NDEKE iitegwa jet noyuuluka inga ipa muwo kuzinguluka cakufwambaana kumpela kwamababa aanjiyo. Muwo uuzinguluka ooyu inga ukwela ndeke aansi calo cipa kuti ndeke ibelesye mungwimba munji. Alimwi muwo ooyu ulakwelelezya ndeke izyuuluka afwaafwi. Akaambo kaceeci, ndeke zyuuluka kuzwa kubusena bomwe zyeelede kutantamukana kutegwa zitanjili mumuwo uuzinguluka wandeke zimwi.

Basyaazibwene mukupanga ndeke bajana nzila yakucesya-cesya penzi eeli. Ino ninzila nzi eeyi? Ninzila yakwiiya mbwaapangidwe mababa aacengeme kumpela aabayuni baulukisya mbuli sikakonze, sikwaze, alimwi atongola.

Amulange-lange cicitika: Ciindi nobauluka, mapepe aali kumpela kwamababa aabayuni aaba, alacengama kutozya mujulu kusikila limwi aimikila. Eeci cipa kuti kakutabi buyumuyumu mukunyamuka alimwi akucesya bulamfwu bwamababa. Alimwi cipa kuti muyuni kauluka kabotu. Basyaazibwene mukupanga ndeke bapanga ndeke kubelesya nzila njiyonya eeyi. Cabupampu, kwiinda mukubelesya nzila iitegwa wind tunnel testing, bakajana kuti ikuti kumpela kwamababa kwacengamikwa bweelede alimwi akubikkwa kabotu kweelana amuwo mboweenda, cipa kuti ndeke kayuuluka kabotu, kusika ku 10 pesenti mazuba aano, kwiinda kaindi. Ino nkaambo nzi ncocili boobo? Mababa apa kuti ndeke kaitakwelelwi kapati aansi kwiinda mukucesya muwo uuzinguluka. Kuyungizya waawo, kweelana abbuku litegwa Encyclopedia of Flight, mababa aacengeme apa kuti “ndeke kaizunda kukwelwa kumwi kwalyoonse.”

Aboobo mababa aacengeme apa kuti ndeke kazyuulukisya, kazinyamuna zintu zilema, akuba amababa mafwaafwi calo cipa kuti kaitalyi busena bupati noyakkala alimwi akutabelesya mungwimba munji. Mucikozyanyo mu 2010, kabunga kategwa NASA kaamba kuti ndeke nyika yoonse “zyakacaalilwa amungwimba wandeke uusika kumalita aali 7,600 miliyoni” calo cakapa kuti busi buzwa kundeke buceye-ceye.

Ino muyeeya buti? Sena mababa aacengeme kumpela aabayuni baulukisya akabako akaambo kakusanduka naa akalengwa buya?