“Tamuli banyika.”​—JOHANE 15:19.

1. Ino makani nzi Jesu ngaakakankaizya imasiku mubuzuba bwakwe bwamamanino kali anyika?

MASIKU mubuzuba bwamamanino bwa Jesu kali anyika, wakatondezya kuti wakali kubikkila maano kapati kujatikizya mbobakali kuyakupona kumbele basikumutobela. Mane wakaapailila makani aaya kuli Bausyi kaamba kuti: “Tandikulombi kuti ubagusye munyika, pele kuti ubakwabilile akaambo kamubi. Tabali banyika mbubonya andime mbonditali wanyika.” (Johane 17:15, 16) Mumupailo ooyu ngwaakapaila camoyo woonse, Jesu wakatondezya kuti wakali kubayanda kapati basikumutobela alimwi wakatondezya mbwaakali kuyandika majwi ngaakaambide kumatalikilo imasiku ngoonya aayo aakuti: “Tamuli banyika.” (Johane 15:19) Cilisalede kuti, Jesu wakacibona kuti cilayandika kapati kuti basikumutobela bazumanane kulyaandaanya kunyika!

2. Ino “nyika” njaakaamba Jesu ninzi?

2 “Nyika” njaakaamba Jesu, mbantu boonse bazandukide kuli Leza, ibeendelezyegwa a Saatani alimwi amuuya wakuliyanda awakulisumpula uuzwa kulinguwe. (Johane 14:30; Baefeso 2:2; 1 Johane 5:19) Masimpe, ikuba ‘acilongwe anyika eeyi nkuba sinkondonyina a Leza.’ (Jakobo 4:4) Pele ino mbuti aabo boonse bayanda kuzumanana kukkala muluyando lwa Leza mbobakonzya kulyaandaanya kunyika mbwaanga bali munyika? Tulalanga-langa nzila eezyi zyosanwe: kwiinda mukuzumanana kusyomeka ku Bwami bwa Leza bweendelezyegwa a Kristo akutatola lubazu mutwaambo twacisi, kwiinda mukukaka muuya wanyika, kwiinda mukusama cabulemu  akulibamba kabotu, kwiinda mukuubya-ubya buumi bwesu alimwi akwiinda mukusama zilwanyo zyesu zyakumuuya.

KUZUMANANA KUSYOMEKA ALIMWI AKUTATOLA LUBAZU MUTWAAMBO TWACISI

3. (a) Ino Jesu wakali kutubona buti twaambo twacisi ciindi naakali anyika? (b) Nkaambo nzi ncotukonzya kwaamba kuti basikutobela Jesu bananike mbaiminizi? (Amubikkilizye abupanduluzi buyungizyidwe.)

3 Muciindi cakutola lubazu mutwaambo twacisi ciindi naakali anyika, Jesu wakabikkila maano kapati kukukambauka makani aajatikizya Bwami bwa Leza, imfwulumende yakujulu eeyo njaakali kuyakuba Mwami. (Daniele 7:13, 14; Luka 4:43; 17:20, 21) Aboobo, naakali kumbele lya Mweendelezi muna Roma Ponto Pilato, Jesu wakaamba kuti: “Bwami bwangu tabuli bwanyika eeyi.” (Johane 18:36) Basikumutobela basyomeka batobela cikozyanyo cakwe kwiinda mukusyomeka kuli Kristo aku Bwami bwakwe alimwi akwiinda mukwaambilizya Bwami oobu munyika. (Matayo 24:14) Mwaapostolo Paulo wakalemba kuti: “Tuli baiminizi ibali mubusena bwa Kristo. . . . Mbotuli mubusena bwa Kristo tumulomba kuti: ‘Amuyanzane a Leza.’” *2 Bakorinto 5:20.

4. Ino mbuti Banakristo boonse bakasimpe mbobatondezya kuti balasyomeka ku Bwami bwa Leza? (Amubone kabbokesi kakuti “ Banakristo Bakusaanguna Tiibakali Kutola Lubazu Mutwaambo Twacisi.”)

