Saatani amadaimonaakwe tabayandi kuti mubelekele Leza. Bakanzide kulesya bantu boonse ikubelekela Leza kuti kacikonzyeka. Mbuti mbobasoleka kucita boobo? Inzila yomwe njakubelesya bukombi bwakubeja. (2 Ba-Korinto 11:13-15) Icikombelo caambwa kuti ncakubeja ikuti kacitayiisyi kasimpe kazwa mu Bbaibbele. Cikombelo cakubeja cili mbuli mali aakucengeezya buyo—inga kaalibonya mbuli kuti mmali loko, pele anyina mpindu. Alakonzya kumuletela mapenzi manji.

Ibubeji bwacikombelo tabukonzyi kumukonda Jehova, Leza wakasimpe. Jesu naakali anyika, kwakali nkamu yabukombi iyakali kuyanda kumujaya. Bakali kuyeeya kuti ibukombi bwabo bwakaliluzi. Bakati: “Tulijisi Taata omwe, ngo-Leza.” Sena Jesu wakaazumina makani ayo? Peepe! Wakabaambila kuti: “Nywebo muzwa kuliuso Saatani.” (Johane 8:41, 44) Ibantu banji sunu bayeeya kuti bali mukukomba Leza, pele mubwini bali mukubelekela Saatani amadaimonaakwe!—1 Ba-Korinto 10:20.

 Mbubwenya musamu uusampukide mbuuzyala micelo mibi, cikombelo cakubeja cijisi bantu ibacita zintu zibyaabi. Inyika izwide mapenzi akaambo kazintu zibyaabi nzyobacita bantu. Kuli bwaamu, kulwana, kubba, kudyaaminina, kujayana alimwi akujata bamakaintu. Ibunji bwabantu ibacita zintu ezi zibyaabi balijisi cikombelo nkobaunka, pele icikombelo cabo kunyina nocibakulwaizya kucita zintu zibotu. Kunyina nobanga baba balongwe ba Leza ccita mane baleke kucita zintu zibyaabi.—Matayo 7:17, 18.

Icikombelo cakubeja ciyiisya bantu kukomba mituni. Leza ulakasya kukomba mituni. Eci ncamaanu. Sena inga mwaciyanda ikuti naa muntu umwi katabandiki andinywe pele kabandikila buyo kucifwanikiso canu? Sena muntu uuli boobo inga waba mulongwe wanu wini-wini? Peepe. Jehova uyanda kuti bantu kababandika kulinguwe, ikutali kucilengelezyo naa cifwanikiso cimwi icitaponi.—Kulonga 20:4, 5.

Cikombelo cakubeja ciyiisya kuti cili buyo kabotu kujaya bamwi ciindi cankondo. Jesu wakati balongwe ba Leza bakali kuyooyandana akati kabo. Tatujayi bantu mbotuyanda pe. (Johane 13:35) Nokuba kujaya bantu babi ncintu cilubide ncotuteelede kucita. Basinkondonyinaa Jesu nobakasika kuzyoomwaanga, tanaakalekela basikwiiya bakwe kulwana ikutegwa bamukwabilile.—Matayo 26:51, 52.

Cikombelo cakubeja ciyiisya kuti basizibi bayoopenzyegwa mumulilo wahelo. Pele Ibbaibbele liyiisya kuti icibi cisololela kulufwu. (Ba-Roma 6:23) Jehova ngu Leza siluyando. Sena Leza siluyando inga wapenzya bantu kukabe kutamani? Peepe! Mu Paradaiso, kunooli buyo cikombelo comwe buyo eco Jehova ncakkomanina. (Ciyubunuzyo 15:4) Zikombelo zyoonse iziyeeme aanjiisyo zya Saatani zyakubeja zinoonyonyweedwe.