EELO KAKA OOBU MBULANGIZI BUTALIBOTELI! Mulengi wesu wakasyomezya kuti uyootupa buumi butamani, mpoonya aano anyika. Nokuba boobo, bantu banji alabakatazya kusyoma makani aaya. Baamba kuti ‘muntu uuli woonse uyoofwa bumwi buzuba nkaambo oobu mbobubede buya buumi.’ Bamwi baamba kuti cilakonzyeka kupona kukabe kutamani, pele kutali waano anyika. Baamba kuti buumi butamani bukonzyeka buyo kuti muntu wafwa mpoonya akuunka kujulu. Ino nywebo muyeeya buti?

Kamutanawiingula mubuzyo ooyu, amulange-lange bwiinguzi bwamu Bbaibbele kumibuzyo eeyi yotatwe: Ino mbwaakalengwa muntu citondezya buti kuti wakeelede kupona kwaciindi cilamfwu? Ino makanze nzi aakusaanguna ngaakajisi Leza kujatikizya nyika alimwi abantu? Ino lufwu lwakaboola buti kubantu?

BANTU BAKALENGWA ABUBE BULIBEDELEDE

Akati kazilenge zyoonse Leza nzyaakalenga aano anyika, bantu mbabalengedwe munzila iilibedelede ncobeni. Munzila nzi? Bbaibbele litondezya kuti bantu balikke mbabakalengwa “mucinkozya” ca Leza, kweelana ‘ambwabede.’ (Matalikilo 1:26, 27) Ino eeci caamba nzi? Caamba kuti mbubonya mbuli cimbonimboni tulakonzya kutondezya bube bwa Leza. Eeci cibikkilizya luyando alimwi abululami bwakwe.

Kuyungizya waawo, bantu bakalengwa kabajisi nguzu zyakuyeeya kubikkilizya anguzu zyakuzyiba cibi acibotu, kulombozya kuzyiba zintu alimwi akuba acilongwe a Leza. Nkakaambo kaako tulakkomana ciindi notubona bubumbo azintu zigambya Leza nzyaakalenga alimwi azintu zikkomanisya mbuli zyakuzekaula, nyimbo alimwi akweema. Kwiinda zyoonse, bantu balijisi luyandisisyo lwakukomba Mulengi wabo. Twaambo ootu tutondezya kwiindana kupati ikuliko akati kabantu alimwi azilenge zimbi zyoonse izipona anyika.

Aboobo amuyeeye kujatikizya mubuzyo ooyu: Sena Leza naakapa bantu bube butaliboteli boobu ikuti naakali kuyanda kuti kabapona buyo kwamyaka misyoonto? Bwini mbwakuti, Leza wakabapa bantu bube oobu alimwi anguzu zilibedelede kutegwa kabakkomana abuumi butamani aano anyika.

MAKANZE AA LEZA AAKUSAANGUNA

Nokuba boobo, bantu bamwi baamba kuti, taanakali makanze aa Leza kuti bantu kabapona kukabe kutamani anyika. Baamba kuti, nyika yakalengwa kutegwa bube busena oomo bantu mobakonzya kusolwa kwakaindi buyo kasyoonto kutegwa kuzyibwe naa  mbaani beelela kuunka kujulu kuti bakakkale a Leza kukabe kutamani. Pele ikuti aaya naali masimpe, sena eeci inga tiicatondezya kuti Leza ngonguwe uupede kuti kakuli bubi munyika? Eeci inga tiiceendelana abwini mbwabede Leza. Bbaibbele lyaamba boobu kujatikizya nguwe: “Nkaambo nzila zyakwe zyoonse zililuleme. Ngu Leza uusyomeka, uutaciti zitaluleme; uliluleme alimwi uliluzi.”—Deuteronomo 32:4.

Cakusalazya Bbaibbele lilayubununa makanze aa Leza aakusaanguna kujatikizya nyika noliti: “Majulu nga Jehova, pele nyika wakaipa bana babantu.” (Intembauzyo 115:16) Masimpe, Leza wakailenga nyika kuba busena bubotu kutegwa bantu kabakkala lyoonse, alimwi wakaizuzya azintu zyoonse nzyotuyandika kutegwa katukkomana mubuumi, inzya kupona lyoonse.—Matalikilo 2:8, 9.

