Switzerland

Buvwuntauzi bwakacitwa ku Switzerland bwakatondezya kuti muntu uujisi myaka yakuzyalwa iinda ku 60 ulalangilwa kufwa mubuzuba mbwaakazyalwa kwiinda mumazuba aambi a 14 pesenti. Kanji-kanji mubuzuba mbobakazyalwa, bantu balaciswa bulwazi bwamoyo bujaya kusika ku 18 pesenti kwiinda mazuba aambi, bamakaintu balaciswa bulwazi bwakulebuka mubili kusika ku 21 pesenti kwiinda mazuba aambi, alimwi bamaalumi balalijaya kwiinda mazuba aambi a 35 pesenti. Basayaansi bayeeyela kuti bukoko akutyompwa kapati nzezipa kuti mweelwe wabantu balijaya alimwi antenda zivwule kapati. Nokuba boobo, basyaazibwene bamwi tababuzumini buvwuntauzi oobu, baamba kuti bantu banji balibonya mbuli kuti balafwa mubuzuba mbobakazyalwa, pele eeci cili boobu akaambo kakutabuzyiba kabotu buzuba mbobakazyalwa.

Israel

Bamaalumi balaaziwa zibotu balalangilwa kwiitwa kumulimo, kuti naa babikkilizya zifwoto zyabo mumagwalo aakulembela mulimo, kakuli bamakaintu balaaziwa zibotu tabalangilwi kwiitwa. Ino nkaambo nzi? Basikuvwuntauzya bamucisi eeci beezeezya kuti ndiza akaambo kakuti bunji bwabaabo babelekela muzibeela zisala bantu ibeelede kulembwa mulimo mbaamakaintu. Magazini iitwa kuti The Economist, yakaamba kuti: “Cuusisya ncakuti, kaambo kapati nkakuti bamakaintu ibanjizya milimo balabafwida munyono basimbi balaaziwa zibotu ibalembela milimo.”

United States

Siite umwi uujisi myaka yakuzyalwa iili 82 antoomwe abeenzinyina bamaalumi bobilo bajisi myaka yakuzyalwa iili 63 alimwi a 57, lino-lino bakanjila mubusena bukwabilidwe kapati buli ku Oak Ridge, mu Tennessee, muyobwedwa mataani aali 100 aazilwanyo zyanyukkiliya, akutalika kulemba abwaanda majwi aatondezya kuti tabaiyandi nkondo. Steven Chu, mulembi wamucibeela cilanganya magesi, wakakopana kapati akaambo kakutabikkila maano kwabasilikani ibalanganya busena oobu bwalo buli mbobusena bwiinda kukwabililwa munyika yoonse.

Australia

Bamunkuta mpati yamucisi eeci bayanda kuti makkampani aapanga tombwe kaatabikki tombwe muzipakete zijisi zifwanikiso alimwi amabala aakulwaizya kufweba. Lino, tombwe weelede kusambalwa muzipakete zisiya-siya zijisi zifwanikiso zitondezya bubi bwakufweba.