“Amuliyake nobeni aantalisyo yalusyomo lwanu lusalalisya . . . Muzumanane kukkala muluyando lwa Leza.”—JUDA 20, 21.

1, 2. Mulimo nzi wakuyaka ngomujisi, alimwi nkaambo nzi ncomweelede kuubikkila maano?

AMWEEZYEEZYE kuti mujisi bubi kuyaka ŋanda. Mulimo ooyu mwakautalika kaindi alimwi ulazumanana. Nokuba kuti mulimo ooyu muyumu, pele ulamukkomanisya. Aboobo, ziyume zitete, mulikanzide kuzumanana akutauleka naa kutolwaala, nkaambo mulizyi kuti mulimo ngomubeleka ulabujatikizya buumi bwanu lino, alimwi mane buya abwakumbele. Nkaambo nzi? Nkaambo ŋanda njomuyaka tiili ŋanda ini buya pe; ŋanda eeyi ndinywe!

2 Sikwiiya Juda wakakankaizya kaambo kakuti tweelede kuliyaka tobeni. Naakakulwaizya Banakristo kuti ‘amuzumanane kukkala muluyando lwa Leza,’ wakabaambila acintu cakali kukonzya kubagwasya kucita boobo naakati: “Amuliyake nobeni aantalisyo yalusyomo lwanu lusalalisya.” (Juda 20, 21) Ninzila nzi zimwi zikonzya kumugwasya kuliyaka nobeni akupa kuti lusyomo lwanu luyume kutegwa muzumanane kuba muluyando lwa Leza? Atulange-lange zibeela zyotatwe zyamulimo ooyu ngomujisi wakuliyaka nobeni kumuuya.

AMUZUMANANE KUYUMYA LUSYOMO LWANU MUZYEELELO ZILULEME ZYA JEHOVA

3-5. (a) Ino Saatani uyanda kumucenga kuti kamwiibona buti milawo ya Jehova? (b) Mbuti mbotweelede kwiibona milawo ya Jehova, alimwi ino eeci ceelede kutupa kulimvwa buti? Amupe cikozyanyo.

3 Cakusaanguna, tweelede kuyumya lusyomo lwesu mumilawo ya Leza. Nomwali kwiiya mubbuku eeli, mwaiya milawo ya Jehova iiluleme iili mboibede iijatikizya mbomweelede kulilemeka.  Ino mwiibona buti milawo eeyi? Saatani uyanda kumucenga kutegwa kamuyeeya kuti milawo, njiisyo alimwi azyeelelo zya Jehova zimwiimya zibotu alimwi zilaminya. Eeyi nenzila njaalikubelesya lyoonse kuzwa ciindi niyakamubelekela mumuunda wa Edeni kusikila mane asunu. (Matalikilo 3:1-6) Sena andinywe muyakucengwa munzila eeyi? Ciya buyo kweelana ambomuzibona zintu.

4 Mucikozyanyo: Atwaambe kuti muyabweendeenda mupaaki, kumane mwajana lukwakwa lulamfwu lwawaya lumusinkila kuti mutanjili mubusena bumwi ibulibonya kabotu. Kumatalikilo, mulakonzya kuyeeya kuti lukwakwa oolo lumupa buyo kwiindwa zintu zibotu. Pele nomwalanga mukati mwabona kuti kuli syuumbwa mukali uuyabubendelela banyama! Eeci cilakonzya kumupa kubona ncolwakabikkilwa lukwakwa oolo, inzya nkutegwa mukwabililwe. Sena caamba kuti kuli munyama mukali uuyabumubendelela lino aawa? Jwi lya Leza litucenjezya kuti: “Amulibatamike amupakamane! Sinkondonyoko, Diabolosi, uyaabweendeenda mbuli syuumbwa wabutambo uuvwuluma, uyandaula muntu ngwatiimene buumbulu.”—1 Petro 5:8.

