CIGAMBYA ncakuti, nokuba ciindi bantu nobalangilwa kusweekelwa mulimo wabo, ŋanda naa mali, ibanji inga baciyanda kuula zyintu zinji.

Bantu bali boobu bali muntenda yakuyungwa abasikwaambilizya makwebo, balo kwiinda munzila nzyobabelesya kwaambilizya makwebo batwaambila kuti tweelede kuba aŋanda mpati, mootokala mubotu, alimwi azisani zipya izidula zyalo zisamwa abantu balaampuwo. Baamba kuti nokuba kuti tojisi mali, ulakonzya kukweleta akuula zyintu. Bantu banji makanze aabo ngakuyanda buyo kuboneka mbuli kuti mbavwubi nokuba kuti balijisi zikwelete.

Pele mukuya kwaciindi bwini bulazyibwa. Ibbuku litegwa The Narcissism Epidemic lyaamba kuti: “Kukweleta zyintu zibotu kutegwa muntu kaboneka mbuli kuti muvwubi cilikozyenye akufweba musamu uukola (cocaine) kutegwa akkomane. Kumatalikilo zyoonse inga kazilibonya mbuli kuti zili buyo kabotu, pele kwaciindi cisyoonto. Kumamanino ulacaala katakwe mali alimwi katyompedwe.”

Ibbaibbele lilabuyubununa bubi ‘bwamambonwa akaambo kazyintu nzyajisi muntu.’ (1 Johane 2:16) Masimpe ngakuti, kubikkila kapati maano kulubono kutupa kutabikkila maano kuzyintu ziyandika kapati mubuumi bwesu—zyintu zitakonzyi kuulwa amali. Atulange-lange zikozyanyo eezyi zyotatwe.

 1. LUKAMANTANO MUMUKWASYI

Mukubusi waku United States wazyina lya Brianne, * waamba kuti bausyi babikkila kapati maano kumulimo wabo alimwi azyintu zikonzya kuulwa amali. Waamba kuti: “Tulijisi zyoonse nzyotuyandika, pele bataata tabakkali aŋanda nkaambo lyoonse inga bali mulweendo. Ndilizyi kuti bacita boobo akaambo kamulimo wabo, pele ndiyeeya kuti balijisi aumbi mukuli uujatikizya mukwasyi wabo!”

Zyakuyeeyesya: Mapenzi nzi aakumbele ngobakonzya kuba angawo mubuumi bausyi Brianne? Mbuti kubikkila kapati maano kuzyintu zyakumubili mbokucijatikizya cilongwe cabo amwanaabo? Ncinzi mukwasyi wabo ncuuyanda kulimbabo iciinda mali?

Njiisyo zyamu Bbaibbele izyeelede kulangwa-langwa:

  • “Nkaambo kuyandisya mali ngomuyanda wamisyobo yoonse yazyintu zibyaabi, eelyo kwiinda mukuba aluyandisisyo luli boobu bantu bamwi . . . baliyasaula koonse-koonse amacise manji.”—1 Timoteyo 6:10.

  • “Bulilu bwazisyu buli antoomwe aluyando mbubotu kwiinda musune uuyokedwe alusulo.”—Tusimpi 15:17.

Kaambo kayandika: Mali taakonzyi kuula lukamantano mumukwasyi. Lukamantano lulaboola kwiinda mukuba aciindi cakukkala amukwasyi wanu, kubabikkila maano alimwi akubatondezya luyando.—Bakolose 3:18-21.

 2. KUKWABILILWA KWINI-KWINI

Mukubusi wazyina lya Sara uujisi myaka yakuzyalwa iili 17, waamba kuti: “Bamaama lyoonse bandaambila kuti ndeelede kuyookwatwa kumusankwa uujisi mali manji alimwi akuti ndeelede kwiiya mulimo uumwi uuyoondigwasya kujana mulimo uuvwolwa mali manji kutegwa ukandigwasye ikuti naa mali aamulumaangu amana. Lyoonse bayeeya buyo mbobakonzya kuzumanana kujana mali.”

Zyakuyeeyesya: Ciindi nomuyeeya zyakumbele, ncinzi ciyandika ncomulibilika kapati? Ndilili kulibilika kuli kabotu nokwiindila? Kujatikizya mali, mbuti banyina Sarah mbobakonzya kuzilanga munzila yeelede zyintu?

Njiisyo zyamu Bbaibbele zyeelede kulangwa-langwa:

  • “Amuleke kuliyobweda lubono anyika, aawo mpoluligwa zyuuka ankalaya alimwi ababbi mpobanjila akubba.”—Matayo 6:19.

  • “Tamuzyi mbobunoobede buumi bwanu juunza.” —Jakobo 4:14.

Kaambo kayandika: Nzinji ziyandika kutegwa tukakkale kabotu kumbele kwiinda buyo kuba amali manji. Kayi, mali alakonzya kubbigwa alimwi taakonzyi kusilika malwazi naa kulesya lufwu. (Mukambausi 7:12) Ibbaibbele liyiisya kuti kukwabililwa kwini-kwini kulaboola kwiinda mukuzyiba Leza alimwi amakanze aakwe.—Johane 17:3.

 3. KUKKUTILA

Mukubusi wazyina lya Tanya uujisi myaka yakuzyalwa iili 24, waamba kuti: “Bazyali bangu bakandiyiisya kutayanda zyintu zinji. Mebo a simaangama twakakomena katukkomene, nokuba kuti ziindi zinji twakajisi buyo zyintu zisyoonto ziyandika.”

Zyakuyeeyesya: Nkaambo nzi ncocikatazya kukkutila azyintu nzyotuyandika? Caboola kumakani aamali, ncikozyanyo nzi ncomupa kumukwasyi wanu?

Njiisyo zyamu Bbaibbele zyeelede kulangwa-langwa:

  • “Twanoojisi cakulya azyakulivwumba, tunookkutila azyintu eezyi.”—1 Timoteyo 6:8.

  • “Balikkomene aabo bazyi kuti bayandika zyintu zyakumuuya.”—Matayo 5:3.

Kaambo kayandika: Nzinji ziyandika mubuumi kwiinda mali alimwi azyintu mali nzyaakonzya kuula. Kayi Bbaibbele lyaamba kuti: “Nokuba kuti muntu kajisi zyintu zinji buti, ibuumi bwakwe tabuzwi kuzyintu eezyo nzyajisi.” (Luka 12:15) Masimpe, kukkutila kwini-kwini mubuumi kulaboola kwiinda mukwiingula mibuzyo iiyandika mbuli yakuti:

  • Nkaambo nzi ncotuponena?

  • Ino mbulangizi nzi mbotujisi kumbele?

  • Mbuti mbondikonzya kujana nzyondiyandika zyakumuuya?

 

^ munc. 8 Mazyina mucibalo eeci acincwa.