Mamiliyoni aabantu nyika yoonse basyoma kuti Kkilisimasi ncilengwa cakusekelela buzuba naakazyalwa Jesu Kristo. Pele sena kuli nomwakalibuzyide kale naa Banakristo bamumwaanda wamyaka wakusaanguna, balo ibakali baapostolo alimwi abasikwiiya ba Jesu, kuti bakali kusekelela Kkilisimasi? Alimwi sena mulicizyi Bbaibbele ncolyaamba kujatikizya kusekelela mazuba aakuzyalwa? Kujana bwiinguzi kumibuzyo eeyi kulakonzya kutugwasya kuzyiba naa Banakristo baleelede kusekelela Kkilisimasi.

Cakusaanguna, Bbaibbele kunyina mpolyaamba kujatikizya kusekelela buzuba naakazyalwa Jesu naa bwamukombi uuli woonse wa Leza uusyomeka. Magwalo aamba buyo bantu bobilo ibakasekelela mazuba aabo aakuzyalwa. Boonse bobilo tiibakali bakombi ba Jehova, Leza mukamwini Bbaibbele, alimwi ciindi nobakali kusekelela mazuba aayo zintu zibi zyakacitika. (Matalikilo 40:20; Marko 6:21) Kweelana abbuku litegwa Encyclopædia Britannica, Banakristo bakusaanguna bakacikaka “cilengwa eeci cabantu batakombi Leza cakusekelela mazuba aakuzyalwa.”

Ino mbuzuba nzi Jesu mbwaakazyalwa?

Bbaibbele kunyina mpolyaamba buzuba bwini Jesu naakazyalwa. Bbuku litegwa McClintock and Strong Cyclopedia lyaamba kuti “buzuba naakazyalwa Kristo kunyina mpobujanika mu Cizuminano Cipya naa mumabbuku aamwi buyo.” Masimpe, ikuti Jesu naakali kuyanda kuti basikwiiya bakwe kabasekelela buzuba naakazyalwa, nkokuti naakabaambila buzuba naakazyalwa.

Cabili, Bbaibbele kunyina mpolitondezya kuti Jesu naa umwi wabasikwiiya bakwe bakali kusekelela Kkilisimasi. Kweelana abbuku litegwa New Catholic Encyclopedia, kusekelela Kkilisimasi kwakasaanguna kwaambwa mubbuku litegwa “Chronograph lya Philocalus, ibbuku lyaamwaka lyabana Roma lyalo ilyakalembwa mu 336 [C.E.].” Aboobo cilisalede kuti, aciindi eeco, Bbaibbele lyakalimanide kale kulembwa alimwi kwakaindide kale myaanda yamyaka minji kuzwa Jesu naakali anyika. Nkakaambo kaako bbuku litegwa McClintock and Strong lyaamba kuti “kusekelela Kkilisimasi tacili cintu ncaakalailila Leza, alimwi kunyina mpokwaambwa mu Cizuminano Cipya.” *

Ino ncinzi Jesu ncaakabalailila basikwiiya bakwe kuti kabaibaluka?

Mbwali Mwiiyi Mupati, Jesu wakapa malailile aatondezya nzyayanda kuti basikumutobela kabacita, alimwi eezyi zililembedwe mu Bbaibbele. Pele kusekelela Kkilisimasi, takwaambidwe akati kazintu eezyo. Mbubonya mbuli mwiiyi wakucikolo mbwatayandi kuti basicikolo kabacita nzyobataambilwa, Jesu tayandi kuti basikumutobela ‘kabaindilila zintu zilembedwe’ mu Magwalo Aasalala.—1 Bakorinto 4:6.

Kulubazu lumwi, kuli cintu cimwi ciyandika kapati Banakristo bakusaanguna ncobakazyi kabotu, nkokuti kwiibaluka, naa kucita Ciibalusyo calufwu lwa Jesu. Jesu lwakwe kumugama wakabaambila basikwiiya bakwe ciindi nobakeelede kubuyeeya buzuba oobu alimwi wakabatondezya mbobakeelede kucita. Malailile aaya aagaminide, alimwi abuzuba naakafwa, alilembedwe mu Bbaibbele.—Luka 22:7, 19; 1 Bakorinto 11:25.

Mbubonya mbuli mbotwabona, Kkilisimasi nkusekelela buzuba bwakuzyalwa, pele Banakristo bakusaanguna tiibakacitobela cilengwa eeco cabantu batakombi Leza. Kuyungizya waawo, Bbaibbele kunyina mpolyaamba kuti Jesu naa bamwi kuti bakali kusekelela Kkilisimasi. Kweelana amakani aaya aamasimpe, mamiliyoni aa Banakristo balazumina kuti Kkilisimasi tabeelede kwiisekelela pe.

^ munc. 6 Kutegwa muzyibe makani manji kujatikizya mbozyakatalika zilengwa zya Kkilisimasi, amubone cibalo cakuti, “Basikubala Balabuzya . . . Ino Makani Nzi Aamasimpe Aaliko Kujatikizya Kkilisimasi?” mu Ngazi Yamulindizi yamu December 1, 2014, alimwi nkoili a www.jw.org/toi.