ZENIMUTENDE uusimide, mupati alimwi ulalema kwiinda bbaasi mpati. Nokuba boobo, muswi ooyu mupati ulakonzya kusotoka akunyona cakufwambaana. Mbuti muswi ooyu mbwakonzya kucita zyintu zyoonse eezyi cakufwambaana? Cimwi cimupa kucita boobu nkaambo kambozipangidwe ziyambyo zyakwe.

Amubone kaambo aaka: Bunji bwabazenimutende alimwi answi zimwi zijisi ziyambyo tazijisi magunyu-gunyu mumabali-bali. Nokuba boobo, zenimutende ooyu wiitwa kuti humpback whale uliindene answi zimbi. Walo ulijisi magunyu-gunyu mapati mumabali-bali aaziyambyo zyakwe (aaitwa kuti tubercles). Ciindi nayamba, meenda alainda atala aamagunyu-gunyu aakwe alimwi akupa kuti muswi ooyu acikonzye kweenda cakufwambaana. Magunyu-gunyu apa kuti meenda kaayenda alimwi akupa kuti kaayenda ceende-ende. Mbwaabeleka magunyu-gunyu mumeenda apa muswi ooyu kuti kauba-uba, kacikonzya kunyonauna ziyambyo zyakwe kwaciindi cilamfwu kakunyina kulyookezya. Kalinyonede, magunyu-gunyu aaya amupa kuti atanyikili, calo cigwasya ziyambyo zyakwe zilamfwu eezyi, izilampa cisela camubili wakwe.

Basikuvwuntauzya babelesya nzila njiyonya eeyi mukupanga nkasi zyamato, zipakapaka zyamincini yamumeenda iibelesyegwa kupanga magesi (water turbines), zipakapaka zyameenda (windmills), alimwi azipakapaka zyacipolopela.

Ino Muyeeya Buti? Sena ciyambyo cazenimutende wiitwa kuti humpback whale cakaba akaambo kakusanduka kwazyintu? Naa cakalengwa buya?