Sena cililubide kusola kwaambaula abantu bafwide?

‘Mutabiki myoyo yanu kuliba sibusangu akulisofwaazya ambabo.’ —Levitiko 19:31.

NZYOBAAMBA BANTU

Bantu inga bayanda kusyomezyegwa kuti muyandwa wabo iwakafwa tapengi. Aboobo, baamba kuti: “Atusole kwaambaula anguwe kwiinda mumyuuya naa baŋanga. Ambweni inga batugwasya munzila imwi akupa kuti tuliibe mumizeezo.”

NCOLYAAMBA BBAIBBELE

Bbaibbele lilaasalazya makani aajatikizya kusola kwaambaula abantu bafwide, cintu cakadumide kapati kaindi. Mucikozyanyo, Mulawo wa Jehova Leza kubana Israyeli wakali kwaamba kuti: ‘Kutajanwi akati kanu muntu uusonda naba muntu uubuzya makani kubafwu. Nkaambo kufwumbwa muntu uucita eezyi ncisesemyo kuli Jehova.’ (Deuteronomo 18:10-12) Alimwi Bbaibbele lyaamba kuti aabo basyoma mizimo, “tabakabukoni Bwami bwa Leza pe.”—Bagalatiya 5:19-21.

 Sena bafwide kuli ncobakonzya kucita kubantu bacipona?

“Baumi balizi kuti balafwa, pele bafwide tabezi cintu niciba comwe.” —Mukambausi 9:5.

NZYOBAAMBA BANTU

Banji baamba kuti bafwide balapona kubusena bumbi. Aboobo, balasola kwaambaula ambabo, ambweni kutegwa bazyibe makani amwi naa kubakkomanisya kutegwa kabapona muluumuno.

NCOLYAAMBA BBAIBBELE

“Baumi balizi kuti balafwa, pele bafwide tabezi cintu niciba comwe; . . . Luyando lwabo alusulo lwabo abbivwe lyabo, [zyoonse nzyobakajisi kabacipona], zyoonse zyafwidilila.” (Mukambausi 9:5, 6) Masimpe, Bbaibbele liyiisya kuti bafwide bali mbubwenya oobo—balifwide. Tabayeeyi, tabakonzyi kucita cintu cili coonse naa kukomba Leza. Lugwalo lwa Intembauzyo 115:17 lwaamba kuti: “Bafwide tabatembauli Jehova, nebaba abo baya mubukata.”

Sena baŋanga zimwi ziindi balaamba makani aaluzi?

“Sa ncibotu kuyandaula bafu kukugwasya baumi?”—Isaya 8:19.

NZYOBAAMBA BANTU

Bamwi baamba kuti baŋanga balakonzya kwaamba makani aakonzya kuzyibwa buyo abantu bafwide, banamukwasyi wabo naa balongwe.

NCOLYAAMBA BBAIBBELE

Lugwalo lwa 1 Samuele caandaano 28 lutondezya mwami uutasyomeki Saulo mbwaakaalilwa kutobela mulawo wa Leza wakutasonda. Saulo wakaambaula amuŋanga, mukaintu iwakali kulibonya mbuli kuti waambaula amuntu wa Leza wakafwa uutegwa Samuele. Sena masimpe kuti mukaintu ooyu wakali kwaambaula a Samuele? Peepe. Wakali kwaambaula asilweeno, iwakali kulicengeezya kuba Samuele.

Silweeno ooyo wakali muuya mubi, mubelesi ‘wausyi wabubeji,’ Saatani. (Johane 8:44) Nkaambo nzi myuuya mibi naa madaimona ncaakulwaizya muzeezo wakuti bafwide balapona? Makanze aabo ngakubejelezya Leza alimwi akupa kuti bantu baleke kulemeka Jwi lya Leza, Bbaibbele.—2 Timoteyo 3:16.

Sena eeci caamba kuti bafwide tabajisi bulangizi? Peepe. Ibbaibbele lisyomezya kuti kumbele kuyooba kubusyigwa kwabaabo ‘boona’ mucuumbwe. * (Johane 11:11-13; Milimo 24:15) Calino, tulizyi kuti bayandwa besu bafwide tabapengi munzila iili yoonse.

^ par. 16 Cibalo 7 mubbuku lyakuti Ino Ncinzi Cini Bbaibbele Ncoliyiisya? cijisi mutwe wakuti “Bulangizi Bwini-Bwini Kubayandwa Benu Bafwide.”