Jehova wakalima muunda mubusena bwiitwa kuti Edeni. Muunda ooyu wakazwide maluba, zisamu, alimwi abanyama. Mpoonya Jehova wakalenga muntu wakusaanguna, Adamu, akumufwulida mumpemo. Sena ulizyi cakacitika? Muntu ooyu wakaba muumi! Jehova wakabikka Adamu kuti kalanganya muunda, alimwi akubaulika mazina banyama boonse.

Jehova wakapa Adamu mulawo uuyandika kapati. Wakaambila Adamu kuti: ‘Ulakonzya kulya micelo kuzisamu zyoonse, ccita buyo comwe cilibedelede toyelede kulya kulincico pe. Ikuti walya micelo yaco, ncobeni uyoofwa.’

Nokwakainda ciindi, Jehova wakati: ‘Ndilamupangila sikumugwasyilizya Adamu. Aboobo Leza wakooneka Adamu ŋonzi zyalufwu, mpoonya wakagwisya kabambo komwe kuli Adamu akulenga mukaintu wakwe. Zina lyakwe wakali Eva. Ba Adamu a Eva bakaba mukwasyi wakusaanguna. Ino Adamu wakalimvwa buti kujatikizya mukaintu wakwe? Adamu  wakakkomana cakuti wakaamba kuti: ‘Amubone Jehova ncaapanga kuzwa kukabambo kangu! Ee kaka! Ooyu muntu tulikozyenye.’

Jehova wakaambila ba Adamu a Eva kuzyala bana akuzuzya nyika. Wakali kuyanda kuti kabakkomene kubelekela antoomwe kupanga nyika yoonse kuba paradaiso, naa muunda weebeka, mbubonya mbuli muunda wa Edeni. Pele zintu tiizyakeenda bweelede pe. Nkaambo nzi? Tulaiya zinji mucibalo citobela.

“Ooyo wakabalenga kuzwa kumatalikilo, wakalenga mwaalumi amukaintu.”—Matayo 19:4