5 Saatani mujayi, uli mbuli munyama wabutambo. Akaambo kakuti Jehova tayandi kuti Saatani atulye, wabikka milawo iikonzya kutukwabilila kunzila zinji ‘zyabucenjezu’ zyamubi ooyu. (Baefeso 6:11) Aboobo, lyoonse notukkala ansi kuyeeya milawo ya Leza, tweelede kuzyiba kuti Taateesu wakujulu wakatupa milawo eeyo akaambo kakuti ulatuyanda. Ikuti twailanga munzila eeyi, milawo ya Leza ilakonzya kutupa kukkomana akuba aluumuno. Sikwiiya Jakobo wakalemba kuti: “Ooyo uulangisisya mumulawo uulondokede uuleta lwaanguluko alimwi uuzumanana mulinguwo . . . unookkomene muzintu nzyacita.”—Jakobo 1:25.

6. Ninzila nzi mbotu iikonzya kumugwasya kuti kamusyoma milawo anjiisyo zya Leza ziluleme? Amupe cikozyanyo.

6 Ikutobela milawo ya Leza mubuumi bwesu nenzila mbotu iikonzya kutugwasya kuti tuyumye lusyomo lwesu muli Sikutupa Milawo eeyo alimwi akubona kuti ncabusongo kutobela milawo yakwe. Mucikozyanyo, “mulawo wa Kristo” ulabikkilizya amalailile ngaakapa Jesu aakuti tweelede kuyiisya bamwi ‘zintu zyoonse nzyaakalailila.’ (Bagalatiya 6:2; Matayo 28:19, 20) Kunze lyaboobo, Banakristo balaabikkila maano kapati malailile aakuti beelede kuzumanana kuswaangana antoomwe kutegwa  bakombe Leza alimwi akukulwaizyanya. (Bahebrayo 10:24, 25) Kuyungizya waawo, milawo ya Leza ilabikkilizya akukulwaizyigwa kuti katupaila lyoonse kuli Jehova cakutaleka alimwi akucita oobo kuzwa ansi aamoyo. (Matayo 6:5-8; 1 Batesalonika 5:17) Ikutobela milawo eeyi mubuumi bwesu, kutupa kubona kuti masimpe itupa busolozi bubotu kapati. Ikwiitobela kutupa kukkomana alimwi akukkala kabotu munyika eeyi iizwide mapenzi. Nomukkala ansi kuyeeya mbomwagwasyigwa nywebo kumugama akaambo kakutobela milawo ya Leza, sena eeci tacimupi kwiisyoma kapati milawo eeyi?

7, 8. Ino mbuti Jwi lya Leza mbolibakulwaizya aabo balibilika akaambo kakuyoowa kuti ambweni inga baalilwa kutobela milawo ya Leza iiluleme mukuya kwaciindi?

7 Bantu bamwi bayoowa kuti ambweni mukuya kwaciindi ciyakubayumina kuzumanana kutobela milawo ya Jehova. Bayoowa kuti ambweni bayakwaalilwa. Ikuti naa mbomulimvwa oobo, amuyeeye majwi aaya: “Mebo, nde Jehova ndime Leza wako, ndime ndikuyiisya kuti ugwasyigwe, uukusololela munzila moyelede kweendela. Eelo kaka inga cabota kuti waiswiilila milawo yangu! Aboobo luumuno lwako inga lwaba mbuli mulonga abululami bwako mbuli mayuwe aamulwizi.” (Isaya 48:17, 18) Sena kuli nomwakakkede ansi kuyeeya mbwaakkazika moyo majwi aaya?

8 Aawa Jehova utuyeekezya kuti ikuti katumumvwida tulakonzya  kugwasyigwa. Utusyomezya kuti tulakonzya kugwasyigwa munzila zyobilo ikuti twacita oobo. Cakusaanguna, iluumuno lwesu lulakonzya kuba mbuli mulonga—uubateme, uutayuminini alimwi uuzumanana kukunka. Cabili, bululami bwesu bulakonzya kuba mbuli mayuwe aamulwizi. Ikuti naa mwaima kumbali aalwizi akubona mayuwe aaboola akulipwaya kunkomwe yalwizi, masimpe mulakonzya kubona kuti kunyina naayakumana. Mulizyi kuti kwamyaka minji iitakonzyi kubalwa iiboola kumbele, mayuwe anakuzumanana kuboola akulipwaya kunkomwe. Jehova waamba kuti bululami bwanu, inzya buumi bwanu buzwide milimo iiluleme, bulakonzya kuba mbuli mayuwe aamulwizi aatamani. Kufwumbwa kuti mwazumanana kusyomeka kulinguwe, kunyina nayakumulekelezya pe! (Amubale Intembauzyo 55:22.) Sena zintu eezyi zibotu nzyaakatusyomezya tazimupi kumusyoma kapati Jehova alimwi azyeelelo zyakwe ziluleme?

