Toonse tulijisi cakusala. Ndiza kubelekela Jehova na kubelekela Saatani amadaimona aakwe. Tatukonzyi kucita zyoonse. Mbusongo buli buti kubelekela Jehova!

Jehova Mubotu

Mbuli mbotwabona, madaimona alakomana kucisa akweena bantu. Jehova tali boobo. Ulabayanda bantu mbubonya mbuli taata mbwayanda bana bakwe. Ngosikupa “zipego zibotu zyoonse azyoolwe zyoonse zilondokede.” (Jakobo 1:17) Tabasisi bantu zibotu zyoonse, noziba kuti zilaamuulo mupati buti kulinguwe.—Ba-Efeso 2:4-7.

Jesu, Mwana a-Leza, wakatondezya luzyalo kubantu kwiinda mukuponya malwazi ngobakajisi

Amuyeeye zintu zyaacitwa a-Jesu, Mwana a-Leza ano anyika. Waacita basyaataambi kukanana aboofu kubona. Waaponya basicinsenda abalemene. Waatanda madaimona akuponya malwazi oonse. Jesu, kwiinda munguzu zya-Leza, mane wakabusya bafwide kubuumi.—Matayo 9:32-35; 15:30, 31; Luka 7:11-15.

Muciindi cakwaaamba zyakubeja kuti atweene, coonse ciindi Leza waamba bwini. Kwiina  ngwaena naba omwe.—Myeelwe 23:19.

Amutantamuke Ziyanza Zitasalali

Mbubonya mbuli luubilizi mbolujata nzinini, mamiliyoni abantu bacegwa kukuyoowa zitazizilwe alimwi akubeja. Bayoowa bafwide. Bayoowa madaimona. Balalibilika akaambo kakusinganizigwa, malweza, misamu, alimwi anyanga. Balaangidwe azyakusyoma alimwi aziyanza zibikidwe akubeja kwa Saatani Diabolosi. Balanda ba-Leza tabacegwi nociba cimwi cazintu ezi.

Jehova ulaanguzu kapati kwiinda Saatani. Ikuti na mwabelekela Jehova, uyoomukwabilila kuzwa kumadaimona. (Jakobo 4:7) Kusinganya takukabeleki alindinywe. Muceezyanisyo, mu Nigeria, baŋanga botatwe banguzu baacita masingo kujaya Kamboni wa-Jehova waakaka kuzwa mudolopo. Ciindi kusinganya nikwakakaka, umwi wabaŋanga abaya waayoowa kapati, waainka kuli Kamboni, akukumbila kulekelelwa.

Bana Efeso bakaumpa mabbuku aabo aakali kwaamba zyamasalamuzi

Ikuti na madaimona alamupenzya, mulakonzya kwiita Jehova azina lyakwe elyo uyoomukwabilila. (Tusimpi 18:10) Pele ikuti nywebo mube akukwabililwa kwa-Leza, mweelede kulekelalimwi zintu zyoonse zijatikizya bulozi akukomba madaimona. Basikukomba Leza mu-Efeso waciindi baacita obo. Baayobolola mabbuku abo onse akali kwaamba zyamabibo akwaaumpa. (Incito 19:19, 20) Balanda ba-Leza sunu beelede kucita mbubonya. Amusowe misamu, zitumwa,  impimpi “zikwabilila,” nyanga, mabbuku amabibo, alimwi kufumbwa azintu zijatikizya bulozi.

Amukombe Bwini

Ikuti kamuyanda kukomanisya Leza, takuzulide kuleka buyo kukomba kwakubeja akuleka  kucita zintu zibi. Mweelede kujatisya kukomba bwini. Ibbaibbele lilatondezya ceelede:

Amujanike kumiswaangano ya Bunakristo.—Ba-Hebrayo 10:24, 25

Amwiiye Ibbaibbele.—Johane 17:3

Amukambaukile bamwi.—Matayo 24:14

Amukombe kuli Jehova.—Ba-Filipi 4:6, 7

Amubbapatizyigwe.—Milimo 2:41

Amujatane Abakamboni ba-Jehova

Saatani amadaimona balijisi bantu ano anyika balo bayiisya akucita zintu zibi. Pele awalo Jehova ulijisi bantu. Mbakamboni ba-Jehova. (Isaya 43:10) Nyika yoonse mbwizulwa, kuli Bakamboni bainda kumamiliyoni aali cisambomwe. Boonse balasola canguzu kucita zintu zibotu akuyiisya bantu bwini. Mumanyika manji, mulakonzya kubaswaana Kuŋanda Yabwami, oko nkobayoomutambula amaanza obile.

Mulimo wabo ngwakugwasya bamwi kubelekela Leza. Bayooiya Bbaibbele andinywe muŋanda yenu, kumugwasya kuti mwiiye mbomukonzya kukomba Jehova munzila iiluleme. Tamweelede kubbadela akaambo kaceeci. Bakamboni balakomana kuyiisya bwini nkaambo bayanda bantu alimwi balamuyanda Jehova Leza.

Bakamboni ba Jehova bayoomugwasya kubelekela Leza