Paradaiso! Mutubbuku tubotu itwabasilweendo tukulwaizya kuunka kubusena bumwi buli kulamfwu ibwaambwa kuti “paradaiso” kutegwa tukalyookezye alimwi akuluba mapenzi eesu oonse. Pele mbuli mbotuzyi toonse, inga twapiluka kuŋanda tulaajana alimwi mapenzi mbubwenya mbuli mbotwakaasiide.

Nokuba boobo, makani aajatikizya paradaiso alakwelelezya kapati. Eeci citupa kulibuzya kuti: ‘Sena “paradaiso” ncintu cibotu cakuyeeyela buyo? Ikuti kacili boobo, nkaambo nzi cilakwelelezya? Alimwi sena inga caakucitika ncobeni?’

PARADAISO YAKAINDI

Kwamyaanda yamyaka minji, bantu bali kukwelelezyegwa amuzeezo uujatikizya paradaiso. Kubantu banji, luyandisisyo lwakatalika kwiinda mukumvwa “muunda wa Edeni” uuli kujwe iwaambidwe mu Bbaibbele. Ino ncinzi cakapa kuti muunda ooyu kaukwelelezya kapati? Cibalo citwaambila kuti: “Jehova Leza wakameneka zisamu zyamisyobo-misyobo anyika izyakali kukkomanisya kulanga alimwi izyakali zibotu kulya.” Muunda ooyu wakali kukkomanisya alimwi bwakali busena bubotu. Cikondelezya kapati ncakuti, kwakali “acisamu cabuumi akati kamuunda.”—Matalikilo 2:8, 9.

Kuyungizya waawo, cibalo ca Matalikilo cilaamba milonga yone iyakali kukunka maanzi kuzwa mumuunda ooyu. Milonga yobilo akati kamilonga eeyo ilizyibidwe asunu—Tigrisi (naa, Hidekeli) alimwi a Firate. (Matalikilo 2:10-14; bupanduluzi buyungizyidwe) Milonga eeyi yobilo ilakunka maanzi kuya kunkomwe ya Persia kwiinda mu Iraq, kaindi ibusena bwakali cibeela ca Persia yansiku.

Tacigambyi kuti paradaiso yaanyika iliswaangene kapati azilengwa zyabana Persia. Kkaapeti yabana Persia yamumwaanda wamyaka wa 16, ku Philadelphia Museum of Art, mu Pennsylvania, U.S.A., itondezya muunda uuyakilidwe uujisi masamu alimwi amaluba-luba aasumidwe alinjiyo. Bbala lyaci Persian ilyaamba “muunda uuyakilidwe” alimwi lyaamba “paradaiso,” alimwi zintu izili akkaapeti zitondezya bupanduluzi bwamu Bbaibbele bwakubota kwamuunda wa Edeni.

Alimwi buya makani aajatikizya paradaiso alabandikwa-bandikwa mumyaambo minji alimwi amuzisi zinji. Ciindi mukwasyi wabantu nowakamwaika mumasena aaindene-indene munyika, bakaunka kabaazyi makani aabwini mboyakabede paradaiso alo mukuya kwaciindi aakanyonganizyigwa anzyobakatalika kusyoma bantu alimwi atwaano. Naaba mazuba aano, bantu balasolekesya kupandulula masena mabotu kapati mbuli paradaiso.

KUYANDAULA PARADAISO

Basikuvwuntauzya masena bakaamba kuti bakaazyiba mpoyakabede paradaiso yakasweeka. Mucikozyanyo, Charles Gordon, mupati wabasikalumamba waku Britain, ciindi naakaswaya nsumbu ya Seychelles mu 1881, wakakkomana kapati kubona bubotu bwa Vallée de Mai—lino butegwa World Heritage site—bwalo mbwaakaamba kuti muunda wa Edeni. Mu 1492, sikuvwuntauzya masena waku Italy wazina lya Christopher Columbus, wakali kuyeeya kuti wakali afwaafwi kujana busena aakali muunda wa Edeni ciindi naakasika ansumbu iitegwa Hispaniola, lino iitwa kuti Dominican Republic a Haiti.

Bbuku lyamazuba aano ilyaamba makani aakaindi litegwa Mapping Paradise, lilijisi twaambo twaamba zyamamaapu aakaindi aainda ku 190, manji aatondezya Adamu a Eva kabali mu Edeni. Akati kamamaapu aaya, kuli maapu yamumwaanda wamyaka wa 13 yamalembe a Beatus of Liébana. Mpoili atala kuli kabeela kasyoonto kajisi paradaiso akati. Kumane kuli milonga yone iikunka maanzi iilembedwe kuti “Tigrisi,” “Firate,” “Indus,” alimwi a “Jordano,” umwi aumwi uli kukkona lyakabeela aako, alimwi kulangilwa kuti eeci ciiminina kumwaika kwa Bunakristo kumakkona one aanyika. Zintu zili boobu zitondezya kuti nokuba kuti busena aakali Paradaiso yakusaanguna tiibwakazyibidwe, pele tacidoonekwi kuti makani aajatikizya njiyo acikwelelezya kapati mbubwenya mbuli kaindi.

