MUBUZYO OOYU NCOUYANDIKA

Ikuti koliiminina omwini, unoocikonzya kweendelezya buumi bwako muciindi cakulekela bantu bambi kuti kabakweendelezya.

INO INGA WACITA BUTI?

Koezyeezya bukkale oobu: Brian naabona basicikolonyina bobilo kababoola, moyo wakwe wazwa. Basankwa aaba basola kale kumusinikizya kwaziindi zyobilo mumvwiki njoona eeyi kuti afwebe. Lino eeci cilaba ciindi catatu.

Musankwa wakusaanguna waamba kuti:

“Uli olikke alimwi? Leka ndikutondezye uukonzya kuba mweenzinyoko.”

Wabelesya bbala lyakuti “mweenzinyoko” kumwi kamutyankila liso, kumane wagusya cintu munkomwe yakwe akutambika Brian.

Brian wabona tombwe mujanza lyamusankwa ooyu. Lino moyo wa Brian waindila kuduntaana.

Brian waamba kuti: “Tandiyandi, ndakwaambila kale mebo kuti tandi . . . ”

Musankwa wabili wamukosokezya akwaamba kuti: “Utanoowi anduwe, kobweza buyo!”

Cabusicamba Brian wavwiila ategwa: “Tandiyoowede pe!”

Musankwa wabili wajata Brian agwezyo. Mpoonya mubuteteete wamwaambila kuti: “Kobweza buyo ufwebe.”

Musankwa wakusaanguna waswena afwaafwi a Brian kaambaula cakupetekezya kuti: “Taaku ngotutiiambile. Kunyina uuyakuzyiba.”

Ikuti nooli nduwe Brian, ino inga wacita buti?

 KOIMA UYEEYE!

Sena aaba basicikolonyina Brian balizyi ncobacita? Sena basaanguna kuyeeya akulisalila cakucita beni? Takulangilwi oobo pe. Mubwini, baile kutobela nzyobacita bamwi. Bayanda buyo kukkomanisya bantu, aboobo bazumizya bantu kuti kababaambila cakucita.

Ikuti walijana mubukkale bukozyenye aboobu, ino ninzila nzi iindene njokonzya kubelesya kutegwa ukake kuyungwa abeenzinyoko?

  1. KOYEEYELA CIKONZYA KUCITIKA

    Bbaibbele lyaamba kuti: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”—Tusimpi 22:3.

    Kanji-kanji, ulakonzya kwaabona mapenzi kaacili kulamfwu. Mucikozyanyo, ino mbuti kuti wabona basicikolonyoko kababoola kumbele, alimwi balafweba. Ikuti wasaanguna kuyeeyela cikonzya kucitika, inga wazyiba cakucita.

  2. KOYEEYA

    Bbaibbele lyaamba kuti: “Amuzumanane kuba amanjezyeezya mabotu.” —1 Petro 3:16.

    Kolibuzya kuti, ‘Ino ndiyakulimvwa buti mukuya kwaciindi ikuti ndatobela beenzuma?’ Masimpe, kwaciindi cisyoonto buyo ulakonzya kupa kuti beenzinyoko bakukkomanine. Pele ino uyakulimvwa buti kwaakwiinda ciindi? Sena ulilibambilide kuleka zintu nzyosyoma alimwi anzyobikkila maano mubuumi akaambo buyo kakuyanda kukkomanisya basicikolonyoko?—Kulonga 23:2.

  3. KOSALA

    Bbaibbele lyaamba kuti: “Musongo ulicenjede.”—Tusimpi 14:16.

    Nolilampa buti, tweelede kulisalila alimwi akuliyumya muzintu zikonzya kutucitikila akaambo kakusala ooko. Bbaibbele lyaamba kujatikizya baalumi mbuli Josefa, Jobu, alimwi a Jesu, balo ibakasala kabotu. Alimwi lilaamba kujatikizya Caini, Esau alimwi a Judasi, balo ibatakasala kabotu. Ino uyakucita buti?

Bbaibbele lyaamba kuti: “Kosyomeka mumilimo yako.” (Intembauzyo 37:3) Ikuti wasaanguna kuyeeya zikonzya kucitika alimwi akusalila limwi cakucita, uyoojana kuti ciyakukuubila kwaamba mbolimvwa kujatikizya cintu eeco—kucita boobo kuyookugwasya.

Utalibiliki—toyandiki buya akutola ciindi cilamfwu kubapanduluda beenzinyoko. Ulakonzya kubaambila buyo kuti, PEEPE. Naa ulakonzya kubasalazyila kuti olo bakusinikizye buti, tokoocinca maano; inga wabaambila kuti:

  • “Mutandibalilizyi!”

  • “Tandiciti zyamusyobo ooyo mebo!”

  • “Mwabaanzyi, mucita mbuli kuti tamundizyi!”

Iciyandika buyo nkufwambaana kubavwiila alimwi akucita oobo kosinizyide. Ikuti wacita oobo, uyakugambwa kubona mbobayakufwambaana kucileka kukukatazya beenzinyoko!

 NCOKONZYA KUCITA NOBAKUFWUBAAZYA

Ikuti wazumina kuyungwa abeenzinyoko, uba mbuli cilobboti iceendelezyegwa buyo ambabo

Ino mbuti kuti beenzinyoko balakunonga? Ino mbuti kuti baamba kuti: “Wabaanzi—sena ulayoowa?” Kocenjela akuzyiba cini ncobasola kucita—kukuyunga. Ino inga wacita buti? Kuli zintu zyobilo nzyokonzya kucita.

  • Ulakonzya kuzuminizya ncobaamba. (Inga waamba kuti: “Nincobeni, ndilayoowa!” Mpoonya mubufwaafwi, inga wabaambila kaambo ncookakila.)

  • Inga wabavwiila munzila iikonzya kubapa kuliyeeya. Kobaambila ncokakila akubagwasya kuti baliyeeye. Inga waamba kuti: (“Ndalikuyeeya kuti mulicenjede cakuti tamukonzyi kufweba!”)

Ikuti beenzinyoko bazumanana kukufwubaazya, kozwa akubasiya! Koyeeya kuti, ikuti calampa ciindi ncoli ambabo, balaindila kusola kukuyunga. Ikuti wazwawo mpobabede, utondezya kuti tokonzyi kuzumizya bantu bambi kukucinca.

Kwaamba masimpe, tokozyi kulesya beenzinyoko kusola kukuyunga. Pele ulakonzya kusala cakucita, kwaamba mpoimvwi mumakani aayo, alimwi akulyeendelezya. Kumamanino, weelede kulisalila omwini!—Joshua 24:15