United States

Bantu bainda ku 20 ibakali basikalumamba bamucisi eeci, balalijaya buzuba abuzuba. Mwezi amwezi, bantu babalilwa ku 950 ibatambula lugwasyo kuzwa kucibeela camfwulumende cilanganya bacembeede inga bayanda kulijaya.

China

Muteende wiitwa kuti China Daily waamba kuti: “Bunji bwabasimbi bajisi myaka yakuzyalwa kuzwa a 30 kuyaansi ibabelekela muzisi zimbi balamita kabatanakwatwa, calo capa kuti mweelwe wabamatumbu [baku China] batakwetwe uvwule kapati kwiinda kaindi.” Alimwi bunji bwabantu bamucisi eeci bazyibidwe kuti “balakkala antoomwe kabatakwetene.”

Greece

Bulwazi bwantuntumaanzi bwakalimanide mucisi eeci mu 1974. Lino, akaambo kabucete alimwi akubula busilisi buli kabotu, capa kuti bulwazi oobu butalike alimwi.

India

Nokuba kuti ibukkale bwacinca mazuba aano, buvwuntauzi ibwakacitwa bwakatondezya kuti 74 pesenti yabantu bakaamba kuti bacuuyanda muzeezo wakuyandawidwa muntu wakukwatana limwi kwiinda kuliyandawida. Mpoonya, bantu basika ku 89 pesenti baamba kuti bayanda kukkala abanamukwasyi bambi kutali buyo kukkala abana babo.

Italy

“Muzisi zivwubide zyaku Europe alimwi aku America, Cikombelo caba Katolika cilaabuyumuyumu kapati. Zilengwa zyesu zyaba zyakaindi, bantu muzikombelo baceya, mweelwe wabamasiite waceya, bweendelezi bwa Cikombelo tabucibeleki, basololi alimwi abapaizi balalisumpula. . . . Cikombelo cicibelesya milawo yakali kubeleka myaka iili 200 yainda.”—Oobu mbwaakaamba mupati-pati wamu Cikombelo caba Katolika Carlo Maria Martini mukubuzya-buzya kwakacitwa katanafwa, ikuli mubbuku lyakalembwa aba Corriere della Sera.