“Yebo ndonduwe kasensa kabuumi.”—INTEMBAUZYO 36:9.

1, 2. Ino ncipego nzi ncaakatupa Leza iciyandika kapati mazuba aano, alimwi ino nkaambo nzi?

TAATEESU wakujulu wakatupa cipego ciyandika kapati swebo tobantu—wakatupa buumi alimwi amaano aatugwasya kutondezya bube bwakwe. (Matalikilo 1:27) Akaambo kacipego eeci ciyandika kapati, tulakonzya kulanga-langa njiisyo zyamu Bbaibbele akubona mbozikonzya kutugwasya. Alimwi kwiinda mukuzitobela, tulakonzya kukomena akuba bantu basimide kumuuya, aabo ibamuyanda Jehova alimwi “ibalaamaano aayiisyidwe kwaandaanya ciluzi acitaluzi.”—Bahebrayo 5:14.

2 Mazuba aano cilayandika kapati kulanga-langa njiisyo zyamu Bbaibbele akubona mbozibeleka akaambo kakuti nyika yakatazya kapati cakuti tacikonzyeki kuba amilawo iikonzya kutobelwa muzintu zyoonse zikonzya kutucitikila mubuumi. Kaambo aaka kalalibonya mumakani aabusilisi, ikapati kujatikizya misamu anzila zyabusilisi zijatikizya kubelesya bulowa. Boonse ibayanda kumumvwida Jehova beelede kukabikkila maano kapati kaambo aaka. Aboobo, ikuti katuzimvwisya njiisyo zyamu Bbaibbele, tulakonzya kusala camaano akuba amanjezyeezya mabotu alimwi akuzumanana kukkala muluyando lwa Leza. (Tusimpi 2:6-11) Amulange-lange njiisyo zimwi zikonzya kumugwasya mumakani aaya.

BUUMI ABULOWA ZILISETEKENE

3, 4. Ino ndilili bulowa nobwakasaanguna kwaambwa kuti bulisetekene mu Magwalo, alimwi ino kaambo aaka kayeeme aanjiisyo zili?

3 Ciindi cakusaanguna Jehova naakatondezya kuti buumi abulowa ziliswaangene kapati akuti zilisetekene nciindi Kaini naakajaya  Abelo. Leza wakaambila Kaini kuti: “Swiilila! Bulowa bwamunyoko bulandililila kuzwa munyika.” (Matalikilo 4:10) Mumeso aa Jehova, bulowa bwa Abelo bwakali kwiiminina buumi oobo ibwakakosokezyegwa ciindi naakajaigwa calunya. Munzila imwi, bulowa bwa Abelo bwakali kukwiila kuti Leza ape cisubulo.—Bahebrayo 12:24.

4 Nolyakamana Zambangulwe lya Nowa, Leza wakazumizya bantu kulya nyama pele ikutali bulowa. Leza wakaamba kuti: “Tamweelede kulya nyama antoomwe abuumi bwayo, nkokuti bulowa bwayo. Kunze lyaboobo bulowa bwanu ndiyoobuyandaula.” (Matalikilo 9:4, 5) Noliba lino bantu boonse beelede kuutobela mulawo ooyu akaambo kakuti mbana ba Nowa. Mulawo ooyu utondezya mbokali kamasimpe kaambo nkaakaamba Leza kuli Kaini kakuti bulowa bwiiminina buumi bwazilenge zyoonse. Kunze lyaboobo, mulawo ooyu utondezya kuti Jehova, kasensa kabuumi, uyakubasubula bantu boonse batalemeki buumi abulowa.—Intembauzyo 36:9.

5, 6. Ino mbuti Mulawo wa Musa mbowakatondezya kuti bulowa bulisetekene alimwi bulayandika kapati? (Amubone kabbokesi kakuti “ Kamubulemeka Buumi Bwabanyama.”)

5 Twaambo ootu tobilo ituyandika kapati twakaambwa alimwi mu Mulawo wa Musa. Lugwalo lwa Levitiko 17:10, 11 lwaamba kuti: “Kufwumbwa muntu . . . uulya bulowa buli boonse, ndiyoomukaka muntu ooyo uulya bulowa, eelyo ndiyoomujaya. Nkaambo buumi bwacintu cipona buli mubulowa, alimwi mebo ndamuzumizya kuti kamububelesya acipaililo kumanya milandu yanu, akaambo kakuti bulowa mbobumanya milandu nkaambo momuli buumi.” *—Amubone kabbokesi kakuti “ Bulowa Mbobumanizya Milandu.”

