BBIZA (litegwa Equus caballus) lilakonzya kuzuza makkilomita aali 50 muwoola lyomwe. Nokuba kuti eeci cibikkilizya kubeleka canguzu, pele ninguzu buyo zisyoonto zibeleka. Ino eeci cikonzyeka buti? Makani ali kumaulu aabbiza.

Amulange-lange cicitika ciindi bbiza nolibalika. Akaambo kakuti milambi yanjiyo ilalandamuka, ciindi bbiza nolilyata ansi, milambi eeyi icita mbuli masipiliŋi yalo iipa kuti bbiza kaliwaalwa kumbele.

Kuyungizya waawo, bbiza nolisotoka, maulu anjiyo inga alanyanyaala kapati cakuti inga anyonyoona milambi yanjiyo. Nokuba boobo, milambi iili kumaulu ilagwasyilizya kutegwa bbiza litalicisi kumaulu. Basikuvwuntauzya baita cibeela eeci camilambi kuti “milambi iibeleka munzila iilibedelede” iipa kuti bbiza kalibalika alimwi akuba anguzu.

Basyaazibwene basola kupanga malobboti aajisi maulu one mukwiiya mbwaakapangwa maulu aabbiza. Nokuba boobo, kweelana ambobakaamba ba Biomimetic Robotics Laboratory of the Massachusetts Institute of Technology, tacili cuuba-uba kwiiya mbwaapangidwe maulu aabbiza kubelesya zibelesyo zyamazuba aano alimwi aluzyibo luliko.

Ino muyeeya buti? Sena mbwaapangidwe maulu aabbiza cakacitika akaambo kakusanduka kwazintu naa akalengwa buya?