‘Amuliyake nobeni aantalisyo yalusyomo lwanu lusalalisya . . . Amuzumanane kukkala muluyando lwa Leza.’—JUDA 20, 21.

1, 2. Ncinzi ncotukonzya kucita kutegwa tuzumanane kukkala muluyando lwa Leza?

TOONSE tulayanda kuba bayumu alimwi akupona buumi buli kabotu. Aboobo tulasola kulya zyakulya zili kabotu, kunyanyaasya mubili alimwi akuubikkila maano mubili wesu. Nokuba kuti eeci ciyandika kubeleka canguzu, kumamanino cilatugwasya, aboobo tweelede kuzumanana kucita oobo. Pele alimwi tweelede kuba bayumu akupona kabotu munzila aimbi.

2 Nokuba kuti twakapanga kale ntalisyo mbotu yakumuzyiba Jehova, tweelede kuzumanana kuyumya cilongwe cesu anguwe. Ciindi Juda naakakulwaizya Banakristo kuti, ‘Amuzumanane kukkala muluyando lwa Leza,’ wakabapandulwida mbobakali kukonzya kucita oobo. Wakabaambila kuti: “Amuliyake nobeni aantalisyo yalusyomo lwanu lusalalisya.” (Juda 20, 21) Aboobo, mbuti mbotukonzya kuba alusyomo luyumu?

AMUZUMANANE KUYUMYA LUSYOMO LWANU

3-5. (a) Ino Saatani uyanda kuti kamuzibona buti zyeelelo zya Jehova? (b) Ino mulimvwa buti kujatikizya milawo anjiisyo zya Jehova?

3 Cilayandika kapati kuti nywebo kumugama musinizye kuti nzila zya Jehova lyoonse zili kabotu. Saatani uyanda  kumupa kuyeeya kuti zyeelelo zya Leza zilakatazya kutobela akuti mulakonzya kujana lukkomano ikuti kamulisalila ciluzi acitaluzi. Kuzwa kaindi mumuunda wa Edeni, Saatani wali kusola kupa bantu kuyeeya munzila eeyi. (Matalikilo 3:1-6) Alimwi wazumanana kucita oobo naaba mazuba aano.

4 Sena Saatani uliluzi? Sena zyeelelo zya Jehova zilakatazya kapati kutobela? Peepe. Atwaambe kuti muyabweendeenda mupaaki iiboneka kabotu. Kumane mwabona lukwakwa naa lubaya lulamfwu lumusinkila kuti mutanjili mubusena bumwi. Ambweni mulakonzya kulibuzya kuti, ‘Ino nkaambo nzi ncobakabikkila lukwakwa oolu?’ Mpoonya nomuciyeeya boobo, mwamvwa kulila kwasyuumbwa mukati kalukwakwa. Ino mulalimvwa buti lino kujatikizya lukwakwa? Mulalumba akaambo kakuti bakabikka lukwakwa kutegwa mukwabililwe! Njiisyo zya Jehova zili mbuli lukwakwa oolo, mpoonya Diabolosi uli mbuli syuumbwa. Ijwi lya Leza litucenjezya kuti: “Amulibatamike, amupakamane! Sinkondonyoko, Diabolosi, uyaabweendeenda mbuli syuumbwa wabutambo uuvwuluma, uyandaula muntu ngwatiimene buumbulu.”—1 Petro 5:8.

5 Jehova uyanda kuti katupona buumi bwiinda kubota. Tayandi kuti Saatani atucenge. Nkakaambo kaako watupa milawo anjiisyo kutegwa atukwabilile akuti katukkomene. (Baefeso 6:11) Jakobo wakalemba kuti: “Ooyo uulangisisya mumulawo uulondokede uuleta lwaanguluko alimwi uuzumanana mulinguwo . . . unookkomene muzintu nzyacita.”—Jakobo 1:25.