6 Ikuti bulowa bwamunyama tiibwapaizyigwa acipaililo, bwakeelede kutilwa ansi. Aboobo, munzila yacikozyanyo, ibuumi bwakali kujolwa kuli Mukamwini buumi. (Deuteronomo 12:16; Ezekieli 18:4) Nokuba boobo, amubone kuti bana Israyeli  tiibakeelede kuciindizya kwiinda mukusola kugusya bulowa boonse bwakali kujanika munyama. Kufwumbwa buyo kuti munyama wajaigwa kabotu naa watendwa buya amoyo, muna Israyeli wakali kukonzya kulya nyama eeyo kakutuba kumoyo, akaambo kakuti ikucita boobo cakali kutondezya bulemu kuli Sikutupa buumi.

7. Ino mbuti Davida mbwaakatondezya kuti bulowa wakali kububona kuti bulisetekene?

 7 Davida, “imwaalumi weendelana amoyo [wa Leza]” wakazimvwisya njiisyo zili mumulawo ngwaakapa Leza kujatikizya bulowa. (Milimo 13:22) Ciindi cimwi naakafwide nyota, ibaalumi bakwe botatwe bakanjila canguzu munkambi yabasinkondonyina bamane bakateka meenda mumugoti akumutolela. Ino Davida wakacita buti? Wakabuzya kuti: “Sena ndeelede kunywa bulowa bwabaalumi aaba ibabikka buumi bwabo muntenda?” Davida wakabona kuti ikunywa meenda aalya cakali mbuli kunywa bulowa bwabaalumi bakwe ibakabikka buumi bwabo muntenda. Aboobo, nokuba kuti wakalifwide nyota, “wakaatila ansi kuli Jehova.”—2 Samuele 23:15-17.

8, 9. Sena Leza wakacinca mbwaabona makani aajatikizya buumi abulowa noyakabambwa mbungano ya Banakristo? Amupandulule.

8 Nokwakainda myaka iisika ku 2,400 kuzwa ciindi Leza naakamupa mulawo Nowa alimwi nokwakainda myaka iitandila ku 1,500 kuzwa nocakabambwa cizuminano ca Mulawo, Jehova wakabelesya muuya wakwe kusololela kabunga keendelezya kambungano ya Banakristo bakusaanguna kulemba kuti: “Muuya uusalala alimwi andiswe twasala kutamuyungizizya mukuli aumbi, ccita buyo zintu eezyi ziyandika: kuti muzumanane kutantamuka zintu zituulwa kumituni, bulowa, zintu zisinidwe alimwi abwaamu.”—Milimo 15:28, 29.

9 Cilisalede kuti, bakabunga keendelezya kakusaanguna bakabona kuti bulowa bulisetekene alimwi akuti ikububelesya munzila iitali kabotu kuleelene akukomba mituni naa kucita bwaamu. Oobo mbobazibona zintu Banakristo bakasimpe mazuba aano. Kunze lyaboobo, akaambo kakuti batobela njiisyo zyamu Bbaibbele, balamukkomanisya Jehova nobasala cakucita mumakani aajatikizya kubelesya bulowa.

KUBELESYA BULOWA MUBUSILISI

Ino mbuti mbondikonzya kumupandulwida musilisi kujatikizya kusala kwangu mumakani aakubelesya tubeela tumwi twabulowa?

10, 11. (a) Ino Bakamboni ba Jehova bakubona buti kubikkwa bulowa naa cibeela cimwi akati kazibeela zyone zyabulowa? (b) Caboola kumakani aabulowa, ndilili Banakristo nobakonzya kubona zintu munzila ziindene-indene?

10 Bakamboni ba Jehova balizyi kuti “kutantamuka . . . bulowa” caamba kutazumina kubikkwa bulowa alimwi  akutasanga naa kuyobola bulowa bwabo kutegwa bakabikkwe kumbele. Alimwi akaambo kakuti balaulemeka mulawo wa Leza, tabazumini kubikkwa zibeela zyone zyabulowa, nkokuti maseelo aapanga bulowa (red cells), maseelo aalwana tuzunda (white cells), cibeela cipa kuti bulowa kabwaangana (platelets), ameenda aamubulowa (plasma).

