Sena cililubide kunywa bukoko?

“Waini uubotezya moyo wamuntu, amafuta aakusyukizya busyu bwakwe, acilyo cipa moyo wamuntu inguzu.”Intembauzyo 104:15.

NZYOBAAMBA BANTU

Mumikwasyi minji, bukoko babubona kuba mbuli cakulya, bwalo bunywigwa ciindi nobalya. Pele mumikwasyi imwi, bukoko bulakasyigwa. Nkaambo nzi ncokuli kwiindana kuli boobu? Kuli twaambo tunji tupa kuti kakuli kwiindana, ndiza bantu bamwi balanywa bukoko naa pe, akaambo kambobakakomezyegwa, zilengwa, kuciswa-ciswa alimwi abukombi.

NCOLYAAMBA BBAIBBELE

Ibbaibbele lilakasya bukolwi, pele talikasyi kunywa bukoko. (1 Bakolinto 6:9, 10) Kuzwa kaindi, bakombi ba Leza bakali kunywa waini, walo waambidwe mu Bbaibbele ziindi ziinda ku 200. (Matalikilo 27:25) Lugwalo lwa Mukambausi 9:7 lwaamba kuti: “Kolya cilyo cako cakukondwa akunywa waini amoyo mubotu.” Akaambo kakuti waini ulapa muntu kukkomana, bantu bakali kuunywa muziindi zyamapobwe, mbuli mumicado. Cakali ciindi capobwe lili boobu, Jesu Kristo naakacita maleele aakusaanguna, ikusandula maanzi kuba “waini mubotu.” (Johane 2:1-11) Alimwi waini wakali kubelesyegwa mbuli musamu.—Luka 10:34; 1 Timoteyo 5:23.

 Sena Bbaibbele lilaamba kuvwula kwabukoko muntu mbwayelede kunywa?

‘Tamweelede kuba bazike kukunywa waini munji.’—Tito 2:3.

NKAAMBO NZI MAKANI AAYA NCAAYELEDE KUMUJATIKIZYA?

Mwaka amwaka, mikwasyi minji ilapenga akaambo kakuti umwi akati kabazyali naa boonse balaciindizya kunywa bukoko. Kuciindizya kunywa bukoko akwalo kwapa kuti mweelwe wantenda, kubikkilizya antenda zyamumugwagwa zivwule kapati. Mukuya kwaciindi, kuciindizya kunywa bukoko kulakonzya kunyonganya bongo, moyo, muni alimwi amwida.

NCOLYAAMBA BBAIBBELE

Kutaciindizya kunywa bukoko alimwi akulya nceelelo ca Leza ciyandika kapati. (Tusimpi 23:20; 1 Timoteyo 3:2, 3, 8) Kwaalilwa kulilesya takumukkomanisyi pe Leza. Ibbaibbele lyaamba kuti: “Bukoko balasampaula, zyakunywa zikola zilapilinganya; kufumbwa uuenwa kulinzizyo tali musongo.”—Tusimpi 20:1.

Nzila imwi bukoko mbobukonzya kweena muntu mufwubafwuba nkwiinda mukumupa kuleka kulilemeka. Lugwalo lwa Hosea 4:11 lwaamba kuti: “Bukoko akukolwa nzezibuzya maanu.” Mwaalumi wazyina lya John wakaazumina makani aaya naakamana kucitikilwa zyintu zibyaabi. * Naakamana kuzwangana abakaintu bakwe, wakaunka kuhotela, nkwaakaakubunywa kapati bukoko akucita bwaamu, calo cakapa kuti kumamanino aliyeeye alimwi akusyomezya kuti takaciinduluki. Kuciindizya kunywa bukoko kulakonzya kutunyonganya kumubili, kumuuya, alimwi Bbaibbele lyaamba kuti bakolwi tabakabi abuumi butamani.—1 Bakolinto 6:9, 10.

Ndilili nokutayandiki kunywa bukoko?

“Muntu uucenjede, abona mapenzi, ulayuba, pele bataiyide balaindilila aboobo balapenga.”—Tusimpi 22:3.

NKAAMBO NZI MAKANI AAYA NCAAYELEDE KUMUJATIKIZYA?

Bbuku liitwa kuti World Book Encyclopedia lyaamba kuti: “Bukoko musamu uukola.” Aboobo, kuli ziindi nokutayandiki kunywa bukoko nokuba asyoonto.

NCOLYAAMBA BBAIBBELE

Kanji-kanji bantu ‘balanjila mumapenzi’ akaambo kakunywa aciindi citeelede. Bbaibbele lyaamba kuti: “Zintu zyoonse zilijisi ciindi cazyo,” kubikkilizya aciindi cakutanywa bukoko. (Mukambausi 3:1) Mucikozyanyo, ndiza muntu inga katanasika aciimo cizumizyidwe cakunywa bukoko, ndiza muntu ooyo inga kali uyanda kuleka kunywa bukoko, naa inga kali muntu uunywa musamu walo uutayandiki kuvwelana abukoko. Kubantu banji “ciindi” cakutanywa, nciindi nobaunka kumilimo alimwi anobali amulimo, kwaambisya kuti naa babelesya mincini iikonzya kuleta ntenda. Kwaamba masimpe, bantu basongo buumi babubona kuba cipego ciyandika kapati kuzwa kuli Leza. (Intembauzyo 36:9) Tulacilemeka cipego eeci ciindi notutobela busolozi bwamu Bbaibbele kujatikizya bukoko.

^ munc. 11 Izyina lyacincwa.