mulukwatano, boonse balatondezya kuti lukwatano lweelede kulemekwa. Tulakonzya kukkomana kuti bantu banji balatondezya mbwaali aamasimpe majwi a Leza aakuti: “Akaambo kaceeci mwaalumi uyoosiya bausyi abanyina akukakatila kumukaintu wakwe, eelyo aaba bobilo bayooba mubili omwe.”—Ef. 5:31, 33.