Bana Israyeli bakali munkanda kwamyaka iitandila ku 40. Bakazunda minzi minji iyakajisi nguzu. Lino nobakayaka nkambi muzibanda zya Moabu Mulonga wa Jordano nkouli kujwe, cakasika ciindi cakuti lino banjile Munyika Yakasyomezyegwa. Balaki mwami wa Moabu wakayoowa kuti balamunyanga nyika yakwe. Aboobo wakaita mwaalumi wazina lya Balamu kuti aboole ku Moabu kutegwa asinganye bana Israyeli.

Pele Jehova wakaambila Balamu kuti: ‘Toelede kubasinganya bana Israyeli.’ Aboobo Balamu wakakaka kuunka. Mwami Balaki wakamwiita alimwi ciindi cabili alimwi wakamusyomezya kumupa kufwumbwa cintu ncaakali kuyanda. Nokuba boobo, Balamu wakazumanana kukaka. Mpoonya Leza wakaamba kuti: ‘Koya, pele ukaambe buyo nconditiikwaambile.’

Balamu wakatanta mbongolo yakwe akutozya kumusanza kuya ku Moabu. Wakakanzide kusinganya bana Israyeli nokuba kuti Jehova wakamwaambilide kuti atabasinganyi pe. Mungelo wa Jehova wakalibonya ziindi zyotatwe munzila. Balamu tanaakamubona mungelo pe, pele mbongolo yakwe yakamubona. Ciindi cakusaanguna, mbongolo yakazwa munzila akuunka musyokwe. Ciindi cabili, mbongolo yakalisyaanikizya kubwaanda bwamabwe, calo cakapa kuti kuulu kwa Balamu kusyaanikizyigwe kubwaanda. Mpoonya ciindi catatu, mbongolo yakalala akati kanzila. Ziindi zyoonse eezyi, Balamu wakali kuyuuma mbongolo yakwe amusako.

Nocakainda ciindi catatu, Jehova wakapa kuti mbongolo yaambaule. Mbongolo yakabuzya Balamu kuti: ‘Ino unduumina nzi?’ Balamu wakati: ‘Nkaambo wapa kuti ndiboneke mbuli ciyanga. Nindalijisi panga nindakujaya.’ Kumane mbongolo yakaamba kuti: ‘Wanditanta kwamyaka minji. Sena kuli nondakacitide kale cintu cili boobu?’

Mpoonya Jehova wakapa kuti Balamu amubone mungelo. Mungelo wakati: ‘Jehova wakakwaambila kuti utabasinganyi bana Israyeli.’ Balamu wakati: ‘Ndalubizya. Ndilapiluka kuŋanda.’ Pele mungelo wakaamba kuti:  ‘Inga waunka ku Moabu, pele ukaambe buyo eeco Jehova ncatiikwaambile.’

Sena Balamu wakaiya ciiyo? Peepe. Kuzwa waawo, Balamu wakasoleka kusinganya bana Israyeli ziindi zyotatwe, pele ziindi zyoonse nzyaakasola kucita boobo, Jehova wakapa kuti abalongezye muciindi cakubasinganya. Mukuya kwaciindi, bana Israyeli bakaulwana munzi wa Moabu, alimwi Balamu wakajaigwa. Nocakabota kuti Balamu naakamuswiilila Jehova kuzwa kumatalikilo.

‘Amulikasye kubusyaacivwulemwangu buli boonse, nkaambo nokuba kuti muntu kajisi zintu zinji buti, ibuumi bwakwe tabuzwi kuzintu eezyo nzyajisi.’Luka 12:15