6. Mbuti mbotukonzya kusinizya kuti nzila zya Leza nzibotu kwiinda?

6 Ikuti naa twabutobela busolozi bwa Jehova, buumi bwesu bulabota alimwi cilongwe cesu anguwe cilayuma kapati. Mucikozyanyo, tulagwasyigwa ciindi notukuzumina  kutamba kwakwe kwakuti katupaila kulinguwe lyoonse. (Matayo 6:5-8; 1 Batesalonika 5:17) Tulakkomana ciindi notutobela malailile aakwe aakuti katuswaangana kutegwa tumukombe akukulwaizyanya umwi amweenzyinyina alimwi anotutola lubazu mumulimo wakukambauka akuyiisya. (Matayo 28:19, 20; Bagalatiya 6:2; Bahebrayo 10:24, 25) Ciindi notuyeeya mbotwagwasyigwa azintu eezyi, eeci cilatugwasya kuzumanana kuyumya lusyomo lwesu alimwi tuyoosinizya masimpe kuti nzila zya Jehova nzibotu kwiinda.

7, 8. Ino ncinzi cikonzya kutugwasya kutalibilika amasunko ngotukonzya kujana kumbele?

7 Tulakonzya kulibilika kuti ambweni kumbele lusyomo lwesu luyoosunkwa kapati cakuti inga twakwaalilwa kuliyumya. Ikuti mwalimvwa boobo, amuyeeye majwi aa  Jehova aakuti: “Mebo, nde Jehova ndime Leza wako, ndime ndikuyiisya kuti ugwasyigwe, uukusololela munzila moyelede kweendela. Eelo kaka inga cabota kuti waiswiilila milawo yangu! Aboobo luumuno lwako inga lwaba mbuli mulonga abululami bwako mbuli mayuwe aamulwizi.”—Isaya 48:17, 18.

8 Ikuti twamumvwida Jehova, luumuno lwesu luyooba mbuli mulonga uutayuminini alimwi bululami bwesu, nkokuti bukkale bwakucita ciluzi, buyooba mbuli mayuwe aamulwizi aazumanana kulipwaya kunkomwe. Kufwumbwa naa ncinzi cikonzya kutucitikila mubuumi, tulakonzya kusyomeka. Bbaibbele lisyomezya kuti: “Kowaala mukuli wako uuminya mumaanza aa Jehova, eelyo walo uyookulanganya. Kunyina nayoolekela muntu uululeme kuti awe.”—Intembauzyo 55:22.

‘AMUYAAMBELE MANE MUSIME’

9, 10. Ino kusima caamba nzi?

9 Mbomuyaabuzumanana kuyumya cilongwe canu a Jehova, ‘muyooyaambele akusima.’ (Bahebrayo 6:1) Ino kusima caamba nzi?

10 Muntu takonzyi kuba Munakristo uusimide akaambo buyo kakuti mupati kumyaka. Kutegwa tusime, tweelede kuba acilongwe ciyumu a Jehova alimwi akubona zintu mbubonya mbwazibona walo. (Johane 4:23) Paulo wakalemba kuti: “Aabo bapona kweelana amubili bayeeya buyo zintu zyamubili, pele aabo bapona kweelana amuuya bayeeya zyamuuya.” (Baroma 8:5) Muntu uusimide tabikkili buyo maano kukulikondelezya naa kuzintu zyakumubili. Muciindi caboobo, ubikkila maano kukubelekela Jehova akusala kabotu mubuumi bwakwe. (Tusimpi 27:11; amubale Jakobo 1:2, 3.) Tazumini kuyungwa kuti acite citaluzi. Muntu uusimide ulicizyi ciluzi alimwi inga ukanzide kucicita.

11, 12. (a) Ino ncinzi Paulo ncaakaamba kujatikizya Munakristo mbwakonzya kubelesya “maano”? (b) Ino kuba Munakristo uusimide kumuuya kukozyenye buti akuba sikubalika uucibwene?

 11 Cilayandika kubeleka canguzu kutegwa muntu asime. Mwaapostolo Paulo wakalemba kuti: “Cakulya ciyumu ncabantu basimide, aabo ibalaamaano aayiisyidwe kwaandaanya ciluzi acitaluzi kwiinda mukwaabelesya.” (Bahebrayo 5:14) Ibbala lyakuti “aayiisyidwe” lilakonzya kutuyeezya mbobaiya basikubalika.

12 Ciindi notubona sikubalika uucibwene kabalika, inga tulizyi kuti cakatola ciindi alimwi akubeleka canguzu kutegwa acikonzye kucita boobo. Kunyina naakazyalwa kali sikubalika uucibwene. Ciindi mwana naazyalwa, inga tazyi kabotu mbwaabelesyegwa maanza alimwi amaulu. Pele mukuya kwaciindi, ulaiya kujata zintu alimwi akweenda. Kwiinda mukuzumanana kwiiya, ulakonzya kuba sikubalika uucibwene. Mbubwenya buyo, citola ciindi kwiiya kutegwa umwi abe Munakristo uusimide.

