Ba Feng-Ling Yang mbaasyaazibwene bagwasyilizya mupati wabasikuvwuntauzya acikolo cimwi cili mudolopo lya Taipei, ku Taiwan. Mulimo wabo wakamwaigwa mumamagazini aamba zyasayaansi. Bakali kusyoma munjiisyo yakusanduka kwazyintu. Pele bakacinca mizeezo yabo. Balembi ba Sinsimuka! bakababuzya kujatikizya lusyomo lwabo muli Leza alimwi amulimo wabo wabusyaazibwene musayaansi.

Amutwaambile kujatikizya buumi bwanu.

Bazyali bangu bakali bacete, alimwi bamaama tiibakacizyi kubala. Twakali kuvwuba ngulube alimwi akulima zisyumani mubusena bukkalila meenda buli munsi-munsi adolopo lya Taipei. Bazyali bangu bakandiyiisya mbociyandika kuba munkutwe, alimwi akugwasya bantu.

Sena mukwasyi wanu wakali kukomba?

Bamukwasyi wangu bakali ba Taoism. Twakali kupa milumbo kuli “Leza Wakujulu,” pele kunyina ncotwakazyi kujatikizya nguwe. Ndakali kulibuzya kuti: ‘Nkaambo nzi bantu ncobapenga? Nkaambo nzi bantu ncobaliyanda?’ Ndakabala mabbuku aa Taoism, Buddhism alimwi amabbuku aamba zyamakani aakaindi aajatikizya bantu ba Kujwe alimwi a Kunyika. Alimwi ndakanjila zikombelo zinji. Pele kunyina nindakabujana bwiinguzi kumibuzyo yangu.

Nkaambo nzi ncomwakaiya sayaansi?

Ndakali kuziyanda kapati namba alimwi ndakali kukkomana kubona milawo yasayaansi mboyeendelezya bupange bwazyintu. Zyintu zyoonse, kuzwa kutuzunda tusyoonto tuli mububumbo, zilijisi milawo iizyeendelezya. Aboobo ndakali kuyandisisya kwiizyiba milawo iili boobu.

Ncinzi cakamupa kusyoma kuti njiisyo yakusanduka kwazyintu njamasimpe?

Kunyina njiisyo iimbi njindakayiisyigwa kapati kunze kwanjiisyo eeyi. Kuzwa nindakali kupulaimali mane kuyunivesiti, eeyi nenjiisyo njindakali kuyiisyigwa. Alimwi akaambo  kakuba sikuvwuntauzya musayaansi, ndakaizumina njiisyo yakusanduka kwazyintu.

Akaambo kakuba sikuvwuntauzya musayaansi, ndakaizumina njiisyo yakusanduka kwazyintu

Ncinzi cakamupa kutalika kubala Bbaibbele?

Mu 1996, ndakalongela ku Germany kuyooyungizya lwiiyo lwangu. Mwaka wakatobela ndakaswaanganya bakaintu bazyina lya Simone. Aaba bakaintu bakali Bakamboni ba Jehova alimwi bakalyaaba kwiingula mibuzyo njondakajisi kwiinda mukubelesya Bbaibbele. Ciindi nibakandaambila kuti Bbaibbele lilakonzya kupandulula mpindu yabuumi, ndakaba aaluyandisisyo kapati. Aboobo ndakatalika kufwuma kubuka abuzuba kutegwa ndibale Bbaibbele kwawoola lyomwe. Ndimane, ndakali kuzinzibala kuyeeya. Mumwaka wakatobela, ndakalibala Bbaibbele lyoonse mbolizulwa. Aboobo ndakakkomana kapati kubona businsimi bwamu Bbaibbele mbobuluzi. Mpoonya asyoonto-syoonto, ndakatalika kusyoma kuti Bbaibbele lyakazwa kuli Leza.

Ino mwakali kwaabona buti matalikilo abuumi?

Kumamanino aamyaka yakuma 1990, ndakatalika kwaayeeyesya makani aaya, eeci nceciindi abalo basyaazibwene musayaansi nobakazyiba kuti sayaansi iijatikizidwe muzyintu zipona ilijisi bumpiyo-mpiyo bunji kapati kwiinda mbobakali kuyeeyela bantu. Kwaamba masimpe, basayaansi kuzwa kaindi bakazyi kuti ma protein aali mumaseelo aazyintu zipona ngaainda kukatazya. Pele lino basola kujana nzila yakubelesya ma protein kupanga mincini iigambya iijisi zibeela zikonzya kweenda. Muncini uuli boobu ulakonzya kupangwa atubeela-beela twama protein twiinda ku 50. Mucikozyanyo, nokaba kaseelo kasyoonto buyo keelede kuba amincini iili boobu isiyene-siyene kutegwa kacikonzye kupanga magesi aakubelesya kupanga makkopi aamakani aamwi alimwi akweendelezya zyintu zimwi kunze aakaseelo.

Ino eeci cakamupa kuzyiba nzi?

Zimwi ziindi ndakali kulibuzya kuti, ‘Ino mincini yama protein iili boobu yakapangwa buti?’ Aciindi eeco, kupangwa kwamaseelo cakutayeeyela ikukatazya kapati kwakapa kuti basayaansi banji babuzye mubuzyo nguwenya ooyu. Syaazibwene musayaansi waku United States wakalemba bbuku ilikazya kuti tubeela-beela twamincini tuli mumaseelo aazyintu zipona tulakatazya cakuti tatukonzyi kulitalikila buyo pe. Andime ndakaazumina makani aaya. Aboobo, ndakazyiba kuti kweelede kuti buumi bwakalengwa buya.

Ndakali kulibuzya kuti, ‘Ino mincini yama protein iili boobu yakapangwa buti?’

Ino nkaambo nzi ncomwakaba Kamboni wa Jehova?

Ndakakkomana kubona ba Simone mbobakali kweenda musinzo uulampa makkilomita aali 56 nsondo ansondo kundiyiisya Bbaibbele nokuba kuti bakali kuciswa-ciswa. Alimwi ndakamvwa kuti ciindi caba Nazi mu Germany, Bakamboni bamwi bakali kubikkwa muntolongo akaambo kakutatola lubazu mutwaambo twacisi. Busicamba bwabo bwakandikkomanisya kapati. Luyando ndobajisi kuli Leza Bakamboni lwakapa kuti ndibasangane.

Sena kusyoma muli Leza kwamugwasya?

Babelesima bandaambila kuti ndilikkomene lino. Ndakali kulibona kubula mpindu akaambo kabucete bwakali mumukwasyi wesu, alimwi kunyina ngondakali kwaambila nkondakakomenena naa kwaamba makani aajatikizya bazyali bangu. Pele ndakaiya kuzwa mu Bbaibbele kuti Leza talangi ciimo camuntu. Alimwi buya, naba Jesu wakakomenena mumukwasyi iwakapengede mbubwenya mbuli mukwasyi wangu. Lino ndilabalanganya bazyali bangu alimwi ndilakkomana kwaambila beenzuma kujatikizya mbabo.