Ciindi Saatani naakabelesya nzoka kwaambaula a Eva, wakasangana mukuzangila Leza

Bantu boonse bamuuya mbaakalenga Jehova bakali babotu. Kumane omwe wabaangelo wakaba mubi. Ngu-Saatani Diabolosi. Saatani wakali kuyanda bantu anyika kumukomba muciindi ca-Jehova. Nceeci cakacitika:

Mumuunda wa-Edeni, kwakali masamu manji akali kuzyala micelo mibotu. Jehova wakaambila Adamu amukaintu wakwe, Eva, kuti bakali kukonzya kulya kuzwa kulinjiyo. Pele kwakali cisamu cimwi Leza ncakaamba kuti tibakeelede kulya kuzwa kulincico. Wakaamba kuti ikuti na balya kuzwa kulincico, bayoofwa.—Matalikilo 2:9, 16, 17.

Bumwi buzuba Eva wakali alike ciindi nzoka niyaakanana kulinguwe. Ncobeni, tiyakali nzoka ini yakakanana; wakali Saatani Diabolosi wakapa kuti cilangike mbuli kuti inzoka yakali kukanana. Saatani wakaambila Eva kuti ikuti na walya kuzwa kumucelo wakakasigwa, inga waba musongo mbuli Leza. Alimwi wakaamba kuti inga tafwi. Twaambo toonse otu twakali twakubeja. Nekubaboobo, Eva wakasyoma Saatani akulya mucelo. Amane, wakapa umwi kuli Adamu, elyo awalo wakalya.—Matalikilo 3:1-6.

Kuzwa kumakani aya aamasimpe, twiiya kuti Saatani muzangi alimwi ngusikubeja. Wakaambila Eva kuti ikuti na wabisizya Leza, inga takonzyi kufwa. Oko kwakali kubeja. Wakafwa mane awalo Adamu. Saatani takwe naakafwa ndimunya, nokuba kuti awalo  uyoocita nkaambo wakabisya. Kwalino, nekubaboobo, ucipona elyo ucitolelela kweena bantu. Ucili sikubeja, elyo alimwi usola kucita bantu kutyola milao ya-Leza.—Johane 8:44.

Baangelo Bamwi Bazanga

Kumbele, baangelo bamwi bakaba babi. Baangelo aba bakabona basimbi babotu anyika akuyanda koona ambabo. Elyo bakaboola anyika akusama mibili yabusankwa. Bamane bakalibwezela basimbi. Oku kwakali kwiimpana aluyando lwa-Leza.—Matalikilo 6:1, 2; Juda 6.

Bangelo babi bakaboola anyika kucita buvwuule abasimbi

Alimwi eci cakaleta mapenzi kubantu. Bakaintu babaaba baangelo bakazyala bana, pele tiibakali bana beenzene. Bakakomena kuba babbabbani basiluuni alimwi bakali. Mpawo nyika yakazula luuni cakuti Jehova wakayeeya kunyonyoona bantu babi azambangulwe mpati. Bantu balike bakafutuka Zambangulwe bakali Nowa mululami amukwasyi wakwe.—Matalikilo 6:4, 11; 7:23.

Nekubaboobo, baangelo babi bakajokela kunyika yamyuuya; tiibakafwa. Pele bakasubulwa. Tiibakazumizigwa limbi mumukwasyi wa-Leza wabaangelo baluleme. Alimwi, Jehova tanaakabazumizya limbi kusama mibili yabuntu. Mbube bayoofwa akubetekwa kupati.—2 Petro 2:4; Juda 6.

 Saatani Watandwa Kuzwa Kujulu

Saatani abaangelo bakwe babi bakatandwa kujulu

Kumatalikilo amwaanda wesu, kwakali nkondo mujulu. Ibbuku lya-Bbaibbele lya-Ciyubunuzyo lipandulula cakacitika: “Lino kwakali inkondo mujulu. Mikayeli [Jesu Kristo sikubusigwa] abaangelo bakwe [babotu] bakalwanisya Simwaaba [Saatani], alakwe Simwaaba wakalwa, abaangelo bakwe [babi], pele teebakazunda pe, nkabela busena bwabo bwamujulu teebwakajanwa limbi. Lino Simwaaba mupati wakawisigwa ansi, nguwenya muzoka waciindi, uutegwa Diabolosi a-Saatani, nguuena bantu boonse baansi. Wakawisigwa ansi, abalo baangelo bakwe [babi] bakawisigwa awe.”

Ino ncinzi cakazwa mpawo? Makani alatolelela kuti: “Nkaambo kaako amusekelele nomajulu, anywebo nomukala mulingao.” Baangelo babotu beelede kukomana nkaambo Saatani abaangelo babi, na myuuya, tiibakacili mujulu. Pele ino mbuti zyabantu anyika? Ibbaibbele lyaamba kuti: “Pele nywebo nonsi alwizi, muli mumapenzi, ikuti Diabolosi wamuselukila abukali bupati, nkaambo ulizi kuti ciindi ncacijisi nciniini buyo.”—Ciyubunuzyo 12:7-9, 12.

Inzya, Saatani abalongwe bakwe babi baleena akuleta mapenzi kubantu anyika. Aba baangelo babi baitwa kuti madaimona. Mbalwani ba-Leza. Boonse mbabi.