 John Milton, sikweema waku England iwakazyalwa myaka iinda ku 400 yainda, ulizyibidwe akaambo kabbuku lyakwe lyakweema litegwa Paradise Lost, lyalo iliyeeme acibalo cabbuku lya Matalikilo icaamba cibi ca Adamu alimwi akutandwa mumuunda wa Edeni. Mulindilyo wakaamba cisyomezyo cakuti bantu bayoopona alimwi buumi butamani anyika, akwaamba kuti: “Aciindi eeco nyika iyooba paradaiso.” Kumane Milton wakalemba bbuku limbi ilyakali kwaamba makani ngaonya lyakuti Paradise Regained.

KULEKA KUBIKKILA MAANO KUCINTU CEELEDE

Cilisalede kuti makani aamba zyaparadaiso yaanyika iyakasweeka, makani ngobali kukkomanina kapati bantu kuzwa kaindi. Aboobo ino nkaambo nzi ncobataabikkili maano mazuba aano? Kweelana abbuku litegwa Mapping Paradise, kaambo nkakuti “basyaazibwene mumakani aabukombi . . . bacileka kubikkila maano acaali kujatikizya mpoyakabede paradaiso.”

Bunji bwabantu baunka kuzikombelo bayiisyigwa kuti bayakuunka kujulu, kutali kupona muparadaiso yaanyika. Pele mulugwalo lwa Intembauzyo 37:29 Bbaibbele lyaamba kuti: “Balulami bayookona nyika, alimwi bayookkala alinjiyo lyoonse mane kukabe kutamani.” Mbwaanga mazuba aano nyika taili paradaiso, ino mbulangizi nzi mbotujisi bwakuti cisyomezyo eeci ciyoozuzikizyigwa? *

PARADAISO MUNYIKA IYOOCITIKA NCOBENI

Jehova Leza, iwakapangide Paradaiso yakusaanguna, wasyomezya kwiipilusya paradaiso iyakasweeka. Munzila nzi? Amuyeeye kuti Jesu wakatuyiisya kuti katupaila kuti: “Abuboole Bwami bwako. Akucitwe kuyanda kwako ansi aano mbubonya mbuli kujulu.” (Matayo 6:10) Bwami oobu nimfwulumende yanyika yoonse yeendelezyegwa a Jesu Kristo yalo iyoonjila mubusena bwamfwulumende zyoonse zyabantu. (Daniele 2:44) Mubweendelezi bwa Bwami oobu, kuyanda kwa Leza kujatikizya paradaiso anyika ‘kuyoocitwa.’

Kaindi, musinsimi Isaya wakasololelwa amuuya kupandulula bukkale mbobunoobede mu Paradaiso yakasyomezyegwa, mwalo mutanoolikwe mapenzi oonse aakatazya bantu mazuba aano. (Isaya 11:6-9; 35:5-7; 65:21-23) Tumukulwaizya kuti mujane maminiti masyoonto buyo akubala magwalo aaya mu Bbaibbele lyanu. Kucita boobu kulamugwasya kubona zintu Leza nzyabambilide bantu bamvwida. Bantu aabo bamvwida bayookkomana abuumi bwamu paradaiso alimwi akukkomaninwa a Leza, izintu eezyo Adamu nzyaakasweekelwa.—Ciyubunuzyo 21:3.

Ino nkaambo nzi ncotukonzya kuba masimpe kuti bulangizi bwa Paradaiso anyika tacili cintu cakuyeeyela buyo pele ciyoocitika ncobeni? Nkaambo Bbaibbele litwaambila kuti: “Majulu nga Jehova, pele nyika wakaipa bana babantu.” Bulangizi bwa Paradaiso anyika mbulangizi “Leza uutakonzyi kubeja, mbwaakasyomezya kaindi.” (Intembauzyo 115:16; Tito 1:2) Eelo kaka tabuliboteli bulangizi mbolipa Bbaibbele—kupona mu Paradaiso kukabe kutamani!

^ munc. 15 Alimwi cilakkomanisya kubona kuti mu Koran, kapango 105 mucaandaano 21 ca sura, Al-Anbiya’ [Basinsimi], yaamba kuti: “Balulami akati kababelesi Bangu bayookona nyika.”