“Luyando ndwajisi Kristo lulatukulwaizya . . . Wakafwida boonse kutegwa aabo bapona kabataciliponeni beni, pele kabaponena yooyo iwakabafwida.”—2 Bakorinto 5:14, 15.

CIPEGO cilibedelede ceelede kutukulwaizya kutondezya kulumba. Jesu wakatondezya mbociyandika eeci ciindi naakamana kuponya bamaalumi bali kkumi ibakali kuciswa bulwazi bukatazya kapati ibwatakali kusilikika aciindi eeco. Umwi akati kabamaalumi aaba bali kkumi “wakapiluka katembaula Leza ajwi pati.” Jesu wakabuzya kuti: “Sena tiibali kkumi basalazyigwa? Aboobo, ino bamwi bali fwuka bali kuli?” (Luka 17:12-17) Ino ncinzi ncotwiiya aawa? Eelo kaka ncuuba-uba kufwambaana kuluba zintu zibotu nzyobatucitila bamwi!

Cinunuzyo ciliindene acipego cili coonse. Ncecipego icipati kwiinda zyoonse. Aboobo, ino mweelede kucita buti akaambo kacintu eeci Leza ncaakamucitila?

  • Amumuzyibe Wakacipa. Cinunuzyo tacikonzyi kubaletela buumi butamani bantu boonse kakunyina kucita cintu cili coonse. Muciindi caboobo, Jesu wakaamba boobu mumupailo kuli Leza naakati: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.” (Johane 17:3) Ikuti umwi wamwaambila kuti kuli muntu umwi iwakafwutula buumi bwanu nomwakacili baniini, sena inga tiimwayanda kuzyiba zinji kujatikizya muntu ooyo alimwi acakapa kuti amufwutule? Jehova Leza walo iwakapa cipego cacinunuzyo  calo cifwutula buumi, uyanda kuti mumuzyibe kabotu alimwi akuti mube acilongwe ciyumu anguwe. Bbaibbele likulwaizya kuti: “Amuswene kuli Leza, eelyo awalo ulaswena kulindinywe.”—Jakobo 4:8.

  • Amube alusyomo mucinunuzyo. “Ooyo uumusyoma Mwana ulaabuumi butamani.” (Johane 3:36) Ino kuba alusyomo caamba nzi? Caamba kubweza ntaamu; kutondezya lusyomo mucinunuzyo kuyandika kubweza ntaamu. (Jakobo 2:17) Ino nintaamu nzi eeyo? Cipego inga caba canu lilikke buyo kuti mwasika mpocibede akucitambula. Aboobo mweelede kubweza ntaamu akucitambula cinunuzyo. Munzila nzi? Amwiiye Leza mbwayanda kuti kamupona, mpoonya akucita mbubwenya oobo. * Amupaile kuli Leza kulomba kulekelelwa alimwi akuba amanjezyeezya aasalala. Amumulombe Leza kamujisi lusyomo lwakuti cinunuzyo cipa kuti cikonzyeke kuyooba aluumuno, kuliiba, alimwi akuzwidilila kuli baabo boonse bajisi lusyomo mulincico kukabe kutamani!—Bahebrayo 11:1.

  • Amujanike ku Ciibalusyo Calufwu lwa Jesu. Jesu wakatalisya cintu cicitwa mwaka amwaka kutuyeezya cipego cacinunuzyo. Kujatikizya kwiibaluka cintu eeci, wakaamba kuti: “Kamucita oobu lyoonse kutegwa kamundiyeeya.” (Luka 22:19) Bakamboni ba Jehova bayakwiibaluka lufwu lwa Jesu muli Bwabili, April 11, 2017, lyaakubbila zuba. Pulogilamu eeyi, iitola buyo woola lyomwe iyoobikkilizya amakani aayoopandulula mboluyandika lufwu lwa Jesu alimwi ambolutugwasya lino alimwi akumbele. Mwaka wamana, bantu babalilwa ku 20 miliyoni nyika yoonse bakajanika ku Ciibalusyo. Twamutamba camaanza obilo kuti mukatusangane ikutondezya kulumba kucipego ca Leza icipati kwiinda zyoonse.

^ munc. 7 Nzila yiinda kubota yakuzyiba Leza alimwi akuswena kulinguwe nkwiiya Jwi lyakwe, Bbaibbele. Amubone mbomukonzya kucita boobo kwiinda mukulomba Kamboni wa Jehova umwi naa kwiinda mukuswaya webbusaiti yesu ya www.jw.org.