ZIKOMBELO munyika—mbuli cikombelo ca Katolika, zikombelo ziindene-indene zya Orthodox, Buddhism, azimwi—zikulwaizya kuti basololi bazyo kabatakwati naa kabatakwatwi. Kulubazu lumwi, bantu banji balimvwa kuti cilengwa eeci nkocili akaambo kamilandu yali kucitwa caino-ino iijatikizya koonana kwabasololi bazikombelo ziindene-indene.

Aboobo cileelela kubuzya kuti, Sena kutakwata naa kutakwatwa nceelelo camu Magwalo cababelesi Banakristo? Kutegwa twiingule mubuzyo ooyu, atulange-lange matalikilo aacilengwa eeci alimwi ambwacibona Leza.

MAKANI AAKAINDI AABUKOMBI AAJATIKIZYA KUTAKWATA NAA KUTAKWATWA

Mumulumbe ngwaakali kwaambila nkamu yabeedelezi bana Roma mu 2006, iwakali paapa kuciindi eeco Pope Benedict XVI wakaamba kuti mulawo wakutakwata naa kutakwatwa “ncilengwa cakatalika kaindi afwaafwi aciindi ca Baapostolo.”

Nokuba boobo, kutakwata naa kutakwatwa tiicakali cilengwa cabukombi icakali kucitwa a Banakristo bamumwaanda wamyaka wakusaanguna. Mane mwaapostolo Paulo, iwakapona mumwaanda wamyaka wakusaanguna wakacenjezya basyomi kujatikizya bamaalumi ibakali kuyakwaamba ‘majwi aakweena aalimvwisya mbuli kuti akasololelwa amuuya wa Leza’ alimwi ‘akukasya kukwatana.’—1 Timoteyo 4:1-3.

Mwakali mumwaanda wamyaka wabili cilengwa cakutakwata naa kutakwatwa nocakatalika kunjila muzikombelo zya “Bunakristo” zyalo mukuya kwaciindi izyakali kuyooba cikombelo ca Katolika. Kweelana abbuku litegwa Celibacy and Religious Traditions, cilengwa eeci “cakali kweendelana akuyaambele mukukasya koonana ikwakatalika mubulelo bwabana Roma.”

Mumyaanda yamyaka yakatobela, miswaangano yazikombelo alimwi abaabo baambwa kuti bama Fwala bacikombelo bakali kukulwaizya kutakwata naa kutakwatwa kwabasololi bazikombelo. Bakali kuyeeya kuti  koonana kwakali kusofwaazya alimwi tiikwakali kweendelana amilimo iicitwa abasololi bazikombelo. Nokuba boobo, bbuku litegwa Encyclopædia Britannica lyaamba kuti “nokuba kumamanino aamwaanda wamyaka wa 10 bunji bwabapaizi alimwi abamabishopo bamwi bakalijisi bamakaintu.”

Mulawo wakutakwata naa kutakwatwa kwabasololi bazikombelo wakabikkwa lyamiswaangano ya Lateran mu 1123 awamu 1139, iyakacitilwa mu Rome, alimwi wazumanana kubako mucikombelo ca Katolika kusikila mazuba aano. Kwiinda mukucita boobu, cikombelo cakakwabilila nguzu nzyocijisi alimwi amali kutegwa bapaizi ibakakwete batasiili bana babo lubono lwacikombelo.

LEZA MBWAKUBONA KUTAKWATA NAA KUTAKWATWA

Leza mbwakubona kutakwata naa kutakwatwa kulaambidwe kabotu-kabotu mu Jwi lyakwe, Bbaibbele. Mulindilyo tulabala majwi aa Jesu kujatikizya baabo ibatakakwata naa ibatakakwatwa, mbuli mbwaakacita walo “akaambo ka Bwami bwakujulu.” (Matayo 19:12) Mumakani ngamunya aaya, mwaapostolo Paulo wakaamba kujatikizya Banakristo ibakasala kutobela cikozyanyo cakwe cakutakwata “akaambo kamakani mabotu.”—1 Bakorinto 7:37, 38; 9:23.