11 Pele, mazuba aano, kwiinda mukubelesya nzila zimwi zyabasyaabupampu, zibeela eezyi zilakonzya kwaandaanizyigwa mutubeela tuniini-niini tubelesyegwa munzila ziindene-indene. Sena Munakristo ulakonzya kutuzumina tubeela tuniini ootu? Sena utubona kuti ‘mbulowa’? Umwi aumwi weelede kulisalila mumakani aaya. Ncimwi buyo anzila zyabusilisi mbuli hemodialysis, hemodilution alimwi a cell salvage izijatikizya bulowa bwakwe muntu uusilikwa, kufwumbwa buyo kuti tiibwayobolwa.—Amubone Makani Aayungizyidwe mucibalo cakuti “Tubeela Twabulowa Alimwi Anzila Zyakwaandulwa.“

12. Ino mbuti mbotweelede kwaabona akwaalanganya makani aajatikizya manjezyeezya?

 12 Sena caamba kuti Jehova tazibikkili maano zintu nzyotweelede kulisalila swebo tobeni? Peepe, nkaambo ulazibikkila maano kapati nzyotuyeeya anzyotuyandisya mumoyo. (Amubale Tusimpi 17:3; 24:12.) Aboobo, twamana kupaila akuvwuntauzya makani aajatikizya misamu naa nzila zyabusilisi, tweelede kwaatobela manjezyeezya eesu aakayiisyigwa njiisyo zyamu Bbaibbele. (Baroma 14:2, 22, 23) Kunze lyaboobo, ibamwi tabeelede kutusalila naa kutusungilizya kusala munzila imwi njobalombozya balo alimwi tatweelede kubabuzya kuti, “Ino inga mwacita buti ikuti nomwali ndinywe?” Mumakani aaya, Munakristo umwi aumwi weelede “kunyamuna mukuli wakwe uumugeme.” *Bagalatiya 6:5; Baroma 14:12; amubone kabbokesi kakuti “ Sena Bulowa Ndibubona Kuti Bulisetekene?

MILAWO YA JEHOVA ITONDEZYA KUTI NGU TAATEESU UUTUYANDA

13. Ino milawo anjiisyo zya Jehova zitondezya nzi kujatikizya nguwe? Amupe cikozyanyo.

13 Milawo anjiisyo zyamu Bbaibbele zitondezya kuti Jehova ngu Sikupa Mulawo imusongo alimwi akuti ngu Taata siluyando uuyandisya kuti bana bakwe kabapona kabotu. (Intembauzyo 19:7-11) Nokuba kuti mulawo wakuti ‘katutantamuka bulowa’ tiiwakapegwa akaambo katwaambo tujatikizya busilisi, utugwasya kuti tutabi amapenzi aaboola akaambo kakubikkwa bulowa. (Milimo 15:20) Masimpe ngakuti, basilisi banji baamba kuti ikutabelesya bulowa mukwaandula bantu “nenzila mbotu kapati” yabusilisi mazuba aano. Ku Banakristo bakasimpe, twaambo tuli boobu tupa bumboni bwakuti busongo bwa Jehova tabweeli akuti ngu Taata siluyando.—Amubale Isaya 55:9; Johane 14:21, 23.

14, 15. (a) Ino milawo nzi yakali kutondezya kuti Leza ulabayanda bantu bakwe? (b) Ino mbuti mbomukonzya kutobela njiisyo izili mumilawo eeyi iijatikizya kutantamuka ntenda?

14 Milawo minji njobakapegwa bana Israyeli yakali kutondezya  kuti Leza wakali kuyanda kuti bantu bakwe kabapona kabotu. Mucikozyanyo, wakalailila kuti maanda aabana Israyeli akeelede kuba acitabililo aciluli kutegwa muntu ataloki, akaambo kakuti milimo minji yakali kucitilwa aziluli. (Deuteronomo 22:8; 1 Samuele 9:25, 26; Nehemiya 8:16; Milimo 10:9) Kunze lyaboobo, Leza wakalailila kuti ŋombe zikali naa ziluma zyakeelede kubambwa kabotu. (Kulonga 21:28, 29) Ikutaitobela milawo eeyi cakali kutondezya kuti tabababikkili maano bamwi alimwi bakali kukonzya kuba amulandu wabulowa.