4 Akaambo kakuti baiminizi baiminina mfwulumende naa cisi cankobazwa, tabatoli lubazu mutwaambo twacisi ooko nkobabelekela; tabajatikizyigwi pe. Nokuba boobo, baiminizi aaba bazwidilizya makanze aamfwulumende yacisi cankobazwa. Ncimwi buyo abasikutobela Kristo bananike ‘basicisi bakujulu.’ (Bafilipi 3:20) Masimpe ngakuti, akaambo kakukambauka makani aa Bwami cabusungu, bagwasya tuulunzuma twa “mbelele zimbi” zya Kristo ‘kuyanzana a Leza.’ (Johane  10:16; Matayo 25:31-40) Ibambelele zimbi bagwasya banabokwabo Jesu bananike, aboobo mbatumwa ba Kristo. Akaambo kakuti inkamu eezyi zyobilo zilikamantene mukusumpula Bwami bwa Mesiya, tabatoli lubazu nokuceya mutwaambo twacisi.—Amubale Isaya 2:2-4.

5. Ino mbungano ya Banakristo iindene buti abana Israyeli bansiku, alimwi ino mbuti Banakristo mbobatondezya kuti baliindene?

 5 Ikusyomeka kuli Kristo takali nkakaambo kalikke kapa kuti Banakristo bakasimpe kabatatoli lubazu mutwaambo twacisi. Mukwiimpana abana Israyeli bansiku Leza mbaakapede cisi cibageme, swebo tuli babunyina ibajanika munyika yoonse. (Matayo 28:19; 1 Petro 2:9) Aboobo, ikuba munkamu imwi yatwaambo twacisi kulakonzya kupa kuti tutanikwaanguluki kwaamba mulumbe wa Bwami alimwi inga catulesya kukamantana a Banakristoma. (1 Bakorinto 1:10) Kunze lyaboobo, ikuti kwaba nkondo, inga capa kuti katulwana abasyomima aabo mbotulaililwa kuti tweelede kubayanda. (Johane 13:34, 35; 1 Johane 3:10-12) Nkakaambo kaako Jesu ncaakaambila basikwiiya bakwe kuti tabeelede kubelesya panga naa kulwana. Alimwi wakabaambila kuti beelede kubayanda basinkondonyina.—Matayo 5:44; 26:52; amubone kabbokesi kakuti “ Sena Tanditoli Lubazu Mutwaambo Twacisi?

6. Ino kulyaaba kwanu kuli Leza kuzijatikizya buti nzyomumucitila Kaisara?

6 Mbwaanga tuli Banakristo bakasimpe, twakalyaaba kuli Leza ikutali kumuntu, kumbunga yabantu naa kucisi cili coonse. Lugwalo lwa 1 Bakorinto 6:19, 20 lwaamba kuti: “Buumi mbomujisi tabuli bwanu nobeni pe, nkaambo mwakaulwa amuulo waatala.” Aboobo, nokuba kuti “Kaisara” balamupa zintu zyakwe mbuli bulemu, mutelo, akulibombya kulinguwe kusikila waawo Leza mpabazumizyide kucita boobo, basikutobela Jesu bapa ‘zintu zya Leza kuli Leza.’ (Marko 12:17; Baroma 13:1-7) Eeci cibikkilizya kumukomba, kumuyanda camoyo woonse, kusyomeka kulinguwe alimwi akumumvwida. Ikuti kakuyandika, balilibambilide kujaigwa akaambo ka Leza.—Luka 4:8; 10:27; amubale Milimo 5:29; Baroma 14:8.

KUKAKA “MUUYA WANYIKA”

7, 8. Ino “muuya wanyika” ninzi, alimwi ino “ubeleka” buti mubantu batamvwi?

7 Nzila imbi Banakristo mbobalyaandaanya kunyika nkwiinda mukukaka muuya wanjiyo mubyaabi. Paulo wakalemba kuti: “Tiitwakatambula muuya wanyika, pele twakatambula  muuya uuzwa kuli Leza.” (1 Bakorinto 2:12) Wakaambila bana Efeso kuti: “Mwakali kweenda aciindi cimwi kweelana . . . anyika eeyi, kweelana amuleli uujisi bweendelezi bwamuwo, nkokuti imuuya ooyo lino uubeleka mubana batamvwi.”—Baefeso 2:2, 3.

