United States

Munsondo ya October 29, 2012, mudolopo lya New York City, mweelwe wabasikubba, basikujaigwa alimwi akuumwa azigwebenga wakayaansi kwiinda mbowakabede mumazuba ngoonya aaya mu 2011. Nkaambo nzi? Akaambo kaguwo lipati litegwa Hurricane Sandy ilyakacitika kujwe aankomwe yacisi ca United States, lyalo lyakapa kuti mumasena manji magesi aunke. Baambilizi bamucibeela cabasilikani caku New York ba Paul Browne bakaamba kuti: “Niyakamana kucitika ntenda mpati mbuli iilya yakacitika mu September 11, 2001, twajana kuti mweelwe wabugwebenga mumazuba aaya wakayaansi.” Nokuba boobo, ba Browne tiibakagambwa kuti mweelwe wabantu basikubba muzintoolo kwiinda mulupyopyongano lwabantu wakayungizyigwa. Bakaamba kuti: “Kuli mudima mumasena manji.”

Antarctica

Basayaansi balalibilika kuti ku Antarctica zisyango zili mutenda akaambo kazisyango zizwa kumasena aambi. Kuyeeyelwa kuti basikuswaya banji kubusena oobu mwaka amwaka balaletelezya nseke zisika kumweelwe waakati-kati wa 9.5, kazinamatide kunsi aamabbusu alimwi akuzibbeeke zyabo. Mweelwe wazisyango zitali zyakubusena ooku zyakajanwa kale ku Western Antarctic Peninsula.

Netherlands

Mucembele uujisi myaka yakuzyalwa iili 83 wakali wakusaanguna kubikkwa mweebo wakupanga. Mucembele ooyu, uulaacifwuwa camweebo cakanyonyookede abulwazi bwamafwuwa, lino ulakonzya kulya, kuyoya alimwi akwaambaula kabotu-kabotu. Basilisi bakabelesya muncini uutegwa laser printer ikubikka tubeela tusyoonto-syoonto kutegwa bapange mweebo ngobakamubikka mucembele ooyu.

Germany

Mumwaka ngobakakasya bantu kufweba mubuleya mucisi ca Germany, mweelwe wabantu baciswa bulwazi bwamucamba wakayaansi kusika ku 13.3 pesenti; mpoonya awalo mweelwe wabantu baciswa bulwazi bwamoyo wakayaansi kusika ku 8.6 pesenti.