15 Ino mbuti mbomukonzya kutobela njiisyo izili mumilawo eeyi? Inga cainda kubota ikubikkila maano kumootokala wanu, mbomweenzya, banyama mbomuvwuba, ŋanda yanu, nkomubelekela, azyakulikatalusya nzyomusala. Mumasi amwi, icijaya bakubusi banji nintenda, bunji bwaziindi izicitika akaambo kabuyamba. Pele bakubusi ibayanda kuzumanana kuba muluyando lwa Leza balabubikkila maano kapati buumi alimwi tabalikondelezyi azintu zikonzya kubanjizya muntenda. Tabayeeyi kuti tabakonzyi kunjila muntenda akaambo kakuti mbakubusi. Muciindi caboobo, balalikondelezya mubukubusi bwabo kwiinda mukutantamuka zintu zibi.—Mukambausi 11:9, 10.

16. Ino ninjiisyo nzi yamu Bbaibbele iibeleka mumakani aakugusya da? (Amubone abupanduluzi buyungizyidwe.)

16 Nobuba buumi bwamwana uutanazyalwa bulayandika kapati mumeso aa Leza. Mu Israyeli yansiku, ikuti naa muntu wacisa mukaintu uulaada mpoonya mukaintu ooyo naa mwanaakwe wafwa, kuli Leza muntu uuli boobo wakali kubonwa kuti mujayi alimwi wakeelede kulunga “buumi kubuumi.” * (Amubale Kulonga 21:22, 23.) Aboobo, amuyeeye mbwalimvwa Jehova nabona bantu banji bagusya mada amwaka, ibunji bwabo akaambo kakuti bayanda kulikondelezya naa kuzumanana kucita buvwuule.

17. Ino mbuti mbomukonzya kumuyumya-yumya muntu wakagusya da katanaiya zyeelelo zya Leza?

17 Pele, ino mbuti kujatikizya mukaintu wakagusya da katanaiya  kasimpe kamu Bbaibbele? Sena caamba kuti Leza takonzyi kumufwida luse? Peepe! Masimpe ngakuti, muntu weempwa ncobeni ulakonzya kusyoma kuti Jehova ulakonzya kumulekelela kwiinda mubulowa bwa Jesu. (Intembauzyo 103:8-14;  Baefeso 1:7) Kristo lwakwe mwini wakaamba kuti: “Ndakaboolela kwiita basizibi kuti beempwe ikutali bantu baluleme.”—Luka 5:32.

MUTABI ALUSULO!

18. Ino mbuti Bbaibbele mbolitugwasya kuzyiba cini cipa kuti muntu ajaye mweenzinyina?

18 Jehova tayandi buyo kuti katutacisi bamwi, pele uyanda kuti tugusye lusulo mumyoyo yesu oolo lusololela kukutila bulowa bwabantu banji. Mwaapostolo Johane wakalemba kuti: “Muntu woonse uusulaika munyina mujayi.” (1 Johane 3:15) Muntu uuli boobu tamuyandi buyo imunyina, pele ulombozya kuti kubota wafwa. Ulakonzya kutondezya kuti ulimusulide mweenzinyina kwiinda mukumubejekezya cakuti ikuti naa eeco ncaamwaamba nicali camasimpe, ooyo wabejekezyegwa inga wayandika kusubulwa a Leza. (Levitiko 19:16; Deuteronomo 19:18-21; Matayo 5:22) Aboobo, cilayandika kapati kuti tugusye lusulo luli loonse iluli mumyoyo yesu!—Jakobo 1:14, 15; 4:1-3.

19. Ino muntu uutobela njiisyo zyamu Bbaibbele waabona buti magwalo mbuli Intembauzyo 11:5 a Bafilipi 4:8, 9?

19 Kuyungizya waawo, aabo ibabona kuti buumi bulayandika mbubonya mbwabubona Jehova alimwi ibayanda kuzumanana kukkala muluyando lwakwe tabayandi nkondo iili yoonse. Lugwalo lwa Intembauzyo 11:5 lwaamba kuti: “Kufwumbwa muntu uuyanda nkondo [Jehova] ulimusulide.” Lugwalo oolu talwaambi buyo ibube bwa Leza; pele lujisi njiisyo iikonzya kutugwasya mubuumi. Lulakonzya kubakulwaizya ibamuyanda Leza ikutalikondelezya azintu zili zyoonse zikonzya kubapa kuyandisya nkondo. Mbubonya buyo, ikaambo kakuti Jehova ngu “Leza waluumuno” kalabakulwaizya babelesi bakwe kuyeeya zintu ziyandika, zili kabotu alimwi zyeelela kutembaulwa, eezyo izipa kuti kube luumuno.—Amubale Bafilipi 4:8, 9.

