Germany

Mu 2012, nkuta imwi mpati mu Germany yakaamba kuti, ikuti bantu bacileka kuzulilwa kucikombelo, tabakonzyi kuzumanana kugwasyigwa acikombelo eeco. Ba Katolika ibakazwa mucikombelo eeci akuleka kutela pele ibaunka kucikombelo akutobela zilengwa zyancico, inga balakasyigwa kulya Mulalilo, kulyaambilila milandu yabo, kupegwa zyuuno mucikombelo alimwi inga tabazikkwi abasicikombelo.

Munyika

Buvwuntauzi ibwakacitwa kujatikizya zikombelo zyamunyika bwakatondezya kuti bantu ibatanjili cikombelo cili coonse, nokuba kuti balasyoma kuti Leza nkwali, lino basika ku 1.1 bbiliyoni. Mubuvwuntauzi oobu, Banakristo bakali kusika ku 2.2 bbiliyoni, ba Mozilemu bakali 1.6 bbiliyoni. Mpoonya, ba Hindu bakali 1 bbiliyoni.

Japan

Basyaazibwene musayaansi ku Japan baamba kuti “kulumbaizyigwa kupa kuti zibeela zimwi mubongo zitalike kubeleka,” calo cipa “kukkomana.” Buvwuntauzi oobu bulakasinizya kaambo kakuti kulumbaizya ninzila mbotu yakukulwaizya bamwi kucita zyintu zibotu.

Bolivia

Kumamanino aamwaka wa 2012, bantu bakabalwa mu Bolivia. Kutegwa mulimo ooyu weende kabotu, basicisi boonse bakaambilwa kuti kabakkede aŋanda buzuba oobo. Kuyungizya waawo, myootokala yabantu buyo yakalesyegwa kweenda, minyinza yakajalwa alimwi bantu bakakasyigwa kunywa bukoko.

Italy

Mubuvwuntauzi bumwi, bazyali baku Italy bakaamba kuti bakali kusobana abana babo maminiti aali 15 abuzuba. Muteende wa La Repubblica wakaamba kuti: “Akati kabazyali bosanwe, omwe buyo nguubona kuti kusobana kulagwasya mukuyiisya.” Ba Andrea Angiolino, basyaazibwene muzisobano, bakaamba kuti kwiinda mukusobana, bazyali bapa kuti bana babo kabacikonzya kweezeezya zyintu alimwi “akutobela milawo.”