13. Ino ncinzi cikonzya kutugwasya kwiiya kuyeeya mbuli Jehova?

13 Mubbuku eeli, twabandika mbotukonzya kuyeeya mbuli Jehova alimwi akubona zintu mbuli mbwazibona. Twaiya akubona mbozili zibotu zyeelelo zya Jehova alimwi akuziyanda. Ciindi notusala zyakucita, tweelede kulibuzya kuti: ‘Ino milawo nzi naa ninjiisyo nzi zikonzya kubeleka mubukkale oobu? Mbuti mbondikonzya kuzibelesya? Ino Jehova inga wayanda kuti ndicite nzi?’—Amubale Tusimpi 3:5, 6; Jakobo 1:5.

14. Ino ncinzi ncotweelede kucita kutegwa tube alusyomo luyumu?

14 Tweelede kuzumanana kuyumya lusyomo lwesu muli Jehova. Mbubonya mbuli kulya cakulya cijisi busani mbokutugwasya kuba amibili iili kabotu, kwiiya kujatikizya Jehova kulatugwasya kuba alusyomo luyumu. Ciindi notwakatalika kwiiya Bbaibbele, twakaiya njiisyo zyantalisyo kujatikizya Jehova anzila zyakwe. Pele mukuya kwaciindi,  tweelede kumvwisya zintu ziyumu. Eeci ncencico ncaakali kwaamba Paulo naakati: “Cakulya ciyumu ncabantu basimide.” Kwiinda mukubelesya nzyotwiiya, tuba basongo. Bbaibbele litwaambila kuti: “Busongo ncintu ciyandika kapati.”—Tusimpi 4:5-7; 1 Petro 2:2.

15. Ino nkaambo nzi ncociyandika kapati kumuyanda Jehova alimwi abakwesu abacizyi?

15 Muntu ulakonzya kuba muyumu alimwi akupona kabotu, pele ulizyi kuti kutegwa azumanane kuba boobo, weelede kuzumanana kulibikkila maano. Mbubonya buyo, muntu uusimide ulizyi kuti weelede kuzumanana kubeleka canguzu kutegwa cilongwe cakwe a Jehova cizumanane kuyuma. Paulo utuyeezya kuti: “Amuzumanane kulisunka kutegwa mubone naa muli mulusyomo; amuzumanane kulilingula kutegwa mubone bwini mbomubede.” (2 Bakorinto 13:5) Nokuba boobo, tuyandika zinji kutali buyo kuba alusyomo luyumu. Luyando lwesu kuli Jehova, kubakwesu alimwi abacizyi lweelede kuzumanana kukomena. Paulo wakaamba kuti: “Ikuti kandijisi . . . luzyibo alusyomo lunji lukonzya kundipa kulonzya malundu, pele kuti kanditajisi luyando, ndili wabuyo.”—1 Bakorinto 13:1-3.

AMUZUMANANE KUBUBIKKILA MAANO BULANGIZI BWANU

16. Ino Saatani uyanda kuti katulimvwa buti?

16 Saatani uyanda kutupa kuyeeya kuti tatukonzyi kumukkomanisya Jehova. Uyanda kuti tutyompwe alimwi akuyeeya kuti kunyina cikonzya kumana mapenzi eesu. Tayandi kuti katubasyoma Banakristoma, alimwi tayandi kuti katukkomana. (Baefeso 2:2) Saatani ulizyi kuti kuyeeya kutali kabotu kulakonzya kutunyonganya alimwi buya akunyonganya cilongwe cesu a Leza. Pele Jehova watupa cintu cimwi cikonzya kutugwasya kulwana kuyeeya kuli boobu. Watupa bulangizi.

17. Ino bulangizi buyandika buti?

 17 Mulugwalo lwa 1 Batesalonika 5:8, Bbaibbele likozyanisya bulangizi bwesu kucimpoompo cikwabilila mutwe wasikalumamba nali munkondo, lyaamba kuti cimpoompo eeco, ‘mbulangizi bwalufwutuko.’ Kuba abulangizi muzisyomezyo zya Jehova kulakonzya kukwabilila mizeezo yesu akutugwasya kulwana mizeezo mibi.