Nokuba boobo, Jesu a Paulo kunyina nobakali kulailila kuti babelesi Banakristo tabeelede kukwata naa kukwatwa. Jesu wakaamba kuti kutakwata naa kutakwatwa cakali “cipego” ncobatakajisi basikumutobela boonse. Ciindi Paulo naakalemba kujatikizya ‘baabo batanakwete naa kukwatwa,’ cakutainda mumbali wakaamba kuti: “Tandijisi mulawo uuzwa ku Mwami pe, pele ndipa muzeezo wangu.”—Matayo 19:11; 1 Bakorinto 7:25, bupanduluzi buyungizyidwe.

Kuyungizya waawo, Bbaibbele lilatondezya kuti babelesi Banakristo banji mumwaanda wamyaka wakusaanguna, kubikkilizya amwaapostolo Petro bakalikwete. (Matayo 8:14; Marko 1:29-31; 1 Bakorinto 9:5) Mane buya, akaambo kakuvwula kwabwaamu mubweendelezi bwabana Roma bakuciindi eeco, Paulo wakalemba kuti, ikuti mulangizi Munakristo kakwete, wakeelede kuba “mulumi uukwete mukaintu omwe” alimwi uujisi “bana balibombya.”—1 Timoteyo 3:2, 4.

Eezyi tiizyakali zikwati mobatakali koonana, nkaambo cakusalazya Bbaibbele lyaamba kuti ‘imulumi [weelede] kupa mukaintu wakwe zyeelede’ alimwi akuti banabukwetene tabeelede ‘kwiimana pe’ caboola kukoonana. (1 Bakorinto 7:3-5) Cilisalede kuti, kutakwata naa kutakwatwa tacili ceelelo ca Leza, alimwi tauli mulawo kubabelesi Banakristo.

AKAAMBO KAMAKANI MABOTU

Ikuti kutakwata naa kutakwatwa tauli mulawo, nkaambo nzi Jesu a Paulo ncobakakulwaizya kutakwata naa kutakwatwa? Akaambo kakuti kutakwata naa kutakwatwa kulakonzya kupa muntu zyoolwe zinji zyakwaambila bamwi makani mabotu. Bantu batakwete naa batakwetwe balakonzya kulyaaba kapati nkaambo tabajisi zintu nzyobalibilika aabo bakwete naa bakwetwe.—1 Bakorinto 7:32-35.

Amulange-lange cikozyanyo caba David, balo ibakasala kuleka mulimo wabo iwakali kuvwolwa mali manji ku Mexico City kutegwa balongele kubusena bwakali kulamfwu ku Costa Rica kuyooyiisya bamwi Bbaibbele. Sena ba David balimvwa kuti kutakwata kwakabagwasya kucita boobo? Bakaamba kuti: “Inzya. Tiicakali cuuba-uba kwiiya zilengwa zipya alimwi abukkale bwiindene ambondakazyibide, pele mbwaanga ndakali buyo endikke, tiicakandikazya kapati kucinca.”

Ba Claudia, Munakristo uutakwetwe iwakalongela kuyoobelekela kumasena kubulide bakambausi, wakaamba kuti: “Ndilaukkomanina mulimo wangu kuli Leza. Lusyomo lwangu acilongwe cangu a Leza zilayuma ciindi nondibona mbwandilanganya.”

“Tacikwe makani ulikwetwe naa tokwetwe, ulakonzya kuba muntu uukkomene kufwumbwa kuti Jehova Leza wamubelekela kusikila mpogolela.”—Ba Claudia

Kutakwata naa kutakwatwa taceelede kuba cintu ciminya. Ba Claudia bakayungizya kwaamba kuti: “Tacikwe makani ulikwetwe naa tokwetwe, ulakonzya kuba muntu uukkomene kufwumbwa kuti Jehova Leza wamubelekela kusikila mpogolela.”—Intembauzyo 119:1, 2.