“ATUSOLEKESYE KUYA KUMBELE MANE TUSIME”

9, 10. (a) Nkaambo nzi kusima kumuuya ncoili mbaakani mbotu ku Banakristo? (b) Ino mbuti ikubona zintu munzila yakumuuya mbokutupa kukkomana?

9 Cintu cabili ciyandika mumulimo wakuyaka ngomujisi cilakonzya kubonwa mumajwi aakalembwa kwiinda mukusololelwa amuuya aakuti: “Atusolekesye kuya kumbele mane tusime.” (Bahebrayo 6:1) Munakristo uli woonse weelede kuba ambaakani mbotu yakuyanda kusima kumuuya. Mukwiimpana akulondoka, ooko kutakonzyeki aciindi cino, Banakristo boonse balakonzya kusika ambaakani yakusima. Kuyungizya waawo, Banakristo balakkomana kapati ikubelekela Jehova nobayaabusima. Nkaambo nzi ncocili boobo?

10 Munakristo uusimide nguyooyo uubikkila maano kuzintu zyakumuuya. Zintu uzibona mbubonya mbwazibona Jehova. (Johane 4:23) Paulo wakalemba kuti: “Aabo bapona kweelana amubili bayeeya buyo zintu zyamubili, pele aabo bapona kweelana amuuya bayeeya zyamuuya.” (Baroma 8:5) Muntu uubona zintu munzila yakumubili takkomani kapati akaambo kakuti ulaliyanda, talangi zyakumbele, ubikkila buyo maano kuzintu zyakumubili. Muntu uubikkila maano kuzintu zyakumuuya ulikkomene  kapati nkaambo lyoonse uyeeya buyo Jehova, “Leza uukkomene.” (1 Timoteyo 1:11) Muntu uubikkila maano kuzintu zyakumuuya ulayanda kukkomanisya Jehova alimwi neliba leelyo nali mumasunko ulazumanana kukkomana. Nkaambo nzi? Nkaambo masunko amupa coolwe cakutondezya kuti Saatani ulabeja alimwi akuzumanana kusyomeka calo icimukkomanisya Taateesu wakujulu.—Tusimpi 27:11; amubale Jakobo 1:2, 3.

11, 12. (a) Ino ncinzi ncaakaamba Paulo kujatikizya “maano” aa Munakristo, alimwi ino bbala lyakasandululwa kuti “aayiisyidwe” lyaamba nzi? (b) Ncinzi ciyandika kutegwa mubili usime akuzyibila kucita zintu zimwi?

11 Kutegwa tube bantu babikkila maano kuzintu zyakumuuya alimwi basimide tweelede kwiiya. Mucikozyanyo, amubone ncolwaamba lugwalo oolu: “Cakulya ciyumu ncabantu basimide, aabo ibalaamaano aayiisyidwe kwaandaanya ciluzi acitaluzi kwiinda mukwaabelesya.” (Bahebrayo 5:14) Paulo naakaamba kuti maano eesu “aayiisyidwe,” wakabelesya bbala lya Chigiriki ililangilwa kuti lyakali kubelesyegwa kapati kupandulula zisobano zyaba Giriki izyakusotooka nzyobakali kucita mumwaanda wamyaka wakusaanguna, nkaambo bbala ndimunya eeli lilakonzya kusandululwa kuti ‘aayiisyidwe mbuli sikusotooka.’ Lino atubone cijatikizyidwe mukuyiisyigwa ooku.