AMUZITANTAMUKE MBUNGA IZIJISI MULANDU WABULOWA

20-22. Ino Banakristo baibona buti nyika alimwi ino nkaambo nzi?

20 Mumeso aa Leza, nyika yoonse ya Saatani ijisi mulandu wabulowa. Imbunga zyanjiyo zyatwaambo twacisi, iziimininwa  azinyama zikali mu Magwalo, zyajaya tuulunzuma twabantu kubikkilizya ababelesi banji ba Jehova. (Daniele 8:3, 4, 20-22; Ciyubunuzyo 13:1, 2, 7, 8) Abalo basimakwebo abasayaansi kwiinda mukubelekela antoomwe ambunga eezyi izili mbuli banyama aaba bakali balajana mpindu mpati kwiinda mukupanga zilwanyo zikali kapati. Masimpe kuti “nyika yoonse ili mumaanza aamubi”!—1 Johane 5:19.

21 Akaambo kakuti basikutobela Jesu “tabali banyika” eeyi, alimwi tabatoli lubazu nokuceya mutwaambo twacisi amunkondo, tabajisi mulandu wabulowa pe lwabo kubagama naa ciinga cabo coonse. * (Johane 15:19; 17:16) Alimwi akaambo kakuti batobela cikozyanyo ca Kristo, tababalwani bantu ibabapenzya. Muciindi caboobo, balabayanda basinkondonyina alimwi buya balabapailila.—Matayo 5:44; Baroma 12:17-21.

22 Kunze lyaboobo, Banakristo bakasimpe tabayandi kujatikizyigwa a “Babuloni Mupati,” nkokuti bwami bwanyika yoonse bwabukombi bwakubeja ibujisi mulandu mupati wabulowa  kwiinda mbunga zyoonse. Jwi lya Leza lyaamba kuti: “Mulinguwe mwakajanwa bulowa bwabasinsimi abwabasalali alimwi abwabantu boonse buyo ibakajaigwa anyika.” Aboobo, tucenjezyegwa kuti: “Amuzwe mulinguwe, nobantu bangu.”—Ciyubunuzyo 17:6; 18:2, 4, 24.

23. Ino kuzwa mu Babuloni Mupati caamba nzi?

23 Ikuzwa mu Babuloni Mupati tacaambi buyo ikufwutwa zina mubbuku lyacikombelo cakubeja. Cilabikkilizya akusulaika micito mibi iizuminwa akucitwa mubukombi bwakubeja mbuli kutalilemeka, kujatikizyigwa mutwaambo twacisi, busyaacivwulemwangu akuyandisya lubono. (Amubale Intembauzyo 97:10; Ciyubunuzyo 18:7, 9, 11-17) Kanji-kanji eeyi njemicito iipa kuti bantu kabajayana.

24, 25. Ncinzi cikonzya kupa kuti Leza amufwide luse muntu weempwa kumulandu wabulowa, alimwi ino eeci cakali kwiimininwa anzi kuciindi cabana Israyeli?

24 Katutananjila mubukombi bwakasimpe, umwi aumwi wesu munzila imwi wakali kutola lubazu muzintu zicitika munyika ya Saatani, aboobo twakajisi mulandu wabulowa. Pele, akaambo kakuti twakacinca bukkale bwesu, twakaba alusyomo mucipaizyo cacinunuzyo ca Kristo alimwi twakalyaaba kuli Leza, eeci cakapa kuti Leza atufwide luse akutukwabilila kumuuya. (Milimo 3:19) Bbaibbele litondezya kuti lukwabililo lwamusyobo ooyu lwakali kwiimininwa aminzi yamayubilo.—Myeelwe 35:11-15; Deuteronomo 21:1-9.

25 Ino bubambe oobu bwakali kubeleka buti? Ikuti muna Israyeli wajaya mweenzinyina ikutali acaali, wakeelede kuccijila kumunzi umwi wamayubilo. Kumane babetesi bakali kwaalanga-langa makani aayo, mpoonya ikuti muntu ooyo wajanwa kuti ncobeni tanaakamujaya acaali mweenzinyina, wakeelede kukkala mumunzi wamayubilo kusikila mane mupaizi mupati wafwa. Mpoonya wakali kukonzya kukkala kufwumbwa nkwayanda. Masimpe, bubambe oobu butondezya kuti Leza ulaaluzyalo alimwi akuti buumi bwabantu bulayandika kapati kulinguwe. Minzi eeyi yamayubilo mazuba aano mbubambe mbwaakabikka Leza kwiinda mucipaizyo cacinunuzyo ca Kristo icitukwabilila kulufwu ikuti cakutazyiba twatyola milawo iijatikizya kusetekana kwabuumi abulowa. Sena mulalumba  kujatikizya bubambe oobu? Mbuti mbomukonzya kutondezya kuti mulalumba? Nzila imwi mbomukonzya kucita boobo nkwiinda mukutamba bamwi kuti bamusangane mumunzi wamayubilo wamazuba aano, ikwaambisya mbotubwene kuti “mapenzi mapati” alaafwaafwi kapati.—Matayo 24:21; 2 Bakorinto 6:1, 2.