18, 19. Ino bulangizi bwakamugwasya buti Jesu?

18 Bulangizi mbwaakajisi Jesu bwakamupa kuyuma. Mubuzuba bwamamanino masiku kali anyika, wakalijana mumapenzi aakatazya kapati. Muntu ngobakali kumvwana kapati wakamwaaba. Umwi wakamukaka kuti tamuzyi. Ibamwi bakamulekelezya akumutija. Bantu bamucisi cokwabo bakamubukila, akwaamba kuti ajaigwe acisamu cakupenzyezya. Ino ncinzi cakamugwasya kuliyumya mumapenzi oonse aaya aakatazya kapati? “Akaambo kalukkomano ndwaakabikkilidwe kumbele wakaliyumya acisamu cakupenzyezya,  wakaubaula kuusyigwa nsoni, alimwi lino ulikkede kujanza lyalulyo lyacuuno cabwami ca Leza.”—Bahebrayo 12:2.

19 Jesu wakalizyi kuti kwiinda mukusyomeka, wakali kuyoopa kuti Bausyi balemekwe alimwi akutondezya kuti Saatani mubeji. Bulangizi oobu bwakamuletela lukkomano lutaambiki. Alimwi wakalizyi kuti ino-ino wakali kuyoojokela kuli Bausyi kujulu. Bulangizi oobu bwakamugwasya kuliyumya. Mbubonya mbuli Jesu, tweelede kubikkila maano kubulangizi bwesu. Buyootugwasya kuliyumya ziyume zitete.

20. Ino ncinzi cikonzya kumugwasya kuzumanana kuzilanga kabotu zintu?

20 Jehova ulalubona lusyomo lwanu alimwi akuliyumya kwanu. (Isaya 30:18; amubale Malaki 3:10.) Usyomezya kuti ‘uyoomupa nzyouyanda moyo wanu.’ (Intembauzyo 37:4) Aboobo, amuzumanane kubikkila maano kubulangizi  bwanu. Saatani uyanda kuti muleke kuba abulangizi akuti mutalike kuyeeya kuti zisyomezyo zya Jehova kunyina noziyoozuzikizyigwa. Pele tamweelede kwiizumina mizeezo iili boobo! Ikuti mwabona kuti bulangizi bwanu bwatalika kuceya, amumulombe Jehova mumupailo kuti amugwasye. Amuyeeye majwi aajanika mulugwalo lwa Bafilipi 4:6, 7: “Mutalibiliki acintu nociba comwe, pele muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba; eelyo luumuno lwa Leza oolo lwiinda maano oonse luyookwabilila myoyo yanu amizeezo yanu kwiinda muli Kristo Jesu.”

21, 22. (a) Ino Jehova ujisi makanze nzi kujatikizya nyika? (b) Ino mukanzide kucita nzi?

21 Lyoonse amujane ciindi cakuzinzibala kuyeeya buumi mbobunookkomanisya kumbele. Lino-lino, bantu boonse bapona banookomba buyo Jehova. (Ciyubunuzyo 7:9, 14) Amuyeeye buyo buumi mbobunoobede munyika mpya. Bunooli bubotu kapati kwiinda cintu cili coonse ncotukonzya kuyeeyela! Saatani amadaimona aakwe alimwi abubi boonse zinooli zyamana. Kunyina nomuyoociswa alimwi tamukafwi pe. Muciindi caboobo, buzuba buli boonse mwabuka munoojisi nguzu alimwi munookkomene kuti muli baumi. Bantu boonse bayoobelekela antoomwe kupanga nyika kuba paradaiso. Boonse banoojisi zyakulya zibotu alimwi abusena bubotu bwakukkala. Bantu tabanooli basilunya naa basinkondo, pele banooli basiluzyalo ncobeni kuli umwi amweenzyinyina. Mukuya kwaciindi, bantu boonse munyika bayookkomana “alwaanguluko lwabulemu bwabana ba Leza.”—Baroma 8:21.

22 Jehova uyanda kuti nywebo mumupange kuba Mulongwe wanu. Aboobo, amucite kufwumbwa ncomukonzya kumvwida Jehova alimwi akukakatila kulinguwe buzuba abuzuba. Inzya, toonse atuzumanane kukkala muluyando lwa Leza mane kukabe kutamani!—Juda 21.