Mubili wasikusotooka ulayiisyigwa kwiinda mukuubelesya

12 Nitwakazyalwa, mibili yesu tiiyakayiisyidwe pe. Mucikozyanyo, imwana muvwanda tazyibi nzyacita amaanza alimwi amaulu aakwe. Aboobo, akaambo kakutazyiba inga kaile kutambaika maanza akulyuuma kumeso naa kulikwamba calo cikonzya kumupa kulila. Pele mbwayaabuzyibila kubelesya zizo zyakwe, imubili wakwe ulayiisyigwa. Mukuya kwaciindi, mwana ooyu ulatalika kukalaba, kweenda akubalika. * Ino mbuti kujatikizya basikusotooka? Ikuti mwabona mbobasotooka akupindamuka bantu aaba munzila iikkomanisya, mulakonzya kubona kuti mibili yabo yakayiisyigwa kabotu. Luzyibo ndobajisi aaba basikusotooka tiilwakaliboolela buyo lwalikke, lwakaboola kwiinda mukwiiya kwaciindi cilamfwu. Inzya, Bbaibbele lyaamba  kuti kuyiisya mubili ooku, ‘kulagwasya asyoonto.’ Pele kuyiisya maano eesu munzila yakumuuya kulainda kugwasya!—1 Timoteyo 4:8.

13. Ino mbuti mbotukonzya kuyiisya maano eesu?

13 Mubbuku eeli twabandika twaambo tunji tukonzya kumugwasya kuyiisya maano aanu kutegwa muzumanane kusyomeka kuli Jehova akubikkila maano kuzintu zyakumuuya. Buzuba abuzuba kamutanasala kucita cintu cili coonse, amusaangune kupaila akuyeeya njiisyo alimwi amilawo ya Leza. Muzintu zyoonse nzyomusala, amulibuzye kuti: ‘Ino milawo nzi naa ninjiisyo nzi zyamu Bbaibbele zijatikizyidwe mumakani aaya? Ino mbuti mbondikonzya kuzitobela? Ncinzi ncondeelede kusala kucita kutegwa ndimukkomanisye Taata wakujulu?’ (Amubale Tusimpi 3:5, 6; Jakobo 1:5.) Lyoonse nomusala zyakucita kwiinda mukutobela milawo naa njiisyo zyamu Bbaibbele, muzumanana kuyiisya maano aanu. Lwiiyo oolo luyakumugwasya kuti mube bantu basimide alimwi akuzumanana kubikkila maano kuzintu zyakumuuya.

14. Kutegwa tukomene kumuuya, ninzala yabuti njotweelede kumvwa, pele ino ncinzi ncotweelede kucenjelela lyoonse?

14 Nokuba kuti tulakonzya kusima, tuleelede kuzumanana kukomena kumuuya. Kutegwa tukomene, tweelede kulya. Aboobo, Paulo wakaamba kuti: “Cakulya ciyumu ncabantu basimide.” Nzila iiyandika kapati iikonzya kumugwasya kuyumya lusyomo lwanu nkuzumanana kulya zyakulya ziyumu zyakumuuya. Mpoonya mulakonzya kutondezya kuti muli basongo kwiinda mukuzibelesya nzyomwiiya, alimwi Bbaibbele lyaamba kuti: “Busongo ncintu ciyandika kapati.” Aboobo, tweelede kuba anzala yakasimpe ikayandika kapati nkatupa Taateesu wakujulu. (Tusimpi 4:5-7; 1 Petro 2:2) Kulubazu lumwi, nokuba kuti tulakonzya kuba aluzyibo  alimwi abusongo buzwa kuli Leza, tatweelede kulisumpula pe. Ciindi aciindi tweelede kulilingula kutegwa tutalekeli kulisumpula naa kampenda kali koonse kunjila mumyoyo yesu alimwi akutalika kukomena mulinjiyo. Paulo wakalemba kuti: “Amuzumanane kulisunka kutegwa mubone naa muli mulusyomo; amuzumanane kulilingula kutegwa mubone bwini mbomubede.”—2 Bakorinto 13:5.

15. Nkaambo nzi luyando ncoluyandika mumakani aakukomena kumuuya?

15 Mulimo wakuyaka ŋanda ulakonzya kumana, pele mulimo wakwiibamba ulazumanana. Kuyandika kwiibambulula, alimwi kweelana abukkale inga kwayandika kuti mwiikomezye. Ino ncinzi ncotweelede kucita kutegwa tusime akuzumanana kubikkila maano kuzintu zyakumuuya? Iciyandika kapati nduyando. Tweelede kuzumanana kukomena muluyando ndotujisi kuli Jehova akubasyomima. Ikuti katutajisi luyando, luzyibo amilimo yesu yoonse zilakonzya kuba zyabuyo mbubonya buyo mbuli cibulo cisabila. (1 Bakorinto 13:1-3) Pele ikuti katujisi luyando, tulakonzya kuba Banakristo basimide akuzumanana kukomena kumuuya.

