INO TWIIYA NZI KUJATIKIZYA BANTU MBOBAKALENGWA?

Amuyeeye kujatikizya cilongwe iciba akati kabana bamaanga ibakozyanya kapati. Bantu bali boobu balamvwana kapati. Ba Nancy Segal, bapati-pati bambunga ya Twin Studies Center balo kubagama ibazyedwe maanga bakaamba kuti, mane buya bamwi bana bamaanga “balakonzya kubandika alimwi akumvwa cini ncaamba mweenzinyina kakunyina buyumuyumu.” Mukaintu umwi wakaamba mbwazyibene asimaanganyina naakati: “Tulizyibene kabotu mumbazu zyoonse.”

Ino ncinzi cipa kuti kakuli kuzyibana ikuli boobu? Buvwuntauzi bwiindene-indene butondezya kuti nokuba kuti bukkale alimwi abazyali balagwasyilizya mumakani aaya, ikukozyanya kwambobapangidwe bana bamaanga ibakozyanya kapati kulibonya kuti nkokupa kuti kabazyibana boobo.

AMULANGE-LANGE KAAMBO AAKA: Mulengi wesu ulituzyi kabotu, umwi aumwi kumugama kwiinda muntu uumbi uuli woonse mbwakonzya kutuzyiba. Masimpe, sintembauzyo Davida wakaamba kuti: “Wakandisisa mwida lyabaama. Mafwuwa aangu kunyina naakasisidwe kulinduwe ciindi nindakali kupangwa cakusisikizya. . . . Meso aako akandibona nindakacili nsalalila; zizo zyangu zyoonse zyakalilembedwe mubbuku lyako.” (Intembauzyo 139:13, 15, 16) Alikke Leza nguuzyi alimwi nguukonzya kutumvwisya kabotu kutali buyo mbotupangidwe pele alimwi azintu zyoonse izyakatucitikila mubuumi zyalo izyakacinca bube bwesu. Luzyibo lulibedelede ndwajisi Leza kujatikizya ndiswe alimwi ambotupangidwe zitupa kusyoma kuti ncobeni ulatumvwisya mumbazu zyoonse.

NCOLITUYIISYA BBAIBBELE KUJATIKIZYA LUZYIBO NDWAJISI LEZA

Davida wakapaila kuti: “O Jehova, wandilingula alimwi ulindizyi. Yebo ulizyi nendikkala ansi anendinyamuka. Ulaizyiba mizeezo yangu koli kulamfwu. Kanditanaamba jwi lili lyoonse amulaka wangu, bona! yebo O Jehova, inga ulilizyi kale.” (Intembauzyo 139:1, 2, 4) Kuyungizya waawo, Jehova ulizyi bwini mbotulimvwa alimwi “akuzyiba mizeezo yoonse muntu njajisi.” (1 Makani 28:9; 1 Samuele 16:6, 7) Ino magwalo aaya ayubununa nzi kujatikizya Leza?

Nokuba kuti inga tiitwaamba zyoonse zili kumoyo wesu alimwi ambotulimvwa ciindi notupaila kuli Leza, Mulengi wesu talangi buyo zintu nzyotucita pele alimwi ulamvwisya akaambo ncotuzicitila. Kuyungizya waawo, ulizyi zintu zibotu nzyotuyanda kucita, nokuba kuti bukkale bwesu inga kabutatuzumizyi kucita nzyotuyanda mumoyo wesu. Inzya, akaambo kakuti kuzwa kumatalikilo Leza wakatulenga katujisi luyando mumyoyo yesu, ulilibambilide alimwi uliyandide kapati kwiibona mizeezo yesu yaluyando alimwi amakanze mabotu ngotujisi.—1 Johane 4:7-10.

Kunyina cintu ncatakonzyi kubona Leza. Ulaazyi naaba mapenzi eesu ngobatakonzyi kuzyiba bamwi naa kutaamvwisya

 Magwalo atusyomezya kuti

  • “Meso aa Jehova alangide balulami, amatwi aakwe alaswiilila mipailo yabo yakukombelezya.”—1 PETRO 3:12.

  • Leza usyomezya kuti: “Ndiyookupa kuba amaano akukuyiisya nzila njoyelede kutobela. Ndiyookulaya kandikulangide.”—INTEMBAUZYO 32:8.

LEZA NGUSILWEETELELO KAPATI

Sena kuzyiba kuti Leza ulabumvwisya bukkale motubede alimwi ambotulimvwa kulagwasya kuliyumya mumapenzi? Amulange-lange cakacitikila ba Anna, ibakkala ku Nigeria. Bakaamba kuti: “Ndakatalika kudooneka naa cakali kugwasya kuzumanana kupona akaambo kabukkale bukatazya mondakabede. Ndakafwidwa mulumi alimwi ndakali kulanganya mwanaangu musimbi walo iwakali mucibbadela kaciswa bulwazi bwakuba amaanzi manji kubongo (hydrocephalus), mpoonya andime bakandijana abulwazi bwakkansa yakunkolo aboobo ndakeelede kwaandulwa, akutalika kubelesya musamu wakkansa uutegwa chemotherapy alimwi akuumpililwa amalaiti (radiotherapy). Cakandikatazya kapati kuba mucibbadela mpoonya akulanganya mwanaangu iwakali kuciswa aciindi comwe.”

Ino ncinzi cakabagwasya ba Anna kuliyumya? Bakaamba kuti: “Ndakali kuzinzibala kuyeeya magwalo mbuli lugwalo lwa Bafilipi 4:6, 7, lwalo ilwaamba kuti ‘luumuno lwa Leza oolo lwiinda maano oonse luyookwabilila myoyo yanu amizeezo yanu.’ Lyoonse nondakali kuluyeeya lugwalo oolu, ndakali kulimvwa kuswena munsi-munsi a Jehova, nkaambo ndakalizyi kuti ulindizyi kabotu kwiinda mbondilizyi ndemwini. Alimwi ndakali kukulwaizyigwa kapati abakwesu alimwi abacizyi bamumbungano ya Bunakristo.

“Nokuba kuti ndicipengana abulwazi bwangu, pele lino bukkale bwangu alimwi abwamwanaangu buli mbubo-mbubo. Akaambo kakuti Jehova uli kulubazu lwesu, twaiya kubikkila maano kapati kuzintu zikulwaizya ciindi notwayaanya mapenzi. Lugwalo lwa Jakobo 5:11 lwaamba kuti: ‘Tubabona kuti balikkomene aabo ibaliyumya. Mulimvwide zyakuliyumya kwa Jobu alimwi mulibwene mbwaakamucitila Jehova kumamanino, kuti Jehova ulaalubomba kapati aluse.’” Jehova wakalibuzyi kabotu bukkale bwa Jobu, andiswe tulakonzya kusinizya kuti ulaazyi mapenzi aali woonse ngotujisi.