“Majulu nga Jehova, pele nyika wakaipa bana babantu.”​—Intembauzyo 115:1

Alimwi Bbaibbele lilaamba cakusalazya kujatikizya makanze ngajisi Leza kujatikizya bantu. Wakalailila banabukwetene bakusaanguna kuti ‘bazuzye nyika akuyeendelezya, alimwi akweendelezya . . . zilenge zyoonse zyeenda anyika.’ (Matalikilo 1:28) Eelo kaka bakajisi coolwe cilibedelede cakulanganya akukomezya munzi wabo kuba paradaiso nyika yoonse! Masimpe, bulangizi mbobakajisi ba Adamu a Eva alimwi abana mbobakali kuyoozyala kumbele, bwakali bwakupona buumi butamani anyika, kutali kuunka kujulu.

NKAAMBO NZI NCOTUFWIDA?

Ino nkaambo nzi ncotufwida? Bbaibbele litondezya kuti cimwi akati kazilenge zya Leza zyamuuya, calo kumbele icakazikwiitwa kuti Saatani Diabolosi, cakazanga akusola kunyonganya makanze aa Leza mumuunda wa Edeni. Munzila nzi?

Saatani wakoongelezya bazyali besu bakusaanguna, ba Adamu a Eva kuti bamusangane kuzangila Leza. Ciindi Saatani naakaamba majwi aatondezya kuti Leza wakali kubaima cintu cimwi cibotu, nkokuti lwaanguluko lwakulisalila ciluzi acitaluzi, bakasala kuba kulubazu lwa Saatani mpoonya bakazangila Leza. Ncinzi cakatobela? Mukuya kwaciindi bakafwa, mbubonya Leza mbwaakabaambilide. Bakasweekelwa bulangizi bwakupona kukabe kutamani mu Paradaiso anyika.—Matalikilo 2:17; 3:1-6; 5:5.

Buzangi bwa Adamu a Eva bwabajatikizya bantu boonse kusikila sunu. Ijwi lya Leza lyaamba kuti: “Cibi cakanjila munyika kwiinda mumuntu omwe [Adamu] alufwu kwiinda mucibi, eelyo lufwu lwakasikila bantu boonse nkaambo boonse bakabisya.” (Baroma 5:12) Tulafwa akaambo kakuti twakakona cibi alimwi alufwu kuzwa kubazyali besu bakusaanguna, kutali kuti lufwu lwakabambilwa limwi naa kuti ‘nkuyanda’ kwa Leza.

MULAKONZYA KUPONA KUKABE KUTAMANI ANYIKA

Buzangi ibwakacitika mumuunda wa Edeni tiibwakanyonganya makanze aa Leza aakusaanguna kujatikizya bantu alimwi anyika. Luyando lwa Leza lulondokede alimwi abululami bwakwe zyakapa kuti ajalule nzila yakutwaangununa kubuzike bwacibi alimwi alufwu nzyotwakakona. Mwaapostolo Paulo wakaamba kuti: “Cakuvwola cacibi ndufwu, pele cipego ncapa Leza mbuumi butamani kwiinda muli Kristo Jesu Mwami wesu.” (Baroma 6:23) Caluyando, Leza “wakapa Mwanaakwe simuzyalwaalikke [Jesu Kristo], kutegwa muntu uuli woonse uumusyoma atanyonyoonwi, pele abe abuumi butamani.” (Johane 3:16) Kwiinda mukulyaaba kuba cinunuzyo, Jesu wakazinununa zyoonse izyakasweeka akaambo ka Adamu. *

Ino-ino, cisyomezyo ca Leza canyika yaparadaiso ciyoozuzikizyigwa ncobeni. Mulakonzya kuyooba abuumi oobu butaliboteli ikuti mwatobela majwi aa Jesu aakuti: “Amunjile mumulyango uusyanikide, nkaambo mulyango uukwazeme alimwi anzila mpati itola kulunyonyooko, kumane mbanji banjila mulinjiyo; pele ulisyanikide mulyango alimwi ninsyoonto nzila iitola kubuumi, kumane mbasyoonto baijana.” (Matayo 7:13, 14) Inzya, buumi bwanu bwakumbele buyeeme azintu nzyomusala kucita lino. Ino ncinzi ncomweelede kucita?

^ munc. 17 Kutegwa muzyibe makani manji kujatikizya cinunuzyo mbocikonzya kumugwasya, amubone cibalo 5 mubbuku lyakuti Ncinzi Bbaibbele Ncolituyiisya? ilyakamwaigwa a Bakamboni ba Jehova alimwi nkolili awebbusaiti ya www.jw.org.