8 “Muwo” naa muuya wanyika ninguzu zitalibonyi, izyeendelezya bantu akubapa kuti kabatamumvwidi Leza akuba ‘azisusi zyanyama alimwi azisusi zyameso.’ (1 Johane 2:16; 1 Timoteyo 6:9, 10) Muuya ooyu ulijisi “bweendelezi” mukuti upa bantu kunyomenena milimo mibi yanyama, ulakatazya kuzyiba, ulazumanana kupenzya alimwi mbuli muwo nkuuli koonse-koonse. Kunze lyaboobo, ‘ulabeleka’ asyoonto-syoonto mubantu batamvwi kusikila mane baba abube butamukkomanisyi Leza, mbuli kuliyanda, kulisumpula, busyaacivwulemwangu, buzangi alimwi akutalilemeka. * Mubufwaafwi, muuya wanyika upa kuti mukuya kwaciindi muntu abe abube bwa Diabolosi mumoyo wakwe.—Johane 8:44; Milimo 13:10; 1 Johane 3:8, 10.

9. Ino mbuti muuya wanyika mboukonzya kutunjila mumoyo akweendelezya mizeezo yesu?

9 Sena muuya wanyika ulakonzya kumunjila mumoyo akweendelezya mizeezo yanu? Inzya, pele lilikke buyo ikuti mwatacenjela alimwi mwauzumizya kuti ucite boobo. (Amubale Tusimpi 4:23.) Ulakonzya kutalika kumweendelezya munzila njomutayeeyeli, ambweni kwiinda mukumvwana abantu baboneka mbuli kuti bali kabotu pele ibatamuyandi Jehova. (Tusimpi 13:20; 1 Bakorinto 15:33) Kunze lyaboobo, muuya ooyu mubi ulakonzya kumunjila kwiinda mukubala mabbuku mabi, kweebelela zintu ziletela muzeezo wakoonana, kubala nzyobalemba basiluleyo aa Intaneti, kulikondelezya kubi naa muzisobano zyakuyanda kuzunda ziyume zitete—mubwini, muuya wanyika ulakonzya kumunjila kwiinda mukuyungwa amuntu naa cintu cili coonse cikonzya kutupa kuyeeya mbuli Saatani naa nyika yakwe.

10. Ino mbuti mbotukonzya kuukaka muuya wanyika?

 10 Mbuti mbotukonzya kukaka muuya mubi wanyika akuzumanana kukkala muluyando lwa Leza? Nkwiinda buyo mukuzibelesya kabotu zintu zyakumuuya zyoonse nzyatupa Jehova akupaila ikulomba muuya uusalala lyoonse. Jehova ulaanguzu kapati kwiinda Diabolosi naa nyika mbyaabi yeendelezyegwa a Saatani. (1 Johane 4:4) Aboobo, cilayandika kapati kupaila kuli Jehova lyoonse!

 KUSAMA CABULEMU AKULIBAMBA KABOTU

11. Ino muuya wanyika upa kuti bantu kabasama buti?

11 Tulakonzya kuzyiba muuya uumweendelezya muntu kwiinda mukubona mbwasama, mbwalibamba ambwalibonya mumakani aabulondo. Mumasi manji, bantu banji tabasami kabotu cakuti simubweza twaambo umwi wakaamba kuti lino-lino kunakunyina kwiindana akati kabavwuule abantu buyo. Nobaba basimbi batanakubuka balayungwa amuuya ooyu cakuti muteende umwi wakaamba kuti bana aaba bali acilengwa “cakusama zisani zitondezya mubili alimwi zitapi bulemu.” Ciyanza cimwi cijatikizya kusama cabuyamba, munzila iitondezya muuya wabuzangi akubula bulemu.

12, 13. Ino ninjiisyo nzi nzyotweelede kutobela caboola kumakani aakusama akulibamba?

12 Mbwaanga tuli babelesi ba Jehova, tuyanda kuti katuboneka kabotu, calo icaamba kuti tweelede kusama zisani zyeelede, zinyina tombe, ziboneka kabotu alimwi zyeendelana ancotucita aciindi eeco. Ciindi coonse, kufwumbwa naa tuli basimbi naa basankwa, nsamino yesu alimwi ambotulibonya kubikkilizya ‘amilimo mibotu’ yeelede kutondezya ‘bulemu alimwi akulibatamika,’ ooko kuyandika kuli baabo “balyaamba kuti balilyaabide kuli Leza.” Masimpe, tatusamini kuti bamwi batubone pe, pele tuyanda kuti ‘tuzumanane kukkala muluyando lwa Leza.’ (1 Timoteyo 2:9, 10; Juda 21) Ee, ncotuyanda ncakuti kulisakatizya kwesu ikwiinda kubota kakuli “kwamuntu wamukati kamoyo . . . , ooyo uuyandika kapati mumeso aa Leza.”—1 Petro 3:3, 4.

