ZISYANGO zibelesya nzila iikatazya kumvwisya yiitwa kuti photosynthesis kupanga zyakulya kwiinda mukubelesya mumuni wazuba. Buvwuntauzi bwamisyobo imwi yazisyango butondezya kuti zilacita acimwi cintu cikkomanisya pele cikatazya—zilacikonzya kubalila kabotu ciindi nozibelesya zyakulya ciindi camasiku.

Amulange-lange icicitika: Masyikati, zisyango zilapanga starch asyuga kuzwa ku carbon dioxide. Masiku, misyobo minji yazisyango ilabelesya starch iiyobolwa masyikati, aboobo eeci cipa kuti kakuba cakulya akupa kuti cisyango cizumanane kukomena. Nkakaambo kaako zilabelesya starch kabotu—tazifwambaani kapati naa kumuka kapati—kutegwa zibelesye starch uusika ku 95 pesenti kusikila kubucedo, ciindi nozitalika kupanga iimbi starch.

Makani aaya ayeeme abuvwuntauzi ibwakacitwa kujatikizya cisyango camusitada iciitwa kuti Arabidopsis thaliana. Basikuvwuntauzya bakajana kuti cisyango eeci cilaabanya starch iiyobodwe kweelana akulampa kwabusiku taciko makani naa busiku oobo bulampa mawoola aali 8, 12, naa 16 kutegwa buce. Cakutadooneka, cisyango cilaabanya starch iiliko kweelana aciindi cisyeede kuti buce, calo icipa kuti cikonzye kubelesya kabotu cakulya.

Mbuti zisyango mbozicikonzya kuzyiba starch iiliko muziyobwedo? Ino zicikonzya buti kubalila ciindi? Alimwi ninzila nzi njozibelesya kutegwa zicikonzye kubalila? Buvwuntauzi bumbi bulakonzya kwiingula mibuzyo eeyi.

Ino muyeeya buti? Sena nzila njozibelesya zisyango kubalila ciindi yakabako akaambo kakusanduka naa yakalengwa buya?