AMUZUMANANE KUYEEYA BULANGIZI MBWAPA JEHOVA

16. Nkuyeeya kuli buti nkwakulwaizya Saatani, alimwi ino ncinzi Jehova ncaatupa kutegwa tulikwalibile?

16 Atulange-lange acimbi ciyandika mumulimo wakuyaka ngomujisi. Kutegwa muliyake nobeni akuba sikwiiya mwini-mwini wa Kristo, mweelede kukwabilila mizeezo yanu. Saatani, imuleli wanyika eeyi, ulicibwene kucenga bantu akubapa kuba amizeezo iitaluzi, iityompya, yakudooneka alimwi akubula bulangizi. (Baefeso 2:2) Mizeezo iili boobu mibi nkaambo ilakonzya kunyonyoona Munakristo mbubonya nkalaye mboinyonyoona masenke. Pele, icikulwaizya ncakuti Jehova watupa cintu ciyandika kapati icikonzya kutukwabilila, eeci cintu, mbulangizi.

17. Ino Jwi lya Leza litondezya buti kuti bulangizi bulayandika?

17 Bbaibbele litwaambila zilwanyo ziindene-indene zyakumuuya nzyotweelede kusama munkondo njotulwana Saatani alimwi anyika yakwe. Akati kazilwanyo ziyandika kapati nzyotweelede kusama kuli cimpoompo, nkokuti “bulangizi bwalufwutuko.”  (1 Batesalonika 5:8) Lyansiku, sikalumamba umwi aumwi wakalizyi kuti takonzyi kutola ciindi cilamfwu munkondo, ulakonzya kujaigwa ikuti katasamide cimpoompo. Cimpoompo cakali kupangwa alubulo naa cipaya kutegwa mivwi iifuswa kumutwe kiitobola. Mbubonya cimpoompo mbocikwabilila mutwe, bulangizi bulakonzya kukwabilila mizeezo yanu naa mbomuyeeya.

18, 19. Ncikozyanyo nzi ncaakatusiila Jesu cakuzumanana kuba abulangizi, alimwi ino mbuti mbotukonzya kumwiiya?

18 Jesu wakatusiila cikozyanyo cibotu kapati cijatikizya mbotukonzya kuzumanana kuba abulangizi. Kamuyeeya buyo mbwaakaliyumya mumapenzi aakamucitikila imasiku mubuzuba bwamamanino kali anyika. Mweenzinyina wakamwaaba akaambo kakuyanda mali. Umwi wakamukaka akwaamba kuti tamuzyi. Ibamwi bakamumwaika akutija. Bantu bamucisi cakwe bakamukaka akwaamba kuti basikalumamba bana Roma bamujaye aacisamu cakupenzyezya. Cakutadooneka, tulakonzya kwaamba kuti kunyina muntu akati kesu uuyakusikilwa masunko mapati mbuli yaayo aakamusikila Jesu. Ino ncinzi cakamugwasya kuliyumya? Lugwalo lwa Bahebrayo 12:2 lwaamba kuti: “Nkaambo akaambo kalukkomano ndwaakabikkilidwe kumbele wakaliyumya acisamu cakupenzyezya, wakaubaula kuusyigwa nsoni, alimwi lino ulikkede kujanza lyalulyo lyacuuno cabwami ca Leza.” Jesu kunyina naakaleka kuyeeya “lukkomano ndwaakabikkilidwe kumbele.”

19 Ino ndukkomano nzi ndwaakabikkilwa kumbele Jesu? Wakalizyi kuti kwiinda mukuliyumya, wakali kukonzya kupa kuti lisalazyigwe zina lya Jehova lisetekene. Wakali kukonzya kupa bumboni buyandika kapati ibutondezya kuti Saatani mubeji. Kunyina bulangizi bumbi ibwakali kukonzya kumukkomanisya kapati Jesu kwiinda boobu! Kunze lyaboobo wakalizyi kuti, Jehova wakali kuyoomulumbula akaambo kakusyomeka kwakwe, kuti muciindi cisyoonto buyo wakali kuyookkomana kapati kuba antoomwe alimwi a Bausyi kujulu. Mumapenzi oonse aakamucitikila, Jesu wakazumanana kuyeeya bulangizi oobu bukkomanisya. Andiswe mbotweelede kucita oobo. Mbubonya mbuli Jesu, andiswe tulijisi lukkomano ndotwakabikkilwa kumbele. Jehova wamulemeka umwi aumwi wesu kwiinda mukumupa coolwe cakusalazya  zina lyakwe lilemekwa. Tulakonzya kutondezya kuti Saatani mubeji kwiinda mukusala Jehova kuti ngo Mwami wesu Mupati akuzumanana kukkala cakuliiba muluyando lwa Taateesu wakujulu kunyina makani amapenzi alimwi amasunko aakonzya kutusikila.

