BA LUZIA BALASUNKUTA KUMWEENDO WAKULUMWENSYI. Nobakacili bana, bakaciswa bulwazi bwa polio, bulwazi buyambukila kapati bwalo bunyonganya nsinga mumubili. Nobakacili aamyaka yakuzyalwa iili 16, mukaintu ngobakali kubelekela ba Luzia wakabaambila kuti: “Leza wakakusubula kwiinda mukupa kuti ulemane nkaambo tiiwakali kubamvwida banyoko.” Nokwakainda myaka iili mbwiibede, ba Luzia bakacili kuyeeya mbobakatyompedwe.

CIINDI BA DAMARIS NOBAKAZYIBA KUTI BAJISI KKANSA YAKUBONGO, bausyi bakababuzya kuti: “Ino ncinzi ncowakacita icakapa kuti uciswe bulwazi oobu? Kweelede kuti wakacita cintu cibyaabi kapati. Nkakaambo kaako Leza ncakusubulila.” Ba Damaris bakatyompwa kapati akaambo kamajwi ngobakaamba bausyi.

Kuzwa kaindi, bantu banji bali kusyoma kuti kuciswa ncisubulo kuzwa kuli Leza. Bbuku litegwa Manners and Customs of Bible Lands lyaamba kuti bantu banji bamuciindi ca Kristo bakali kusyoma kuti “kuciswa kwakali kuboola akaambo kacibi camuntu ooyo iwakali kuciswa naa cabanamukwasyi, alimwi akuti kuciswa ooko kwakali kuboola kacili cisubulo akaambo kacibi eeco.” Bbuku litegwa Medieval Medicine and the Plague lyaamba kuti kakwiindide myaka minji kuzwa ciindi ca Kristo, “bantu bamwi bakali kusyoma kuti Leza wakabaletela malwazi kutegwa abasubule akaambo kazibi zyabo.” Aboobo ciindi mamiliyoni aabantu mu Europe nobakafwa akaambo kabulwazi ibwakali mumwaanda wamyaka wa 14, sena Leza wakali kusubula basizibi? Naa sena bulwazi oobo bwakaboola buyo akaambo kakazunda ikaleta malwazi kweelana ambobakaamba basyaazibwene mubusilisi? Bantu bamwi balakonzya kulibuzya kuti, sena masimpe Leza ubelesya malwazi kutegwa asubule bantu akaambo kazibi zyabo? *

AMULANGE-LANGE KAAMBO AAKA: Nkaambo nzi Jesu ncaakabaponya bantu ibakali kuciswa ikuti naa kuciswa alimwi akupenga ncisubulo ceelede kuzwa kuli Leza? Sena kucita boobo nokwatakaba kukazyanya abululami bwa Leza? (Matayo 4:23, 24) Jesu kunyina naakali kunga wakazya makanze aa Leza. Wakaamba kuti: “Lyoonse ndicita zimukkomanisya” alimwi “ndilacita mbubonya Taata mbwaakandilailila kuti ndicite.”—Johane 8:29; 14:31.

Bbaibbele lilacisalazya kuti: Jehova Leza ‘taciti zitaluleme.’ (Deuteronomo 32:4) Mucikozyanyo, Leza takonzyi kupa kuti ndeke icite ntenda akujaya bantu banji ibanyina mulandu akaambo kakuti wali kuyanda kusubula buyo muntu omwe iwali mundeke. Kweelana abululami bwa Leza, Abrahamu, mubelesi wa Leza uusyomeka wakaamba kuti Leza takonzyi ‘kunyonyoona baluleme antoomwe ababi.’ Wakaamba kuti ‘takonzyi kucita boobo.’ (Matalikilo 18:23, 25) Bbaibbele alimwi lyaamba kuti “Leza taciti bubi pe”; “takonzyi kubisya pe.”—Jobu 34:10-12.

NCOLITUYIISYA BBAIBBELE KUJATIKIZYA KUPENGA

Ciindi notupenga, tacaambi kuti Leza ulimukutusubula akaambo kacibi cimwi ncotwakacita. Jesu wakakasalazya kaambo aaka ciindi walo alimwi abasikwiiya bakwe nobakabona mwaalumi iwakali moofwu kuzwa ciindi naakazyalwa. “Basikwiiya bakwe bakamubuzya kuti: ‘Rabbi, ino nguni wakacita cibi kutegwa azyalwe kali moofwu, sena muntu ooyu naa mbazyali bakwe?’ Jesu wakaingula kuti: ‘Tali muntu ooyu wakacita cibi nobaba bazyali bakwe pe.’”—Johane 9:1-3.

Akaambo kamizeezo iitaluzi yalo yakadumide kuciindi eeco, kweelede kuti basikwiiya ba Jesu bakagambwa ciindi naakabaambila kuti mwaalumi uulya kunyina cibi ncaakacita naa bazyali bakwe calo cakapa kuti abe boobo mbwaakabede. Jesu tanaakamuponya  buyo mwaalumi iwakali moofwu pele alimwi kwiinda mukucita boobo wakapa kuti muzeezo uutaluzi ngobakajisi wakuti kupenga ncisubulo kuzwa kuli Leza umane. (Johane 9:6, 7) Aabo bapenga akaambo kamalwazi mazuba aano balakonzya kujana luumbulizyo kwiinda mukuzyiba kuti Leza talinguwe uupa kuti kabapenga.

Ino nkaambo nzi Jesu ncaakali kubaponya bantu ikuti naa Leza ngowakali kubasubula akaambo kazibi zyabo?

Magwalo atusyomezya kuti

  • “Kunyina muntu uunga wasunka Leza azintu zibyaabi alimwi walo mwini tasunki muntu uuli woonse azintu zibyaabi.” (JAKOBO 1:13) Masimpe, “zintu zibyaabi” zyalo izyapenzya bantu kwamyaka minji, kubikkilizya akuciswa, kucisa alimwi alufwu, lino-lino ziyoogwisyigwa.

  • Jesu Kristo “wakabaponya boonse aabo ibakali kuciswa.” (MATAYO 8:16) Kwiinda mukubaponya boonse ibakali kuboola kulinguwe, Mwana wa Leza wakatondezya ncobuyoocita Bwami bwa Leza munyika yoonse.

  • “[Leza] uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”—CIYUBUNUZYO 21:3-5.

INO NGUNI WEELEDE KUPEGWA MULANDU?

Pele ino nkaambo nzi bantu ncobapenga kapati boobu? Bantu bali kubuzya kwamyaka minji kujatikizya mubuzyo ooyu. Ikuti naa tali Leza weelede kupegwa mulandu, ino nguni uupa kuti katupenga? Bwiinguzi bwamibuzyo eeyi bulabandikwa mucibalo citobela.

^ munc. 4 Nokuba kuti kaindi, kwakali ziindi Leza naakali kusubula bantu akaambo kazibi zimwi zigaminide, Bbaibbele talyaambi kuti mazuba aano Jehova ucibelesya zintu mbuli kuciswa naa ntenda kusubula bantu akaambo kazibi zyabo.