Basizikombelo bajisi mizeezo iindene-indene kujatikizya cicitika kulindiswe twafwa. Pele Bbaibbele lilapa bwiinguzi busalala.

Sena kuli cibeela citalibonyi ncotujisi icizumanana kupona twafwa?

NZYOBAAMBA BANTU

Bantu banji basyoma kuti kuli cibeela citalibonyi ncotujisi cizumanana kupona twafwa. Bamwi basyoma kuti muntu ulazyalwa alimwi, akulibonya mumubili mupya mubili wakaindi wafwa. Alimwi bamwi basyoma kuti mukuya kwaciindi muntu uyakuunka kubusena bumbi, mbuli kujulu naa kuhelo.

NCOLYAAMBA BBAIBBELE

Bbaibbele talyaambi kuti kuli cibeela citalibonyi ncotujisi icizumanana kupona twafwa. Masimpe ngakuti, lyalo kanji-kanji lyaamba kuti tulafwa. Musinsimi Ezekieli, iwakabelesyegwa a Leza kulemba cibeela cimwi ca Bbaibbele, wakaamba kuti muntu ulakonzya kupegwa cisubulo calufwu. Alimwi Bbaibbele libelesya bbala lyakuti “mutunta” ikwaamba muntu uufwide. (Levitiko 21:11) Cilasalala kuti Bbaibbele taliyiisyi kuti kuli cibeela citalibonyi ncotujisi icizumanana kupona twafwa.

“Muntu ooyo uubisya ngonguwe uuyoofwa.”Ezekieli 18:20.

Sena tujisi zibeela zyobilo zyaandeene?

NZYOBAAMBA BANTU

Kuli cintu cimwi cipa buumi ciindi muntu napona pele cilazwa afwa.

NCOLYAAMBA BBAIBBELE

Bbaibbele lyaamba muzyali watumbuka bana, nkokuti bantu baumi, ibayoya ikutali kutumbuka bana bajisi zibeela zyobilo zyaandeene. (Matalikilo 46:18) Ibbala lya Chihebrayo libelesyedwe mu Bbaibbele kwaamba “bantu” lilakonzya kusandululwa kuti “cintu ciyoya.” Zimwi ziindi bbala eeli lilabelesyegwa kwaamba banyama. Kuyungizya waawo, Bbaibbele lyaamba muntu kuti uyandika cakulya. (Deuteronomo 12:20) Ikuti muntu kajisi zibeela zyobilo zyaandeene, ncibeela cili ceelede kuyoya naa kulya? Mu Bbaibbele, muntu kunyina naambwa kuti ujisi zibeela zyobilo zyaandeene, kanji-kanji waambwa kuti muntu uupona omwe, eeci cibikkilizya mubili, mbwalimvwa, alimwi abube mbwajisi.

‘Wakazyala bana bali 16.’Matalikilo 46:18.

 Ncinzi cicitika kulindiswe twafwa?

NCOLYAAMBA BBAIBBELE

Mubili wesu wafwa, “kunyina mulimo naa kuyeeya noluba luzyibo naa busongo mu Cuumbwe.” (Mukambausi 9:10) Magwalo alatwaambila munzila iisalede kuti muntu afwa “ulapiluka kubulongo; mubuzuba mbubonya oobo nzyayeeya zyoonse zilamana.” (Intembauzyo 146:4) Muntu uufwide kunyina ncakonzya kucita, aboobo Magwalo kanji-kanji munzila yamaambilambali aamba bafwide kuti “baloona.”—Matayo 9:24.

NKAAMBO NZI MAKANI AAYA NCAAYANDIKA?

Ciindi nomwafwidwa bayandwa banu, inga muyanda kuzyiba bwiinguzi kumibuzyo mbuli yeeyi: Ino bali kuli? Ino bali muciimo nzi? Sena balapenga? Mbwaanga Bbaibbele litwaambila kuti bafwide tabazyi cintu cili coonse, tulakonzya kuumbulizyigwa kuzyiba kuti bayandwa besu bafwide tabapengi. Alimwi tulakonzya kuumbulizyigwa kuzyiba kuti Jehova usyomezya kuti uyoobabusya bantu bafwide kumbele.—Isaya 26:19.

“Bafwide tabazyi cintu nociba comwe.”Mukambausi 9:5.