Nokwakainda mazuba aali 10 kuzwa ciindi Jesu naakapiluka kujulu, basikwiiya bakwe bakatambula muuya uusalala. Mwakali mu Pentekoste 33 C.E., ciindi bantu nobakaboola ku Jerusalemu kuzwa mumasena manji aaindene-indene kuzoosekelela pobwe. Kwakali basikwiiya ba Jesu ibali 120 ibakabungene muŋanda yamujulu. Cakutayeeyela kwakacitika cintu cimwi cigambya kapati. Kwakali cintu icakali kulibonya mbuli kuti mulilo amutwe wasikwiiya umwi aumwi, mpoonya boonse bakatalika kwaambaula myaambo iindene-indene. Muŋanda mobakabede mwakali kumvwika mbuli kuti kuli guwo lipati.

Beenzu ibakaboolede ku Jerusalemu kuzwa kumasena aambi bakalimvwa guwo eelyo aboobo bakazuzila kuŋanda eeyo kutegwa babone icakali kucitika. Bakagambwa nobakamvwa basikwiiya kabaambaula myaambo eeyi. Bakati: ‘Bantu aaba bazwa ku Galilaya. Pele ino bacikonzya buti kwaambaula mumyaambo yesu?’

Mpoonya Petro abaapostolo bambi bakaimikila kumbele lyankamu yabantu. Petro wakaambila bantu kujatikizya Jesu mbwaakajaigwa alimwi a  Jehova mbwaakamubusya kuzwa kubafwu. Kumane wakati: ‘Lino Jesu uli kujulu kujanza lyalulyo lya Leza, alimwi watila muuya uusalala ngwaakasyomezya. Nkakaambo kaako ncomwabona akumvwa kujatikizya maleele aaya.’

Bantu akabanjila mumoyo majwi ngaakaamba Petro, aboobo bakabuzya kuti: “Ino tucite buti?” Wakabaambila kuti: ‘Amuleke zibi zyanu akubbapatizyigwa muzina lya Jesu. Alimwi mulatambula cipego camuuya uusalala.’ Mubuzuba oobo, bantu ibasika ku 3,000 bakabbapatizyigwa. Kuzwa ciindi eeco, basikwiiya bakatalika kuvwula cakufwambaana mu Jerusalemu. Kwiinda mukugwasyigwa amuuya uusalala, baapostolo bakatalisya mbungano zinji kutegwa kabayiisya basikutobela zintu zyoonse Jesu nzyaakabalailila.

“Ikuti kamwaambilizya caantangalala amulomo wanu, kuti Jesu ngo Mwami, akusyoma mumyoyo yanu kuti Leza wakamubusya kuzwa kubafwu, muyoofwutulwa.”—Baroma 10:9