13 Kuyungizya waawo, mutalubi kuti mbotusama ambotulibamba kulakonzya kubakulwaizya bamwi kutobela bukombi bwakasimpe naa kubatyompya. Ibbala lya Chigiriki lyakasandululwa kuti “cabulemu,” nolibelesyegwa kwaamba kulilemeka lipa muzeezo wakuba abulemu naa kubikkila maano mbobalimvwa bamwi. Aboobo, tweelede kwaabikkila maano kapati manjezyeezya aabamwi muciindi cakuyeeya buyo kuti tulakonzya kusama kufwumbwa mbotuyanda. Kwiinda zyoonse, tuyanda kupa kuti Jehova abantu bakwe balemekwe  alimwi akulitondezya kuti tuli babelesi ba Leza, ibacita “zintu zyoonse kutegwa Leza alemekwe.”—1 Bakorinto 4:9; 10:31; 2 Bakorinto 6:3, 4; 7:1.

Sena nsamino yangu naa mbondiboneka zipa bulemu kuli Jehova?

14. Caboola kumakani aabulondo alimwi ambotuboneka, ino mibuzyo nzi njotweelede kulibuzya?

14 Ikulibamba, kusama kabotu alimwi abulondo zilayandika kapati kwaambisya notutola lubazu mumulimo wamumuunda anotujanika kumiswaangano ya Bunakristo. Amulibuzye kuti: ‘Sena mbondilibamba ambondiboneka mumakani aabulondo cipa kuti bantu kabandilangisya akugambwa? Sena kupa kuti bamwi kabafwa nsoni naa kutyompwa? Sena nzyondicita mumakani aaya zitondezya kuti ndibikkila maano kapati kuzintu nzyondiyanda alimwi nsikombeleli nokuba kuti inga zyandilesya kupegwa mikuli mumbungano?’—Intembauzyo 68:6; Bafilipi 4:5; 1 Petro 5:6.

15. Ino nkaambo nzi Jwi lya Leza ncolitapi mulongo wamilawo yeelede kutobelwa caboola kumakani aakusama, kulibamba abulondo?

15 Bbaibbele kunyina nolipa mulongo wamilawo njobeelede kutobela Banakristo caboola kumakani aakusama, kulibamba alimwi abulondo. Jehova tatukasyi kulisalila naa kubelesya bongo bwesu. Muciindi caboobo, uyanda kuti tube bantu basimide ibabelesya njiisyo zyamu Bbaibbele alimwi “ibalaamaano aayiisyidwe kwaandaanya ciluzi acitaluzi kwiinda mukwaabelesya.” (Bahebrayo 5:14) Kwiinda zyoonse, uyanda kuti katucita zintu akaambo kaluyando—nkokuti kuyanda  Leza abasimukoboma. (Amubale Marko 12:30, 31.) Kulakonzya kuba nzila ziindene-indene zyakulibamba akusama izyeendelana anjiisyo zyamu Bbaibbele. Eeci cilakonzya kubonwa munsamino mbotu yamakamu-makamu aabantu ba Jehova bakkomene ibaswaangana mumasena aaindene-indene nyika yoonse mboizulwa.

KUUBYA-UBYA BUUMI BWESU

16. Ino muuya wanyika wiindene buti anzyaakayiisya Jesu, alimwi ino mibuzyo nzi njotweelede kulibuzya?

16 Muuya wanyika uleena alimwi upa kuti bantu banji kapati kabasyoma kuti mali azintu zyakumubili nzyezikonzya kubapa kukkomana. Pele, Jesu wakati: “Nokuba kuti muntu kajisi zintu zinji buti, ibuumi bwakwe tabuzwi kuzintu eezyo nzyajisi.” (Luka 12:15) Nokuba kuti kunyina naakaamba kuti tweelede kuciindizya kuliimya, Jesu wakayiisya kuti “aabo bazyi kuti bayandika kusololelwa a Leza” alimwi abaabo bazumanana  kuubya-ubya buumi bwabo naa ibajisi liso ‘lilangide buyo acintu comwe,’ nkokuti lilangide aazintu zyakumuuya, balakonzya kujana buumi alukkomano lwini-lwini. (Matayo 5:3; 6:22) Amulibuzye kuti: ‘Sena ndilazisyoma ncobeni nzyaakayiisya Jesu naa ndilayungwa a “usyi wabubeji”? (Johane 8:44) Ino nzyondaamba, mbaakani zyangu, nzyondibikka kumbele mubuumi bwangu naa mbondipona zitondezya kuti ndili muntu uuli buti?’—Luka 6:45; 21:34-36; 2 Johane 6.

