MUBUZYO OOYU NCOUYANDIKA

Kuti njiisyo yakusanduka kwazintu njamasimpe, nkokuti kunyina cini ncotuponena. Kuti naa masimpe kuti zintu zyakalengwa buya, nkokuti tulakonzya kujana bwiinguzi bumvwika kujatikizya buumi alimwi aziyoocitika kumbele.

INO INGA WACITA BUTI?

Koezyeezya bukkale oobu: Alex wanyongana. Lyoonse walikusyoma kuti Leza nkwali ncobeni akuti zintu zyakalengwa buya. Pele sunu bayi bakwe ba biology bakankaizya kuti njiisyo yakusanduka kwazintu njamasimpe, kuti iyeeme aabuvwuntauzi busyomeka bwasayaansi. Alex tayandi kuti bamwi bamuyeeyele kuti mufwuba-fwuba. Walyaambauzya mumoyo kuti: ‘Ikuti naa basayaansi bakasinizya kuti njiisyo yakusanduka kwazintu njamasimpe, ino ndime ni kuti nditalike kukazyanya ambabo?’

Kuti nooli nduwe Alex, sena inga waizumina njiisyo yakasanduka kwazintu akaambo buyo kakuti mabbuku atondezya kuti njamasimpe?

KOIMA UYEEYE!

Bantu kumbazu zyoonse zyobilo ibakazyanya mumakani aaya kanji-kanji balafwambaana kwaamba nzyobasyoma kakunyina kuzyiba ncobeni twaambo itubapa kusyoma boobo.

  • Bantu bamwi basyoma kuti zintu zyakalengwa buya akaambo buyo kakuti mbobakayiisyigwa kucikombelo.

  • Mpoonya bambi basyoma munjiisyo yakusanduka kwazintu akaambo buyo kakuti mbobakayiisyigwa kucikolo.

 MIBUZYO IILI 6 IIYANDIKA KULANGWA-LANGWA

Bbaibbele lyaamba kuti: “Iŋanda iili yoonse kuli wakaiyaka, pele ooyo wakapanga zintu zyoonse ngu Leza.” (Bahebrayo 3:4) Sena ulakozya kukasyoma kaambo aaka?

Kwaamba kuti buumi tiibwakalengwa buya tacimvwiki mbubonya mbocitamvwiki kwaamba kuti ŋanda eeyi kunyina iwakaiyaka

NCOBAAMBA: Zintu zyoonse zyakabako kwiinda mukubboloka kupati.

1. Nguni naa ncinzi cakapa kuti kubboloka kupati ooku kucitike?

2. Ino nkali kaambo ikamvwika—kwaamba kuti zintu zyoonse zyakazwa kucintu catakaliko naa kwaamba kuti zintu zyoonse zyakazwa kumuntu umwi?

NCOBAAMBA: Bantu bakasanduka kuzwa kubanyama.

3. Ikuti naa bantu bakasanduka buya kuzwa kubanyama—mucikozyanyo, kuzwa kubapombo—nkaambo nzi ncokuli kwiindana kupati mbobayeeya bantu alimwi ambobayeeya bapombo?

4. Nkaambo nzi notuba tuntu tupona tusyoonto-syoonto ncotupangidwe munzila iigambya kapati?

NCOBAAMBA: Njiisyo yakusanduka ilisinizyidwe kuti njamasimpe.

5. Sena muntu iwaamba boobo wakabuvwuntauzya bumboni lwakwe mwni?

6. Mbangaye bantu ibasyoma munjiisyo yakusanduka akaambo buyo kakuti bakaambilwa kuti bantu boonse basongo balaisyoma?

“Kuti koyaabweenda musyokwe mpoonya wajana ŋanda mbotu, sena inga wayeeya kuti: ‘Zisamu zyakaile kukkala mubusena bweelede kutegwa ŋanda eeyi ipangike.’ Mubwini tacikozyi kuba boobo! Tacili camaano kuyeeya boobo. Aboobo nkaambo nzi ncotweelede kusyoma kuti zintu zyoonse mububumbo zyakaile kubako zilikke?”—Julia.

“Koezyeezya kuti muntu umwi wakwaambila kuti fakitoli imwi iisimba mabbuku yakabboloka akuti inki yakaile kumwaikila kubwaanda akuciluli kumane yalipanga kuba mabala aali mudikisyinali. Sena inga wacisyoma eeci?”—Gwen.

 NKAAMBO NZI NCONDEELEDE KUSYOMA KUTI LEZA NKWALI?

Bbaibbele likukulwaizya “kubelesya maano.” (Baroma 12:1) Eeci caamba kuti toyelede kusyoma kuti Leza nkwali akaambo buyo:

  • KAMBOLIMVWA (Ndilimvwa kuti kweelede kuti kuli nguzu ziliko iziinda nguzu zyoonse)

  • KAKUTOBELEZYA BANTU BAMBI (Ndikkala mucilawo bantu mobali bakombi)

  • KAKUSINIKIZYIGWA (Mbobakandikomezya bazyali bangu —kunyina mbondakali kukonzya kucita)

Muciindi caboobo, weelede kuba atwaambo tumvwika itukupa kusyoma.

“Ciindi nondili mukilasi kandiswiilila kubayi nobapandula mboibeleka mibili yesu, inga tandidooneki naaceya kuti Leza nkwali ncobeni. Cibeela cili coonse camubili cilijisi mulimo wancico, alimwi buya nouceya buti mulimo ngocicita, bunji bwaziindi milimo eeyi ilacitika katutazyi. Mubili wamuntu ulagambya citaambiki!”—Teresa.

“Ciindi nondibona mayake malamfwu kapati, bwato, naa mootokala, inga ndilalibuzya kuti, ‘ino nguni wakacipanga eeci?’ Kuyandika muntu musongo kutegwa mootokala upangwe, cili boobo akaambo kakuti kuli tubeela tunji kapati itweelede kubelekela antoomwe kutegwa mootokala ukonzye kubeleka. Ikuti mootakala wakapangwa amuntu, nkokuti abalo bantu bakalengwa buya.”—Richard.

“Mbondakali kuyaabuyungizya luzyibo lwangu lwasayansi, ndakatalika kubona mboitali yamasimpe njiisyo yakusanduka kwazintu. . . . Mebo ndibona kuti muntu weelede kuba alusyomo lunji kapati kutegwa aisyome njiisyo yakusanduka kwazintu kwiinda lusyomo iluyandika kusyoma kuti kuli Mulengi.”—Anthony.

KAAMBO NKOYELEDE KUYEEYA

Nokuba kuti basayaansi balikuvwuntauzya kwamyaka minji, tabanajana bupanduluzi bomwe mbobazuminana boonse bujatikizya kusanduka kwazintu. Ikuti basayansi kabatazuminani anjiisyo yakusanduka kwazintu—ibategwa mbabasyaazibwene—sena kuli uukonzya kukupa mulandu ikuti yebo waidooneka njiisyo eeyi?