AMUTONDEZYE KUTI BUUMI BULAYANDIKA KAPATI KWIINDA MUKUKAMBAUKA MULUMBE WA BWAMI

26-28. Ino bukkale bwesu bukozyenye buti abwamusinsimi Ezekieli, alimwi ino mbuti mbotukonzya kuzumanana kukkala muluyando lwa Leza?

26 Bukkale bwabantu ba Leza mazuba aano butuyeekezya musinsimi Ezekieli, ooyo Jehova ngwaakapa mulimo wabulindizi kutegwa acenjezye bana Israyeli. Leza wakati: “Eelyo nomvwa jwi lizwa kumulomo wangu, weelede kundicenjezyela bantu aaba.” Ikuti Ezekieli naatakaubikkila maano mulimo ooyu, naakaba amulandu wabulowa bwabaabo ibakajaigwa ciindi munzi wa Jerusalemu nowakapegwa cisubulo akunyonyoonwa. (Ezekieli 33:7-9) Pele Ezekieli wakaucita mulimo ooyu, aboobo kunyina naakaba amulandu wabulowa.

27 Sunu, tulaafwaafwi amamanino aanyika yoonse ya Saatani. Aboobo, Bakamboni ba Jehova balimvwa kuti bajisi mukuli alimwi acoolwe cipati cakwaambilizya mulumbe wa Bwami alimwi ‘abuzuba bwa Leza bwakupa cisubulo.’ (Isaya 61:2; Matayo 24:14) Sena andinywe muluujisi kubeleka cakumaninina mumulimo ooyu uuyandika kapati? Mwaapostolo Paulo wakali kuubikkila maano kapati mulimo ngwaakapedwe wakukambauka. Aboobo, wakaamba kuti: “Ndinyina mulandu wabulowa bwabantu boonse, nkaambo tiindakamusisa pe, pele ndakamwaambila zyoonse nzyayanda Leza.” (Milimo 20:26, 27) Masimpe, tweelede kutobela cikozyanyo cakwe cibotu.

28 Ncobeni, kutegwa tuzumanane kukkala muluyando lwa Taateesu siluyando Jehova, kuli acimbi ncotweelede kucita kunze lyakubona buumi abulowa mbubonya mbwabubona Jehova. Tweelede kuzumanana kusalala mumeso aakwe mbubonya mbotulaabone mucibalo citobela.

^ munc. 5 Kujatikizya kaambo nkaakaamba Leza kakuti “buumi bwacintu cipona buli mubulowa,” magazini yakuti Scientific American yaamba kuti: “Nokuba kuti mukaambo aaka bulowa bwaambidwe mumaambilambali kuti bwiiminina buumi, masimpe ngakuti musyobo umwi aumwi wamaseelo aapanga bulowa ulayandika kutegwa cintu cibe cuumi.”

^ munc. 12 Amubone Sinsimuka! ya Chingisi yamu August 2006, amapeeji 3-12, iyakamwaigwa a Bakamboni ba Jehova.

^ munc. 16 Basikupandulula mabala aamu Bbaibbele baamba kuti mabala aakabelesyegwa mu Chihebrayo “kuboneka kuti taajatikizyi buyo kucisa mukaintu alikke.” Alimwi amubone kuti Bbaibbele talyaambi kuti mukukosola makani Jehova wakali kubala kuti ino nsalalila naa mwana uuli mwida mupati buti.

^ munc. 21 Amubone Cibalo 5 cakuti, “Mbomukonzya Kulyaandaanya Kunyika.”

^ munc. 70 Ikuti kamuyanda makani aambi, amubone Makani Aayungizyidwe mucibalo cakuti “Tubeela Twabulowa Alimwi Anzila Zyakwaandulwa”.