20. Ncinzi cikonzya kumugwasya kuzumanana kuba amizeezo mibotu alimwi abulangizi?

20 Jehova ulilibambilide alimwi uliyandide kapati kubapa bulumbu babelesi bakwe basyomeka. (Isaya 30:18; amubale Malaki 3:10.) Ulakukkomanina kupa babelesi bakwe zintu zibotu nzyobayanda mumyoyo yabo. (Intembauzyo 37:4) Aboobo, amuzumanane kuyeeya bulangizi mbomujisi kumbele. Mutaizumini mizeezo iitali kabotu, iityompya alimwi iitaluleme eeyo iili munyika ya Saatani iimanide. Ikuti naa mwabona kuti muuya wanyika watalika kumunjila, amupaile camoyo woonse kuli Jehova kutegwa mube “[a]luumuno lwa Leza oolo lwiinda maano oonse.” Luumuno oolo ndwapa Leza luyakukwabilila myoyo amizeezo yanu.—Bafilipi 4:6, 7.

21, 22. (a) Mbulangizi nzi bubotu mbobajisi iba “nkamu mpati”? (b) Ino makani nzi aajatikizya bulangizi bwa Bunakristo aamukkomanisya kapati, alimwi ino mujisi makanze nzi?

21 Amuyeeye buyo bulangizi butaliboteli mbomujisi! Ikuti naa muli ba “nkamu mpati” iiyakuzwa “mumapenzi mapati,”  amuyeeye buyo buumi mbomutiitalike kupona ino-ino. (Ciyubunuzyo 7:9, 14) Saatani amadaimona aakwe baakujaigwa muyakukatalukwa, munzila njomutakonzyi akuyeeyela lino. Inzya, ino nguni akati kesu uukonzya kwaamba kuti tacizyi mbocili ciyumu kulwana mapenzi aaboola akaambo kamuuya mubi wa Saatani? Masimpe, aakwiinda mapenzi aaya oonse tuyakukkomana ikusololelwa a Jesu abasikulelanyina bakujulu ibali 144,000 mumulimo wakusandula nyika eeyi kuba paradaiso. Eelo kaka cilakkomanisya ikuzyiba kuti malwazi oonse alimwi azicisa ziyakumana, tuyakubatambula bayandwa besu bakafwa alimwi tuyakupona buumi buli kabotu kweelana amakanze ngaakajisi Leza kumatalikilo! Twaakulondoka tuyakutambula bulumbu bupati kapati, ibulumbu mbotusyomezyedwe kulugwalo lwa Baroma 8:21 ibwakuba “alwaanguluko lwabulemu bwabana ba Leza.”

22 Jehova uyanda kuti mube alwaanguluko lwini-lwini ndomutakonzyi akuyeeyela. Kumumvwida nenzila iitola kulwaanguluko oolo. Sena inga tiicainda kubota kuti kamusoleka canguzu kumumvwida Jehova buzuba abuzuba kutegwa mukajane lwaanguluko oolo? Aboobo, amuzumanane kuliyaka nobeni aantalisyo yalusyomo lwanu lusalalisya kutegwa muzumanane kukkala muluyando lwa Leza mane kukabe kutamani!

^ munc. 12 Basayaansi baamba kuti mbotuyaabukomena tulaakuba aluzyibo ilutugwasya kuzyiba mbozibambidwe ambozibelesyegwa zizo zyamubili wesu. Mucikozyanyo, iluzyibo oolu lupa kuti tucikonzye kukamba katufwunyide. Mukaintu umwi naakacisidwe, wakali kwaalilwa kwiimikila, kweenda akukkala akaambo kakuti wakaluba mbozibelesyegwa zizo zyakwe.