17. Amwaambe mpindu zimwi nzyobajana aabo bazumanana kuubya-ubya buumi bwabo.

17 Jesu wakaamba kuti: “Busongo bulabonwa kuti buliluleme kwiinda mumilimo yambubo.” (Matayo 11:19) Atulange mbobagwasyigwa aabo bazumanana kuubya-ubya buumi bwabo. Balakatalukwa ncobeni mumulimo wa Bwami. (Matayo 11:29, 30) Tabalibiliki kapati alimwi eeci cibagwasya kutacita zintu zikonzya kubapa kupenga kapati mumizeezo alimwi amumoyo. (Amubale 1 Timoteyo 6:9, 10.) Akaambo kakukkutila azintu nzyobajisi, balaba aciindi cinji cakukkala amukwasyi wabo alimwi abalongwe Banakristo. Aboobo, balakonzya koona kabotu kakunyina acibanyonganya. (Mukambausi 5:12) Balaakukkomana kapati nobapa kufwumbwa ncobakonzya. (Milimo 20:35) Kunze lyaboobo, ‘balaindila kuba abulangizi’ alimwi balikkalikene mumizeezo. (Baroma 15:13; Matayo 6:31, 32) Masimpe, eezyi nzilongezyo zitaliboteli!

KUSAMA “ZILWANYO ZYOONSE”

18. Ino Bbaibbele limupandulula buti sinkondoma anzila nzyabelesya, alimwi ankondo njotulwana?

18 Alimwi aabo bazumanana kukkala muluyando lwa Leza balakwabililwa munzila yakumuuya kuli Saatani, ooyo uuyanda kuti Banakristo kabatakkomani akuti batakajani buumi butamani. (1 Petro 5:8) Paulo wakaamba kuti: “Tujisi nkondo yakutingana, ikutali abantu bajisi mubili wanyama abulowa pe, pele amfwulumende, beendelezi, baleli banyika bamudima ooyu alimwi amyuuya mibi iili mumasena aakujulu.” (Baefeso 6:12) Mabala aakuti “nkondo yakutingana” atondezya kuti nkondo yesu taili yakulwana amuntu uuli kulamfwu —katuyubide abusena bumwi bukwabilidwe—pele cili mbuli kulwana kamando. Kuyungizya waawo, mabala aakuti “mfwulumende,” “beendelezi,” alimwi a “baleli banyika” atondezya kuti myuuya mibi ilibikkidwe mumakamu-makamu alimwi ilicenjede.

19. Amupandulule zilwanyo zyakumuuya nzyayelede kusama Munakristo.

19 Pele nokuba kuti tuli bantu buyo alimwi tulalezya, tulakonzya kuzunda. Munzila nzi? Tulakonzya kucita oobo kwiinda mukusama “zilwanyo zyoonse zizwa kuli Leza.” (Baefeso 6:13) Ikupandulula zilwanyo eezyo, lugwalo lwa Baefeso 6:14-18 lwaamba kuti: “Amwiime nji, kamulyaangide kasimpe mucibuno mbuli lutambo alimwi kamusamide cilikwabilizyo cakucamba cabululami, akwalo kumaulu aanu kamusamide kabotu ikulibambila kwaambilizya makani mabotu aaluumuno. Kunze lyazintu eezyi zyoonse, amubweze ntobo mpati yalusyomo, iiyoomupa kucikonzya kuzima mivwi yoonse iiyaka mulilo iifwuswa amubi. Kunze lyaboobo, amucitambule acalo cimpoompo calufwutuko [naa bulangizi bwalufwutuko] alimwi apanga lyamuuya, nkokuti ijwi lya Leza. Aciindi nciconya, amuzumanane kupaila ciindi coonse mumuuya, ikubelesya misyobo yoonse yamipailo alimwi amisyobo yoonse yakukombelezya.”

20. Ino nkondo yesu yiindene buti ayabasikalumamba bazisi?

20 Mbwaanga zilwanyo eezyi zyakumuuya zizwa kuli Leza, tulakonzya kuba masimpe kuti zilakonzya kutukwabilila ikuti naa tulazisama lyoonse. Ikwiindana abasikalumamba ibalyookezya kwaciindi cilamfwu zimwi ziindi mumulimo wabo, Banakristo balo balalwana lyoonse kulwanina buumi bwabo alimwi inkondo eeyi iyakumana buyo ciindi Leza aakunyonyoona nyika ya Saatani akuwaala myuuya mibi yoonse mumulindi uutagoli. (Ciyubunuzyo 12:17; 20:1-3) Aboobo, mutatyompwi ikuti naa mulakatazyigwa atumpenda naa zisusi zyanyama, nkaambo toonse buyo tuyandika ‘kudinkaula’ mibili yesu kutegwa tuzumanane kusyomeka kuli Jehova. (1 Bakorinto 9:27) Mubwini, ikuti naa tatutoli lubazu munkondo eeyi nkokuti kuli cilubide!

21. Ino muunzila nzi ilikke motukonzya kuzunda munkondo yakumuuya?

 21 Kuyungizya waawo, tatukonzyi kuzunda munkondo eeyi munguzu zyesu tobeni. Nkakaambo kaako, Paulo utuyeekezya kuti tweelede kupaila kuli Jehova “ciindi coonse mumuuya.” Kulubazu lumwi, tweelede kumuswiilila Jehova kwiinda mukwiiya Jwi lyakwe akuyanzana abasikalumambama bakumuuya ciindi coonse, nkaambo munkondo eeyi tatuli tolikke pe! (Filimoni 2; Bahebrayo 10:24, 25) Aabo basyomeka muzintu zyoonse eezyi bayakuzunda alimwi akwiiminina lusyomo lwabo cakutayoowa ciindi nolusunkwa.

AMULIBAMBILE KWIIMININA LUSYOMO LWANU

22, 23. (a) Nkaambo nzi ncotweelede kulibambila lyoonse kwiiminina lusyomo lwesu, alimwi ino mibuzyo nzi njotweelede kulibuzya? (b) Makani nzi aatiilangwe-langwe mucibalo citobela?

22 Jesu wakaamba kuti: “Akaambo kakuti tamuli banyika, . . . nkakaambo kaako nyika ilimusulide.” (Johane 15:19) Aboobo, Banakristo lyoonse beelede kulibambila kwiiminina lusyomo lwabo cabulemu alimwi amoyo mubombe. (Amubale 1 Petro 3:15.) Amulibuzye kuti: ‘Sena ndilikazyi kaambo Bakamboni ba Jehova zimwi ziindi ncobatatoli lubazu mukucita zintu bantu banji nzyobacita? Nondiyandika kukaka kutola lubazu muzintu nzyobacita bantu banji, sena ndilasyoma kuti ncolyaamba Bbaibbele alimwi amuzike uusyomeka cililuzi? (Matayo 24:45; Johane 17:17) Caboola kukucita cintu ciluzi mumeso aa Leza, sena inga ndililibambilide alimwi ndicibona kuba coolwe ikwiindana abamwi?’—Intembauzyo 34:2; Matayo 10:32, 33.

23 Nokuba boobo, kanji-kanji Saatani ulatusunka munzila nzyotutayeeyeli kutegwa tucileke kuzumanana kulyaandaanya kunyika. Mucikozyanyo, mbuli mbokwaambwa kale, Diabolosi usola kuyunga babelesi ba Jehova kuti babe banyika kwiinda mukulikondelezya azintu zyamunyika. Mbuti mbotukonzya kusala kulikondelezya kubotu ikukonzya kupa kuti tukatalukwe akuzumanana kuba amanjezyeezya mabotu? Makani aaya alalangwa-langwa mucibalo citobela.

^ munc. 3 Kuzwa ibuzuba bwa Pentekoste 33 C.E., Kristo wali Mwami weendelezya mbungano yabasikumutobela bananike ibali anyika. (Bakolose 1:13) Mu 1914, Kristo wakapegwa nguzu zyakweendelezya “bwami bwanyika.” Aboobo, mazuba aano Banakristo bananike mbaiminizi ba Bwami bwa Mesiya.—Ciyubunuzyo 11:15.

^ munc. 8 Amubone bbuku lya Kukambitsirana za m’Malemba, amapeeji 323-332, lyakamwaigwa a Bakamboni ba Jehova.

^ munc. 65 Amubone Makani Aayungizyidwe mucibalo cakuti “Kusuluta Ndembela, Kuvwoota Alimwi Amilimo Iitali Yabusikalumamba.”